《香港傭兵》: [Day 24－三合成立] PART 01
喺夜幕之下...坐喺...一大片草原上...只有天上嘅明月...同面前嘅火堆作照明...
呢度...係邊度...
望望四周...遠處有唔少高高嘅大樹...
擰轉頭一望...背後不遠處又有一棟棟...高樓大廈...
高樓大廈都好似...荒廢咗好多年...外牆都掛滿蔓藤...
而雖然係夜晚...但眼前嘅景象...總係好似...好似有...薄薄一層...藍藍地色...
眼前所見...總係好似藍藍地...藍藍地...
而喺身邊...仲坐咗一個...男人...
男人面上有鬚根...皮膚粗糙...睇起上嚟都有三十幾歲...
而男人身上...著住...輕皮甲裝...
唔止喺佢身上...就連我身上都係...
睇清楚啲...護手...護碗...護臂護腿護肩護胸護甲...全部都係以皮革製造...
一樣...我同個男人...都著住同一種輕皮甲裝備...一齊坐喺...火堆前...
點解...點解會...
男人突然開聲：「你知道嘛...喺失去能源之前...呢度係一個繁榮嘅都市～」
喺失去...能源之前？
咩能源？
男人繼續講：「好繁榮...真係好繁榮～科技發達～先進嘅大都市～已經喺呢個世界發展成熟咗過百年～可以話乜都有～只要你有...錢...」
只要有...錢...
男人望望背後...荒廢已久嘅高樓大廈：「有好多人...為錢而努力...為錢而向上爬...」
為錢而...向上爬...
男人再望返火堆：「但就算點爬...都爬唔到去上等...」
『上...等...』咩係上等？
「嗯...」男人望住火堆點點頭，「以前呢度...有上中下三等人之分...」
『上...中...下...』三等人...
「係當時嘅政權...控制人民嘅手段...」男人帶住無奈嘅微笑...
『政...權...』控制...人民...
「分等級係全面控制人民嘅其中一環...」男人眼定定望住堆火，「而最主要嘅係...全方位主動式防禦系統...」
『全方位...』主動式隊禦系統？
係咩嚟？
面前堆火燒得唔算猛烈...又唔算好光...但久唔久都會發出“吱...啪...啪...吱...”聲...
「當時我仲細...唔知道個系統有幾咁可怕...」男人擰擰頭，「只係知道...佢係用嚟保護上等人...只要有下等人或中等人對上等人作出任何攻擊之前...會主動將下等人或中等人爆頭...」
『爆頭？！』點...點爆？
「嗯...」男人點點頭，「嗰時我都係睇到新聞報導先知...都未親眼見過～」
『新...聞...』
「嗯...」男人又點點頭，「一啲將唔同地方嘅事收集再發放嘅機關～」
『調查工作？』我有冇理解錯？
「類似啦～」男人帶住微笑點點頭～
『咁團長嗰陣有冇做過調查工作？』我追問團長...
「我？」團長好好奇咁笑笑口，「我嗰陣時仲細...仲係細路仔～」
『哦...』仲係細路仔...
「我嗰陣時呢...」團長諗一諗，「仲住喺...最東邊嘅地方...」
最東...邊...咪即係...
「嗰陣時...嗰度都住咗唔少中等人...」團長對眼好似充滿住...影像...
『中等人...團長都係中等人？』我再追問團長...
「都算係...」團長帶住微笑點點頭，「我父母係官嚟嘅～」
『官...』
「嗯...」團長點點頭，「政權嘅人...」
『團長嘅父母...都係有份監控人民？』官...監控人民嘅人...
「咁又唔可以話有份嘅...」團長擰擰頭，諗一諗，「我父母都係啲細官嚟姐...權力唔大～」
『哦...』權力...有分大細...
「我細個就一直都住喺裡面...直至到...恐襲...」團長對眼又好似充滿住影像...
