《香港傭兵》: [Day 24－三合成立] PART 11
喺成個升降機大堂...唔少裝修師傅停低手頭上嘅工作...呆望住我同綽姿...
「咩人嚟㗎？」
佢哋都口噏噏咁...
「就咁由𨋢槽跳落嚟㗎？」
又帶住疑惑嘅眼神...
「由幾多樓跳落嚟㗎？」
打量住我哋...
「唉...唔好理啦...呢度嘅人都怪怪地嘅...」
然後又開始繼續做自己嘅工作...
「係囉...都話咗呢度啲嘢怪怪地㗎啦...」
搬嘢嘅就繼續搬...
「唉...未嚟之前都話咗㗎啦...係見呢度好搵先嚟做咋嘛～」
抬嘢嘅就繼續抬...
「總之佢哋話咗見到乜都唔使理，做好要做嘅嘢就有錢收㗎喇！」
裝緊板嘅就繼續裝板...
總之就係各有各忙...冇人理我哋...
都係...普通嘅裝修師傅？
真係可以乜都唔理...繼續裝修？
我哋個Look咁奇怪喎...
由𨋢槽跳落嚟喎...
呢個地下研究所喎...
話唔理就可以唔理㗎喇？
咁奇怪嘅地方...就由普通嘅裝修師傅維修？
唔係吖化...
所以話就算香港有暴龍周街走，香港人都可以當係狗隻散步～
痴線㗎咩大佬...
綽姿見班裝修師傅唔理我哋，就都唔理佢哋咁直行直過...
我都跟住綽姿身邊行...一路行入通道...
通道嘅牆身...有啲都已經換好咗...有啲都仲封咗白色膠紙...
然後又見到有幾個師傅喺大閘度搞幾搞...望我哋兩眼...又繼續搞個大閘...
都真係有唔少...有好多...好多生命嘅氣息...
的確...除咗眼見...仲感覺到...
一落到嚟...企定喺升降機大堂之時...就已經感覺到...四周都有唔少生命嘅氣息...
呢啲生命氣息嘅主人...就係由裝修師傅身上發出？
我諗...就唔止...
再行多幾步...穿過幾道閘門...同幾個裝修師傅擦身而過...就行到嚟...以玻璃幕牆間開嘅房間...
望望一間間以玻璃幕牆間開嘅房間...裡面都有唔少人...整緊嘢...
有啲整緊電子儀器...有啲就拎住塊平板電腦撳撳撳撳撳...
係IT狗？科技人員？
我都唔知...不過就咁睇佢哋就唔係做緊研究工作...應該都係Set返好啲電腦...Set好啲WiFi...插返好晒啲線...Set返好啲設備...
我同綽姿繼續行...有幾間房都仲未有玻璃...又有幾個裝修師傅搬緊塊玻璃...又有幾個裝修師傅裝緊塊玻璃幕牆...
佢哋個個唔係望我哋兩眼...就係連兩眼都唔望...繼續做自己嘢...
然後再行多幾步...就見到兩個Full Gear守衛企埋一邊...
兩個守衛企定定咁望住我同綽姿行...行到佢哋身邊...
「咦係佢哋吖？」
「有收到通知佢哋會嚟咩？」
「之前有收過通知㗎咩？」
「我唔知吖...我都未見過佢哋...」
「我上次都係冇收過通知...佢哋就嚟咗做嘢...」
「咁唔知啦...反正上頭都係叫我哋唔好理佢哋㗎啦...」
「係囉～企喺度乜都唔使理就得㗎喇～」
咁睇嚟真係...班守衛...應該話負責呢度保安嘅部門...都冇權過問有關我哋SPIRIT嘅事...
咁都算好彩...真係少咗好多煩麻...
最起碼...我哋而家鍾意點行就點行...暢通無阻...
請君入甕...真係好有呢種感覺呢...
縱使我嘅觸覺幾咁差...都可以感覺得到...綽姿冇理由感覺唔到...
