《香港傭兵》: [Day 21－現在過去] PART 17
「你講到未來咁恐怖～」阿月又點點頭～
『喂真係好恐怖㗎！有得去你都唔好去吖！』真係唔係個個都好似我咁好彩有命返到嚟㗎！
「就係恐怖先要親身去一次～睇睇有乜嘢方法可以改變～」阿月又點點頭～
『改變...由而家開始推翻政府囉...』最好就係由香港打到上北京啦～
「屯門常開、天水圍城同西貢獻命唔係革命軍咩？咪又係將香港推去地獄嘅主要因素～」阿月諗一諗，「重點係點樣先唔會再歷史重現～」
『我去過都唔知啦...』邊知得咁多吖...
「你冇查過㗎咩？」阿月冷眼望住我～
『點查吖？咁易查吖？就係搵方法返嚟都夠死啦！仲邊有咁多時間走去查呢啲嘢吖？仲有委託呢？有好多任務要做㗎...時間好緊迫㗎咋...』我唔死得返到嚟算係屎忽撞棍㗎咋...
「咁你都可以喺執行委託嘅時候，順手調查埋㗎嘛～」阿月谷一谷塊面豬登～
『你就真係講得輕鬆...唔係好似寫故咁，個劇本喺你手，樣點行點走就點行點走㗎...』阿月寫故寫到上晒腦...
「你應該要嘗試呢～」阿月對我莞爾一笑～
『我！我...』應該要...
「雖然你冇查到啲乜...但你見過未來～」阿月點一點頭～
『嗯...我應該嘗試去改變...就算所做嘅都係將香港推去地獄嘅主要因素...』一切都係...所有所有都跟住既有嘅劇本進行...
「係咁就冇計喇～」阿月彈一彈起身，拍拍籮柚拍拍手，「只可以講一切都係命運～」
一切都係...命運...
「喂喂～我哋去嗰邊睇睇咯～」阿月指一指山上面一間石屋～
『哦...好吖好吖～喂等埋啦！』我都彈一彈起身，拍拍籮柚拍拍手，跟住阿月行上山～
“颼～颼！颼！”風真係比之前更大...更猛...
阿月就成隻馬騮咁爬上石屋～
『喂～你小心啲吖～』我見到阿月俾風吹到左搖右擺咁...立即上前...
「得啦得啦～你唔使擔心我喎～嘩嘩嘩...」阿月差啲就由屋頂跌落嚟！
『喂！小心呀你！』我立即扶住阿月個屁股仔！
「冇事冇事～」阿月借力一上，坐喺石屋上面，啲風就係咁吹埋佢身上～
『梗係冇事啦～有我喺下面扶住你吖嘛～坐定喇～等我上埋嚟喇～』我都小心翼翼咁爬上石屋～
「你得唔得㗎？使唔使我拉你上嚟吖？」阿月得個講字～完全冇打算要伸隻手俾我～
『你算罷啦～坐定定啦～』靠阿月真係死得...
一陣唔夠力，兩個一齊跌返落去就柒晒喇...
好唔容易先爬到上石屋，坐喺阿月身邊～
「喺呢個位置睇仲靚～」阿月抬頭仰望銀河～
『嗯...真係好靚呢～』成個天空都好清...冇雲...可以好清楚咁睇晒成個銀河～
阿月伸出手...伸向銀河...再慢慢企起身...
『喂...你睇住吖...』我扶一扶住阿月對腳仔...
「得啦～放心啦～」阿月企直個人～想同銀河拉近距離～
喺銀河襯托之下，阿月永遠都係咁美麗動人～
阿月身上條黑色吊帶連身長裙被猛風吹到飄揚～飄揚～
阿月嘅美...深深咁印喺我內心深處...
身處喺任何時候...任何地方嘅阿月...都係最美麗...最動人...
