《香港傭兵》: [Day 21－現在過去] PART 11
「不過真係好可惜呢...點解會將一個咁有利嘅地方...送俾西貢獻命...」阿月皺住眉頭...
『係咯...我都好好奇...就算係當初想接濟...都唔一定要係送個據點俾人姐...』仲要係已經成為敵人嘅爪牙...
「或者...」阿月諗一諗，「唔係咁嘅話，冇藉口令元朗國歸順呢...」
『吓？』真係要付出咁大咩？
「要知道...元朗國都唔簡單...佢哋絕對可以自立為一個政府控制唔到但親政府嘅“中立國”...」阿月點點頭...
元朗...可以自立為“中立國”？
「元朗一帶都係鄉黑...唔好睇少班鄉黑...呢班鄉黑嘅勢力根深蒂固...源遠流長...差唔多可以話全個元朗都係由佢哋話事...而且要清楚當時嘅形勢...」阿月再諗一諗，「雖然話只要切斷主要公路就同外界隔絕...但要屯門常開同天水圍城守住據點，唔俾政府攻到入嚟之餘，仲要對付元朗國係需要花費大量資源...」
呃...好複雜...
「所以...話唔定...拱手相讓屯門俾西貢獻命...以三個勢力迫使元朗歸順係必須...」阿月又點點頭...
『嘩...分析得咁仔細吖...』又係唔係真係咁㗎？
「冇一個完善嘅背景又點寫到好故吖？」阿月谷起塊面豬登～
『呃...』都係嘅...
「之不過...」阿月又諗一諗，「背後仲有好多嘢唔明白...唔清楚...仲係有好多謎團呢...」
仲有好多...謎團...
「好似話...最大嘅敵人...」阿月眉頭一皺...
『咪就係逆行者囉...』擁有極強大綠光能量嘅敵人...曾經係我哋SPIRIT嘅行者...
「你真係覺得最大嘅敵人就係逆行者？」阿月認真咁打量住我...
『呃...係吖...』唔係咩？
「唉～」阿月帶住無奈嘅微笑擰擰頭，「假如真係穿越嘅話...你咁都可以喺咁嘅亂世未來生存到兩個幾禮拜，平安無事穿越返嚟真係萬幸咯～」
『嘩...你咁係咩意思？好想守寡咁喎...』我冷眼望住阿月...
「花哈哈～我到而家仲未守寡都真係萬幸咯～」阿月對我莞爾一笑～擰擰頭咁轉身坐上韆鞦～
『喂...喂...你咁講嘢㗎...我好差咩？』我就望住阿月喺韆鞦上...盪嚟盪去～
「唔係差～係好弱囉～」阿月帶住莞爾一笑，喺韆鞦上盪前盪後～
不知不覺...我又被阿月吸引住...其實一直都...眼中就只有阿月...
望住阿月喺韆鞦上盪嚟盪去～盪去盪嚟～
阿月身上條黑色長裙就飄飄揚揚～揚揚飄飄～
一對雪白無暇嘅美腿就喺面前若隱...若現...若隱...若現...
阿月真係...好靚...好似仙女一樣咁靚...
突然！
阿月一跳！就跳到我面前！對我莞爾一笑：「喂！不如我哋去露營咯～」
『吓？露咩營吖？』阿月又有咩鬼主意吖？
「上山露營吖露咩營～」阿月Keep住對我莞爾一笑～
『吓？上山露營？大佬呀...你唔好咁痴線啦...』先唔好話無啦啦上咩山露咩營咩喇...
「有咩問題？」阿月仲係一面天真咁嘅樣～
『你睇你身衣著...』我打量住阿月身上條黑色長裙...
「有咩問題？」阿月仲要雙手拉一拉起條裙邊～
『長裙吖大佬...點上山吖？』邊有人著長裙上山㗎？！
「有咩問題？」阿月又雙手擺動條長裙～
『仲有你對鞋呢？布鞋仔嚟㗎...』我望住阿月對黑色布鞋仔...
「有咩問題？」阿月又踢踢對腳仔～
『邊有人著布鞋行山㗎？』跌到仆街㗎喎真係...
「有咩問題？我著布鞋都跑贏你啦～」阿月又對我莞爾一笑～
『呃...呃...』又有位俾阿月入...
「再加上有你喺我身邊吖嘛～有咩事你都會睇住我㗎嘛～」阿月翹實我隻手，對我莞爾一笑～
『呃...係...係...』見到阿月呢個樣...我都反抗唔到㗎啦...
「咁我哋行喇行喇～」阿月拉住我行兩步～
『真係就咁上山吖？』我就半推半就咁被阿月拉住嚟行...
「就咁點上山吖？要去買嘢先～要去買嘢先～」
『去邊度買吖？』
「過銅記～過銅記～」
『銅鑼灣？點解要去咁遠呢？』
「因為嗰邊啲嘢齊吖嘛～」
所以話阿月呢個女仔...你總係估唔到佢想做乜...
