[愛情甜故] 失戀過後的 (快樂) 日子: 第一章

下午時份, 女朋友芷茵打電話比我, 芷茵態度有啲冷淡咁講, 「呀明, 今晚收工我地去番上次旺角果間餐廳度食飯兼我有啲野想同你講!」
 
有啲唔係咁好野嘅預兆, 但我亦好從容咁哦左佢一聲, 收線之後, 隔左無耐, 我個電話又再響起, 我望吓個來電顯示, 哦, 原來係芷茵個老死妙芝打黎嘅, 我接左電話之後, 「呀明, 我幫你條女淘果個電鬚刨已經到左我公司嘞, 咁我係比你吖定抑或比你條女先好呀?」
 
電鬚刨? 唏, 芷茵從來都唔會特登買呢啲野黎送比我嘅, 我同妙芝講, 「喂靚女, 呀茵今晚同我會去妳公司附近果間餐廳度食飯, 咁不如妳收工之後都過黎同我地一齊食飯同吹水吖, 同埋順便妳咪就比埋個鬚刨佢囉!」
 
妙芝再同我講, 「做咩呀? 想見吓我呀? 咁我都知我又真係幾正嘅, 但之不過最衰你又已經比我個 friend mark 左吖, 如果唔係, 咁我諗你都有機會入紙排期申請做我條仔嘅!」
 


講真, 呢個妙芝我又真係幾嗒佢糖嘅, 人又夠靚, 性格又玩得, 同佢一齊又可以咩都講得一餐死, 而就唔似得我條女芷茵咁, 初初我都因為係覺佢靚先至溝佢, 而跟住好快我亦將佢擒左上床, 但除左係咁樣之外, 我同芷茵嘅性格其實又真係有幾大差別架。
 
我嘅性格向來都係比較是是旦旦, 但芷茵對於各方面大小事情就會比較執著, 好多時我都比佢話我做咩事都係求求其其咁, 而且佢又成日都話唔準我呢樣, 一陣就話又唔準我果樣, 總之同佢一齊我就成日都係咁比佢鬧鬧鬧, 但就係因為成日都比佢鬧, 所以漸漸地我地段感情好快就已經由濃轉淡。
 
放工之後, 我搭地鐵到左旺角之後, 妙芝打電話比我, 「喂呀明, 我響嘉樂隔離個公園仔度 hea緊呀, 一陣你地會係幾點鐘食飯架?」 哦, 咁我而家咪就已經行到黎呢個公園仔嘅出面度囉, 我入左去公園仔之後, 遠處見倒有個似乎好似係幾熟悉嘅背影。
 
憑我食過夜粥嘅一雙眼, 我已經能夠斷定佢就係妙芝, 妙芝正在烏低個身邊摷緊野咁同我繼續講緊電話, 我見佢個屎忽紇得咁輪誘惑, 條黑色底環又響佢條白色薄布裙內若隱若現咁。
 

 


我行到埋去佢背後度, 跟住我就忍唔住伸手響佢個屎忽度摸左一吓, 妙芝比我一摸即時嚇到企番起身就望吓後面, 「妖, 嚇死人咩? 街黎架, 你唔好咁賤啦!」
 
我笑住同佢講, 「玩吓之嗎, 鬼叫妳個躉紇得咁高呀? 搞到條街啲男人個個都望到充哂血嘞!」 妙芝扮嬲咁打左我手臂一吓, 「充你個死人頭血呀, 一陣等我話番比你條女聽, 睇你到時仲可唔可以笑得咁過癮吖嗱!」 又輪到我扮住驚咁講, 「唔好呀, 我知道錯嘞, 不過其實我係想摸吓妳對波至真!」
 
妙芝聽倒之後就仲更加嬲, 跟住見佢向我起腳就踢, 「嗱嗱嗱, 走哂光嘞!」 就係咁, 妙芝同我就響公園仔度妳追我逐咁黎打住。
 
同妙芝一齊行左上餐廳度, 遠處已經見倒芷茵正向我地揮住手, 坐低之後, 芷茵正有啲冷淡咁同我地講, 「叫左野食先啦, 食完我地先至再講其他嘅事!」
 
妙芝同我都覺得有啲怪怪咁, 但跟住妙芝就同芷茵講, 「喂妳淘果個鬚刨呀, 不過條友塊面都無咩毛咁, 妳送個鬚刨比佢咪就好似送把梳黎比個和尚咁, 嘥氣啦!」
 


芷茵好快咁接過妙芝手上個鬚刨收埋落手袋之後就講, 「我唔係送比佢嘅!」 妙芝聽倒之後就打左個突, 餐湯已經送到, 我地三個唯有就開始自顧地食野。
 
芷茵好快地食完飯之後, 見佢抺左一吓咀跟住就同我講, 「呀明, 食埋呢餐飯之後, 我而家就正式宣佈我要同你分手嘞!」 妙芝聽倒之後即時瀆左一瀆, 而我就定住個匙羹黎咁望住芷茵講, 「妳講認真架?」 芷茵好冷淡地講, 「咩我個樣似係同你講緊笑咩?」
 
氣氛有啲僵持, 而坐響中間嘅妙芝亦已經呆到答唔倒咀, 芷茵繼續同我講, 「你唔使再問同亂估嘞, 我亦唔怕老實話比你知, 我已經同左第二個男仔響埋一齊嘞!」
 
事情既然到左咁嘅田地, 我亦已經無話好再同佢說, 我繼續冷靜地咁食埋我呢碟飯之後, 跟住我就再淡淡然咁舉高隻手黎嗌住, 「哥仔唔該埋單吖!」