《香港傭兵》: [Day 21－現在過去] PART 03
「行快啲～行快啲～」阿月拖實我隻手，衝去巴士總站～
與唔少路人擦身而過～左閃右避～
「衝吖～衝吖～」望住就快要開車嘅61X車尾...
“嘟！嘟！”
『嗄...嗄...好彩趕得切...嗄嗄...』差啲又送車尾...
「所以咪叫你快啲囉～」阿月就行上樓梯，上上層～
“吼！吼～”巴士隨即開動！
『喂！睇住吖！』我立即跟住阿月身後！扶住佢條腰！
「你睇住你自己仲好啦～平衡力又唔係好～喂喂！唔好累我跌埋落去吖！」阿月雙手捉實左右兩條扶手！就一口氣衝上上層！
嘩...講到我好似會拉埋你落去咁...點講我嘅平衡力都唔差啦好唔好...
同阿月上到上層，望一望都唔算有太多人...
其實屯門去土瓜灣都真係幾遠...就算係坐呢架61X一程車就到，都要成個幾鐘...
冇乜事嘅話，屯門人都真係唔會走過去嗰邊...
同阿月坐返坐開嘅位置～
『你又知差唔多開車嘅？』我望一望阿月，再望出窗外。
「有App㗎嘛～」阿月望一望我，又同我一齊望出窗外～
『我唔見你有睇過嘅？』我夠知有App啦～但都唔見你有拎部電話出嚟睇先好奇一問咋嘛～
「證明你冇留意我啦～淨係掛住啲𡃁妹仔～」阿月又對我莞爾一笑～
『我...我邊有吖...頭先一路上都冇𡃁妹仔經過！』時間尚早...啲𡃁妹仔邊有咁早起身出街？
「就係因為你掛住留意街上有冇𡃁妹仔，所以冇留意我拎部電話出嚟睇囉～」阿月用隻食指篤一篤我個鼻～
『我...唔係吖～我係覺得...唉...都係冇嘢喇...』我只係覺得好似有人𥄫住我哋...
「嗯？」阿月一頭問號咁～
『係錯覺姐～』冇嘢嘅...冇嘢嘅...
「古古怪怪～」阿月又望出窗外～
講到古怪又點及你吖...
我就拖住阿月隻手仔，同佢一齊望出車窗～
我哋架巴士好快就駛過友愛...駛到嚟兆麟苑...
望住兆麟苑...內心總係有種無奈嘅激動...
然後唔使幾耐...就見到屯門泳池...
外牆仲係完整無缺...仲未遭受破壞...
終於都俾我見返...見返有外牆圍住嘅屯門泳池...
遲咗兩個禮拜有多喇...
然後...巴士就駛上行車天橋...
然後...
『係...屯門標誌...』我望銀光閃閃嘅屯門標誌...
「嗯？」阿月都跟住我望住銀光閃閃嘅屯門標誌～
『我...仲記得去到未來嘅第二日...就過咗嚟呢邊...坐喺已經氧化既屯門標誌...望住一堆堆淺藍色嘅廢鐵...反光嘅隔音玻璃碎片...掩蓋咗成條公路...』我望返上前...
「一堆堆...淺藍色嘅廢鐵？反光嘅...隔音玻璃碎片？」阿月一頭問號咁望住我...
『嗯...嗰時我係打算返嚟時光隧道...諗住可以由時光隧道返翻嚟搵你...點知...時光隧道已經倒塌...爛晒...殘骸都掩蓋成條公路...已經返唔到嚟...』我同阿月而家正正駛入完好無缺嘅時光隧道...
「跟住呢跟住呢？」阿月又好似好有興趣咁～
『跟住吖...諗住呢邊都近舊屋...咪返去睇睇囉...兩老就唔見喇...間屋仲已經俾一個死道友霸咗...』雖然話都預咗兩老未必仲喺度...
「哦...」阿月諗一諗，帶住微笑望實我，「我哋都好似好耐都冇同你兩老飲過茶喇～過兩日等佢哋去完旅行返嚟約佢哋出嚟飲啦～」
『嗯嗯...我都有咁打算～』難得有命返到嚟...
