《DSE幻想校園(一)》── 從這裡開始 (Do Something Easy): 第一節： 從學長訓練營開始 2.2
隨反思會後，超人暗中召集大家，洗澡後到指定的房間一同享用戰利品。幸好我不是跟他同房，我可以考慮一下是否參與，因為這天的活動太多，我有點累，而且……
「今次我哋合作咁成功！一定要嚟呀！」超人看穿我不想加入。
「但……你唔怕我係犯眾憎……會搞到大家無癮咩？」
「就係咁我先要借呢個機會嚟同大家講話你變咗，等大家都清楚呢件事！」
超人一說，令我有種莫名其妙的感動，我只好笑著，再說沒有推卻的理由，便由他強行帶我到一間可容納十六人的大房。
那裡一共有八張雙層床，認識超人的同學本想借機會來取一點甜頭，令十六人的房間擠滿了男男女女二十多人，一下子令房間變得熱鬧。可是當大家看到我出現時，頓時靜了下來，我亦成為大家的焦點。一名男生居高臨下，坐在上層的鐵㗎床說：
「喂……超人，老老實實，做咩叫埋佢嚟先？我唔想大家玩得唔開心，有咩宜家講清楚佢……」
「咁佢係我呢隊人嚟㗎嘛！無理由唔俾佢參加㗎？同埋卓龍已經唔係以前嘅佢喇！今日大家都睇到㗎？如果係以前嘅佢，佢點會唔發火？佢點會嚟玩學長營先？」
眾人聽到超人這樣說，也沒有特別回應，主要因為大家心知超人是老好人，這次也是出於善意，就算不領情，也不會當場反駁。
「其實我都收到風話佢失咗憶。無嘅，咁我咪當住佢係Friend先囉。我叫令狐德，都係同你、超人同班。」
一個自稱令狐德的男子冷笑了一聲後，視線回到自己的電話，坐在下層的鐵㗎床，依著窗邊，似乎不太友善。但沒想到他已經是比較仁慈的一位，其他的同學，沒作一聲便離開了房間，剩下的人寥寥無幾。
「唔怕嘅！慢慢佢哋會接受你㗎喇，只要你唔好再咁串、做啲乞人憎嘅嘢就得。」
超人說後，坐向面前一張鐵㗎床的下層，而身邊另一位黑色長髮的女生，眼神十分堅定地看著我，聲音說起話來卻有點柔弱，和議著他：
「超人都咁講，我就信佢！不如你講下你發生咗啲咩事？睇下我哋幫唔幫到你？」
說話的是一個叫周佩君的女生。剛剛洗澡後的她，肩膀的衣服被濕透的頭髮沾濕了。超人發現後，馬上給她毛巾墊起頭髮，令傻傻的她知道自己的冒失。
「哎呀！佩君啲服務精神病又發作，佢失憶喎，我哋點幫到佢呀？」
令狐德見佩君將話題轉到我身上，馬上掉下了電話，盯了我一眼來表示抱怨，似乎他不想我成為焦點。
「咩啫，大家將來都係同班同學嚟㗎嘛！幫到幾多咪幾多囉！」
令狐德雙手平開，沒有意見，又再拿起了電話。
我望著佩君、超人、南兄、還有這個令狐德，我想他們都應該是熟識的朋友，應該可以問多一點。
「可能咁問有啲奇怪，但我想了解一下我哋間學校係點？我好似對上堂嘅嘢一啲印象都無。」
眾人聽到也感愕然。過了一會，令狐德才懂反應：
「唔係呀嘛，你喺度讀咗三年喇喎！你真係咩都唔記得呀？」
「其實……我連自己讀過啲咩都唔係好知……」
如果只是中文、英文、數學三科主要科目，我還是有點印象，但通識、還有一科倫理及宗教……我真的沒有什麼記憶。這時佩君認真回答：
「我都可以當你中一生咁講一次俾你知嘅，反正我哋學長嘅職責就係協助中一學生適應學校嘅生活。」
佩君說過後，本想好好地解釋一下，但被超人阻止：
「喂！佩君呀，唔好咁認真啦！我哋嚟玩㗎！玩埋今晚先算啦！」
「咩呀？幫人係我地義工組嘅宗旨，你點可以咁唔認真㗎！」
佩君與超人來回對話，彷彿只剩他們二人在鬥嘴。
「哎呀……唔該妳兩個唔好喺度放閃啦！盲喇！」
令狐德不斷噓聲，超人與佩君極力否認。這時南兄走到我身邊道：
「佢哋兩個係咁，初中同班到宜家，合作無間。」
「南兄？我想問下……呢個Camp仲有幾多個係我哋嘅同班同學？」
南兄抬頭一想，隨便說出幾個名字：
「我、你，仲有超人同佩君四個，加埋德哥同小藍，仲有陳詠珊同蘇家瑤，一共八個人。」
聽到兩個陌生的女生名字，令狐德又插口說：
「嗰兩個係學校舞蹈社嘅正副社長，陳詠珊仲要喺我哋學校被稱為『女舞神』添！佢真係聞名不如見面！喺Camp到仲可以同佢分到一組，簡直係幸運S(請注意「直排」英文字母)添呀！」「『女舞神』？」
「哈，係佢外號，學校仲有幾個唔同嘅女神，到時你再慢慢識啦！……仲有樣嘢……我姓鄭，叫鄭江南，喺朝早未答你問題，宜家還返俾你！」
南兄笑了一下，沒想到他還記得這件事。
隨後令狐德越說越興奮，還跟南兄十分投契地討論著。而我則被佩君及超人指導說明學校大大小小的事情。後來小藍拉著希桐來到，見令狐德明顯收儉起來，可能是有別的女生出現，馬上跟南兄轉了話題提議玩撲克牌，而為我的學校解說也暫停下來，正式開始大家的玩樂時間。
這天夜上，佩君說了很多我不太明白的事，如選修科、學校的老師、陸運會、學術週及運動日等等，我一點印象也沒有，失憶的情況很嚴重呢，就像一個小學生來到所謂DSE的世界……
我抱著疑問，一個人走出了房間，準備回去自己的睡房。
(待續)
香港區訂購實體本：
https://www.penana.com/product/43