『恐...襲？』咩係恐襲？
「嗯...突然有一班好奇怪嘅人...喺城裡到處殺人...又有大爆炸...死咗好多...好多人...」團長眼定定咁望住堆火...
『嗯...』呢啲事...唔係經常發生？
由我一出世...到而家...每日都發生...
唔係殺人...就係被殺...
喺我有印象嘅一刻...我第一樣拎喺手嘅...就係匕首...
細細個除咗認字...就係認住人...迎接死亡嘅一刻...
捉到天上人返嚟...處決佢哋...
睇住佢哋面上流露出恐懼嘅神色...大嗌...慘叫...喊住咁求饒...
一直感受住死亡...一直求生...
守護陣地...支援...望到同伴嘅屍骸...復仇...追殺...屠殺...再被追殺...逃命...死守陣地...
每日都發生...每日都不斷咁重複又重複發生...
殺人與被殺...就叫...恐襲？
「嗰陣時...我真係好驚...真係好驚...」雖然團長口講話驚...
『團長都會驚？』但我又冇喺佢身上感覺到驚...
「哈哈～」團長笑兩聲，「嗰陣時唔同而家吖～雖然嗰陣時都係地獄...但同而家嘅地獄又唔同...」
我完全唔理解團長句話嘅意思...
矛盾之餘...仲有好多唔理解...冇經歷過...
「當時我...真係乜都諗唔到...淨係識得喊...然後我父母都被殺...都仲係識得喊...然後喊到冇咗意識...唔知發生過咩事...到醒返嘅時候...我已經喺醫院...」
喺醫...院...
「喺我床頭...放咗把...」團長由大髀拔出匕首，「匕首...就係呢把匕首...醫護人員話係喺我身邊搵到...我諗...係救我嘅人留低...」
我同團長一齊望住...黑色刀身...銀色刀刃嘅匕首...
而黑色嘅刀身上仲刻有...“SPIRIT”...
我都由大髀拔出匕首：『係我哋嘅...匕首...』
望一望自己手上把匕首...又望一望團長手上把匕首...
兩把造工都係一樣...連字樣都係一樣...
「嗯...」團長點點頭...
『係我哋嘅人...』救咗團長？
「我都唔知～」團長帶住微笑擰擰頭～
『團長都唔知？』團長應該係...知得比我哋多...多好多...
「我唔知道...嗰陣時...我哋成立咗未...或者成立咗...或者喺更早之前就成立咗...但係唔見得光...係地下組織...」團長望住自己手上把匕首。
『我哋...SPIRIT...』係地下組織...
「老實講...我真係唔知...」團長擰擰頭，「我並唔係創立SPIRIT嘅成員...其實我都唔知邊個創立...喺我之上...仲有幾多人...我都唔清楚...」
『團長嘅身份...都唔知上面有幾多人...』我哋有...咁龐大咩？
「哈哈～」團長大笑兩聲，「你唔好睇我係團長就好大粒先得㗎～」
『殊...』團長笑得有啲大聲...
「噢...對唔住...」團長立即細聲返啲，「一時唔覺意...大聲咗...好易俾敵人發現...」
『嗯...』的確...
我立即提高警覺...留意四周...留意有乜風吹草動...
應該冇...冇其他人喺附近...
團長眼尾望咗四周一眼，繼續講：「我都係之後先加入...」
『之後先加入？』係指...
「冇錯...喺恐襲之後冇幾耐...有一日...能源突然消失得無影無蹤...冇咗電能...仲有啲高能量嘅能源都用唔到...發動唔到...火...都只可以勉強燃燒起嚟...」團長用手上把匕首指指面前堆火...
電能...高能量...係乜嘢嚟呢？
「嗰一日...有人稱之為審判之日...」團長點點頭...
審判...之日...
係咩人審判...又要審判咩人...
團長繼續講：「審判之日之後...高科技用唔到...毀滅性嘅武器用唔到...被壓制多時嘅下等人終於可以反抗...」
下等人...反抗...
