《香港傭兵》: [Day 24－三合成立] PART 13
綽姿繼續摸摸...摸摸妙齡少女著住黑色皮甲嘅手臂...戴住黑色皮手套嘅手掌...
「真係...黐實...」綽姿一邊摸...一邊口噏噏...
『咩...咩黐實吖？』講到1999咁好難明喎...
「你摸吓。」綽姿示意叫我摸摸妙齡少女。
吓..摸摸...
雖然話已經死咗...唔係唔係...摸妙齡少女嘅屍體就更加變態...
不過...既然綽姿叫得我摸...都要摸㗎啦...
我就摸一摸...都係摸摸膊頭好啲...冇咁變態吖嘛...
但當我一摸到妙齡少女個著住黑色皮甲嘅膊頭...
『咦？』好似...有啲怪怪地...好似...
除咗話皮甲嘅質感好熟...好似成日都接觸到...我哋身上嘅行者長袍...緊身衣...仲有精神刀柄...
係我哋...SPIRIT嘅物質...
唔止...唔止皮甲係用上我哋SPIRIT嘅物質製造...而且仲...好似黐住...
我再摸摸妙齡少女件黑色皮甲...再摸一摸對手...掃幾掃...又拉一拉...
拉唔開...好似...好似...
『黐實咗...』我再雙手摸住妙齡少女個胸...撳住左胸上...紅光傷口...
好似...黐實咗咁...件黑色皮甲...好似黐實喺妙齡少女嘅皮膚...
「好似皮膚咁...件黑色皮甲...係身體一部份。」綽姿摸一摸妙齡少女對大髀。
『點會...點做到...』我向下摸...摸摸妙齡少女條小蠻腰...
真係...真係好皮膚咁...呢件黑色皮甲...係妙齡少女嘅表皮？
我再來回摸一摸...就留意到喺妙齡少女嘅左胸上...紅光傷口上少少嘅位置...好似有...有啲字...
我撥一撥開飄散緊嘅紅色粒子...靠埋啲...睇清楚啲...
『SS...0083...1』我見到有...深黑色嘅字樣...
係...編號？
而上面仲有...“魂導兵”三隻深黑色字...
「係...魂導兵...」綽姿同我一齊望住妙齡少女嘅左胸上...
『魂導兵...魂導兵計劃...上次嗰個裝置？』同羅羅對立嘅委託...嗰個喺黑色箱裡面嘅遠端連接投射系統...
「冇錯...」綽姿點點頭，「嗰個遠端連接投射系統所投射嘅計劃...魂導兵計劃...」
『魂導兵計劃...魂導兵...佢就係...魂導兵？』我望住死唔眼閉嘅妙齡少女...
「應該就係...而且應該唔止得佢一個...佢有編號...」綽姿摸一摸妙齡少女左胸上...深黑色嘅“SS-0831”...
『仲要唔止得佢一個...係咩人製造佢哋出嚟？係咩計劃？呢度又係咩地方吖？』我望住妙齡少女身上...除咗紅光傷口飄出紅色粒子外...就連手腳...全身都...有紅色粒子飄出...
越嚟越多...越嚟越多紅色粒子由妙齡少女身上飄出...由“黑色皮甲”上飄出...
慢慢...妙齡少女全身上上下下都分解成無數咁多紅色粒子...飄散喺空氣中...喺空間之中...
妙齡少女化成無數咁多紅色粒子...喺空氣中飄散...喺空間中消失...
『都係會...化成無數咁多紅色粒子...』我企返起身...望望整條通道...
四周都係雜亂嘅氣息...冇減弱過...仲好似多咗...妙齡少女嗰份雜亂氣息...
「嗯...」綽姿都企返起身，「就好似我哋精神化咁...真係好相似...」
『唔係同一種技術...但類似...』究竟係咩科技...
「真係話唔埋...要再去睇吓先知。」綽姿小心謹慎咁行前兩步。
『仲要去睇？』我立即行前兩步...跟上綽姿...『我哋根本就唔知...唔係...係預計唔到前面有啲咩...』
如果知就唔使去...問題係最起碼都要預計到有乜嘢喺前面等緊我哋...
