[讓謊言與虛偽堆砌成我們的最後樂土]《終末後．新世界》: 19-匿藏的殺意

晚上九時左右，我們才正式沿剛才來的時候起步回阿俊的家。
「返去玩咩好？又玩《魔Hunt》？」阿俊問，我們兩個又走過新城市商場前城門河的那道橋。
「好啊。」我答。從來沒有見過如此靜謐的沙田市，我忍不住拖慢腳步欣賞這個難得一見的夜景。
路燈將周圍冷清的街道照亮，河水也映出橙色的光暈。
「我仲有套舊RPG想用PSP玩。」我說。阿俊的家除了PS4也有PSP這種史前時代的產物。
「咩Game？」阿俊問。
「恐怖Game。《屍體派對》。」我答。
「*咁重口……等等……有電話……」阿俊回應。
這時候阿俊的手機響了，他從褲袋拿過了手機，接聽來電。
「喂？」阿俊說。




「沙角商場個兩個人。」阿俊又細聲地和我說，說明來電者的身份。
「開擴音啦。」我要求，阿俊擺出了「OK」的手勢，然後開啟了手機的擴音器。
手機傳來女聲：「喂喂？」
「我地喺度。」阿俊回應。
「我地有急事要同你地講！」女聲應該是來自林海欣，她說。
「你地有冇同『新世界議會』班人接觸？」對面的男子說，他應該就是何念慈。
「啊，有啊。你地又知道佢地嘅？」阿俊回應。
「啱先有個同我地同校嘅人俾人一直追殺……」阿欣說：「而佢之前曾經見過『新世界議會』啲人。」
「聽你地咁講即係你地都曾經同『新世界議會』嘅人來往過。」阿慈又說。
「*街……我地仲俾咗地址佢地……」阿俊慌張起來。




「俾人追殺嗰個女仔……啱先一直有我地phone contact。佢由屋企一直走路……就係幾分鐘之前，佢嚟到咗沙角商場，即係我同阿慈喺嘅地方。但係佢已經全身傷哂，仲要傷得好重……好快就斷咗氣。」阿欣悲傷地說。
「佢一路話自己俾『新世界議會』班人發現咗住邊……然後就俾人mark住咗做目標。」阿欣又補充說。
我和阿俊陷入一片恐慌。
「*！邊可能？如果佢地要殺我地啱先咁多人又唔圍死我地？」阿俊拼命否定阿欣的說法。
「我地而家好多嘢都唔知。」阿慈冷靜地回應。
「我地而家好多嘢都唔知……」阿俊激動地說：「咁算咩意思姐！我地咩都唔知……好似比人玩咁……」
「唔知道你地有冇發覺一樣好奇怪嘅嘢。」阿慈突然說：「如果世界末日啲人冇死哂嘅話，應該會喺網上啲forum……咩高登連登搵到好多Post先啱……」
「咦……好似又係喎……等等……」我立即用手機上網找網絡討論區的帖文和留言。
「然之後你地會發現全部post都係喺今朝早突然死勁多人嘅事件之前。」阿慈又說。
「吓……但係大家仲上到網㗎喎。」阿俊感到奇怪地說。




「而家其實連whatsapp都已經用唔到。」阿慈再說：「所以頭先同我地同校嗰個人都係一直phone call我……whatsapp已經完全冇辦法用嚟連絡……」
「冇理由㗎……我下晝仲send咗阿慈個phone number俾你地，你地兩個都seen咗過喎。」阿俊說。
「等等……你地啱先收唔收到阿俊send俾你地嗰幅相？」我靈機一動、問。
「我地都發現whatsapp係呢幾個鐘先虧咗……相？咩相啊？」對面的回答使我和阿俊完全愣住。
「我地影咗有個沙官學生，喺新城市間7-11隔離……」阿俊說。
「真係冇收到喎。」阿慈回答。
「我都冇……」阿欣也回答。
聽到他們兩個的回應，我頓時感到渾身發寒。
「所以我地嘅猜測係……」阿欣說：「全世界嘅互聯網現在正處於一種監控下。」