「究竟宇宙有幾大呢？」阿月仲係想捉住個銀河～
『宇宙有幾大吖？你咁問...即係同隻螞蟻問地球有幾大冇分別咋喎...』呢個比喻係唔係好正？
「嘩你呢個咩比喻嚟㗎？」阿月冷眼望一望我～
『唔正咩？』我覺得好正喎～
「都唔對等...」阿月Keep住冷眼望實我～
『點唔對等法？』點先叫對等？
「起碼都太陽系啦...」阿月點一點頭～
『我係以認知做對比，唔係空間嘅大細～OK？』平時就講到有幾高深...一時又咁膚淺...
「扮吖你～」阿月冇我咁好氣～
唔夠人講又話人扮...
「咁究竟宇宙有幾大呢？」阿月再抬頭仰望銀河～
『真係唔知喎...好大好大...又話唔定一直伸展緊...又話唔定原來宇宙都係圓嘅...』我真係唔識喎...
天文學呢啲嘢咁深...睇維基都唔係識得好多㗎咋喎...
「話唔定...宇宙唔止得一個～」阿月望住個銀河點點頭～
『吓？』唔止得一個？
「話唔定...有好多好多好多個宇宙～」阿月再點點頭～
好多好多...
「我一直都係咁認為...認為係咁...」阿月一直望住遠遠嘅銀河～
『咁嘅話...唔知另一個宇宙又有冇我嘅存在呢～』我都企一企起身～
“颼！颼！”風超大超猛！差啲吹郁我個人！
「有都唔出奇啦～話唔定仲會更加吸引呢～」阿月對我莞爾一笑～
『我而家好失禮咩？』成日都講到我咁差咁...
「又唔可以話好失禮嘅～」阿月咬住下唇諗一諗，「可以多返少少勇氣囉～大膽啲囉～」
『喂我今時唔同往日㗎喇～』
「花哈哈～係吖係吖～係唔同咗嘅～但可以再多啲囉～」
『咁多要求㗎...』
「人就係咁㗎啦～得一想二～」
『我唔覺得你係人囉...』
「所以我比人更加貪婪囉～無盡嘅貪婪～」
『貪婪喔～七罪宗～』
“颼～颼！颼！”同阿月企喺石屋之上，抬頭仰望壯麗嘅銀河多一陣...
「係時候要郁動吓喇～」阿月輕輕一跳！就跳返落地！
『喂喂...等埋...等埋...』我都跳返落地面...
但跳落去嘅時候，先發現原來都幾高！
落地之時仲好自然咁碌咗一轉！卸一卸力！
「嘩你又使唔使咁型吖？」阿月一邊跑，一邊擰轉頭望一望我～
『嘩你唔覺得高㗎咩？對腳唔痛㗎咩？』我都起返身...
「唔覺喎～唔覺喎～」阿月越跑越遠～
『喂喂...等埋啦！』我又跟住阿月身後跑～
「呢度呢度～」阿月一邊走～
『喂...唔好跑咁快啦...』我又跑近阿月...
「跑快啲喇咁鬼慢～呢度嘅風景仲靚喎～」
『係喎係喎～呢個位置真係幾好喎～』
「啲風吹埋嚟仲好爽添吖～再上高啲睇吓咯～」
『嗯嗯...喂！等埋我啦！』
「你啲反應可唔可以快少少㗎～嘩～呢度仲正吖～」
『嚟緊...嚟緊...你就快俾風吹走喇～』
喺萬天星光銀河之下，我同阿月跑勻成個山頭～
喺唔同嘅位置～唔同嘅角度～三百六十度無死角咁欣賞全個被夜空星光銀河包圍住嘅山頭美景～
「正呀喂～置身喺大自然之中，真係好爽吖～」阿月攤開雙手～自轉幾圈～
『啱吖啱吖～望吓星空～望吓山頭～望吓一大片草原～真係令人心曠神怡～』我都攤開雙手自轉幾圈～
「做咩學我自轉～」阿月叉住條小蠻腰，谷起塊面豬登望實我～
『因為你叻吖嘛～學你就冇錯啦～』不過轉多兩圈就腳步浮浮...
「車～」阿月冇我咁好氣咁～「第時影結婚相，一定要上嚟影～」
『嗯？你想上嚟影結婚相吖？好辛苦㗎喎...』頭先上嚟都唔容易啦...