“吼！吼～”繼續坐喺巴士上層望出窗外...
好似已經好耐都冇搭過車行屯門公路...由屯門公路望去黃金海岸...
而家嘅黃金海岸...
一邊望住黃金海岸...差唔到望到下面條青山公路...望到有紅頂...
『係紅Van...』望住架紅Van喺青山公路行駛緊...
「嗯嗯？那夜凌晨吖？」阿月又八八卦卦跟我一齊望住架紅Van～
『哈哈～唔係...都可以話係嘅...點講好呢...屯門公路被時光隧道嘅殘骸封住咗之後...就只能靠青山公路出入...而出入係唔可以用其他車輛...就只可以靠一架紅Van...個司機仲成個林雪咁嘅樣㗎！』講起又好笑～點解紅Van司機總係要似林雪㗎呢～
「呢個設定又唔錯喎～主要嘅公路封咗...又只能夠靠一架紅Van出入...用嚟寫故真係諗少好多嘢～唔係喎...」阿月又咬住唇咁諗一諗，「咁西鐵呢？」
『西鐵俾西貢獻命同天門呢兩個革命軍控制咗吖嘛～』西貢獻命同天門...
「哦～咁就啱喇啱喇...連鐵路都斷埋...海路唔使講啦...實俾革命軍控制住...嗯嗯...啱喇啱喇...又唔係喎...唔係話會整條屯門至赤鱲角連接路段㗎咩？你話發夢...」我未等到阿月講完...
『係穿越！穿越！』我立即更正阿月嘅說法！
「係係係～穿～越～」阿月勉強附和，「廿年後嘅香港...應該整好啦！」
屯門至赤鱲角連接路段？
講起上嚟...又好似...冇聽綽姿提起過...
就算執行“破壞能源”嘅委託...去到龍鼓灘一帶...都唔覺眼有...通往赤鱲角嘅路段...
點解會咁㗎呢？
「唔...」阿月又眼仔碌碌咁，「可能整好冇耐就沉Q咗落大海啦～而家啲基建垃圾嚟嘅～」
『你又啱...』而家啲工程全部都係大陸㗎嘛...
頭先經過嘅擴建屯門公路工程，全部都係大陸公司...
正正就係要借基建嚟洗黑錢！
用嘅料知咩料啦！
遲啲都唔知會唔會成條屯門公路唔見咗...唔係喎...
屌...唔怪之得廿年後條屯門公路咁易就被革命軍收皮啦！
“吼...”然後我哋架巴士就去到轉車站...
又嚟到...小欖附近...
我就拎部電話出嚟睇：『都係收唔到...』
「唔？」阿月就八八卦卦咁望一望我手上部電話，「一向都收唔到㗎啦～唔係我尋晚又點知你過咗轉車站呢～」
『係...』對我嚟講...已經係過咗兩個幾禮拜嘅事...『廿年後都仲係收唔到...』
「吓？廿年後嘅通訊都仲係咁差咩？去到咩G吖？唔係應該無死角全覆蓋㗎咩？」阿月又眼仔碌碌咁一頭問號～
『呃...我又冇留意係咩G喎...我都唔知吖...以我哋SPIRIT嘅科技...都係收唔到...』我望一望出車窗...望到對面線...再遠啲...建喺海面上嘅...『係....橋...』
係青山公路新大欖段條橋...
橋上面...仲有車行緊...雖然唔算多...
「嗯？青山公路新大欖段嘅跨海大橋吖嘛～又有問題吖？」阿月又一頭問號咁跟我一齊望住條橋～
『嗯...廿年後條橋就真係沉Q咗落大海喇...』我仲記得...海中仲見到大橋嘅殘骸...
「睇嚟都係大陸建造㗎喇～」阿月恥笑住咁點點頭～
『我諗...應該係革命軍整斷...因為小欖嗰邊有西貢獻命路障...係唔知喺屯門常開嗰時整斷...定係西貢獻命接手之後先整斷...』
「唔...」阿月又好認真咁思考...
『嗰次...我仲差啲...連人帶車飛落海...』仲連埋俾必然斬斷隻手嘅綽姿...
