[讓謊言與虛偽堆砌成我們的最後樂土]《終末後．新世界》: 17-被提論

「你地知道咩叫做『被提』嗎？」阿源又問。
聽到阿源的問題，我不自覺瞪大雙眼來，我曾經在外國的小說裡接觸過「被提」這一概念。
「唔知道……你想講咩？」阿俊疑問道。
「『被提』係宗教嘅用語，係基督教末世論中的一種概念，有啲教徒認為當耶穌再臨嘅時候，已死的信徒將會被復活高升，活着的信徒也將會一起被送到天上與基督相會。」阿源解釋。
我和阿俊沉思起來。外國有些末日小說，的確會以「被提」作為世界毀滅的歸因。
「只有部份人獲得神嘅救贖帶走，其餘的人繼續留喺俗世……」我原本只是想自言自語地說。誰知阿源回應了我的話：「就係咁。」
「即使點……我地就係俾上帝選中冇死嗰啲人？」阿源問。
「恰好相反。」阿陶插話，又說下去：「我地可能係俾神遺棄嘅人。死咗嗰啲人反而已經喺天國享有永生。」
被提者有福，剩餘者有罪，只有罪人需要在污濁的人間繼續度過餘生、甚至被迫踏上萬劫不復的末路。
「*……完全匪夷所思……」阿源反駁道。




因為阿源的提到的「被提」，我徑自沉思起來。
「當然啱先講嘅嘢只係一種假設。」阿源又補充：「不過我地其實搵到一啲關鍵資料。」
阿源說罷，打開自己手機，開啟一個我完全沒有聽過的網絡瀏覽器。
「我地而家要去deep web搵嘢，唔好學去上深網。」阿源說。
「唔好學咩姐……而家世界都末日啦deep web仲鬼有人咩？」阿俊吐槽道。
不消一會，手機屏幕出現一個奇怪的網站。阿源便說：「嗱，就係呢個網。」
「等我睇過。」阿俊說，我和他留意網站的介面。
整個網站的背景都是詭異的深紅色的，還有一些錯亂的圖形線條，使得網頁黑色的文字閱讀起來很困難。
「嘩……個網咁恐怖嘅……」阿俊說。
「R……A……PT……UR……E。」我念念有詞起來。




「識唔識得個英文字點解？」阿源問。
「Rapture……就係『被提』嘅英文。」我答。
阿源點起頭來。
我還隱約能看見這個網站有「11/8」的標記，就是今天的日期。
「等陣……好詭異。」阿俊說。
「值得留意嘅係我check咗個website嘅最後更新時間係一個月前。」阿源說。
「你意思係，整呢個page果個人預知到今日嘅事？預知到有『被提』發生？」我問。
「唔唔。所以我地懷疑呢個網頁同而家發生嘅事好有關係。就算其實唔係關『被提』事，世界毀滅都好可能關整呢個page嘅人事。佢可能知情，甚至係佢所策劃……」阿源分析道。
「點可能一瞬間殺到咁多人……」阿俊喃喃自語。
我完全沉默起來，頭袋只剩下一片的混亂。




「我地而家好多嘢都唔知。」阿源回應：「出面成個世界已經崩潰……至少我地識得嘅香港已經變成一個死城……」
「而家我地唯有好好計劃一下點樣生存，然後再慢慢去搵事情嘅真相。」他又說。