夢遊系列: 夢遊系列 1 - 送禮

自從屋企裝修個時丟咗個舊梳化之後，我地屋企就冇再買過梳化。一來慳啲位，二來唔係必需品。
直到一日，隔離屋個鄰居過黎話佢媽咪要搬屋，有張真皮3人梳化新屋唔夠位擺，問下我地要唔要，仲影咗張相俾我地睇。其實我媽咪一直都想買返張梳化，又見到相入面張梳化好靚咁，於是就要咗。雖然我唔想要，但我都冇講出口，心諗：好心想要就買過張新架啦！人地坐過曬又可能瞓過，可能流曬啲汗同埋口水落去，俾我感覺唔係幾好囉！過咗幾日之後，張梳化終於送到嚟，我媽咪見到實物都好中意，睇落又真係唔錯既，都幾新淨。於是我地依家就可以舒舒服服咁坐住梳化睇電視，然後張梳化瞓落都算舒服既，但就一定未舒服到當床瞓囉！

之後個幾日鄰居行過我屋企門口都會同我地打招呼，我地個梳化係面向門口既，佢就問我父母：「點呀？張梳化好坐嗎？」
「好好坐呀！多謝曬！」
「唔使客氣。」

有一日，我未沖涼，但係又好眼瞓，於是係梳化到瞓咗一陣，短短個一個鐘，我發咗個夢。係夢入面，有一個我唔識既老婆婆坐咗係張梳化上面，對住我露出慈祥既笑容。雖然唔知點解無啦啦發個咁既夢，但我好快就冇咗件事冇理到。反而係之後，我出現咗夢遊既現象，半夜起身又或者朝早起身發覺自己瞓咗係梳化上面。我都好疑惑，我以前從未試過夢遊，唔通呢排做嘢壓力太大，睇嚟我都要做下運動減下壓至得！但做左幾日運動之後我既夢遊情況都冇改善到，甚至更嚴重，媽咪話半夜見到我開電視睇粵劇，叫我又唔應，睇唔到人咁。夢遊都算啦！做咩夢遊會夢到睇粵劇架！我真係唔明。然後可能因為成日夢遊，我個人係瞓覺既時間根本就冇好好休息，所以成個人非常攰，朝早起身之後個人都非常昏昏沉沉。做咩都冇精神，好想瞓，於是我每日返到屋企，我都會係梳化瞓一陣補下眠，等食飯。雖然我係越瞓越眼瞓，但係唔瞓又唔得咁。而且好似我每次下午係梳化到補眠既時候，隔離屋個姨姨都會咁岩返屋企，然後對住瞓係梳化上面既我係到笑。初頭個幾次我都基於禮貌向佢報以微笑，但之後我實在太攰啦！係梳化到瞓到昏昏沉沉，都冇力氣同佢打招呼。反而係佢，佢係未送梳化俾我地之前根本就同我地冇咩兩句，送咗梳化俾我地之後就表現到同我地好親近咁。佢成日係門口望住我笑真係令我有啲不寒而慄。

仲有就係，佢最近成日係門口到燒衣紙，佢之前都係清明重陽既時候先會燒，但呢排我出門成日都見到佢係到燒，真係有啲奇怪。隨住我夢遊既情況越嚟越嚴重，我既精神都越嚟越差。我仲係夜晚既時候唱埋啲好舊既歌，之後媽咪同我講返，但我根本連首歌既歌名都未聽過。甚至去到有一晚，我半夜夢遊到要出門口，好在我老豆發現得早，係咁叫醒我。事情去到咁既地步，我父母都意識到有問題，叫咗我去睇醫生。但係我覆診咗幾次之後都搵唔到病因，醫生都只能開啲藥俾我食，而我既情況又冇因為食咗藥而好轉。隨住我夢遊所作既動靜越嚟越大，我父母開始自己諗啲方法等我夢遊個時唔可以自己走出去。初時，佢地搵麻繩綁住我隻腳，另一邊綁住床腳，兩邊都綁勁多個死結，等我走唔到，咁佢地就打算第二朝就可以用剪刀幫我剪開個結，到時我先可以離開張床。頭個幾次起身既時候，我都見到被綁個隻腳有紅印，見到咁我都知道自己尋晚夢遊既時候掙扎過嚟。不過呢啲都只係皮外傷，個人安全就冇問題啦！





