《香港傭兵》: [Day 24－三合成立] PART 29
望清楚...呢個著住黑色長袍嘅光頭佬...左頸...後方...
雖然我呢個角度睇得唔清楚...但隱約...隱約都見到...頸後有...有紋身...
而個紋身...唔使睇清楚都可以肯定...肯定係“西貢”...
係西貢獻命嘅紋身...佢點會係西貢獻命？
點會...點會咁...
西貢獻命唔係俾我哋...俾SPIRIT...殺光？
只見黑色長袍光頭佬靠近仁慈：「就剛才第一批所見...直至最後見到嗰批共有九十六批人...目測每批大約有六十人...最多嗰批大約有一百人...保守估計有七百人入咗去...當中至少有三百人係先行者級數...」
至少有三百人...係先行者級數...
咁即係話...佢所講保守估計入咗去嗰七百人...係指SPIRIT...
七百人...雖然唔係千軍萬馬...之但係...七百個SPIRIT嘅行者...當中仲有三百人係先行者級數...唔好話要抵抗駐港解放軍...由香港鏟到上北京都仲得...
話就係咁講...唔好唔記得解放軍已經有SPIRIT嘅物質同技術...
打起上嚟...應該都幾激烈...
「咁樣...」仁慈諗一諗，「你哋冇俾佢哋發現吖嘛？」
黑色長袍光頭佬立即回答：「當然冇。」
雖然係著上黑色長袍...但佢哋冇精神化...身上感覺唔到氣息...係普通嘅西貢獻命？
定係會好似...短白髮男？
會同仁慈匯報...即係同逆行者有關...會唔會都係逆行者？
定係好似天門啲守衛咁...只係普通人？
係咩人都好...我都係唔可以放下戒心...
因為係西貢獻命...我早就對西貢獻命有偏見...
「嗯...」仁慈點點頭，「一切都同個死老鬼所講嘅一樣...亳無偏差...咁好啦...照計劃...你哋繼續留守喺度...以匿藏方式繼續觀察...有咩特殊情況都只係留意好喇...唔需要有任何行動...直至到...我哋再有安排...而且唔使幾耐～」
黑色長袍光頭佬點一點頭：「了解。」
然後八個黑色身影立即閃返埋去草叢...斜坡...就好似消失得無影無蹤咁...
佢哋...真係聽從仁慈嘅吩咐...
“吼...吼...咔...咔...吼！吼...”仁慈都俾一俾油...又再俾一俾油...架車就好似唔多願行咁...向住上小欖山嘅小路轉入去...
沿住小路行駛，係一條來回只有兩條行車線嘅上山路...
我哋係要...上山？
先唔好理呢一點...有一點更令我在意...
『頭先嗰班...係西貢獻命？』就係頭先嗰班人...
「嗯？」仁慈望一望倒後鏡中嘅我，再望返上路面，「可以話係...又可以話唔係啦～」
可以話係又可以話唔係...可唔可以唔好講到咁模棱兩可？
十足十宋本木咁...係唔係跟得佢多得濟...
「點講好呢...」仁慈又諗一諗，「佢哋係西貢獻命...早喺西貢攻防戰之前就係西貢獻命～西貢攻防戰之後就過咗嚟呢邊...你唔好咁望住我啦～」
我唔好點望住你吖...明顯我就係唔想你再兜圈...直接講重點啦...
經過左邊嘅白色建築物...繼續向山上駛上去...
“吼...吼！吼！咔...吼！咔咔...吼...”上山嘅小路十分之斜...我哋架老爺車又好似唔多聽話...俾極油都唔多去...
仁慈再一俾油：「嚟到呢邊之後，佢哋都知西貢獻命已經成為國安局嘅爪牙～然後佢哋就假裝繼續留喺西貢獻命裡面，一直都守喺呢邊～做我哋嘅內應～」
『即係一直守喺呢邊嘅都係佢哋...佢哋一直都係你哋嘅人...』係內鬼...
「冇錯～」仁慈帶住微笑點點頭，「呢個世界...總係有鬼～冇鬼唔會死人～」
『尋日佢哋咁都冇被誤殺...算佢哋好彩...』對SPIRIT嚟講...左頸後方有紋身...就係目標...
