[武俠甜故] 古裝武俠有味巨著 - 鐵血丹飛: 第三十五章 - 比拼結果

 
來福知道眾人唔信, 即時就響錦盒之內取出字條交比龍飛睇, 果然, 信中嘅內容就如來福口中所講嘅一模一樣, 而來福亦開始解釋住錦盒之內信中內容。
 
「各位請先行聽我講, 家師當日為著過世師母而隱居響山上多時, 而且就響師母入土為安當日曾發下毒誓, 如有人斗膽闖入山頭騷擾到師母先靈嘅話, 家師定必會探取殺無赦姿態。
 
但日前家師為救你地, 就已經破左自己嘅誓盟, 所以家師思前想後, 就決定用此方法, 一來既可以保住佢嘅毒誓, 二來如以家師親自出手嘅話, 你地就肯定會必死無疑, 所以家師如今要以我代為出手, 所以可以講家師係刻意留有你地一條生路!」
 
丹娜正在怒啤住來福, 但來福面上就似露住非我所願嘅表情, 來福揚起左手講, 「你地準備好就隨時可以一齊上!」
 


生死尤關, 丹娜首先發難, 劍鋒已至, 來福眼角一瞄, 一個漫不經意嘅後退, 劍招即時就斬左個空, 龍飛亦不敢怠慢, 掌拳齊攻, 勇不可當, 但來福就依然雙手翹後, 只以靈巧嘅腳步黎不斷閃避住, 大力亦提拳而上, 勁風撲至, 但來福仍能在眾人攻擊之中輕易地避過。
 
四人抖纏左好耐, 龍飛等人以三敵一居然都未能取得半點優勢, 只見來福就只懂閃避, 但就完全未有向各人出手攻擊之意, 戰況雖然乏味, 但龍飛三人依然都係出盡全力咁去攻擊住來福。
 
丹娜開始感到煩燥, 突然, 劍氣已現, 一聲暴喝, 泛住氣勁嘅長劍正以雷霆萬均嘅速度斬落來福度, 速度好快, 來福根本就無法可避, 後翹嘅雙手最終都要被迫伸出而迎接住丹娜嘅強勢一擊。
 
吓, 來福居然就咁以臂擋劍, 但見長劍氣勁正被來福一個擺手就順勢卸去, 跟住來福就儲勁提掌正要還擊丹娜嘅時候, 電光火石之間, 來福同丹娜一吓眼神接觸之後, 來福居然突然撤掌收勁, 但丹娜同一時間就再長劍一揮, 來福一時閃避不及, 上衣就被劃上一道劍痕。
 
來福摸住衣服上嘅劍痕之處, 正面有所思嘅同時, 三人又再一同上前進攻, 但見來福似乎開始一臉認真地開始擺手起式。
 


心靜用意, 身正體鬆, 虛領頂勁, 氣沉丹田,………
 
龍飛勁掌已至, 來福則以反手輕壓勁掌, 右邊大力重拳同樣被來福以巧掌擋去, 到丹娜嘞, 長劍同一時間已至, 來福不敢怠慢, 雙掌儲勁一吓合實, 長劍即時被來福緊夾於雙掌之中, 丹娜內勁一吐, 但來幅同時亦全力發勁反攻。
 
高下立見, 丹娜比來福以掌勁震到長劍脫手, 緊隨成個人更被震到飛跌地上咀角淌血, 此時來福突然停戰再好緊張咁上前跪下慰問, 「姑娘, 妳有無事呀?」
 
但見來福已將人地個老婆急忙抱起到石櫈之處放低, 然後就再急急腳咁跑到入屋內, 跟住好快地又見來福攞左粒藥丹出黎餵住比受左內傷嘅丹娜食, 藥已吞下, 來福再響丹娜背後提掌運功療傷, 一盞茶嘅時間過後, 丹娜終於都開始感覺好左好多咁。
 
來福起身企響眾人面前講, 「十招已過, 而我仍未能擊殺你地, 所以呢次比鬥你地已經獲得勝利, 我會盡快安排船隻比你地, 最快明早就可以起程, 若唔嫌棄, 今晚你地就可先行留在此處稍待一晚!」