《香港傭兵》: [Day 24－三合成立] PART 03
一尾同片翼...呢兩個大人物...
羅羅咬住下唇，諗一諗：「我仲諗住喺交收嘅時候，佢兩個就算唔係一齊出現...最起碼都有片翼到場吖～點知到最後都唔見人...就只有一班先行者...雖然班先行者都唔簡單...」
只有一班先行者...唔簡單嘅先行者...
突然，羅羅古古惑惑咁打量住我：「講起唔簡單...你哋都好唔簡單喎～」
『吓？』咩...咩我哋好唔簡單？
羅羅靠近我多一點：「你哋兩個...唔單止係殺得最多...仲要多出好多好多～」
『呃...』係咩...有啲咁嘅事咩？
老老實實...我就真係冇乜印象...
其實...講咗咁耐...我對尋日執行強迫委託真係冇乜印象...
只係...只係記得...我有殺過人囉...殺過西貢獻命嘅光頭佬...
但好老實...期間嘅行動...我真係...冇乜印象...
只係尋日發生...但就冇乜印象...就連零零碎碎都講唔上...
點...點解會咁㗎呢...
羅羅又冷眼咁打量住綽姿...
綽姿回返個冷眼俾羅羅：「唔好咁望住我。」
羅羅立即谷起塊面豬登，嬲嬲豬咁望住日倫：「肯定係因為你呢個調查型行者手腳慢啦！」
日倫一面無辜：「又關我事？唔係我嘅情報...你都搵唔到咁多人嚟殺啦～」
羅羅扭晒計咁：「唔理吖唔理吖！我係都要入晒你數㗎喇！」
日倫無奈咁擰擰頭：「唉...任性嘅小女孩...」
羅羅冷眼望住日倫：「咩吖...你講咩吖...你呢個手腳慢嘅調查型行者...」
日倫回返個冷眼俾羅羅：「你唔好搵我買情報...」
羅羅谷起塊面豬登：「我有俾Sil㗎！」
日倫恥笑住羅羅：「我計平咗你啦～喺出面你實買唔到吖～」
羅羅翹起對手：「好叻咩！哼！」
『呃...西貢獻命已經被滅口...冇證據去證明國安局做唔見得光嘅嘢...咁跟住...應該點...』都係傾返啲正經嘢...
「跟住...」就喺日倫合埋對眼諗一諗...
檯面上部電話震兩震...
係...我部電話...
日倫、綽姿同羅羅都拎部電話一睇...然後三個都皺住眉...
『做...做咩吖？』我...我又係唔係應該落床拎部電話睇睇...
綽姿將放喺檯上部電話拋俾我...
『唔...唔該...』我一望住個Mon...就已經見到有個提示訊息彈咗出嚟...
我再睇清楚啲...上面寫住...
『緊急委託...留在原處...』又有...強迫委託...
日倫望住部電話：「睇嚟...大家都係一樣...」
羅羅同綽姿都點點頭...
日倫撳撳部電話：「真係估唔到...咁快又有緊急委託...」
『係咯...尋日先接完...而家又...』真係接二連三...
日倫再撳兩撳部電話，皺皺眉：「而且個委託...淨係話要留喺原處...」
羅羅都望住部電話，點點頭：「嗯...我都係...第一次...收到咁奇怪嘅強迫委託...」
綽姿就唔出聲咁望住部電話...
日倫望實部電話：「仲未有內容...」
未有...內容...
我都解鎖...打返開個SPIRIT App...睇返委託嘅內容...
真係...等待通知...
唔出奇吖...日倫都話未有內容...我就更加唔會睇得到啦...
至於...今次強迫委託...有幾多成員參與...
我就撳入成員一睇...都係睇唔到...
『你哋...睇唔睇到有幾多成員參與？』我睇唔到...佢哋又睇唔睇到呢？
日倫擰擰頭：「睇唔到...」
羅羅同綽姿都擰擰頭...
『連你哋都睇唔到...』咁即係點吖...
