【屋村7-11驚魂】落樓下7仔食個叮叮飯，竟然咁可怕...: 1
前言：當大家睇落去果陣，如果以為依個故仔又係咩「漂流XX」、「人性遊戲」、「人體實驗無限Loop」等等，咁就大錯特錯。成件事肯定超乎大家想像．．．
是咁的，我叫阿嵐，由一出世開始就住係依個屋村，由於公開試成績麻麻，讀IVE再幾經辛苦駁入間頹U，最後總算叫做大學畢業。拎住個頹U電腦學位，搵工果陣已經唔洗多諗，咩金融咩搵大錢既行業根本唔到我諗，晨早疊埋心水做個IT毒男。
出黎做野都已經三年，人工無o麥得點加，所以放工放假都唔敢出街洗錢，我最大既娛樂就係上高登同埋打機。
今晚又係一個短暫得到解脫既星期五晚，我一放工就如常趕番屋企打機，晚飯都未食就已經開始打，唔經唔覺竟然打到差唔多十二點，終於開始覺得肚餓，於是乎就諗住去廚房煮個出前一丁，快快脆脆食完就繼續開戰，點知原來屋企ｄ即食麵食晒，咁我唯有死死地氣落樓下７仔買野食醫肚啦，點知依一趟７仔之旅，係我前所未見咁得人驚．．．
先講下我住果度既環境先，我住係九龍區某個近山既屋村度，除左我住果條村，附近仲有幾個屋村同埋私樓，交通唔算方便，但都叫做係風涼水冷。
老豆老母通常要番夜班，所以夜晚果餐一向食自己，有時食厭左即食麵，我都係落樓下７仔搞掂一餐，快靚正。而由於我住果度附近無咩大型商場，所以依間７仔就好似成為依頭既「地標」咁。
有時諗諗下自己真係不孝，老豆老母佢地咁辛苦養大我，到我出黎做野，打份牛工每個月搵得雞碎咁多，自己都係僅僅夠洗，仲要佢地繼續番工先叫做唔洗餓死，若然唔係有依間７仔俾我用少少錢就搞掂一餐，我真係唔知點撚算。
成日話知識改變命運，真係o厄鳩人，依句說話我肯撚定係ｄ補習社或者學店諗出黎既口號，又ＩＶＥ又剪翅，再好似我咁硬９９讀埋大學，就已經爭政府一大筆錢，係就係改變命運，不過係越黎越差呢．．．
由於見今晚有少少涼，所以我著多件風褸，拎埋手機同銀包就出門口。
行到去Ｌｉｆｔ口，發現原來壞Ｌｉｆｔ，好彩我只係住係７樓，行樓梯落去都唔係好「金」。
住係依座樓有個好處，就係本身位置高，即使只係７樓樓梯望出街外，都已經可以望到好遠，由我座樓既後樓梯望出去，係可以望到維港景色同埋對面海既商業大廈，單計依點，係絕對唔會比果ｄ豆腐潤「豪宅」差。
但係好諷刺，望住五光十色既香港，我就好似只係一個路人甲咁，咩背夠祖國咩經濟機遇好似通通與我無關，係我仲未有任何得益之前，我只係見到好多強國人落黎香港炒貴晒ｄ野，衣食住行都俾佢地霸住晒，但作為一個ＩＴ毒男，我自知無能力改變大環境，所以連上網做個鍵盤戰士都懶。
落到樓下７仔，見到入面有幾個人係度買緊野。話到明係「地標」，間７仔當然有番咁上下大，成間７仔係「Ｌ」字型，格局如下：
由於夜晚周不時係度開餐，所以我同夜更既７仔員工已經有Ｄ熟，宜家係收銀機位置果位，我通常叫佢做四眼哥仔，佢份人係無脾氣果種人，有少少怕事，但總括黎講係一個好人，周不時都會同Ｄ客人吹下水。
平時應該仲有個阿嬸同佢一齊番夜更，但今晚就唔見果個阿嬸。
而同四眼哥仔吹緊水既，係一個地中海阿叔，有時夜晚落黎買野，都會見到依個阿叔，佢每次都係買完罐啤酒就一邊飲一邊同四眼哥仔吹水。
雖然我唔認識依位阿叔，但見過佢幾次，總係對佢無咩好感，佢係果種一味吹水吹到自己曉飛既人，成日講到自己識幾撚多野，但明明佢只係一個住係屋村既地中海阿叔，我諗佢一生人最大既成就，就係娶到一個唔介意佢有大肚腩既老婆。
「琴晚果場波真係俾曼聯激撚死，仲枉我訓身落佢地度，佢地都唔撚識踢既，俾我踢我實控到果一球然後再黎一腳窩利破網！」
「嘩，阿叔你有冇咁勁呀？」
「屌你，後生仔即係後生仔，真係有眼不識泰山，你知唔知我以前個朵叫咩？我細細個住慈雲山，以前個個都叫我做慈雲山比利！」
屌鳩你，慈雲山比利？慈雲山籃球場比利呀？
當然，作為一個毒男，依句說話我無講出口，都係拿拿淋隊個叮叮飯，食完再番上去開戰好過。
豬扒意粉加罐可樂真係無得輸，完全解決左我果種想食西餐都又唔夠錢既矛盾心情。
等左幾分鐘，熱辣辣既豬扒意就出世，我拎住個意粉，係角位果張圓枱開餐。
依個時候，我見到個地中海阿叔依然同四眼哥仔吹緊水，另一方面，有一男一女係飲品櫃果邊揀緊野飲。
「老公，有咩奶由（理由）要我地拎咁多野上去太波（睇波）架。」
「屌，鵝（我）拎又唔係乃（你）拎，乃（你）咁多生氣（聲氣）做咩姐？」
原來係一對強國夫婦，操住一口半咸淡廣東話。