《DSE幻想校園(一)》── 從這裡開始 (Do Something Easy): 第一節： 從學長訓練營開始 1.4

熱鬧的氣氛中，我彷彿像空櫈一樣，既沒有意思，卻有點礙眼。可是突然，有人嘗試將這張空櫈拉回小組。超人友善地對著我說：

「不如你都講下？雖然問題都積咗好多下，你淨係講點解會嚟呢個訓練營都得㗎？」

他將球放在我的手上，雖然我不知道為什麼他突然這樣做，而且令氣氛急轉直下，南兄及希桐又回到一開始時的戒備狀態。但……也好，總算有機會跟大家說話了：

「我叫單卓龍，大家可以叫我卓龍，我應該係讀4B班……」

「應該？」





希桐反應很大，因為升班及選科的通知在七月下旬已經公佈了，還有一星期便開學，我沒可能不知道是讀哪一班。

「……係呀，因為我喺暑假時，發生咗啲意外，好似話係坐飛機時遇到空難，我死唔去，不過就失咗憶……好多嘢都唔記得晒……」

話說完後，大家比開始時更加沉默，而且還多添了一份莫名其妙的驚訝。見眾人不懂得反應，我開始繼續說：

「我有住宿舍，選修嘅係……都唔記得喇！更加唔記得點解會參加呢個訓練營啦！不過都好彩……俾我返學前有啲心理準備，人少少傾總好過一次過對住廿幾人講……」
南兄聽到我的說話，冷笑了一聲，說：

「咁你就真係要做好心理準備喇！」





他的語氣有點不悅，令我不明白他的意思。他再說：

「如果你真係咩都唔記得，嚟緊嘅日子都會覺得幾無辜，因為你以前份人都幾乞人憎！」

什麼？我是一個被人討厭的人嗎？我內心問著自己，繼續聽他們說：

「老實講，你俾我嘅印象都好差……不過難得你咁都無事，都算係不幸中嘅大幸……」

希桐說著，似乎她想安慰我什麼，但又帶著厭惡的心情……





「咁……大家可唔可以話俾我知，我以前有幾衰？」

這時眾人互望起來，希桐則等待大家分享他們的見聞。

「我……」

想不到先開口的是小藍，她柔弱的語氣聲線很輕，害得我非集中精神來聽不可！

「……喺幫圖書館做義工嘅時候……你走嚟話唔見咗本圖書，我咪按規定咁問你收返罰款……點知你將啲錢揸成一舊嘢，仲掉我塊面添……又講啲好難聽嘅說話。」

單單是聽到小藍這樣說，我已經開始討厭自己，哪有這麼野蠻？

「……我就簡單得多，所謂『閒事莫理、眾地莫企』，咁就衰咗！我喺廁所見你瞓咗喺度，唔知你係跌親定被人打，諗住睇睇你，扶你一把，點知……哎呀！咁就俾你一拳車埋嚟……」





南兄模仿著中招的一刻，按著自己的面，露出痛苦的表情。

「我都有、我都有一次！」

超人急著說，怕被錯過一樣。

「有次唔小心整跌咗你個書包，諗住幫你執返就無事，點知好似我殺咗你全家咁，大聲喝我，要我一樣一樣執返晒佢，咁我都知係我衰，但都唔使咁凶㗎……」

聽過他們說的事件，我大概明白這裡的學生為何避諱、甚至討厭我，只是剛巧來了四個組員，其中三個也跟我結怨，可想而知我的為人會是如何……

「對唔住……」

或者說出來也不讓人感覺到是真心的內疚，但如果以上都屬實，我相信這是我唯一可以做的補救。

「唔關我事！你無對我唔住！」





希桐這樣說著，超人顯得有點奇怪，但見希桐的眼神迴避，還帶點怒氣，令我感覺她是口不對心。

「……得㗎喇……你唔好再鬧我就得㗎喇……」

小藍尷尬地點頭笑著，南兄與超人也嘆了口氣，雖然有點無奈，但也似乎接受了。

「係囉！咪當重新認識過大家囉！再嚟再嚟！」

超人正想將球傳開時，負責老師卻叫停了大家，要準備之後的活動。

(待續)

香港區訂購實體本：
https://www.penana.com/product/43