「要去...一定要繼續去...我感覺...就喺前面...不遠處。」綽姿Keep小心謹慎咁向前行。
就喺前面...不遠處？
啱...就喺前面不遠處...我都有呢種感覺...
就喺綽姿用精神能量打開圓形大鎖...就感覺到...就喺前面不遠處...
事實上...都嚟到呢步...冇理由只係遇到一個魂導兵...就咁空手而回...
繼續同綽姿步步為營咁喺道通之間行...
每一行到轉角...我哋都會先探一探頭...望出去...
「以我估計...魂導兵係呢邊嘅守衛...我哋會有機會再遇到其他巡邏緊嘅魂導兵。」綽姿匿喺牆角...望清楚出面嘅情況。
『雖然佢哋身上都有氣息...之但係整個空間都被雜亂氣息籠罩...我哋感覺唔到...』我都留意住身後...留意住會唔會咁啱咁唔好彩...有魂導兵巡過...
「嗯...」綽姿點點頭，「同樣...佢哋都感覺唔到我哋嘅氣息...就要用肉眼去觀察。」
『仲有...上面嘅CCTV...』我探頭望一望出面...遠處嘅天花正正就有個黑色半圓球體...
「嗯...」綽姿望住天花上嘅黑色半圓球體，「經過嘅途中...見一個...摧毁一個。」
『怕唔怕打草驚蛇？』我都望實天花上嘅黑色半圓球體...
「希望冇咁快就驚動到佢哋。」綽姿一講完，就立即以忍步跑出去...飛跳到半空中... 凌空三百六轉體揮刀一斬...
“嗡！”紅光刀影一轉...天花上嘅黑色半圓球體就分開兩邊...
清脆俐落...優美動人...
綽姿嘅攻擊動作清脆優美...真係百看不厭...
百看不厭？
我睇過好多次咩？講到好似睇過好多次咁...其實算唔算多呢？
好似唔算好多...但感覺比起現實多...
點解...點解會有呢種...錯覺？
我知道而家唔係講呢啲廢話嘅時候...
而家應該要...繼續潛行...
之但係...總係控制唔到感覺...
感覺...從來都唔受控...
我就只好一直帶住呢種錯覺...跟住綽姿潛行...
潛行到下一個轉角...探頭望出去...就見到有個“魂導兵”背住我哋行緊上前...
裝束同頭先嗰個完全一樣...睇嚟應該隻隻魂導兵都係一式一樣...而且又係女仔...
今次我冇等綽姿出手...
我一個忍步極速跑出去...極短距離之下超加速...然後飛跳到半空中拔出精神刀...凌空三百六轉體...先向住天花上嘅黑色半圓球體揮刀一斬...
“嗡！”紅光刀影一轉...天花上嘅黑色半圓球體就分開兩邊...
然後立即反手持刀...向住魂導兵身上飛落去...
就喺我飛到埋去剛好感覺得到魂導兵嘅氣息嘅範圍...魂導兵亦剛好感覺到我嘅氣息...正想擰轉...抬頭之時...
“嗡！吱！”紅光刀刃就由上至下插入魂導兵肩膀...由鎖骨位置插入體內...
我從後一手撳住魂導兵個嘴...
當魂導兵雙腳一軟...我就扶住佢...佢就慢慢跪喺地上...
“嗡！”我將把紅光刀刃由魂導兵鎖骨位置抽返出嚟...將佢放喺地上...
望住死唔眼閉嘅魂導兵...又係一個妙齡少女...
而喺呢個魂導兵嘅左胸上...印有“魂導兵 SS-1112”...
綽姿都行到嚟我身邊...單膝半跪喺魂導兵面前...
綽姿摸兩摸SS-1112：「可以話完全一樣...只係唔同人。」
『點會咁...究竟係點樣製造出嚟...係複製？但又唔似...』假如好似星球大戰嘅白兵咁...係複製人嘅話...應該連個樣都相同...
之但係...而家面前嘅SS-1112同頭先嘅SS-0831完全係兩個人...
「我都認為唔係複製...每個都係...獨立嘅個體...」綽姿企返起身...望住魂導兵身上...開始有紅色粒子飄出...