「咁刺激？！」阿月又睜大對大眼仔望實我～好似期待我講故事～
『激吖...好激吖...我仲係要揸住架林寶吖...』
「你最鍾意嘅林寶吖？仲要係未來林寶？咪型到核爆？！」
『型吖！真係型到核爆！碳纖色嘅車身！極貼地！超誇張流線擾流設計！仲要係林寶招牌嘅閘刀式車門！坐落去好似坐喺地咁！仲有個導航吖！喺擋風玻璃度顯示㗎！』就只有超級跑車先有！
「嘩嘩嘩！恨到啦你～成日都話人一生一定要有一架林寶～」阿月對我莞爾一笑～
『有鬼有馬咩...俾綽姿賣走咗啦...加埋都係揸咗兩次咋...』唉...講起都心痛...
「哦～～～又係嗰個十五歲嘅綽姿吖～～～」阿月又對我莞爾一笑～
『你...你又諗咗去邊吖？』每次望到用呢種笑容對住我嘅阿月...總係...背後充滿陰謀咁...
「諗你心裡面諗嘅嘢囉～」阿月就越嚟越陰濕咁～
『都...都話冇嘢㗎咯...我哋...SPIRIT俾我嘅身份係佢嘅哥哥...咪話咗我哋嘅關係係兩兄妹囉...』講清楚...講清楚...要同阿月再講清講楚...
「係係係～兩兄妹吖嘛～啱晒你啦～戀妹控～成日都話想有個細妹同你玩兄妹Play～」阿月又掩住個嘴仔偷偷笑～
『你講咗去邊吖又？變態！』阿月個腦真係...
「不過個設定又會唔會差太遠呢？大成十年咁多...」阿月又咬住下唇諗一諗，「我覺得相差九年已經係極限...」
『嗰時我嘅年齡被設定為廿一歲...』都係相差六年姐...
「嘩！後生咗四年咁益你吖？」阿月睜大對大眼仔！
『又有幾益吖？』我冷眼打量住阿月...
「廿一歲嘅哥哥搞自己個十五歲細妹喎...仲唔益晒你吖？」阿月又掩住個嘴仔偷偷笑～
『冇搞吖冇搞吖冇搞囉好唔好？！』你話你話你話吖！阿月個腦戴乜㗎？！
好彩冇講俾阿月聽，差唔多日日起身都見到唔係內衣褲Look，就係裸背Look嘅綽姿咋！
唔係嘅話？又加甜㗎喇！
「嘿嘿...仲話冇...嘿嘿...」阿月又對我莞爾一笑～
『呃...呃...講開揸車真係好難...你係點考到個車牌㗎？』都係轉個話題...唔係實俾阿月Chok到我自爆羅羅啲嘢出嚟...
「嗯？未來嘅林寶仲用棍波㗎咩？」阿月一頭問號咁望住我～
『唔係...仲用緊Dual-clutch transmission嘅...好鬼爽添...』加加減減...幾咁有落場賽車Feel～
「咁咪係囉～」阿月又扮晒揸住個軚盤咁，上上落落波～
『不過我都有揸過棍波車...真係難到呢...』諗返起宋伯伯...
「有幾難吖？嗱～呢啲咪就係叫做資質囉～好簡單㗎姐～即飄移咁～點飄吖～一入彎～拉一拉手掣～架車Bei一Bei咁～咁又點呀～型囉！」
『架...架車咪慢囉...』
「咁應該點飄呢？」
『咁你咪踩盡油門...過彎嘅時候唔好太慢...唔～～～～～～～然後反軚...』我都未講完...
阿月就推一推我個頭：「你咁反架車咪跌咗落山咁你咪死囉～」
『唉...真係好難㗎...』
「都話做落就覺得好容易㗎咯！」阿月谷起塊面豬登！
『就係做過先覺得難吖嘛...』顧得隻腳又顧唔到隻手咁...
「唉～真係好弱㗎～仲話喺未來做行者喎～唔係發夢嘅話，一早死咗啦～」阿月帶住恥笑擰擰頭～
又話我弱...
綽姿又話我弱...阿月又話我弱...乜我真係咁弱咩...