《香港傭兵》: [Day 24－三合成立] PART 23
我同綽姿跟住逆行者身後跑近多兩步...
睇清楚...呢架新新淨淨...算係我嗰個年代嘅黑色Benz...之唔係宋伯伯嗰架...
「快啲上車！」逆行者已經打開車門！
我同綽姿都立即衝上後座...
“依...依...吼！”坐喺司機位嘅逆行者立即撻車...
“依！吼！”逆行者一俾油...成架Benz就衝住去...
「呼～」逆行者揭開頂帽同拉返低個衫領...
我從倒後鏡中就可以好清楚咁睇到雪一樣咁白嘅肌膚...帶住點點哀愁嘅一雙綠色大眼睛...鼻好直...面尖尖嘅...仁慈...
『真係你...仁慈...』果然真係...
頭先當我感覺到佢嘅氣息...我都差唔多可以肯定...
只係唔敢相信...
但而家...確確實實見到佢個樣...只係...
「嗯～」仁慈望一望倒後鏡中嘅我，再望返路面，「我哋又見面喇～」
『你唔係死咗喇咩？』唔係俾...偶然殺死...
「冇～」仁慈擰擰頭，「佢都冇殺到我～」
冇...冇殺到...
講起上嚟...我又真係冇見到偶然落手...亦冇見到仁慈化成無數嘅紅色粒子...
講返轉頭...仁慈把頭髮...
『你把頭髮...染咗白色？』之前見仁慈...把頭髮都金到差唔多白...而家直頭白晒...
有必要要染白佢咩？
「我把頭髮...」仁慈單手輕輕摸一摸自己把白髮，「係副作用。」
『副作用？』咩...咩嘢副作用？
“吼！吼～”仁慈踩盡油...衝上高速公路...
「EVE...」仁慈駛向快線...踩盡油，「吸收EVE能量所帶嚟嘅副作用。」
『EVE？！』係短白髮男曾經提過...
「冇錯...」仁慈點點頭，「三原核之一嘅EVE...逆行者就係吸收EVE能量...」
原來...原來逆行者...
「講起上嚟就真係長篇～」仁慈留意住路面，「偶然話我應該適合做逆行者...就帶我去吸收EVE能量...」
綽姿開聲問：「做逆行者都有適唔適合？」
「嗯...」仁慈點點頭，「同SPIRIT一樣，要適合先吸收到。不過又同SPIRIT有啲唔同...萬一同EVE排斥...會灰飛煙滅...」
“吼！吼～依！吼～～～”爬過架的士頭...向住沙田方向飛馳...
『灰飛煙滅？』係指...
「點講好...」仁慈諗一諗，「EVE嘅能量太大...萬一出現排斥嘅話...唔係單單吸收唔到...而係會被佢嘅巨大能量毀滅。」
咁...咁恐怖咁嘅...
「EVE...」仁慈又留意住路面，「我仲好記得偶然帶我去到吸收EVE能量...刺眼嘅綠光...強大且無盡嘅能源...當我吸收嘅一刻...我全身上上下下內內外外都好似被電...係持續好耐...一直被電擊中咁...痛到死...又冇失去知覺...一直感受住電擊帶嚟嘅痛...」
『等等先...我仲唔係好明...唔明係咩一回事...』我真係完全唔理解...
「我應該要講得清楚啲...」仁慈望一望倒後鏡中嘅我，再望返路面，「逆行者只要吸收過EVE能量一次，就可以精神化。」
吸收過一次...就可以精神化...
仁慈點一點頭：「EVE能量會注入全身...潛伏喺體內...只要想精神化...就可以精神化...」
唔怪得...喺黃金扮黃傘嗰個逆行者...同短白髮男都冇精神液喺身...都可以突然精神化...
咁咪可以...無時無刻都...會唔會太屈機吖？
「之但係...」仁慈一扭軚，爬過貨車頭，「有好多限制...」
有好多限制？
“依！ 吼！吼～吼～～～”我哋架Benz喺車群之間...左穿右插...
「首先最重要一點係...」仁慈切返入快線，「唔可以離EVE太遠...」
「唔可以離...」綽姿講一半又停咗口...
「嗯...」仁慈點點頭，「逆行者要精神化...就唔可以離EVE太遠...唔係嘅話就精神化唔到...又或者好似我而家咁...唔可以Keep住...時強時弱...」
的確...我感覺到仁慈嘅氣息...仲係時強時弱...