「只可惜...下等人都團結唔到...分成好多唔同組織...各門各派...而當時嘅上等人亦趁機帶住班中等人向上逃走...」 團長用手上把匕首向天上指指...
『係...天上人...』
「冇錯...」團長點點頭，「天上人...本來就係中等同上等人...」
原來...天上人嘅由來...
團長繼續講：「上等人帶中等人上去幫佢哋建立天上王國...想繼續居高臨下咁統治世界...真係可笑～」
『佢哋係點建立...』上等人係點樣要中等人幫佢哋建立天上王國...
「我點知咁多姐～」團長擰擰頭...
『...』連團長都唔知...
「都唔慌係好嘢啦～」團長帶住恥笑擰擰頭，「以上等人嘅手段～」
『咁...點解團長冇一齊上去？你都算係中等人嘅後裔...』我打量住團長...
「我？」團長好奇咁望住我，「我父母死咗...嗰陣又鬼咁亂...我跟住啲人走難咁四圍走...都唔知自己走咗去邊～然後就有一日...一個夜晚...喺街角又凍又餓又冇嘢食...就有人嚟問我加唔加入佢哋喎...呢個係唯一可以生存落去嘅路...我當然加入啦～」
『就係SPIRIT...』
「嗯～就係SPIRIT～」
『哦...』原來團長就係咁樣加入SPIRIT...
「不過點都好...審判之日之後...下等人真係唔夠團結...」團長無奈咁擰擰頭...
審判之日...團結...
『咁點解會有審判之日...』我仲係唔清楚審判之日之前...呢度係點樣...
但我都想知道...係邊個令呢度變成而家咁樣...
「你睇唔睇到嗰邊？」團長用手上嘅匕首...指向遠遠...遠遠嘅...黑牆...
『係禁地...』我望住...黑牆...一幅超巨型...高高...直到天際嘅黑牆...
黑牆嘅頂上...仲有一層厚厚...黑色...深淵一樣黑嘅黑雲蓋住...
嗰度...我哋稱為禁地...
我哋嘅大本營...好接近嗰邊...但絕對禁止向嗰邊調查...
團長一直用手上把匕首指指...指指：「被黑牆包圍嘅裡面...喺審判之日之前...我哋叫佢哋做...三合...」
『三...合...』
團長繼續用匕首指指...指住黑牆：「冇人入得到去...唔知裡面係點樣...咩情況...但佢哋久唔久就會出嚟...擄人勒索...已經...都維持咗差唔多成百年...」
『擄人...勒索...』
團長全神貫注咁望住黑牆：「喺審判之日之後...失去能源之後...佢哋就冇再出過嚟...」
『喺審判之日之後...』失去能源之後...就冇再...出過嚟...
團長凝視住黑牆：「雖然我哋禁止調查嗰邊...之但係...我總係覺得...所有嘢都同佢哋有關...三合...」
所有嘢...都同黑牆裡面...三合有關...
三...合...
一直都冇人講嗰邊嘅事...
半句都冇...
大家都唔會主動提及黑牆嘅事...甚至連望...都唔會望多一眼...
喺大本營...我記得有一次...我對黑牆好好奇...被黑牆吸引住...呆望咗過去...
然後就有人同我講...唔好理嗰邊咁多...嗰邊嘅事係唔關我哋事...
然後...我只會偷偷望...趁冇人嘅時候...趁明月掛在夜幕之時...
三合呢個名...我都係第一次聽...
三合...三合...
團長收返好把匕首，拍一拍我膊頭：「你會解開呢個迷團～你會係一個...出色嘅執行者～」
我會係一個...出色嘅...執行者...
剎那間...整個空間由薄薄一層藍...變成灰色...草地都變成灰色...火堆中嘅火焰都變成灰色...分裂...分裂...
分裂到團長對我讚賞嘅手指公...充滿信心嘅笑微容之中...粉碎...飄散...