《香港傭兵》: [Day 24－三合成立] PART 09
望住擋風玻嘅紅光路障提示...仲有啲箭嘴都開始變成黃色...要求我減速...
我就放一放油...印一印Break...減慢車速...
保持住時速三四十公里咁行駛多一段距離...我就見到遠處...喺紅毛橋之前...有路障...仲有唔少人...
越嚟越埋...越駛越近...睇得清楚啲...已經見到路障分開咗左右兩邊...中間騰出路...俾我哋過？
應該就係...離遠已經見到手持長槍嘅天門守衛向住我哋招晒手...示意我哋駛過...
真係咁順利？
連停低睇睇都唔使？
一早已經安排好？
係邊個安排？
又係...宋伯伯？
我就保持住時速二三十公里...喺天門嘅路障...守衛之間駛過...
當我哋駛過路障嘅同時...我眼尾望一望...天門嘅守衛...
除咗著晒避彈衣...手持長槍之外...仲有幾個...著住...黑色長袍...
幾個著住黑色長袍...白髮嘅男男女女...坐埋一邊...企埋一邊...望住我哋架林寶駛過...
當中女嘅比男嘅多...
從LED倒後鏡望住佢哋...手上冇槍...身上冇避彈衣...就只有...黑色長袍...
越駛越遠...與天門嘅路障越嚟越遠...已經遠到得返一點咁細...遠到睇唔到...駛過錦田河...先發現遠處嘅元朗公路...
斷晒...架空嘅元朗公路...全部斷晒...
原來...同屯門嗰邊差唔多...
主要嘅公路斷開...防止外敵輕易進入...
好...
當我想再俾油之時...
“嗶！嗶！”擋風玻璃又出現咗啲紅光提示...
呢啲提示...呢啲圖案...又係...路障？！
“吱...”我繼續保持住時速三四十公里...再行駛多一段路...
唔使幾耐...又俾我見到...路障...
我再減慢車速...駛近多少少...就見到路障前...有幾個...著住黑色西裝嘅人...
黑色西裝友...佢哋係...國安局？
「拉起衫領...笠起頂帽。」綽姿一邊講...一邊拉起衫領...笠起頂帽。
『係...』我都單手控制住個軚盤...單手拉起衫領...笠起頂帽...
我再減慢車速...駛近多少少...就見到有兩個戴住黑超嘅西裝友...一左一右咁向我示意停車...
而喺佢哋嘅身後...仲有幾個黑超西裝友用長槍瞄住我哋...
“吱...依...”我就減慢車速...再減慢車速...慢慢停喺路障前...停定喺幾個黑超西裝友之間...
其中一個黑超西裝友向我示意撳低車窗...
我一撳低車窗...個黑超西裝友就望入嚟：「嗯？係你哋？」
我同綽姿都冇出聲...淨係望住前方...
黑超西裝友一邊向佢身後嘅同事示意放低槍，一邊繼續問：「又會喺呢邊...睇嚟深井...你哋要去邊？」
綽姿冇出聲...我都跟住佢唔出聲...
之但係...真係Work？
眼尾望望在場嘅黑超西裝友...個個都放下警戒...只係用上正常水平嘅戒備狀態...
對我哋...真係冇敵意？
真係唔使回答佢哋問題都冇問題？
「唉算啦...上頭都叫我哋唔好理你哋...過啦過啦。」黑超西裝友就退開...招手向我哋示意過。
我就撳返高隻車窗...一俾油...
“吱！依！吱～～～”立即衝過路障！
望住LED倒後鏡...班黑超西裝友越嚟越遠...遠到得返一點...遠到睇唔到...
「果然...」綽姿諗一諗，「我哋同國安局仲有關係...不過呢啲...應該只有先行者先知。」
『嗯...Owner都講得啱...但佢所指再過多陣就話唔埋係咩意思？』過多陣...又會點？
「唔知。」綽姿擰擰頭。
『係吖...』我揭返開頂帽，拉返低衫領，『不過又估唔到...只係差唔多一河之隔...就係敵方嘅路障...』
「喺國安局未接手之前...」綽姿揭返開頂帽，拉返低衫領，「應該係由警察駐守。」
『咁近唔驚㗎咩？』差唔多一河之隔咋喎...