「邊有咁多好彩～」仁慈帶住微笑擰擰頭，「係個死老鬼一早叫我通知佢哋匿埋～避開SPIRIT嘅獵殺～個死老鬼真係...無所不知...」
又係宋本木...
佢真係...乜都知？
咁又知唔知...ADAM被SPIRIT收埋喺邊...
『佢哋早喺西貢攻防戰之前就係西貢獻命...咁講法...佢哋都係逆行者...可以...以EVE精神化？』我有冇估錯...
「嗯嗯～」仁慈帶住微笑點點頭，「你哋都知西貢獻命同逆行者嘅事？」
我同綽姿對望一眼後點點頭：『嗯...知道啲...唔算太清楚...只係遇過一個...曾經係西貢獻命嘅逆行者...」
「哦～」仁慈點點頭～再大力踩一踩油！
“吼！吼！吼...咔...吼吼！咔咔...吼...”我哋架老爺車就上斜冇力咁...聲大但龜速上山...
『走過嚟呢邊嘅話...EVE...就喺山上面？』上山嘅斜路...真係幾斜...
「嗯～」仁慈再俾一俾油～再大大力咁踩行油～「乖乖地...俾啲力啦喂～」
竟然...係喺山上面...
小欖嘅山上...唔係應該係...監獄？
小欖嘅山上...係有一座監獄...
而座監獄...係監禁咗有精神病嘅犯人...
咁而家呢？而家仲係唔係？
係喎...我一直都冇諗過呢點...
應該早喺特殊區成立之後...小欖上面嘅監獄...已經廢棄...
係估唔到...估唔到EVE會收喺上面...
除咗估唔到EVE會收喺山上面...更加估唔到嘅係...我有種...有種熟悉嘅...感覺...
“吼...咔...吼！吼！吼吼！咔咔...吼...”架車好似叫晒救命咁...但又唔係好上到...
條上山路...真係有啲斜...
至於我...越係上山...就越係有一種...熟悉嘅感覺...
真係好奇怪...
雖然話平日返工坐巴士行屯門公路...總會路經小欖...但我明明...明明我從來都冇嚟過...冇上過嚟...
但周圍嘅環境...總係好熟悉...總係好似知道前面不遠處就有個彎...彎後不遠就有涼亭...
真係好奇怪...呢種...好似曾經嚟過...有啲熟...但又好陌生...
冇理由...我真係冇上過嚟...就連上網都冇搵過呢邊嘅資料...冇睇過呢邊嘅地圖...相片...
講真...好人好者又點會無啦啦留意小欖呢啲鬼地方...
「乖啦...俾多少少力啦...」仁慈一邊口噏噏...一邊俾俾油...
“吼！咔...吼...咔...吼吼！咔咔...吼...”但架車就好似就死就死咁...冇乜力上...
而且...我仲聞到...好似有陣燶燶地嘅味...由車頭傳過嚟...
究竟仲有幾遠...要上到去邊先到我哋要去嘅地方...
“吼！咔...吼！咔...吼吼！咔咔...吼...咔...”繼續慢慢上...慢慢爬上超斜嘅斜路...
好唔容易先嚟到一個分岔路...
“吼！吼...”仁慈一俾油向左轉...
喺轉入左邊嘅小路嘅一瞬間...我望到有塊鐵牌指向右邊大路...上面寫住...
『小欖精神病...治療中心...』右邊嘅大路係去治療中心...
但我哋就向左邊嘅小路上...
即係話...我哋嘅目的地唔喺治療中心嗰邊...
咁...再沿住小路上去...又係咩地方？
“吼！吼！咔...吼吼！”轉一個彎...再轉一個彎...好唔容易咁繼續上山...
然後好唔容易先上到嚟...掘頭路...
“咔...吼...咔...咔咔...吱...吱！！！”我哋架古董車就停喺山上嘅盡頭...車頭噴晒白煙...
「呼～總算上到嚟吖～」仁慈解開安全帶～
總算...總算上到嚟...車頭出晒白煙添...
“咔...啪！啪啪！”我同綽姿跟住仁慈落車...望一望四周...
左邊係山區野草...前面係...山崖...而右邊...有一間木建小屋...再右邊遠少少...有座舊嘅建築物...