「其實...」仁慈又諗一諗，「過嚟呢邊已經係好遠...正常係冇可能精神化到...係唔知點解...真係奇怪...竟然真係可以...」
吓？又話已經好遠又話真係可以...即係點？
“吼！吼～～～”繼續騎住快線衝住去...
「再者...」仁慈踩行油，貼住前車，「精神化雖然話冇時限...之但係都會進入深層睡眠...」
冇時限...但都會進入深層睡眠...
「一般情況之下...」仁慈等到前車忍唔住切向中線，再踩油加速，「係可以自己控制解除精神化...之但係就立即進入深層睡眠...而喺深層睡眠期間...絕對唔似得SPIRIT咁...」
『即係點？』我已經心急到忍唔住追問...
仁慈望一望倒後鏡中嘅我：「比死更難受...」
「比死...」綽姿欲言又止...
「嗯...」仁慈點點頭，「會發啲超真實...但極痛苦嘅夢...好似話如果你喺精神化期間斷咗左手...喺深層睡眠期間左手會不停咁切斷...切斷...切斷...切斷...切斷...身體中刀嘅地方就不停中刀...中刀...中刀...中刀...中刀...中刀...就算你精神化期間完完整整乜損傷都冇...喺深層睡眠期間...全身上上下下都會受到電擊嘅刺痛...」
『唔係咁...折磨吖化？』咁樣...真係慘過去死喎...
「就係咁折磨...」仁慈再點點頭，「而且你係醒唔到...直致到深層睡眠完...而深層睡眠嘅長短...就取決於你精神化咗幾耐再乘六倍...」
綽姿接住問：「即係你精神化咗兩個鐘...就要喺深層睡眠裡面受十二個鐘苦？」
「嗯...」仁慈望住倒後鏡中嘅綽姿，點點頭。
『好...好難頂喎...』諗諗都起雞皮...『之但係...咁唔解除一直精神化落去咪得囉...』
我係唔係突破咗盲腸？
「唔得㗎...」仁慈擰擰頭，「你會攰...會眼瞓...只要你一失去神志...就立即進入深層睡眠...」
係喎...又冇諗過添...
「令頭髮變白係其中一種副作用...深層睡眠嘅惡夢又係其中一種...所以...」仁慈諗一諗，「吸收EVE能量...做逆行者絕對唔係一件好事...」
都唔係唔係一件好事咁簡單...係好難受嘅事...
『咁...EVE係邊度？』三原核之一嘅...EVE...
「呢層...」仁慈望一望倒後鏡，「甩到身後嘅麻煩先再講～」
身後嘅...麻煩？
突然...我感覺到背後...遠處...有雜亂嘅...氣息...
我回頭一望...望向車後遠處...正正就有...三架...黑色嘅...Chevrolet？！
望住車後遠處...有三架黑色嘅Chevrolet左穿右插咁衝緊上嚟...
綽姿同我一齊望住後面：「係國安局。」
仁慈再俾多少少油：「真係煩麻...咁都要追上嚟。」
“依！ 吼！吼～依！吼～～～”我哋同後面三架黑色嘅Chevrolet同時喺車群之間左穿右插...
雖然仁慈手車都算辣...開得幾快...但都係同後面三架黑色嘅Chevrolet拉唔開距離...
「可惡！」仁慈咬牙切齒咁左扭軚，右扭軚，「嗰個死老鬼吖...又話夠用！」
『吓？邊個死老鬼？』又夠咩用？
仁慈望住倒後鏡中...三架黑色嘅Chevrolet：「逆行者嘅領袖...」
『逆行者嘅領袖...』即係邊個...
「嗯...」仁慈再望返上前，「逆行者嘅領袖...曾經係SPIRIT最高位置...十二預行者之一...」
十二預行者之一...
『係...Owner？！』Owner係十二預行者之一...
「唔係...」仁慈擰擰頭...
綽姿接住講：「係呢架車嘅主人...」
呢架車嘅主人...
『係...宋伯伯？！』宋伯伯...
「唔怪之得...」綽姿諗一諗...
我都知宋伯伯唔簡單...之但係...唔簡單到係...曾經係SPIRIT嘅十二預行者之一...而家仲要係逆行者領袖？！
“吼！依！吼～依！吼～～～”仁慈上一上波...喺幾架貨車之間穿插...再繞過巴士...