「你指天門定警察？」綽姿望住前路問。
『梗係班警察啦～』班警察廢嘅～
對住平民百姓都要揸晒槍Full Gear仲要一大班對一兩個先敢衝埋去！
對住悍匪？都唔知縮撚晒去邊啦～
香港要靠佢哋維持治安真係仆得街！
咁多年...唔係因為香港人民質素高...罪案率先可以咁低...
完全唔撚關班垃圾警察事...
班垃圾警察都唔使做嘅～
日日行行企企～食飯幾味～
入蛇竇蛇就最勤力～
係估唔到...估唔到終於有反抗嘅一日...
香港人...反抗...
「或者係因為...」綽姿諗一諗，「對手係西貢獻命同天門嘅分別。」
『嗯？』有乜關係？
「班警察唔知西貢獻命早喺西貢攻防戰之後，就成為國安局嘅走狗。佢哋仲以為西貢獻命係比天門激進嘅革命軍...所以比較怕西貢獻命...而天門早喺屯門常開同天水圍城嘅時候，霸咗屯門同天水圍之後就冇大動作...所以班警察繼續以原有嘅策略對應天門。」綽姿一口氣講咗勁多嘢。
『所以話...班警察幾咁無知...』乜都唔知...柒撚懵懵...
「最起碼...班低級警員唔知。不過都好正常...」綽姿點點頭，「警察呢啲咁低下嘅部門...冇需要知咁多...俾佢哋知咁多...仲點會肯做。佢哋隨時都要犧牲...之但係佢哋又以為自己條命好矜貴...咁咪要瞞住佢哋。」
『哈～咁講法...我哋都幾似吖～』我俾一俾油...
“吱！”林寶再衝得快啲！
「嗯？」綽姿眼尾望住我。
『我哋同班警察...都係俾上面瞞住咋嘛～』我哋...行者...
只需要知道自己需要知道嘅事...其實都係怕俾我哋知道...我哋將會成為犧牲品...
為咗唔俾我哋逃避...作反...就只需要我哋知道需要知道嘅事...
以為自己好重要...係完成委託嘅一部份...
事實上...到你要面臨犧牲...先知道原來你嘅犧牲先係委託嘅一部份...
呢啲就係神秘地下組織嘅控制手法？
我又會唔會...知得太多？
我而家開始明白...明白我哋只係棋盤上嘅一隻棋子...
唔理你係兵...主教...騎士定係城堡...
每行一步...好似都係為齊上齊落而行...
而事實上...當要你為大局犧牲...你就要犧牲...
冇人想做犧牲嗰個...所以就唔可以俾你知...你會係犧牲嗰個...
綽姿冇出聲...彷彿好似思考緊同我一樣嘅諗法...
“吱！吱～”踩行油...繼續跟住路上嘅導航箭嘴...衝返上高速公路...
時速百幾二百...二百幾三百公里咁衝...喺冇車嘅高速公路上衝...真係好爽...
不過越衝得快...爽嘅時間就越短...
好快...就見到有車...
高速公路上...開始有其他車輛行駛緊...
“吱！”我就騎住喺快線...極速飛馳...
當前面有車擋住之時...導航箭嘴由綠色漸變成黃色...我並冇打算減速...
“吱！”我再踩一踩油...追得貼啲...跟得貼啲...
貼住前車嘅屎忽...差唔多要推埋去...
前車終於頂唔順...切入中線...
我見前車一入中線...
“吱！”就立即俾油...
揸得咁慢就唔好阻鬼住晒啦...
話口未完...前面又有架綠的...
死人的士佬...揸得咁慢又鬼咁鍾意騎快線...
今次我唔隊埋去...索性Cut過中線...
反正啲死人的士佬都唔理你隊唔隊埋去...死都照騎住條快線...
“依！吱！吱～依！吱～”我就喺高速公路上左穿右插...爬的士頭...爬私家車頭...爬七人車頭...爬貨車頭...
