《香港傭兵》: [Day 22－現在未來] PART 06

係逆行者...短白髮男人都係...逆行者！

冇錯！西貢獻命本來就同逆行者有關...佢係逆行者亦都唔出奇！

突然！有道力由短白髮男人身上爆出！

『嗚呀！』我被推到彈飛到撞埋牆！

短白髮男人綁住手手腳腳嘅繩都斷開晒！企咗起身！



而日倫、綽姿同羅羅都已經拔出精神刀！亮出紅光刀刃！

精神化...佢哋都已經精神化...我都要...

我左手插入褸袋...先發然...

仆街！冇精神液！

精神液...冇精神液喺手...邊度有精神液？！



日倫、綽姿同羅羅同時向短白髮男人作出攻擊！

但只見短白髮男人左手捉住日倫同綽姿把紅光刀刃...右手捉住羅羅把紅光刀刃...赤手空拳都可以捉實三把紅光刀刃！

要搵精神液...邊度有精神液？！

短白髮男人360度凌空自轉一踢！就將日倫佢哋三個同時踢開！

呢度...呢間房...冇...乜都冇嘅房間唔似會有精神液...要去出面...要去其他房...



當我想跑去門口之時...

「喝！」短白髮男人左手一爪！

“嗡！吱！”日倫就以紅光刀刃擋住！

日倫以紅光刀刃擋住爪擊...但就被撳咗埋牆！擋住咗我嘅路線！

短白髮男人嘅能量好大...大到壓住日倫...壓埋去牆身...紅光刀刃嘅能量都就快要被切斷！

與此同時，綽姿同羅羅就一左一右向住短白髮男人背脊一砍！

就喺兩把紅光刀刃都仲未掂到短白髮男人背脊...短白髮男人推開日倫...一個轉身用左手前臂一擋！擋住兩把紅光刀刃之時，再順勢一Fing！綽姿同羅羅同時飛開！

綽姿同羅羅撞一撞天花板再跌返落地...站穩陣腳...日倫就趁機偷襲！



但日倫都未揮到刀...短白髮男人就一個轉身順勢左直拳！一拳直轟去日倫面上！

日倫成個人就向後一飛！

“砰啪！”成隻木門就被日倫撞到爛晒！

綽姿同羅羅立即同時向短白髮男人攻擊！

短白髮男人就赤手空拳咁與手持紅光刀刃嘅綽姿同羅羅交戰！

我就立即跑出房！扶起仲瞓喺地上嘅日倫：『點吖？你有冇事吖？』

日倫勉勉強強咁企返起身：「冇...暫時都冇...」



我冇等日倫講落去：『你有冇精神液呀？』

「冇...我都冇精神液喺身喇...你快啲去...」日倫話都未講完就一手推開我！

“嗡！吱！！！”一刀就幫我擋住短白髮男人嘅爪擊！

要搵...要快啲搵...

精神液...我記得...喺羅羅間房...個矮櫃！

“嗡！嗡！吱！吱！吱吱吱！！！”三個手持紅光刀刃嘅身影就與赤手空拳嘅短白髮男人激戰起嚟！

牆身不停咁出現刀痕！爪痕！

“砰啪！”連木門都被短白髮男人一拳打爆！



要快啲...快啲去羅羅間房...

當我正要打開羅羅間房隻木門之時...我感覺到...身後...

我轉頭一望...就見到短白髮男人衝向我面前...

短白髮男人一爪爪埋嚟！我一避！

短白髮男人再爪！我再避！

仆街做乜無啦啦轉咗Target打我㗎？你唔係被綽姿、羅羅同日倫圍毆㗎咩？！

我一邊避住短白髮男人嘅爪擊...一邊偷偷望向佢身後...綽姿...羅羅同日倫都跪咗喺地上...仲未起得返身...



佢哋三個仲要口噴紅色粒子...好似好傷咁！

呢個短白髮男人...赤手空拳都打到佢哋咁傷...真係唔講得笑...

而家嘅我冇精神化...中佢一爪嘅話...會唔會立即分屍？！

我一邊避！一邊後退！

退到出廳之時...短白髮男人一個右直拳打埋嚟！

我已經嚟唔切迴避...就只可以用雙手交叉擋！

係就係擋得住！不過...

