[武俠甜故] 古裝武俠有味巨著 - 鐵血丹飛: 第十八章 - 黑夜逃亡

 
大力轉勢漸慢, 眾人見有機可乘, 跟住即時就向住大力一湧而上, 黑衣人正一個疊一個咁向住大力身上跳責落去, 而跑緊嘅丹娜回頭一望, 見大力已經被推倒地上, 跟住好快亦再被埋沒住響人海之下, 黑衣人仍繼續跳上人頂之處繼續責住大力。
 
望住呢個自小亦當佢係哥哥嘅大力已經淹沒響人海之內, 一陣陣心酸感覺已令到丹娜喊左出黎, 「大力….鳴…嗚….」, 丹娜邊喊邊繼續牽住龍飛隻手向前奔跑住。
 
跑左一陣, 「噓噓噓…..」有件大舊佬突然就響丹娜身邊雞咁腳跑到超越二人, 丹娜望真啲, 居然係大力黎喎。
 
大力邊跑邊講, 「嘩, 比佢地咁責法仲得掂嘅, 好在我一早就已經捐番出黎, 喂, 快啲走呀, 後面班人就快追到上黎架嘞!」
 


三個人繼續向前奔跑住, 跑左一陣, 「呀飛大力娜姐!」三人望吓路邊, 見菁菁小柔眾人正匿左響路邊山坡旁嘅草叢之內。
 
但見後方遠處追兵已至, 龍飛即時大嗌, 「快啲沿住山坡走落去先再講!」
 
眾人聽到, 即時沿住斜坡一路亦跣亦跑咁向下而去。
 

 
追兵已至, 為首三怪正俯瞰住山坡下方, 微弱月色底下, 山坡下已經漆黑一片, 廚房疤痕佬同各人正盤算住如何是好, 但諗起會一去不返嘅傳言, 眾人再考慮左一陣, 跟住最終都係決定原地撤返。
 


龍飛等人繼續向下前進, 四周好黑, 草叢之內又多蛇虫鼠蟻, 但眾人為著逃命, 已經心無雜念咁繼續向前邁進。
 
已經跑左好耐, 到左一撻稍平而又無咁昏暗嘅平地之上, 師爺基殊住各人之後, 跟住見佢正監視住山上有無動靜, 等左一陣, 「喂, 佢地好似無追到落黎嘞!」
 
總算有驚無險, 眾人定過神後, 丹娜就正為手部受傷嘅愛郎包紮傷口, 而大力就攤左響地正在透住大氣, 但菁菁呢個時候就開始發住怨言。
 
「死啦, 我地啲野全部都漏哂響果度, 所有銀票同衣服而家全部都無哂嘞, 仲有呀, 而家人地仲鬼死咁肚餓添架, 啱啱諗住有野食嘅時候又突然比人追殺, 好衰架, 早知唔黎好過啦!」
 
龍飛手上嘅傷口已經包紮完畢, 見丹娜開始行去大力果度, 丹娜單腳跪響大力身前捉住佢對手黎檢查,「大力, 你個身上仲有其他地方受傷呀?」
 


大力比丹娜捉住對手有啲覺得唔好意思, 見佢縮番對手黎拍住心口講, 「噓, 小小瘀傷, 何足掛齒, 娜姐妳都受左幾野鞭傷, 不如妳都坐低抖抖先啦!」
 
丹娜呆呆咁望住大力再講, 「義兄, 弟婦同呀飛好多謝你剛才嘅捨身救命之恩, 今次如果唔係得義兄你…..」
 
大力已經比丹娜講到面都紅哂, 「得嘞得嘞娜姐, 哈, 識妳咁耐, 都未曾見過娜姐妳會咁樣同人講野, 我頭先咁做都只不過係見妳同呀飛尋日先至剛剛成親, 所以就唔想睇見妳地任何一個人要守生寡咁之嗎!」