【屋村7-11驚魂】落樓下7仔食個叮叮飯，竟然咁可怕...: 19
阿叔越聽就越一頭霧水：「喂喂，咪住先，聽你講野真係Ｒ撚晒頭，你話依段片先係真，先至係今晚既影像，咁你點解釋依度明明一滴雨都冇落過先！？」
我問大家：「嗯．．．我地一直都覺得，所有古怪事都係由７仔外面既濃霧出現後開始．．．係咪？」
阿叔：「問黎都多鳩餘！咁梗係啦，好地地入黎７仔買野吹水，點鬼知會無啦啦大霧到番唔到出去架姐，宜家我連自己係邊都唔知呀！」
基於多次「不協調」既感覺，其實我腦海閃過一種想法，一種我自己唔願意相信既想法：「你地有冇諗過，我地可能唔係因為大霧出現之後先黎到依個世界．．．我地可能係未入黎７仔之前，就已經黎到依個世界！咁就解釋左，點解我地明明（入７仔前）唔見今晚落雨，但７仔閉路電視既影像就反映另一回事。」
西裝友對於我依個想法感到難以至信：「唔係掛．．．有咩可能呀，入黎７仔之前一切都好地地架ｗｏ．．．」
阿叔：「喂，你咪嚇我呀，入黎７仔之前就已經撞邪？？」
我繼續提出理據：「仲有，依個設想亦都可以令大家諗通另一樣奇怪野。由頭先閉路電視影片所睇，季嬸同埋Ｍａｒｙ姨直至十二點都仲係７仔入面，而四眼哥仔當時就仲未出現，但誰不知，根據阿叔所講，十二點搭三就見到四眼哥仔係度，但就唔見有其他職員．．．我地初頭諗極都諗唔通，四眼哥仔有咩理由可以係短短十零分鐘入面，殺死兩個職員再清理現場，同時又要唔俾人發現．．．我地之所以諗唔通，係因為我地一直理所當然認為，我地、四眼哥仔同埋果兩位７仔職員都係同一個世界，我地一直以為果兩位７仔職員先唔見左，然後四眼仔再出現，就係依種諗法，令到我地既思維入左崛頭巷！」
西裝友開始點點頭，示意我繼續講落去。
我：「但如果一開始，四眼哥仔同埋仲有未入去７仔既我地都已經黎到另一個世界，咁就解得通所有野．．．四眼哥仔並冇殺人，之所以唔見季嬸同埋Ｍａｒｙ姨，係因為未入黎７仔之前，我地就已經身處係唔同既世界！」
阿叔：「死火喇咁．．．喂，咁我地幾時開始撞邪架？？」
依個時候，我諗大家都開始思索緊自己未入黎７仔之前究竟發生左咩事。
阿欣：「但我仲有ｄ野未明．．．根據目前所發生既事，你話我地係另一個世界，依點我絕對同意．．．但係點解，依一個世界既便利店，又會有原本世界既閉路電視影片呢？？」
我：「依個問題，其實就正如問點解依邊既世界又會有間７仔一樣．．．你問我既話，我就覺得，依邊既世界好似係由原本既世界複製左一套過黎咁，但係幾時開始複製，而又幾時完結複製，咁我真係答唔到你，因為我諗大家同我一樣，究竟點解會無啦啦走入黎依邊既世界都唔清楚．．．」
阿叔：「喂喂，做咩事越講越遠架，就算搞清楚依ｄ野，咁同我地番唔番到出去有咩關係先？？」
西裝友幫手補充：「因為若然我地知道左自己係點樣入到黎依個世界，咁我地或者可以諗到方法點番出去！」
我同阿欣都點頭同意，雖然結果係點仲係未知之數，不過似乎我地終於靠近真相。
我：「雖然仲有好多野仲未解釋到，但似乎，如果諗得通我地係點樣入黎，又或者入黎之前發生過咩特別事，對我地能唔能夠番出去有好大幫助。」
聽完我咁講，阿叔開始思索佢入黎７仔之前既事：「入黎７仔之前，我真係唔記得有發生過咩奇怪野ｗｏ．．．我見悶悶到今晚咪落黎７仔買枝酒飲，順便同四眼哥仔吹水ｌｏｒ，同果個衰婆冷戰左幾晚，想搵人呻下，我周不時都落黎架啦，同平時無咩分別ｗｏ．．．」