但事情遠遠冇我諗得咁簡單，過咗幾日之後，我竟然係夢遊既時候掙脫到個麻繩，第二朝我發現自己係梳化上面醒返，而隻腳腕損曬。依家就連繩都綁唔住我，於是，我父母就買咗長既腳箍，硬既實走唔甩啦掛。但亦都因為係硬既，我醒返既時候發現隻腳既傷勢更嚴重，腳腕有更深既傷痕。我真係好沮喪，唔明點解會呢啲事會無啦啦發生係我身上。為咗令自己唔會受傷，上腳箍之前，我加咗毛巾墊住先。但到咗第二日，我都係會見到已經綁好既毛巾甩咗出嚟，傷口依然越嚟越深。
直到有一朝，我醒返發現自己係廳，又瞓咗係梳化，我嚇到彈左起身，我點樣掙脫腳箍出到嚟架？ 我望住自己房門口既一滴滴血跡，沿住廳延續到我面前，再望向我自己隻腳，我個腳背冇咗一片肉，正確嚟講係一片皮至岩，腳背根本就冇咩肉。我隻腳流曬血，好痛，真係好痛。我父母見到之後即刻幫我包紮。包紮完之後我慢慢咁行返去自己間房，我見到自己腳背個層皮掛咗係個腳箍上面。成件事真係好奇怪，我點會夢遊到咁大陣象，隻腳傷到咁痛我都醒唔到，仲可以係出面梳化瞓到今朝。個晚，食完飯之後，我坐咗係梳化到，望住旁邊個位，竟然一啲血跡都冇。明明今朝見到我隻腳流咗好多血落個梳化到架！雖然個梳化係深藍色，但都未至於一啲痕跡都冇掛。
我問媽咪：「媽咪！你抺過張梳化嚟呀？」
「冇呀！」
「點解一啲血跡都冇既？」
「係喎！張梳化真係唔錯！」
就係呢個時候，隔離屋個姨姨又經過我屋企門口，又對住我意味深長咁笑。
望到佢呢個笑容，我心入面有一個荒誕既想法，就係呢一切都係因呢個梳化而起，因為我就係係佢送咗張梳化俾我地屋企之後先開始有夢遊。而且結合佢成日燒衣紙同對住我笑既呢啲奇怪行為，令我更加覺得有啲嘢！





之後我起身，坐返去普通凳到，同我呀媽講：「會唔會係呢張梳化有古怪，自從佢送咗張梳化嚟之後，我就開始夢遊，每次夢遊，我都係呢張梳化上面醒返。」
「關咩事呀！」媽咪唔認為係咁。
「但係佢成日燒衣紙，又成日無啦啦行過門口對住梳化笑，你唔覺得好奇怪既咩？」
「唔好再亂講啦！人地好心送張梳化俾我地，我地仲咁講人，俾人聽到幾唔好意思呀！」媽咪始終唔相信我既說話。
「就當唔係佢有問題，係我有問題，我覺得張梳化令到我夢遊，所以我先會夢遊。或者丟咗佢，我就會好返呢！依家有可能醫好我個病，你肯唔肯試先？」我嘗試說服媽咪。
「唔好再講啦！唔通醫唔好之後你話邊樣邊樣整到你咁，我又丟咗佢呀？根本就唔關事。」
啫係唔肯試啦！媽咪咁講根本就冇道理，我夢遊既情況係緊接出現係梳化到咗我地屋企之後，所以我先會懷疑係張梳化出咗問題，佢根本就唔明！

老實講，我有啲嬲我媽咪，有事個個唔係佢，佢梗係咁講啦！到佢有事既時候睇下佢會唔會咁諗，會唔會有萬分之一既機會都想試。佢唔幫我唔緊要，我自己出錢換過張梳化。我簡咗日父母都唔係屋企既朝早，叫傢俬店送貨過嚟，佢地仲免費包運走舊傢俬，所以我先會簡呢間公司。一切都好順利，直到送貨人員準備將張舊梳化搬走既時候。隔離屋個姨姨竟然咁岩返咗嚟。佢平時都係下午先返嚟架，點解編編今日係呢個時候返既！面對咁既情況，我叫自己冷靜啲，唔好怯，一怯我就輸架啦！換張梳化啫，唔通我仲要請示佢咩！