冇錯...不知不覺路面越嚟越多車...
不過都阻唔到我...Keep住時速二百幾公里咁飛住去...
“吱！”唔使幾耐就過咗新田...
“吱～”唔使幾耐就過咗古洞...
“依！”唔使幾耐就嚟到粉嶺...
“吱～”唔使幾耐就過咗林村...
好快...雖然一路上都有唔少車...但係都總算順暢...
當差唔多去到大埔之時...我都減返慢車減...跟住路上嘅綠色導航箭嘴...
留意一下...路面嘅情況...
有冇奇怪嘅車輛喺左右兩邊...喺後面跟住...
話晒頭先開得咁快...話唔定會吸引到其他人注意...
唔知會唔會有...警察...
好彩嘅係...冇車跟住我哋...
總算順利...都真係...好順利...
之但係...究竟科學園有啲乜嘢呢？
越接近科學園...腦裡就越多問題...
Owner淨係話科學園嘅黑門有真相...有乜真相先得㗎？
再加上...而家嘅科學園...又會係點呢？
上次滅絕異常生命體之後...裡面會係咩情況...
點都要...過咗去先知...
“吱！吱～”繼續跟住路上嘅綠色導航箭嘴飛馳...
騎住快線...跟住前車...然後就差唔多...駛落去創新路...
喺創新路揸得慢少少...再慢少少...應該喺邊度停好...
轉到入科進路...然後喺...香港墨爾文國際學校對出停低...
『喺呢度...行過去好唔好？』我都係問問綽姿意見...
「嗯...」綽姿點點頭，解開安全帶，「始終都唔知嗰邊咩情況。」
『我都係咁諗...』我都解開安全帶...
唔知嗰邊咩情況...喺比較遠嘅位置開始...一邊視察...一邊慢慢接近...會安全啲...
“啪...啪...”落咗車之後，我同綽姿都望望附近...
唔係好覺有人...有人都係喺國際學校裡面...
國際學校裡面有個看更望咗過嚟...
我哋都望住個看更一陣...然後個看更就冇理我哋...
『我哋由邊度行過去好？』我再望多兩眼...有一架豪華房車由天賦海灣駛出...
「由單車徑嗰邊。」綽姿就雙手插住褸袋，向住海邊方向行。
我都雙手插住褸袋...跟住喺綽姿身邊...
一路行...一路留意住四周...路面...行人路...旁邊嘅天賦海灣...
唔算有太多人...都係得幾個女仔行過...
然後我哋就行到出嚟單車徑...
或者係因為平日嘅關係...單車徑一帶亦都唔算多人...就只有幾個男男女女跑步...又有幾架單車駛過...
我就同綽姿吹住海風行...一邊留意住四周...一邊向住科學園方向行過去...
『好似...一切都好正常...』雖然人唔太多...但總算有人...
「嗯...」綽姿點點頭，眼尾望一眼架Road Bike駛過，「我仲以為...會封。」
『嗯...』我又望一望有對情侶各自踩架Road Bike駛過，『我初頭都有咁諗過...我仲諗住...呢邊一帶都會封咗...』
頭先駛到過嚟...我仲諗會唔會彈出前方有路障嘅提示...
『會唔會係...已經搞掂好？』我望住遠處...又有三架Road Bike踩緊過嚟...
「發生咁大件事...會咁快搞掂？」綽姿都同我一樣...望住三架Road Bike越踩越近...
『真係唔知...表面係私人...』我等到三架Road Bike喺我哋身邊擦身而過，「實際係政府...係支共嘅科研中心...仲要有地下研究所...研究啲唔知乜嘢生物科技...」
「喺一個咁近民居嘅地方做呢啲嘢...不過都冇人會理。」綽姿擰擰頭。
『嗯...或者就係因為冇人會理...所以就算有幾奇怪嘅事發生...都好似乜事都冇...活喺平行時空一樣...繼續正正常常咁生活...』要喺一個痴線嘅世界扮正常咁生活...
究竟係呢個世界痴線...定係啲人痴線...我真係唔識分...