座舊嘅建築物好似...係住宅？
我都唔肯定...因為都幾舊...幾殘...而且我並唔係好在意...因為有更令我在意嘅嘢...
係...嗰間木建小屋...
喺嗰間小木屋裡面...我感覺到...有兩個熟悉嘅...氣息...
其實...由我哋一駛到上嚟...我就已經感覺到...
呢兩個熟悉氣息嘅主人係...羅羅同日倫...
點會有佢哋兩個嘅氣息...佢哋都上咗嚟？
我同綽姿都跟住仁慈身後行...行向小木屋...
但行唔夠幾步...我同綽姿都立即停低...
我同綽姿...全身僵硬咁企定定...提高警戒...
因為...我感覺到...喺小木屋入面...除咗羅羅同日倫嘅氣息之外...裡面仲有...兩個熟悉帶住點點暖意嘅氣息...
呢兩個氣息嘅主人係...偶然同必然...
佢哋兩個...兩個都係喺...裡面...
仁慈擰轉頭望一望我哋：「點吖？哦～冇事㗎喎～入去啦～」
冇...冇事...
係嘅...應該真係冇事嘅...
只係一時之間...感覺到呢兩個強大敵人嘅氣息...好自然咁卻步...提高警戒...
我同綽姿都小心謹慎咁...同仁慈保持住兩個身位咁行...行近小木屋...
“依...咔咔...”當仁慈推開木門之時...我首先見到羅羅同日倫擰轉頭...
羅羅提高戒備咁望住仁慈同我講：「你哋...真係嚟咗...」
『嗯...等陣先...』我行前多兩步...望住坐喺長方形嘅木餐檯前...木凳上嘅...『梓...梓翹？！』
偶然嘅氣息...由梓翹身上發出...
唔止...唔單止梓翹...
仲有...仲有企喺梓翹身邊嘅...子茵...身上散發出必然氣息嘅子茵...
佢哋兩個...同樣著上黑色長袍...全身都有綠色粒子...仲有長袍上嘅暗花...閃著...閃著綠色光芒...
一閃...一閃...綠色光芒一閃...一閃...
點會...梓翹同子茵...點會係...
梓翹帶住微笑揮揮手：「Hi～」
『點會...點會係你㗎？』仲可以咁輕鬆Say Hi？
梓翹帶住微笑摸摸頭：「呃...點講好呢...」
子茵依然冷淡...唔出聲...
羅羅繼續提高戒備：「你哋識㗎？」
『識...識...』係唔知...唔知佢哋係...逆行者...
仲要係偶然同必然...
日倫接住講：「就估到係你...大名鼎鼎嘅偶然...同必然...」
日倫...一早就估到？
係幾時？
梓翹繼續帶住微笑：「都話咗唔駛咁緊張～」
日倫就再緊張啲：「講笑咩？你哋係逆行者...仲已經表露晒出嚟啦...」
「都話...」正當梓翹一起身...
“嗡嗡！嗡！”羅羅同日倫立即拔出精神刀...亮出紅光刀刃...
唔止羅羅同日倫...仲有子茵都拔出精神刀...亮出刺眼嘅綠光刀刃...
個氣氛...都真係好緊張...
梓翹帶住微笑：「唔使咁緊張～唔使咁緊張～收返埋把刀先啦～」
羅羅望實梓翹：「你...你叫佢收先唔好？」
日倫接住講：「係咯...叫人收埋把刀又唔自己人收先？」
仁慈加把口：「一齊收～一齊收～」
羅羅接住講：「佢唔收我唔收...」
子茵仲係揸到把精神刀實一實...
梓翹帶住微笑望住子茵：「收先啦～收先啦～」
子茵眼尾望梓翹一眼...再揸實啲把精神刀...綠光刀刃越嚟越光...越嚟越刺眼...
日倫望實子茵：「嗱而家係佢唔收咋...」
「收啦...收啦...」
「一齊收喇～」
「佢唔收我哋唔收...」
「不如你哋收先啦～」
「點解要我哋收先吖？」
「你哋收咗佢就收㗎喇...」
「收㗎喇...收㗎喇...」
「我睇唔出佢會收囉...」
『我數三聲你哋一齊收喇好唔好？！』真係煩到頭都爆吖...