我哋真係仲要繼續？
明明覺得唔對路...都仲要繼續落去？
睇嚟...呢個世界上...真係冇一個係正常...
繼續行...跟住綽姿身邊...喺裝緊玻璃嘅裝修師傅身邊行...又望到玻璃房入面有男男女女喺度Set緊電腦...整緊電子儀器...
再繼續行...喺兩個Full Gear守衛之間穿過...穿過一道仲貼住白色膠紙嘅大閘門...行到過嚟另一個區域...
都係一個有唔少裝修師傅喺度搬緊玻璃...裝緊玻璃幕牆...又有唔少技術人員喺一間間研究室裡面整緊嘢...
繼續行...喺幾塊玻璃之間行...又同幾個男男IT狗...女女技術員擦身而過...
然後就行到嚟一間玻璃研究室...
我望住間研究室...仲記得...嗰晚喺呢間研究室入面...有具著住火嘅屍體...趴喺檯上...
我仲記得...嗰陣燒肉嘅...香味...比牛角更香嘅燒肉味...
果然...五觀六感之中...嗅覺係最敏感...
而家諗一諗...嗰陣撲鼻嘅燒肉味就好似再飄入我個鼻...
仲記得...早兩晚...我同阿月上山...喺掛滿星星明月嘅夜幕之下...煮牛扒...
雖然牛扒就唔夠人肉香...之但係都勾返起...
阿月...同阿月一齊...永遠都係最幸福...
「繼續行。」行喺我前面嘅綽姿見我企咗喺度發呆...就提一提我。
『係...』唔好發呆住...而家唔容許發呆...
而家嘅情況...仲係好不安...
雖然話喺度工作嘅人...不論係裝修師傅...IT狗...技術員定係守衛...都好似冇乜嘢咁...好正常又好平常咁做自己要做嘅工作...
我同綽姿都好似係...但實際上唔係...
我哋而家要做嘅...究竟係咩呢？
Owner話想知真相...就要去黑門...
咁黑門後面...究竟有啲乜？
有真相？
咁咩係真相？
應該好快就會知...
繼續跟住喺綽姿身邊行...由綽姿帶路...
再穿過幾個維修緊嘅閘門...與唔少裝修師傅擦身而過...又遇到一兩個待修嘅大閘...要繞路行...然後就行到...冇乜人嘅區域...
呢個係咩區域？我就真係唔知...
只係知...冇人...由頭先嗰個研究區域之後...人就越嚟越少...就只有兩三個守衛行過...守住...
行到嚟而家呢度...直頭一個人都冇...
『又會一個人都冇...』連生命氣息都...只有後面先有...
「話唔定係同黑色大閘門有關。」綽姿Keep住正常步速。
『因為...黑色大閘門比較特殊...唔俾人接近...連守衛都唔可以？』我有冇估錯？
「嗯。」綽姿點點頭，「呢個可能性好大。」
『咁我哋而家行過去...又會唔會有問題？』我望住離遠嘅黑色大閘門...
已經望到...上次入唔到...Owner話會搵到真相嘅黑色大閘門...就喺前面...
「有冇警報系統...又或者俾唔俾我哋接近...就要行到過去先知。」綽姿堅定不移咁望住黑色大閘門行過去。
行到過去先知...
咁如果真係有警報系統又或者唔俾我哋接近咁點算？
硬闖？
我諗應該都係...
都嚟到呢度...仲有乜嘢可以阻止我哋？
我同綽姿都望住黑色大閘門行過去...
當我哋都行到嚟深黑色嘅大閘前...
我同綽姿都望望四周...
四周除咗冇人...仲好似...冇乜警報系統...
喺天花板上...半圓球體嘅CCTV唔係爛咗...就係好似冇乜反應...
喺行過嚟嘅同時...我都留意到一路上都有技術人員維修半圓球體嘅CCTV...
仲未到呢度？
一個看似咁重要嘅地方...唔係優先搶修㗎咩？
綽姿見啲警報系統好似唔Work...就行上前...望清楚閘門...