羅羅咬住唇：「究竟有幾多人...範圍又有幾大...」
『每個人只需要...知道自己需要知道嘅事...就足夠...』突然...我諗返起宋伯伯曾經有咁講過...
日倫、羅羅同綽姿都打量住我...
『冇錯...我哋一直都係咁...一直都係只需要...知道自己需要知道嘅事...我哋而家...只要知道...要留喺原處...其他人...都係一樣...係停留...係移動...全部人都只係知自己要做啲乜...由上面安排...但...目的係乜嘢...我哋...唔知...唔需要知...』一直...一直都係咁...
以往一直都係以委託名去得知個委託要做啲乜...
縱使個內容都係列出自己有乜任務要完成...
但今次...就連委託名都冇講要做啲乜...
就只有留在原處...
日倫點點頭：「冇錯...一直都係...之但係...咁嘅委託名真係第一次見...根本就唔知要我哋做啲乜...」
『你終於覺得有問題...』我打量住日倫...
日倫冇出到聲...望住我...諗一諗...
『每個人只需要知道自己需要知道嘅事就足夠...到用完即棄呢？』西貢獻命都唔會知自己做咗Condom...
日倫擰擰頭：「咁係基於對決策人冇信心...」
『我哋而家仲有信心咩？』我打量住日倫...羅羅...綽姿...
佢哋三都默不作聲...
『其他人可能仲有...話唔定全部人都仲有...但我哋四個唔同...我哋...知得太多...』我哋四個...比起其他人...其他行者...知道啲...唔應該知道嘅事...
我哋四個...唔止只需要知道自己需要知道嘅事...
日倫諗一諗：「你係指西貢遺址...」
『唔止...唔止西貢遺址...仲有短白髮男...ADAM產生出嚟嘅副產物黑球...我哋SPIRIT同解放軍嘅合作...抽取黑物質...神秘工廠...反目...都係我哋唔應該知...』唔應該...唔應該...
日倫諗一諗...
『其他行者應該唔會知道...就算有行者知...都應該只有先行者...仲要係唔簡單嘅先行者...』就好似...一尾...片翼...
羅羅都諗一諗...
『我哋就係因為知得太多...先會惹到片翼嘅注意...指派我哋去執行機密嘅強迫委託...』先派綽姿入西貢遺址殺短白髮男...然後就係派我哋去破壞神秘工廠...
綽姿都諗一諗...
『我哋就係知道箇中關係...知道有關ADAM嘅線索...』ADAM...
大家都諗一諗...
『ADAM...所有都關於三原核之一嘅ADAM...只係知道皮毛...都知得太多...』只係皮毛...就只係皮毛...
日倫點點頭：「三原核...ADAM...被我哋SPIRIT搶走...」
『SPIRIT一直都唔想俾我哋知...但我哋知...就係唔知佢哋知唔知我哋知...』我哋四個...
日倫再點點頭：「話唔埋...」
羅羅咬住唇：「知唔知都好...我哋都要聽指示做...唔係嘅話...會更麻煩...」
我哋三個都望住羅羅...點點頭...
都係嘅...我哋已經知道啲唔應該知道嘅事...假如仲唔聽聽話話...真係唔知會對我哋點...
『咁我哋而家應該點做？乜都唔理坐喺度？』留在原處...
日倫帶住微笑擰擰頭：「又唔使真係坐定定乜都唔做嘅～應該可以出去視察～」
視...察？
羅羅都帶住微笑點點頭：「嗯嗯～所謂嘅原處...我估就係屯門呢度～」
原處係...屯門...