總係有好多驚人嘅主意...
仲好痴線添...
不過就係咁...我先會咁愛佢...
「行快啲啦行快啲啦～」望住阿月跑前幾步...
「有好多嘢要買㗎～」再跑遠幾步...
「再唔快啲過唔切馬路喇～」阿月一轉身...就走過嚟捉住我隻手～
『嘩嘩嘩...』我就拖住阿月隻手仔～衝過快要轉紅公仔嘅馬路～
一直急急腳咁向住巴士站行～咁啱就有架101埋緊站～
「快啲快啲～有車有車～」阿月再拉住我咁跑快兩步～
『得得得...』我都出力咁跑快幾步...（點解成日都要望住架巴士嚟跑㗎...）
阿月拉住我，一個箭步就衝上巴士！
“嘟！嘟！”
「呼～啱啱好趕得切～」阿月就拖住我一齊坐係凳上～
『嗄...唔跑咪趕唔切囉...嗄...』又搞到我上氣唔接下氣咁...
「所以咪要跑囉～」阿月得得戚戚咁望住街外嘅風景～
『嗄...係...嗄...係...』你話係就係啦...我就冇你咁好氣...回回氣先...
望住車窗外嘅風景...好快又差唔多入隧道...
「我哋都真係好耐都冇過嚟呢邊搭巴士過海喇～」阿月一直望住車窗外～
『嗯...都真係...好耐喇...』自畢業之後...一直都冇再返過嚟...
「變化雖然唔大...但總算係變咗呢...」阿月望住遠處嘅風景...喺進入隧道之前...
『嗯...所有嘢一直都變緊...』巴士進入隧道...再睇唔到出面嘅風景...
「但我總相信...就算所有嘢都變晒...總有嘢係永恆不變...」阿月點一點頭～
我捉一捉實阿月隻手仔...
『咪就係我對你嘅愛囉～』呢個時候，我都係要口甜舌滑啲先得～
「吖～你吖真係～發完個夢返嚟就變得咁口甜舌滑嘅？肯定成日氹啲小妹妹啦～」阿月又對我莞爾一笑～
『邊...邊係呢...我冇對過其他女仔咁囉...』我...我絕對冇對綽姿同羅羅口甜舌滑過囉...
「係咩係咩？」阿月仲係對我莞爾一笑～打量住我～
『係吖係吖...真心話嚟㗎...』
「嘩～仲要用埋真心話添～真係喺個夢裡面，學識咗點樣氹女仔喎～」
『都話唔係氹咯...仲有...係穿越！穿越！』
「係係係～穿越～」
同阿月坐101巴士過海...然後嚟到利景酒店落車。
阿月一跳就跳落巴士站，再拖返實我隻手。
同阿月喺馬路旁邊，向住銅記方向行...望望對面間遊戲機中心...
「喂～」阿月捏一捏我隻手，「記唔記得以前我哋都會入機舖打機㗎？」
『記得～成日都二人合奏Keyboard㗎嘛～』同阿月打機，都係玩音樂Game多～
「係咯係咯～成日都俾你累到輸～」阿月得得戚戚咁嘅樣～
『嘩...Keyboard咁難玩...』睇得切都撳唔切啦...
「同你打鼓夾結他都唔係好好多咋喎～又要我幫你拉血～仲好多時俾你拉死添吖～」阿月又得得戚戚咁嘅樣打量住我～
『嘩...音樂唔係我專長...你唔好講打高達～』我冷眼望住阿月～
「嘩～你仲好講～打親Seed D都係我救你㗎啦～Step Cancel都唔識同我講高達～淨係識得大嗌“去死啦基拉！！！”～」阿月又半帶恥笑咁望住我～
『我講緊DX吖～』Seed D同DX差咁遠...
「Seed D都出咗啦～仲打乜鬼DX吖？咁鬼舊...」阿月冷眼打量住我～
『DX要技術好多囉～唔識嘢先玩Seed D鳩Step Cancel㗎姐～』講真我對Seed D真係冇乜性趣～
唔係比較鍾意揸住部命運或者脈衝鳩叫“去死啦基拉！！！”，根本就冇性趣去玩～
「弱就係咁㗎喇～就係話鳩Step Cancel㗎喇～返去你嘅0079啦～」阿月又半帶恥笑咁打量住我～
『你鍾意玩Seed D都係因為基拉靚仔咋嘛～』膚淺～
「咁基拉真係靚仔吖嘛～又勁喎～」阿月點點頭～
『仲話佢勁喎...勁在班冇腦女Fans強力施壓～先可以令作者幫佢神筆加護咋嘛～講到尾都係靠女人～』最睇唔起呢啲人！
喺故事裡面就專搶人/朋友女朋友同老婆...現實就要靠女Fans撐人氣...可恥！
「主角係咁㗎啦～有光環㗎嘛～」阿月又莞爾一笑，「好似你咁咩～俾你做主角都係一碌廢柴～」
『嘩...你咁講嘢嘅？我啱啱先好型咁打退五條MK仔咋喎...』
「係吖係吖係吖～返去打退埋西貢獻命吖笨～」
『嘩！打死我都唔要再返去呀！』
拖住阿月隻手仔，好快就行到嚟銅記～
銅記...之前同羅羅過嚟...搵神秘商人...