除咗紅光傷口飄出紅色粒子外...就連手腳...全身都...都開始有紅色粒子飄出...
獨立嘅...個體...
望住越嚟越多紅色粒子...由魂導兵身上飄出...由“黑色皮甲”上飄出...
慢慢...魂導兵全身上上下下都分解成無數咁多紅色粒子...飄散喺空氣中...喺空間之中...
魂導兵化成無數咁多紅色粒子...喺空氣中飄散...喺空間中消失...
綽姿繼續行...行前兩步...我都跟住佢身後...留意住身後咁行...好快就行到嚟通道出口...
喺出口嘅大閘門裡面...我同綽姿一左一右咁偷偷探頭望出去...
我望到出面有...半身高嘅玻璃圍欄...圍住中間一大個中空嘅位置...然後圍住中間嘅左右兩邊都有路...路上都有...魂導兵巡緊...
有兩個喺對面...又有兩個背住我哋巡緊...
出面夾埋就有四個魂導兵...
我同綽姿...每人要解決兩個...
綽姿指指自己...又指指出面背住佢巡緊嘅魂導兵...又指指天花板...又指指我...指指出面背住我巡緊嘅魂導兵...又指指天花板...
雖然我唔識手語...之但係就咁睇...鳩估都估到綽姿係想話佢解決近佢嗰邊嗰兩個魂導兵...我就去另一邊解決另外嗰兩個...順手搞掂埋天花板嘅CCTV...
我直豎姆指...俾咗個“Good”綽姿...
綽姿一點頭...我哋兩個同時以忍步極速跑出去...各自向住魂導兵背後...極短距離之下超加速...接近...
就喺我跑到埋去剛好感覺得到魂導兵嘅氣息嘅範圍...魂導兵亦剛好感覺到我嘅氣息...正想擰轉頭之時...
我拔出精神刀...從後一手撳住魂導兵個嘴...一刀插入佢背脊...
“嗡！吱！”成把紅光刀刃就由背脊插入...由胸口刺出...
喺魂導兵仲未跪低之前...我鬆開手...抽返把精神刀出嚟...再喺魂導兵身上快斬兩刀...
“嗡嗡！吱！”兩道紅光刀影劃過魂導兵身體...
喺魂導兵嘅身體仲未散落地上之前...我立即以忍步短距離加速...飛跳到半空中...向住天花上嘅黑色半圓球體揮刀一斬...
“嗡！”紅光刀影一轉...天花上嘅黑色半圓球體就分開兩邊...
唔止一個...前面仲有...
我一落地就再以忍步短距離加速...飛跳到半空中...一斬...落地忍步加速再飛跳...再一斬...再跑再跳再斬...
喺剎那之間就差唔多圍住跑咗半個圈...斬爛咗四五個CCTV後...面前不遠處就係另一個魂導兵...
面前嘅魂導兵已經見到我...雙手已經亮出紅光手刀...擺出迎戰姿態...
我冇停落嚟...Keep住以忍步短距離加速...以一閃姿態向魂導兵攻擊...
“嗡！吱！”魂導兵以紅光手刀擋住咗我嘅一閃...
我並冇停止攻擊...再向魂導兵揮兩刀...再接轉身半月斬...
“嗡嗡！吱！嗡！”魂導兵擋兩刀再避一刀...立即轉換成紅光利爪向我反擊...
就喺魂導兵對紅光利爪差唔多刺到埋嚟我面前之時...
「呀...」面前嘅魂導兵睜大對眼...雙眼亮出紅光...紅色粒子就由口中飄出...
而喺魂導兵胸口...就有把紅光刀刃刺穿出嚟...
係綽姿...綽姿從後偷襲...
綽姿將紅光刀刃由魂導兵背脊抽返出嚟...
“啪！”魂導兵就瞓喺地上...
我摸住自己個肚...仲飄緊紅色粒子出嚟個五個爪窿...
綽姿都望住我個肚...
『嗱...唔係我想賴吖...我呢個傷真係有影響㗎...』除咗真係痛之外...仲真係影響到行動㗎...
唔係嘅話...我一定可以喺俾魂導兵發現之前就解決咗佢...唔使綽姿幫手...