日倫都點點頭：「以我估計都應該係...雖然唔知其他成員...但我哋四個就應該係喇～你點睇吖綽姿？」
綽姿點一點頭：「嗯...就算唔係整個特殊區...都應該係屯門範圍以內。」
日倫點點頭：「咁好啦～我哋以兩人一Team出去視察...」
羅羅就搶住講：「今次我要同飛揚哥哥一Team！唔要你呢個慢手慢腳嘅調查型行者阻手阻腳～」
日倫無奈咁點點頭：「唉...你鍾意啦...咁我同綽姿一Team...有冇問題？」
綽姿擰擰頭：「我冇所謂。」
日倫就拍拍手：「就咁決定啦～飛揚使唔使梳洗食啲嘢先吖？」
『食嘢就唔使喇...係要洗梳姐...』反正...一啲餓嘅感覺都冇...
日倫點點頭：「咁就等你梳洗完就出發～」
『嗯...』梳洗完...
羅羅立即翹實我隻手臂，甜絲絲咁望實我：「等我幫你刷背吖～」
『刷...刷背...唔使喇唔使喇！』幫我刷背...即係玉帛相見？！
唔得唔得！我呢啲血氣方剛嘅大哥哥好易扯旗㗎嘛...
一陣俾羅羅見到...又俾佢挑逗幾嘢...好易做錯事㗎嘛...
羅羅仲要古古惑惑咁望實我，用個小饅頭壓埋嚟：「怕咩羞姐～怕咩羞姐～」
『唔係怕羞呢...唔係咁好呢...』
「有咩唔係咁好姐～」
『真係唔好...真係唔使...』
「好啦好啦～」
『唔好啦...唔好啦...』
幾經辛苦...終於俾我甩到身...入浴室梳洗...
“灑！”暖水由頭流到落腳趾尾...
呢個浴室...同阿月一齊生活...
喺未來生活咗廿幾日...就總係好似記唔起...記唔起我哋嘅屋企...
明明都有經過...都有路過...但就醒唔起...我哋嘅屋企...就係呢度...
點會咁...點解好似一直...有好多嘢都唔記得...
算啦...記唔記得都好...而家都係要...面對返面前嘅事...
ADAM...想返去就要靠ADAM...
而家知道...ADAM喺我哋SPIRIT手中...
之但係...而家知道ADAM喺我哋SPIRIT手中都冇用...只係有少少線索都被盯上...
冇錯...知得太多...關於SPIRIT唔想俾人知嘅事...ADAM...三原核...
好快手咁梳洗完，出到嚟已經見到羅羅同日倫都咬住生命麵包。
綽姿就靜靜咁坐定定...撳撳電話...
日倫就咬住生命麵包，行去個櫃...拎咗...四支精神液出嚟...
日倫將精神液都交到我哋手中：「帶埋去...」
『嗯...』我望望手中支精神液...
係Level 1...
日倫戴齊裝備...著埋件大褸：「始終都唔知出面係咩情況...以備不時之需～假如委託有更新...再視乎需要先再拎高啲Level嘅精神液。」
『嗯...』委託更新...視乎需要...
究竟委託要我哋做啲咩呢...又幾時會有更新呢...
睇嚟就只有...等...
一邊等...一邊出去視察...就係而家我哋可以做嘅事...
羅羅同綽姿都拎齊嘢...著返件大褸...
我都著返件行者長袍...綁返把匕首喺大髀...插返把精神刀柄喺腰間...著返件黑色大褸...袋返好部電話...Level 1精神液...帶齊所有嘢...著埋對鞋...
日倫就打開大門：「出發。」
我哋一行四人落到嚟街上...望望四周...望望滿目瘡痍嘅Vcity...
日倫指指市中心方向：「我哋行呢邊。」
羅羅就翹實我手臂，指指新墟方向：「咁我哋行嗰邊啦～」
日倫點點頭：「嗯～咁有咩事就電聯啦。」
羅羅帶住甜絲絲嘅微笑點點頭：「冇咩事就唔好電聯喇～」
吓？點解我總係覺得好似...怪怪地咁...
日倫同綽姿點點頭後，就向住市中心方向行。
望住日倫同綽姿嘅背影越行越遠...
羅羅用力一翹，成個小饅頭就壓晒落我手臂：「又可以同飛揚哥哥拍拖喇～」
吓？乜...乜係咁㗎咩？