[恐怖/探險] 達德詭校: 13
「喂，你後面呀。」大哥喊道。
「嗯？」
我轉頭，與大哥雙目交接。
明媚的陽光下，我們二人提著行山杖，走過麥理浩徑第六段。
「你平時好少行山架喔，做咩叫我嚟？」我微笑問他。
其實，我自己也很慶幸，因為大哥很少會主動邀約。
縱使是兄弟，我們卻甚少待在一起，都是各有各忙的。
「想……睇下風景，呢度望海幾好。」大哥許久沒有運動，喘氣起來：「嘩，真係要做多啲運動先得。」
「太忙？」我問。
「係囉，份金融好鬼辛苦。」大哥回答。
沿著崎嶇山路，穿過叢林，走上斜波，我們逐漸靠近山頂。
「嘩，休息下先，要飲啖水。」大哥停下，從背包中拿出水樽。
驀然，大哥察覺旁邊的植物，露出好奇的眼神。
「咦？係咪番茄仔？」大哥指著眼前的果實，果實呈鮮紅色，大約只有波子的大小。
然而，那絕不是小番茄。
「唔係呀，以前阿爸講過。」我解釋：「呢種果實有毒架，食左會頭暈，嚴重甚至會休克，好多人都叫佢哋做顛茄。」
「顛茄？幾得意。」大哥仔細打量這些果實。
「係時候行啦。」我說。
接著，我和大哥繼續行走，過了半小時有多，終於到達高峰。
宏偉的高山拼在一起，成為山脈，再向下延伸至大海，形成海岸。
蔚藍的天空，與青藍的大海，彷彿是互相的映襯，我不自覺陶醉起來。
一陣溫柔的涼風，連同大自然的香氣吹到臉上，我深呼吸，享受每一點氣息。
「係幾靚可？」大哥問我。
「係，風景好靚。」我回應。
「我都好鍾意，企喺高處嘅感覺。」大哥說道。
「你嘅意思係……」我轉頭看他。
「企喺高嘅地方，先可以享受更多風景。」大哥看著我的眼神，希望得到認同。
「我當然明，但你想表達嘅應該唔係咁簡單。」我說。
作為親弟，我當然了解他。
大哥坐在一旁的石頭上，一邊欣賞風景，一邊說話：「公司搵我上大陸發展，有董事呢個位Offer俾我。」
聽上去，是好消息。
然而，這就意味著，他要離開香港，離開我們的家庭。
「你……考慮清楚？」我問。
其實，無論他的決定是怎樣，我都不會反對的。
父親卻不會願意……
「唉，其實都係阿爸嗰邊嘅……嘅……情況。」大哥說：「一嚟佢唔太想，一嚟佢都開始老，要我哋照顧。」
這也是事實，父親年紀漸大，近幾個月開始喊腳痛，亦沒有以前般精力充沛。
「但係我唔想冇左呢個機會，你明唔明，董事呀。」大哥緊握拳頭，不願放棄大好前程。
兩難的困境。
「所以，你打算……」
「唔係打算，我其實已經決定去。」大哥認真看我：「今日約你出嚟，係想你答應支持我，同埋幫手照顧阿爸。」
原來，這次邀約，是帶著目的。
大哥是個勤奮進取的人物，聽聞他在公司裡表現優秀，得到上司賞識。
倘若大哥北上發展，也許真的能大展鴻圖，出人頭地。
然而，我們必須考慮父親的感受。
「阿爸會擔心。」我淡然說。
「叫佢放心，同埋……」大哥站起，前來，右手搭在我的肩膀上：「我信你，可以照顧好阿爸，係咪？你又咁了解佢。」
「…」我一時不語。
「我真係好重視呢次機會，唔該你，細佬。」
他溫柔的語氣，彷如山上的涼風一樣。
也許，我應該信任他，支持他。
「好。」我下決定。
「多謝你，多謝你，我落山請你食飯，重有啤酒。」大哥喜悅，起行下山。
我無法忘記，大哥對我的信任。
然而，父親最後還是離去了。
「…」
「…」
「…」
「呀……我個頭。」我緩緩站起，卻又缺乏力氣，不消三秒便再次跌倒。
「有冇其他人……」我四周張望，然而四下無人，清靜得詭異。
好一會兒，我才重新站起，發現自己仍舊身處課室內。
然而，黑板和文件櫃都消失得無影無縱，宛如從來都沒出現過一樣。
「Sing？阿哥？阿怡？」我壓低聲線，生怕惹來惡鬼。
可是，沒有回音。
我整理背包裡的東西，大口大口喝水，好讓自己清醒。
此時，我察覺天色昏暗，看看時間，警覺我昏迷了足足一個小時。
我開啟電話手電筒，照射空間，發現課室裡只有我一個。
奇怪……
課室不再封閉，我走出現場，來到殘破的走廊上。
「有冇人？」我再次詢問。
這次，終於有反應。
「阿正？係咪你？」
那是阿怡。
阿怡轉出走廊，也拿著手提電話，似乎平安無事。
「Sing呢？」我立刻問她。
我依稀記得，Sing以身軀保護阿怡，熬過地動山搖。
「唔見左，我搵左一陣，都唔見佢。」阿怡開始緊張：「頭先撞得太犀利，連把刀都冇埋。」
「你頭先邊度醒翻？」我打算問清楚。
「唔知點解，我喺禮堂嗰邊醒翻，完全唔符合邏輯……」阿怡仔細回想，然而想不出什麼。
「唔緊要，而家搵Sing先。」他應該還在附近。
「我真係好擔心佢，又要驚，又要逞強。」阿怡向我吐槽：「我當初就叫左佢唔好嚟……」
「對唔住，係我嘅錯。」我道歉。
「咦？」驀然，阿怡看見了我身後的「人物」。
「仔，我終於搵到你啦。」
縱然這把聲音極之熟悉，我還是嚇得幾乎魂飛魄散。
那是不可能的事情……
剛才文件櫃傳來的恐怖笑聲，不是來自楊導遊。
而是父親……陳中明。
我不願回頭，但還是要面對。
「仔？好高興見返你。」父親站在眼前，樣子如往常一樣，慈祥溫柔。