【屋村7-11驚魂】落樓下7仔食個叮叮飯，竟然咁可怕...: 21
伴隨師奶既叫聲，之後就係一ｄ物品被掃跌落地下既聲音，由師奶既叫聲可以清楚感受到佢有幾驚，於是阿欣馬上出去睇下發生咩事，而我同阿叔就繼續壓制住強國女人，因為強國女人依然發左神經咁不斷掙扎。
「發生咩事呀？？你冇野ｍａ？」
「行開．．．行開！無可能咁架．．．無可能咁架．．．」
「喂，你想去邊呀？？喂，小心呀！！」
「呀！！！」
砰！淅瀝淅瀝！．．．
就咁聽既話，似乎係有ｄ野跌低左，然後搞到ｄ野散落一地既聲音，越係睇唔到，越想知道發生咩事。
「喂阿欣，出面咩事呀？」
之後我就聽見阿欣把聲，不過佢唔係回應緊我既問題。
「喂！！！你有冇事呀！？你．．．你個頭流緊血呀！」
阿欣既語氣好緊張，唔通師奶佢受左傷？佢究竟做咩事好似好驚咁呢？
「行．．．行開！吼！！！無理由架．．．吼！！！！！」
「喂！！唔好走出去呀！」
走出去？師奶走出左７仔！？
「喂，阿欣，咩事呀究竟？你番入黎先啦！」
「搞咩撚呀果個師奶！？佢都癲埋一份呀？」
無幾耐阿欣跑番入黎貨倉，佢個樣就好困惑：「果位師奶走左出去呀，咁．．．咁點算呀？」
「咩話！？仲夠膽死走出去？？佢痴左邊條根呀！」
「放開鵝！！乃地個個都不得好屎！！！」
「屌你你又發癲！．．．喂，一陣先再講，你快ｄ俾條泥龍繩我。」
阿叔接過阿欣手上既泥龍繩，一邊綁住強國女人雙手同埋雙腳，一邊問阿欣：「喂，究竟出面咩事呀？果個師奶係度搞咩呀？」
「佢無啦啦做咩走左出去既？？」由於我都好心急想知咩事，所以都插埋嘴。
「．．．我都唔知咩事，頭先我一行出去，就見到佢神色好慌張，又有好多野掃跌左落地下，我見佢咁驚，咪行近佢諗住問佢咩事ｌｏｒ．．．」
「咁呢？咁跟住點呀？？」
「點知我一掂下佢，佢就即刻ｆｉｎｇ開我隻手，又不斷係度話『無可能無可能．．．』，然後佢就想轉身跑出去便利店，不過佢太心急，一個唔為意撞左埋去雜誌架度，連人帶架成個仆左係７仔出面地下，個頭流晒血．．．」
「嘩佢撞鬼呀！？」
「我都唔知佢發生咩事．．．佢好似見到ｄ好可怕既野，我都未有機會問清楚佢，佢就即刻起番身跑左出去．．．」
好可怕既野？唔通好似我咁見到個人頭？？但無理由架．．．照計咁驚既話，應該更加唔會走出去７仔先ｏ岩架ｗｏ．．．
「喂，咪係度發呆住啦，搬左依個痴線婆出去先，之後先再慢慢研究咩事啦！」
跟住阿叔同我就將強國女人帶到飲品櫃前面，將佢「劈」左係地下。
將強國女人放低一邊之後，我同阿叔就跟住阿欣行去收銀櫃果邊。
正如阿欣所形容，好多野都被掃跌落地下，場面有少少亂，而近門口果個雜誌架仲成個「冧」低左係出面，ｄ報紙雜誌散到一地都係。
睇黎師奶佢見到一ｄ好可怕既野，怕到佢寧願摸黑走出去，都唔想留係７仔入面。
「果個師奶發左神經咩，搞到周圍立立亂．．．」
「阿欣，頭先師奶佢仲有冇講ｄ咩呀？又或者佢有冇其他古怪行為呀？」
「佢淨係不斷講『無可能無可能．．．』，我問極佢佢都唔應我．．．不過我見佢雙眼紅紅咁，好似喊過黎，成個人仲失魂落魄咁．．．」
「喂，哥仔，你估佢係咪好似你頭先咁，見到ｄ『污糟』野，嚇到佢走左出去呢．．．？」
「嗯．．．我都唔知．．．」
阿欣：「咁點算好呀．．．？我地好唔好出去搵番佢呀？我見佢頭先個頭仲流緊血，佢一個人係出面亂走，我怕佢會出事．．．」
阿叔一聽到阿欣咁講，即刻好大反應：「出去搵佢！？你都痴線既！你係咪唔撚記得左頭先果個恐怖ｍａｄａｍ講呀，我地出去既話分分鐘死人架！你想出去你自己出飽佢，咪預我！」
雖然阿叔講既野好仆街，但並非完全錯，宜家出面依然一片濃霧，咩都見唔到，再加上之前我出去既經歷，莫講話要係咁既環境搵人，有冇把握走番入黎７仔都成問題。
「貿貿然咁走出去好危險．．．」
師奶唔係度，無辦法知道頭先發生左咩事，我同阿叔好就自然咁周圍望下，睇下有冇咩發現。
阿叔好隨意咁拎起地下一份報紙：「搞咩份報紙會飛左過黎依度架．．．」
阿欣：「依份報紙係我地之前睇完放低係度．．．」
阿叔：「嘩，我真係服撚左你地，你地以為自己去撚左渡假呀？竟然咁有閒情逸緻係度睇報紙．．．」
對住周圍七國咁亂既情況，我地一ｄ頭緒都冇，宜家強國男同西裝友又死埋，師奶又唔見左人，憑我地依度四個人，仲有冇可能番到出去呢？
死埋．．．番出去．．．死埋．．．番出去．．．我慢慢抬起頭望住阿欣同埋阿叔，我突然有一個不安既念頭。
「你．．．係咪有咩發現呀？」
「喂，你眼定定咁做咩鳩呀？」
我慢慢擰轉頭，望向貨倉果邊。
「喂，你做咩姐！？」
我無理會阿叔既問題，一步一步咁行去貨倉度門前面，頭先我地出黎果陣，唔覺意將度門關埋左，所以我輸入密碼。
係我打開度門之前，猶豫左一陣，希望唔好俾我估中．．．
「唔撚係下化．．．」依個時候，阿叔同阿欣都領會到我既諗法。
我抖一抖大氣，終於推開左貨倉度門．．．好既唔靈醜既靈．．．強國男同埋西裝友既屍體果然唔見左，就係短短既分零鐘入面．．．