「嗯...冇錯...」仁慈再一俾油，「你所講嗰個Owner...杜王土同宋本木都係一樣...曾經係SPIRIT嘅十二預行者之一...不過杜王土並唔係逆行者。」
『Owner佢...唔係逆行者？』但點解...個關係咁奇怪？
仁慈再爬過三架私家車頭：「以我所知就唔係...其實我都唔係太清楚...逆行者同SPIRIT個運作其實都差唔多...都係只要知自己要知嘅事就足夠...我淨係由偶然口中打聽過...要監視住Today Coffee...」
『要監視...Today Coffee...』點解要...
「嗯...」仁慈一邊加速，一邊點點頭，「詳情我真係唔知...只係知好似話佢哋之間意見有啲分歧...杜王土唔跟宋本木嗰套...」
意見分歧...我都聽過佢哋講...
之但係...宋伯伯嗰套...又係邊一套？
咁Owner又係行緊邊一套？
「不過照咁睇...」仁慈再一扭軚...喺架巴士前突然切入，「杜王土利用你哋去破壞國安局同SPIRIT嘅關係...點睇都係對逆行者有利。」
『我哋...差啲俾Owner害死...』不知不覺又俾人利用咗...
「呢點講返又真係幾奇怪...」仁慈好努力咁甩身後嗰三架黑色嘅Chevrolet，「喺我成為逆行者後一個禮拜左右...宋本木突然親自嚟搵我...仲叫我混入去科學園做維修工人...起初仲以為...只係嚟收集情報...然後今日突然又叫我揸佢架車過嚟...準備好救你哋...而家諗返...點解好似一早就知道...」
但係點甩都甩唔開...後面嗰三架黑色嘅Chevrolet仲越追越近...
『一早就知道...我哋會嚟...冇可能...你成為逆行者後一個禮拜...再距離今日都應該又一個禮拜...』我諗我嘅推斷應該冇錯...
綽姿留意住車後：「你話杜王土同宋本木意見分歧...應該唔會攜手合作。」
“吼～依！吼！”喺兩架的士之間穿插...差唔多駛到去火炭...
「嗯...」仁慈點點頭，望一望倒後鏡，「就係咁先奇怪...照計係需要周詳嘅計劃...之但係...更奇怪嘅係...今朝宋本木交架車俾我嘅時候，仲話放心一定精神化到...」
綽姿一直留意住後面：「你頭先提過...嗰邊已經係好遠...」
「冇錯...」仁慈再點點頭，「差唔多呢一個禮拜...我喺地下研究所工作，一直都精神化唔到...就只可以用普通人嘅身軀去調查...去收集...去偷鎖匙...但頭先...我突然感覺到...EVE嘅能量...喺體內...真係好奇怪...」
EVE嘅能量...喺體內...究竟係...咩一回事...
「嗰兩個老鬼...」仁慈再望一望倒後鏡，「總係古古惑惑...可惡呀！根本就唔夠！」
我再擰轉頭一望...三架黑色嘅Chevrolet又追貼咗...
“吱！吱～～～”已經貼到...聽到佢哋嘅電動引擎聲...
仁慈Chok一Chok波棍...片住咁喺兩三架貨車之間穿插：「宋本木個死老鬼交架車俾我嘅時候就覺得唔對路！叫我去救人...就俾架舊車我揸...我都有問過佢夠唔夠快...有冇架好啲嘅...佢就話夠㗎喇夠㗎喇～而家夠鬼夠馬咩？！又陰我！」
望住三架黑色嘅Chevrolet就喺幾架貨車同私家車之間左穿右插...
『又陰？』乜宋伯伯成日陰人㗎咩？
「唔好提...」仁慈皺住眉擰擰頭，「喺短短呢兩個幾禮拜，我都俾佢陰過好幾次...雖然人冇事...仲話錫住部車揸吖～心肝寶貝嚟㗎～我而家踩爆佢副偈都走唔甩啦！」
『哈哈...佢係咁㗎...佢好錫呢部車㗎...哈哈...』古董吖嘛...
仁慈谷起塊面豬登：「咁鬼錫部車就唔好俾我用嚟救人啦！個死老鬼係唔係有心玩嘢㗎？！」
睇到仁慈個嬲豬樣就覺得好好笑～
不過而家唔係笑嘅時候...
“依～吱！吱～～～”三架黑色嘅Chevrolet已經越嚟越近...越嚟越近...
唔得...我哋呢架Benz始終都係用電油嘅古董...同現今成熟嘅電動引擎相比真係冇得比...
再係咁落去...真係會俾佢哋追上...
再係咁...真係唔掂...就只可以...
我望住綽姿...綽姿亦望住我...好似知我想點咁...
或者...呢個真係一個...好方法...