阿欣亦都講佢：「今晚我係屋企溫書溫到夜，見有ｄ肚餓，所以就落黎買ｄ野食，期間都冇咩特別事發生．．．其實近排我大部份時間都用黎讀書，因為今年我要自修重考公開試，除左係屋企，我近排去得最多就係中大，因為依幾星期我個補習Ｍｉｓｓ約左我番中大陪我操下ｐａｓｔ ｐａｐｅｒ，除左咁就無去ｄ咩地方，所以一切都好平常．．．」
西裝友：「我今晚一收工就係公司渣車番到黎附近，然後諗住係番上屋企之前入黎買包煙，平時我通常都係依ｄ鐘數渣車番到黎，因為我要等埋歐洲果邊個收市，我番到黎唔覺得附近有咩異樣ｗｏ，咪又係同平時一樣．．．」
我呢？我今晚做過咩？打機．．．
打機之前呢？係公司做野．．．
咁再之前呢？係屋企起身番工．．．
咁再再之前呢？打完機訓覺．．．
我表現得有ｄ苦惱：「．．．我都一樣，唔覺有咩特別事發生過．．．其實日日都咁上下，番工放工，有時夜晚就黎７仔買野食，就係唔知今晚搞咩鬼，無啦啦會搞成咁．．．」
「四．．．四眼仔．．．乃唔洗旨意整屎鵝！呀．．．唔洗旨意！．．．．」正當大家都係度回憶緊今晚發生既事時，近貨倉門口果邊，就傳黎強國男含糊不清既叫聲。
「老公，乃唔好嚇我呀！乃見邊度唔舒服呀？？」
「乃地個個都想殺死鵝．．．呀．．．唔洗旨意呀！．．．．」
大家都俾強國男既叫聲，打斷左思路。
阿叔：「嘩，痴撚左線呀佢，係度亂鳩咁叫．．．頭先佢咁都仲未死，真係有冇搞錯．．．．」
阿欣：「依！？係ｗｏ．．．頭先果位師奶，唔係同我地一齊入黎架咩？？」
依個時候阿欣亦都發現師奶唔見左。
阿叔：「係ｗｏ！佢去左邊呀？？」
我：「其實我之前都發現，睇黎佢無跟我地一齊入黎，不過頭先我掛住同大家講野，所以又唔記得左依件事。」
於是乎，我地好自然咁打算出去睇下師奶做咩事，就係行埋去貨倉門口既時候，我地見到果個強國男頭上面包左紗布，應該係佢老婆幫佢包，強國男個樣好似迷迷糊糊咁坐係門口隔離ｄ貨物箱上面，佢老婆就係側邊陪住佢。
就係依個時候，強國男企左起身，腳步有少少浮，然後指住我地：「四眼仔．．．乃唔洗旨意．．．我唔會放過乃！」
「老公，乃見點呀？乃坐低休息下先啦！」
「行開！！乃地個個都係四眼仔既同檔！！．．．呀．．．鵝咩都聽到晒．．．四眼仔．．．殺左職員．．．呀．．．然後鵝入到泥．．．之後，乃地又想殺鵝．．．乃地以為鵝唔知呀！？下！！！」
「老公，乃唔好咁激動啦，乃小心個傷口呀！」
強國男神智好唔清醒，似乎佢係聽到我地頭先係辦公枱果邊講既野，然後自己又係度亂諗野，所以開始胡言亂語。
就係依個時候，唔知強國男發咩神經，突然行埋黎督住西裝友個心口：「乃地唔洗旨意整屎鵝！．．．呀．．．呀．．．」
我地都俾強國男既舉動嚇左一跳，佢就好似一個醉酒佬咁周圍亂叫。
雖然強國男宜家模模糊糊咁好似無晒攻勢力，但大家本來就已經睇佢唔順眼，加上頭先佢殺左四眼仔，所以西裝友對佢都好唔客氣，一手推開強國男：「仆街，你發咩神經呀！」
俾西裝友一推，強國男又成個酒鬼咁向後跌落去頭先堆貨箱度，當我地以為佢發完癲既時候，點知強國男面色一變，變得好嬲好似發左神經咁，企起身衝向西裝友度，捉住西裝友衫領：「乃仲唔係想鵝屎！？下！！！鵝唔會俾乃整屎，要屎就乃屎先！！」
強國男一邊用力捉實西裝友件衫，同時又一邊腳步浮浮，周圍跌跌撞撞。
「老公，乃做咩呀？乃冷靜Ｄ休息下啦！」
我：「喂，放開佢呀癲佬！」
西裝友嘗試甩開強國男，但唔係好成功，因為強國男身型高大，佢一用蠻力捉住西裝男，西裝男都唔知點算好：「放手呀仆街！」
於是我即刻上前幫手，捉住強國男其中一隻手臂，試圖拉開佢，就係咁，我地三個扯埋一齊發力，勉強保持平衡。