「有幾辛苦吖～」阿月仲係興致勃勃咁～
『著住婚紗上山喎...點上吖？定係你想上到嚟先換吖？』上到嚟先換都死啦...
「我著住婚妙上嚟都唔怕啦～」阿月又得得戚戚咁～
「哦...咁你OK嘅話，我都OK嘅～』最多我就真係上到嚟先換衫啦～
再加上新郎哥都係配襯嚟㗎姐～唔使點影嘅～唔會太辛苦嘅～
「邊個話同你結吖？」阿月對我莞爾一笑～
『嘩...唔同我結同邊個結吖？』邊個頂得你順吖～
「我呢啲咁好條件，行出街都大把人撩啦～」阿月又得得戚戚咁～
『哈哈～保證唔夠三日就頂你唔順～』真係忍唔住要恥笑阿月～
「係吖係吖～冇人頂得我順㗎～就只有同你最夾得埋吖～」阿月又對我莞爾一笑～
『你都知呢？』
「我梗係知啦～到時...要喺秋天上嚟影～」
『秋天好吖～冇咁熱吖～』
「仲要成個山頭都係金黃色～」
『嗯～金黃色嘅山頭～靚吖～』
「要喺中午就上到嚟準備～」
『嘩...咁快就諗定幾點上嚟喇？』
「梗係～要喺黃昏前開始影～夜深又影～到差唔多天光又再影～」
『嘩...咁就真係要搵隊大師級嘅攝製隊先得啦～』
「當然啦～我咁高要求～」
『明顯啦～唔係嘅話又點會揀著我～』
「呃...」
『你呃咩吖？』
「呃...冇...我有少少想收返我頭先句說話...」
“颼～颼！颼！”再同阿月吹多陣風～吹多陣水～欣賞多一陣山上嘅夜景～
「係時候入去帳篷休息喇～」阿月拖住我，行去帳篷～
“啪...啪...”入到帳篷，風都好似冇之前咁大...
「嗱～我哋仲有啲頭先買嘅罐頭湯吖～生命麵包吖～瞓醒肚餓呢，就可以食喇～」阿月喺個背囊度拎出兩罐金寶湯同一大條生命麵包～
『嗯嗯～做埋早餐都得～』咁大條生命麵包，真係唔怕餓死山頭～
「嗯～做埋朝早早餐～咁呢～我哋而家執好埋哋地方，就可以瞓覺覺喇～」阿月收返好兩罐金寶湯同一大條生命麵包入背囊～
『OK～咁就執嘢先～』我都幫手整理一下，執好啲位～
「咁我哋瞓五個鐘就起身睇日出...Set好個鬧鐘...你唔好唔知醒吖～」阿月Set好個電話個鬧鐘～
『你唔好要我叫你起身又唔願起吖～』一陣又話俾你瞓多陣...一瞓又半個鐘都唔願醒...
「我先冇你咁懶瞓～好～瞓得～」阿月瞓入個睡袋裡面～
『喂唔使熄燈吖？』我望住差唔多要拉上拉鏈嘅阿月～
「你熄啦～嘟頭～」阿月拉上拉鏈～
『係係～』
“咔”熄咗支太陽能光管之後...
其實都仲有啲光...
嚟自繁星嘅光芒，仲有明月...
嚟自外太空嘅光芒，穿透帳篷，照到阿月個睡袋上，阿月嘅面上...
夜空明月照麗人...
「唔...你話人與人之間...幾咁奇妙呢～」我都仲可以好清楚咁，望到阿月...望住帳篷頂...
『嗯？』我就望住阿月...
「你話...人與人點解會相遇？」阿月問一問我...
『唔...可能係...背後有條紅線牽引住...』由一出世開始...我哋背後都有紅線...
「嗯...我都覺得係有嘢牽引...不過唔係紅線...或者係其他嘢...吸引住對方...誘導...拉扯...牽動...產生共鳴...就好似我同你...」阿月對我莞爾一笑～
『嗯...就好似...我同你...命中...』
「注定...」
TO BE CONTINUED