我都跟上前...喺綽姿身邊...望清楚黑色閘門：『而家應該點做？』
望清楚...望清楚...深黑色...好似金屬嘅物質...有啲似...精神刀柄嘅...閘門...圓形大鎖...
鎖咗...可以點開？
用咩密碼...用咩方法開都唔知...
綽姿遞起左手...望住自己隻左手手心...再擰轉...望住自己隻左手手背...然後伸向黑色閘門上...圓形大鎖...
我望住綽姿隻左手...手背上...好似出現...黑色...紅色...越嚟越紅嘅...五角星...
五角星越嚟越紅...越嚟越光...然後就有紅色嘅粒子...由五角星飄出...
越嚟越多...越嚟越多紅色粒子由紅色嘅五角星飄出...好似被黑色圓形大鎖吸埋去咁...
無數咁多紅色粒子就由綽姿手背中嘅五角星...吸到埋去黑色圓形大鎖之中...
黑色圓形大鎖慢慢變成紅色...越嚟越紅...越嚟越光...而喺中間...就有個黑色嘅五角星...
當圓形大鎖越嚟越紅...越嚟越光...最紅最光之時...突然一閃...變回黑色圓形大鎖嘅一瞬間...中間個五角星紅光一閃後...消失...變回一個黑色圓形大鎖...
然後...
“咔！吱！”黑色圓形大鎖解開...大閘門打開...
『點...點會...』點解會...
「係用精神能量解開嘅鎖。」當大閘門打開後，綽姿就行入去。
係精神能量...解開嘅鎖？
我都跟喺綽姿身邊：『你點會...識得用精神能量解開個鎖？』
「我都唔知...」綽姿行多兩步，「我只係...好似見過...」
『你...見過？』我行多兩步...企定...『你有嚟過？』
「唔係...」綽姿都企定定，擰擰頭，「係好似...好似...」
係好似...好似有啲唔對路...
而家呢度...呢條著住紅光燈嘅通道...呢個空間...好唔對路...
“吱！咔！”背後嘅黑色閘門關上後...我哋都企喺原位...
好唔對路...由閘門打開嘅一瞬間...就已經覺得好唔對路...
因為...因為當閘門打開之時...就有大量氣息由窄縫湧出嚟...
好似決堤咁...好似有極大量精神氣息喺裡面...谷住谷住...一下子湧出嚟...
而且呢啲精神氣息...好雜亂...好...好似有好多個行者...同時散發出精神能量...
多到...大到...雜亂到...就算綽姿企正喺我身邊...我都感覺唔到佢身上嘅氣息...被整個空間嘅雜亂氣息所淹滅...
點解會咁...呢度...就好似上次嚟到...一落到嚟就感覺到...被大量雜亂嘅氣息所包圍...
比起上一次...更加誇張...
點解會咁...
綽姿望望左右...再頕天望地...望望整條通道...好似好唔自在咁...
冇錯...真係好唔自在...呢種雜亂嘅氣息...總係令人...窒息...
綽姿踏前一步...再行前兩步...
我就同綽姿肩並肩咁...一步一步...行前...喺通道之中行向前...
當我哋行多兩步...行多幾步...喺大約十米嘅前面...十字路口之中...右邊轉角就有個身影...行咗出嚟...
我同綽姿立即停下腳步...望住前面...一個黑色嘅身影...
黑色嘅身影都企定咁...擰個頭過嚟...望住我哋...
我再望清楚...呢個黑色身影...好似著住黑色嘅...輕皮甲裝...冇戴帽又冇戴頭盔面罩...係一個短髮嘅妙齡少女...
妙齡少女睇起上嚟都係十幾歲...
佢係咩人？喺呢做乜？
係呢度嘅研究人員？做研究工作？
當我都仲未諗到做乜嘢研究工作之時...妙齡少女雙眼發出紅光...左手同時亮出刺眼紅光手刀...
要...要進入戰鬥Mode喇？！