佢行到我面前問：「做咩呀？張梳化唔好坐呀？換過張既？」
「都唔係唔好坐，只係我見有間傢俬店大減價，索性換過張啫！」我冷靜笑答。
佢聽完之後只係稍為點頭，之後就返返入自己屋，而我都鬆一口氣。

到咗夜晚我父母返到嚟，佢地都話我曬錢，但我都冇理佢地，只係有啲期待聽朝，好希望我既夢遊可以就咁醫好，證明我係岩既。但我又有啲擔心，擔心我既推斷係錯既。我帶住忐忑既心 情上床瞓，而且我冇上到腳箍。第二朝起身既時候，我真係唔敢相信我所見到既嘢！我又係梳化上面瞓醒，而最恐怖既係我唔係係張新梳化上面醒返，而係個張舊梳化。我嚇到彈咗落地下，望住眼前張梳化同埋周圍既環境，係廳咁既地方，但呢到唔係我屋企。正當我以為我去咗異度空間既時候，隔離屋個姨姨係房入面行咗出嚟。我呆咗咁望住佢。
佢同我講：「你尋走嚟拍我鐵閘，我聽你父母講過你有夢遊，所以開門俾你入嚟，你一入嚟就瞓咗係梳化到。咁我見咁夜就冇叫醒你，由你係到瞓。」
我心諗我係唔會信你架！你根本就應該叫醒我，都唔知你咩居心。
我指住張梳化問：「你執返張梳化？」
「嗯！係呀！」
佢冇多作解釋，但佢咁樣真係好奇怪，佢當時點解唔自己keep起張梳化，要送俾我地，我地要丟既時候，佢又自己執返返嚟。我已經唔會再相信眼前呢個女人所講既任何嘢啦！佢真係好奇怪，奇怪到有啲恐怖。我意思意思咁多謝咗佢之後就即刻衝返返自己屋企。冷靜咁好好梳理好呢段時間所發生既事，雖然知道問題出係梳化到，但具體係咩問題，我並唔知道。但我知道我唔可以俾自己咁落去，我要盡全力令自己唔好再去佢個到。於是個晚，我幫自己既左右腳都加咗腳箍，我就唔信我咁都可以過到去。但第二朝瞓醒既時候，我發現自己又係個張梳化到醒返，而我雙腳同上次一樣，好傷好傷。見到咁，我真係就嚟崩潰啦！完全唔知發生緊咩事，唔知道原因，我究竟應該點做至好呀？我眼定定咁望住眼前呢張梳化，心諗應唔應該趁依家毀咗佢呢，用手撕爛佢？定係搵剪刀插爛佢？但望望下，我發覺梳化既邊邊位好似有個開口，我用手扯一扯，發現入面好似仲有一層嘢咁！我再大力啲咁扯一扯，扯開咗一部份，我終於見到呢張梳化既真身。佢根本就係一張好舊既梳化，但係表面用真皮蓋住重新縫合。我見入面仲收埋一道黃色既符同埋一個紅色信封。我打開信封，入面又有一個黃色既符，上面寫咗一個生辰八字咁既嘢，仲有一張黑白相，相入面係一個老人家，我記起就係我第一次瞓呢張梳化夢到既個個人。依家既我終於大概估到發生啲咩事，相入面既老人家好可能就係佢呀媽，而佢呀好可能已經死咗。諗到呢到，我本能上準備即刻逃走，但隨住背後一下重擊，我暈咗。

到我醒返既時候，我發現我坐咗係梳化上面，姨姨幫我洗緊腳上既傷口，佢同我：「媽！以後佢地綁起你隻腳，你就唔好掙扎啦！你睇你傷得幾嚴重。你依家已經可以完全控制佢，唔使再等夜晚先出沒啦！」
我想開口同佢講：鬼係你呀媽呀！唔好亂叫呀！但我發覺我自己出唔到聲，又郁唔到，控制唔到自己，我控制唔到咁同姨姨攬埋一齊！

#有興趣可讚黑柴Facebook




https://www.facebook.com/%E9%BB%91%E6%9F%B4-879053098899020/