十六歲但非處子身嘅女孩: 13.2 我犯錯了

三月潮濕嘅天氣中，仲帶有幾分涼意，我淨係著咗t-shirt 短褲就落街真係有d 唔夠做
我喺街上繼續遊離浪盪，不猶自主咁行下行下就黎到Cyrus屋企留下
我望上去佢屋企嘅單位，見到燈火通明，相信佢係呢個時候都應該係溫緊書
我都只好轉身離開，返屋企摺埋繼續頹算

「Anki，係唔係你？」有一把聲音從後方呼喚我
我回頭咪實對眼睇真d ，原來係Cyrus，睇佢一身嘅頹look 可見，佢同我一樣受呢件事而煩惱，所以落街走走
我企係原地不動，Cyrus就一步一步咁靠近我，佢伸出雙手擁抱我，將我抱緊喺佢胸前
喺濕冷嘅寒氣下，我感受到Cyrus 胸懷嘅溫暖，喺我最頹，最掛住佢嘅時候，佢就立刻出現喺我面前
同時我又覺得好錯愕，冇諗過Cyrus 會喺街上咁主動咁攬住我



「其實我好掛住你Anki，我冇時冇刻都諗起你，不過我知道你而家已經有Rick，我知道你唔想放棄Rick，喺你心裡面，或多或少Rick 到佔有d 位置，我知道我搵返你，令到你成個人亂曬自有唔啱，什至我想迫到你同Rick 分手去擁有你，但係我知道咁做係冇可能，我而家只可以做嘅事係等，我會一直等你，等到你同佢分手為止，對唔住Anki，我真係唔敢聽你電話」Cyrus 好深情咁同我坦白佢內心嘅說話

我雙手環抱Cyrus 回應佢，我冇講任何說話，我要用行動黎俾答案佢
見到一個男仔咁為我著想，對我不離不棄，而我就淨係識得顧自己，淨係想同時擁有兩個男人
我實在太貪心，我覺得自己真係好渣，係時候要做個了斷

一直都唔敢下決定係因為怕自己會後悔，不過愛情從來都係一場賭局
同時落注喺Cyrus 同Rick 身上係冇可能，從來all in 都只可以揀一邊，唔識賭就唯有離枱，自己單身一個，貪心注定係冇好結果



但係我真係負荷唔到Cyrus 對我嘅冷漠，我而家清楚知道我係鐘意Cyrus，但係我真係接受唔到佢對我嘅不理不睬
始終我地之前係一齊過，我地兩個之間嘅問題依然存在，究竟我同Cyrus 分開嘅呢大半年裡面佢有冇改變過？我都唔知

「Anki，我已經失去過你一次，我今次唔會再俾你離開我，你俾多次機會我好嗎？」Cyrus用認真嘅眼神望住我講
「Cyrus......我真係好唔啱.....我犯錯啦.....」Cyrus 嘅開口打斷我腦海中嘅思緒，喺呢一刻我可以更加肯定，我鐘意嘅係Cyrus
「令到你咁辛苦咁多野諗嗰個人係我，我應承你，我會同Rick 分手，我地從新開始，好冇？」我輕撫Cyrus 嘅臉脥，摸一摸呢個似層相識嘅溫度，三月嘅涼意將我隻手都吹到變得冰冷

Cyrus 將佢隻我疊著我隻手，撫喺佢嘅臉上，然後又將手放低，輕輕咁吻我冷冰冰嘅手一吓
呢種溫暖唔係由手上發出，呢種溫暖係由心而發



時候都已經唔早，都係時候要返屋企食飯，我離開Cyrus 嘅懷抱，漸行漸遠
見到佢遠遠咁遙望住我，雖然冇同我揮手，不過呢種不捨嘅眼神又的確令人心碎，與其話Cyrus 虧欠我太多，同我講咁多次對唔住
不如話係我自己兩頭唔到岸而搞出咁大問題，我先係要講對唔住嗰個，無論係對住Rick 又好定係Cyrus都好，錯嗰個係我

返屋企嘅路上，我經過好多我同Rick 呢半年黎嘅足跡
有我地之前成日去食糖水嘅糖水鋪，老闆娘對我地呢對情侶非常好，成日同我地傾計又會俾折我地兩個
然後我又經過荃灣大會堂，有一次我跳舞有表演，Rick 佢特登上城市電腦售票網到買飛睇我表演
跟住行過嘅係間粥鋪，上次Rick 佢病咗但係我又任性遭迫佢出街陪我睇戲，睇完戲之後我同佢就黎咗呢間粥鋪食野

冇論我幾任性，脾氣有幾差都好，Rick 佢都好遷就我，我想點佢都會就我，好寵我
之不過問心嗰句，我真正鐘意嘅人係Cyrus，我唔可以拖著一個我唔鐘意嘅好男仔，我應該俾條生路佢
佢值得一個比我更加好嘅女朋友

同Rick 喺埋一齊嘅半年，佢令到我成長咗好多，我識得點樣去愛人，我知道自己真正鐘意嘅人係邊個
之前嘅我淨係識得小小事就發脾氣，經過呢段感情之後，我明白到維系一段感情係要互相付出，就算Rick 係付出得比較多嗰個都好，我都了解到關係嘅維持真係唔可以靠單方面


就算Rick 佢幾愛我都好，我個心已經唔再屬於佢，係呢一刻我知道我同佢之間嘅感情已經冇得再勉強

我諗都係時候要做個了斷