羅羅...最憧憬戀愛嘅小妹妹時期...
橫過闊闊嘅大馬路之後，阿月突然鬆開手！跑前兩步！
『喂！等埋吖...阿月！』
阿月彈彈跳跳咁～跑前幾步～
你輕輕地舞著，在擁擠的人群之中。
旁人投射過來異樣的眼神。 詫異也好，欣賞也罷， 並不曾使你的舞步凌亂。
因為令你飛揚的，不是旁人注視的目光， 而是...
我一步一步...向住對我莞爾一笑嘅阿月行近...
『點吖～』我拖返實阿月隻手仔，『美麗動人的輕舞飛揚小姐～』
「冇吖～突然想跳就跳～」阿月又對我莞爾一笑～
『哈哈～幾時都係咁優美呢～』
「多謝～」
『咁我哋而家應該向邊個方向行吖？』
「唔...」阿月拎部電話出嚟撳幾撳，「嗰邊嗰邊～」
阿月就係一個咁奇怪嘅女仔，但就係因為咁奇怪先令我咁愛佢～
有阿月帶路之下，喺人群之中穿插～走入商場行上幾層...好快又真係俾我哋搵到間買露營爬山遠足舖頭！
阿月立即行去個靚仔面前：「唔該唔該～我哋想買啲露營嘅用品吖～」
「哦！」個靚仔打量咗我同阿月一眼，「你哋係想...買露營用品？」
「係吖係吖～」阿月又點晒頭，「我哋買完就出發㗎喇～」
「吓？」個靚仔勁愕然，「買完就去露營？！」
個靚仔有咁嘅反應都好正常嘅～
先唔好講乜裝備都冇...望住阿月條黑色吊帶連身長裙嘅裝束都覺得唔對路啦...
「呃...Er...你哋係想去邊露營呢？」個靚仔有啲尷尬...
「大東山～」阿月意志堅定～
「呃...大東山...」靚仔又打量一下我同阿月，「唔係難嘅...但你哋咁樣...」
「得啦得啦～你幫我哋執齊必須品就得啦～」阿月仲係胸有成竹咁～
「咁...好啦...跟住我嚟...一邊執...一邊講解俾你哋聽啦...」靚仔就帶住我哋行...
「嗯嗯～」阿月同我就跟住靚仔身後～
喺舖頭裡面一邊行，一邊執，一邊聽靚仔講解...
「衫褲都唔使...鞋都唔使吖？」靚仔都有問問阿月意見...
「唔使啦～就咁都OK㗎喇～」阿月又淡淡定定有錢淨咁～
「咁...行山杖每人一支啦...安全啲嘅...」靚仔又拎咗兩支行山杖...
「好吖好吖～伸縮㗎嘛？」阿月又問一問～
「伸縮～好似警棍咁咋嘛～嗱～」靚仔又示範一次俾阿月睇，「好方便㗎～」
「係喎係喎～真係好似警棍咁咋喎～」阿月又開心大發現咁～
「咁就插埋喺背囊側邊啦...帳幕就...一個夠啦～你哋情侶嚟㗎嘛～一齊瞓好啲嘅～」靚仔又拎個帳幕～「教埋你哋點起啦～」
「好吖好吖～唔該喎～」阿月又好專心咁學～
「嗱就咁...」靚仔就一邊教我哋...
我同阿月又好專心咁睇...
然後基本嘢都學識晒～要有嘅嘢都拎齊晒～
「Gas爐同Gas都放埋入去啦...」靚仔將個大大個嘅Gas爐同三支Gas都放入背囊，「咁啲嘢齊晒㗎喇～現金定碌卡？」
『碌卡啦...』我就喺銀包拎張信用卡...
「好...等等...喺度簽個名吖唔該～」靚仔俾張單我～
『好...』簽返個靚名，『唔該晒...』
「好...」靚仔俾返張卡我，「多謝晒兩位吖～上山有咩問題都可以睇返我哋網頁㗎～有好多資訊可以幫到你哋～」
「嗯嗯～唔該晒～」我同阿月各人都孭住個背囊～
「慢慢行啦～小心啲啦～拜拜～」靚仔同我哋揮揮手～
「拜拜～」我哋都同靚仔揮住手咁行出舖頭～