[武俠甜故] 古裝武俠有味巨著 - 鐵血丹飛: 第二十五章 - 脫胎換骨

 
堅仔小倩已經番到過黎, 「大力, 我地仲要等幾耐先至走得呀?」 大力同堅仔講, 「再等多一陣先啦, 而家八叔正廢緊龍飛啲武功呀!」 「吓, 點解會咁嘅?」 眾人再望吓八叔同龍飛之處, 見龍飛正促膝盤坐住, 而八叔就係咁篤篤篤住龍飛。
 
八叔正同緊閉雙目嘅龍飛講, 「你雖身懷正道武功, 但亦因為只依從舊有嘅武功規限而無甚可進, 所以你嘅成就亦只能僅此而已, 但要突破自己, 就必先需要摒棄以往舊有, 以你嘅資質, 只需依我傳授比你嘅內功心法同招式勤加於練, 假以時日, 就必可超越以往架嘞!」
 
八叔正出哂煙咁雙掌推住龍飛個背脊, 「如今我就先行為你打通任督二脈, 跟住你就再依照我嘅心法而練功, 武功並不在乎牌頭, 只在乎能於殺敵, 拳來掌擋, 一擊即中, 無需花巧!」
 
成班正發哂 mo 咁等緊八叔過野比龍飛之際, 眾人不遠之處, 見丹娜一個人正響山坡之處獨行沉思, 經過幾日而黎實在發生左太多嘅事, 一時三刻丹娜都需要啲時間黎適應一吓。
 


話咁快, 八叔嘅雞精傳功速成班已經落堂, 見龍飛正開始適應住新嘅內功吐納方法, 跟住又依照八叔所傅授嘅掌劍雙招, 正不斷來回重覆咁耍住掌劍起黎。
 
「下盤要輕, 要做到點塵而跳, 上盤要紮實, 但就要剛柔並濟, 剛柔既能相克, 但亦能夠相輔相承, 以柔制剛, 以剛制柔, 眼要集中, 耳聽八方, 殺敵就只在乎一剎那嘅機會, 邊個能夠把握呢個機會嘅就能可以勝者為王!」
 
得高人指點, 龍飛好快就已經成個脫胎換骨咁, 見佢右手揸劍正虎虎生威, 而左手啲掌勁就耍到嘭嘭咁聲, 一個跳起, 就已經可以彈到成半丈咁遠, 八叔見龍飛居然響咁短時間之內就能有此番表現, 心正暗歎住此子假以時日, 必能成為大器。
 
對上嘅山坡草叢內, 見一身影正在慢慢蝓動, 「哦, 原本成班人都響哂呢度, 等仲以為呢個山坡有啲咩野咁恐怖, 講到會一去不返咁嚴重, 原來就只係多左個老坑響度之嗎!」 一隻佈滿麟角嘅怪手正慢慢舉起, 麟角怪人似乎就要開始有所行動咁。
 
一個使勁嘅彈跌, 怪人就從天而降到眾人面前, 眾人見到怪人之後, 即時嚇到彈埋一堆黎準備抗敵, 遠處嘅丹娜亦已眺望到怪人嘅出現, 見佢即時提步就衝, 好快, 就已經去到怪人身前。
 


兩邊對峙, 大戰一觸即發, 呢個時候, 龍飛亦已行到為首嘅丹娜身邊, 二人一個對望, 心內正各自盤算住自己嘅功力到底會提昇到邊個程度, 但怪人剛好咁啱出現, 所以此刻亦正好比機會二人試試自己嘅功力又會是如何。
 
龍飛悠悠然咁望住丹娜講, 「娘子, 比妳先出招黎對付佢嗱!」 丹娜又含情默默咁同龍飛講, 「相公, 我驚一陣無機會睇到你表演身手, 咁不如都係由你先出招去玩吓啦!」 「娘子, 妳而家個傷口仲有無痛呀?」「無啦, 不過就有啲肚餓就真…..」
 
麟角怪人見二人係咁打情罵俏, 簡直就好似完全唔放自己在眼內咁, 氣上心頭, 怪人即時出招就打, 拳風已至, 但龍飛同丹娜就似乎好似無咩反應咁, 五官已變得敏銳嘅龍飛耳骨一動, 即時就慢不經意咁舉掌輕撥。
 
怪人右手比龍飛撥到失去重心, 但緊隨再以左手重拳就打, 但同時好快, 一隻齊腕而斷嘅左手就已經跌左響地上, 怪人痛到即時就彈開左。