『嗚呀！』我成個人就向後直飛去梳化！

痛...好痛...雙手痛到震晒...痺晒...好似唔屬自己咁！

不過總算好彩...呢一拳嘅力量都唔算好大...總算擋得住...但下次...唔可以再有下次...下次再中...話唔定成個人散晒！

講口未完，短白髮男人一個Rider Kick飛踢埋嚟！

我立即一個轉身避開！

“砰啪！”成張梳化粉碎！

嘩嘩嘩...真係粉碎㗎...如果頭先避唔開...我真係已經粉身碎骨咗喇！

羅羅立即以忍步一閃斬向仲喺梳化殘骸之中嘅短白髮男人！

短白髮男人轉身一踢！

“嗡！吱！”踢向紅光刀刃！

羅羅立即被踢到飛開！落地嘅同時插把刀落地都要後跣多幾步！

要搵精神液...廳有冇精神液？！

綽姿同日倫同時向短白髮男人作出攻擊！

“嗡！吱！嗡嗡！吱吱！！！”紅色嘅刀光劍影閃過不停！

短白髮男人一直都係以拳爪腳踢咁招架！

唔係唔係...如果話係招架...不如話係進攻！

要快啲搵...搵精神液！

“嗡！砰！吱！啪！嗡嗡！砰吱！！！”喺廳啲傢私都差唔多俾佢哋斬爛打爛踢爛踩到爛晒！

而牆身都劃上唔少爪痕同刀痕！

啲櫃都爛晒...都係冇...都係唔見有紅色嘅物體...冇精神液...

一定要去房...去返羅羅間房！

就喺我想再次走返去羅羅間房之時...日倫同綽姿同時被短白髮男人打到飛埋牆！

短白髮男人以爪擊向我極速接近！

同時我踩到地上嘅木塊...一跣...失去重心...

今次弊！

就喺短白髮男人正要一爪插去我身上之時...羅羅飛撲過嚟攬實我...

「呀！」羅羅背脊被短白髮男人一爪插中！

羅羅...幫我...擋...

短白髮男人一爪Fing開羅羅！羅羅撞埋牆後瞓喺地上！

羅羅...羅羅...

短白髮男人一手捉住坐喺地上嘅我...舉起左爪！

我被短白髮男人秤到頂帽都揭開...衫領都拉低...

短白髮男人停晒手...定晒身咁眼定定咁望住我...

望住短白髮男人對眼越擘...越大...越擘越大...一對綠色眼睛擘到大一大...

「點...點會...」短白髮男人帶住驚訝嘅神色...口震震咁...

點...點會...

短白髮男人面上嘅驚訝神色不減...反增...

一對綠色眼珠震震...望實我...震震...

「點會...點...」短白髮男人口震震...手震震...就連全身都震起嚟...

就喺呢個時候，綽姿揮刀斬向短白髮男人隻左手！

“嗡！”短白髮男人成隻左手就飛到上天花板！隨即化成無數綠色粒子...喺空氣中飄散...消失...

短白髮男人一手就拋開我！我成個人就飛埋去綽姿身上！

綽姿攬實我之時，短白髮男人右手撳住自己左邊膊頭斷口衝向牆身！

“砰啪！”一聲巨響！短白髮男人撞爛幅牆！跳出街外！

走咗...逃走咗...

短白髮男人逃唔逃走都唔重要...最重要嘅係...

『羅羅...羅羅！』我立即起身！走埋去仲瞓喺地上嘅羅羅！

「嗄...嗄...」羅羅冇氣冇力咁...起唔到身...

羅羅背脊飄出大量紅色粒子...大量紅色粒子亦都同時由口中噴出...

『羅羅...你點吖？』我立即扶住羅羅！揭開頂帽！拉低衫領！

睇落好傷...羅羅嘅傷勢...好重...

「飛揚...哥哥...」羅羅手震震咁伸手...伸手摸住我塊面...

『羅羅...羅羅...』我捉實羅羅隻手...好凍...羅羅隻手又震又凍...

「我...我終於可以為你...為你...嗄...」羅羅口噴出大量紅色粒子...

『點解...點解要幫我擋？』點解...明明...一直我都覺得你陰險...

但點解...原來...原來一直都係我錯！

係我...係我誤會咗你...誣蔑咗你！！！

「因為...因...因為我...我真係...真係好愛...你...」羅羅情深意重咁...望實我...

『就算...就算係愛...都唔使咁傻...』

「愛...本來唔係就係咁傻㗎咩？」羅羅再摸一摸我面頰...

愛...本來唔係就係咁傻？

愛...的確會讓人失去理智...會讓人做出一啲...冇諗過會做出嘅事...

愛...會讓人喪命...

「唔好為我...嗄...為我難過...嗄...答應我...要好好...生存...落去...嗄...」羅羅不停口噴紅色粒子...

『唔好...唔好吖...』

「答應我...冇咗我...嗄...你都要...你都要好好...嗄...好好咁...生存...嗄...」羅羅好努力咁...摸我塊面...

『唔好吖...唔好...唔好吖...』

「飛...飛揚哥哥...你...你...愛...愛我...嘛？」羅羅對眼...半開...半合...

『唔好...唔好...唔好吖！』我捉實羅羅隻手...已經冇力嘅手仔...

我攬實羅羅...攬到好實...好實...

『羅羅...羅羅呀！』唔好...唔好離開我...唔好....唔好咁...唔好咁吖...我唔想咁呀！！！

點解...點解要...點解要咁...點解...點...

「扮夠喇。」綽姿冷冷淡淡咁講一句。

扮？

「咳咳...」羅羅喺我胸口咳咗兩聲，「難得飛揚哥哥攬得我咁實，俾我陶醉喺飛揚哥哥嘅懷抱之中耐少少都唔得嘅～」

吓？咩...咩情況吖？

綽姿冷眼望住羅羅：「你咁耐都未化成紅色粒子...即係唔死得啦...仲可以扮幾耐姐？」

係...係喎...羅羅都冇化成紅色粒子...

「哎吖...」羅羅擰轉身指住自己背脊，「我真係中咗招㗎！你睇你睇！五個窿窿吖！好深㗎！飄晒精神能量出嚟喇！好痛㗎真係！」

真...都真係幾深...五隻手指嘅紅色窿窿...仲係不停咁飄出紅色粒子...

綽姿Keep冷眼望住羅羅：「都唔死得...」

羅羅谷起塊面豬登：「咁人哋想俾飛揚哥哥氹多啲咋嘛～」

我立即攬實羅羅：『太好喇...唔死得就太好喇...』

咩都好...最重要都係保住條命...

我呢條命...都係由羅羅保返嚟...

「飛揚哥哥...」羅羅都攬一攬實我，「你仲未答我...你愛唔愛我喎～」

『呃...呃...』愛唔愛...

羅羅再攬得我實啲：「頭先咁感人咁...唔會一啲愛嘅感覺都冇掛？」

『呃...呃...』我...我唔敢講話愛...『感...感動囉...』

我諗感動應該冇問題嘅...應該唔算係背叛阿月嘅...

「感動即係愛啦～」羅羅再攬到我實一實～

『感動邊係愛呢？』感動唔等於愛...感動同愛係兩樣嘢嚟㗎...

「我以身相救喎～咁你係唔係應該都要以身相許呢？」羅羅又甜絲絲咁～

『唔得㗎！唔得㗎！』犯法㗎！！！

「咳該...」日倫咳咗兩聲，「其實我就唔想打擾兩位...之不過...我哋都要快啲離開...」

呃...快啲離開？

日倫繼續講：「我哋再唔離開嘅話...好快就會有人上嚟睇發生咩事...畢竟...都幾嚴重...」

幾嚴重...

我回望一眼整個廳...

全部傢私傢具都爛晒...地板又插咗幾刀...牆身唔止滿佈刀痕爪痕...仲穿咗個大窿...仲見到對面樓大大塊LCD招牌...

「都係嘅...」羅羅扶返我起身，「唉...我間屋吖...冇喇冇喇...」

綽姿冷冷一句：「唔係租㗎咩？」

「係就係...」羅羅拎起舊爛木，再掉埋一邊，「咁都要執返啲嘢...啲衫唔使要啦...唉...」

日倫擰部電話出嚟：「咁啦...去我喺葵芳間屋先...離開呢度遠啲好...仲有我哋都要深層睡眠...」

羅羅望多兩望：「OK～咁呢度就等我善後...我搞掂就趕過嚟搵你哋～」

「嗯...」日倫點點頭，「地址Send咗俾你同飛揚...飛揚你自己過嚟有冇問題？」

『呃...冇...冇...』我諗有地址...我自己一個人過去應該唔係問題嘅...

「咁好啦...」日倫向住牆身大窿行過去，「咁我就帶綽姿過去先...」

綽姿都行近日倫身後：「叫我瓦解...」

「是旦啦...呢度又冇其他人...」日倫企喺大窿前望一望，「咁一陣見喇。」

日倫向外一躍！跳咗出去！

綽姿都緊隨其後一躍！跳咗出去！

「飛揚哥哥～咁你都行先啦～我一陣自己趕過去㗎喇～」羅羅都行去自己間房～

『哦...好好...咁你都小心喇...』

「嗯～放心啦～你都小心啲吖～一陣見～」