《香港傭兵》: [Day 20－遺址禁區] PART 11
夜空明月下...我跪喺地上...
睇住交通燈閃著閃著...由綠轉上紅...
“吼！吼～吼～”望住一架架私家車...七人車...綠的喺面前駛過...
我終於都返到嚟...
「喂！你做咩吖？瞓到發軟蹄吖？」阿月拉住我手臂，嘗試拉我起身。
我立即捉實阿月隻手仔！拉埋身邊攬到實一實：『我返到嚟喇！我終於都返到嚟喇！我真係好掛住你呀！』
我攬到阿月實一實！好實好實！
好真實！可以再攬實阿月！我最深愛嘅阿月！
「喂...喂...你係唔係返工返到傻咗吖？由荃灣返嚟屯門都係半個鐘左右姐...又使唔使咁掛住我吖？」阿月俾我攬到坐咗喺我大髀上。
『唔係吖...唔係吖...我...穿越咗時空...去咗廿年後嘅香港呀！』而且仲...而且仲...
「吓？你穿越咗時空？」阿月一頭問號咁打量住我。
『係吖...係吖...仲要喺嗰度...生活咗兩個幾禮拜！』兩個幾禮拜...地獄嘅生活...
「吓？你係唔係攰到傻咗吖？」阿月一面疑惑咁打量住我，「我同你收咗線之後...都係差唔多過咗十分鐘咋嘛～」
『唔係吖...真係㗎...我同你收咗線之後...就穿越咗時空...去咗廿年後嘅香港...』我扶起阿月...喺行人路上行...
阿月一直都拖住我...打量住我...
『廿年後嘅香港...好恐怖...』一邊行...一邊望望四周...望望頭上條天橋...
「恐怖？」阿月仲係一面疑惑咁...
『廿年後嘅香港...屯門被西貢獻命控制...』繼續向前行...行到去紅公仔前...
「西貢獻命？！」阿月拉停我！
『嗯...』我企喺紅公仔前點點頭，『係革命軍...唔係唔係...表面係革命軍...背後係受國安局操控...係支共嘅走狗！』
「花哈哈哈～」阿月大笑起嚟，「你係唔係反共反到上晒腦吖？」
『係真㗎！係真㗎！』我捉實阿月對膊頭！『我唔係講笑㗎！佢哋人渣嚟㗎！專捉細路女㗎！！！』
阿月忍住笑咁望實我...
『我唔知佢哋要捉啲細路女做乜...不過呢啲都唔重要...最重要係...呢個世界...有個地下組織叫做...SPIRIT...』綠公仔一轉，我拖住阿月隻手仔...橫過馬路。
「SPIRIT？！」阿月又一頭問號咁咬咬唇。
『係吖...係傭兵...係用好高嘅科技...精神能量...精神化...精神刀...好似激光劍咁...紅色嘅激光劍...』
「嘩！咁咪好型囉！嗡！嗡！」阿月手舞足蹈咁扮晒雙手持刀揮動。
『唔型...一啲都唔型...我做咗成兩個幾禮拜...只係覺得好危險...隨時連命都冇！』你差啲就守寡喇...
「你呀？你都做到傭兵呀？花哈哈哈～」阿月又大笑起上嚟～
『係㗎...我都唔知點解會做咗傭兵...跟住個𡃁妹仔...』我自己都覺得自己冇可能做到傭兵...
「𡃁妹仔？」阿月打量住我...
『係吖...跟住一個叫梁綽姿嘅𡃁妹仔...做佢嘅隨行者喎...』諗起都覺得痴線...
「叫梁綽姿吖？幾多歲吖？」阿月古古惑惑咁嘅口吻...
『十五喎...』點解好似...講錯嘢咁...
「哦～十五歲嘅𡃁妹仔～你最鍾意嗰種未成年𡃁妹仔吖～啱晒你口味啦～」阿月對住我莞爾一笑～
『嗯？』我諗一諗...立即耍手兼擰頭！『唔係吖唔係吖！佢份人冷血㗎！仲成日點我去做呢樣！做嗰樣！唔危險嘅都唔點我去做㗎！』
仆街喇...唔覺意自爆咗綽姿出嚟添！
「係咩係咩？唔係好開心先係咩？」阿月仲係古古惑惑咁打量住我～
『唔係吖唔係吖！同佢一齊生活呢廿日真係好唔開心㗎！』點解好似越講越錯咁嘅？
「哦～仲要一齊生活咗廿～～～日添～爽死你啦～」阿月流晒口水咁嘅樣～
『唔係吖唔係吖！真係好危險㗎！有班叫逆行者嘅敵人！真係好危險㗎！』都係轉移話題！
「逆行者？」阿月又真係好似好有興趣咁！
『係吖！逆行者係SPIRIT嘅叛徒！佢哋都好似我哋咁！分別係我哋用紅色嘅能源！佢哋就用綠色！』我繼續講有關逆行者嘅事！
「亦係點？」阿月又一頭問號咁...
『亦係佢哋嘅能源勁我哋好多！我哋唔夠佢哋打！遇到佢哋九死一生㗎！而佢哋係幫革命軍嘅！我哋SPIRIT就做開政府生意嘅！』雖然我都知自己講到1999咁...之但係我都唔知點講！
「咁你做乜唔過檔姐？你都反開政府㗎啦～你不嬲都主張革命㗎啦～」阿月又古古惑惑咁打量住我～
『唔係咁易㗎...我哋呢啲隨行者...係要聽從執行者...即係綽姿話㗎...佢Say No...你一定要跟住Say No...』有得過檔我就一早過咗啦...
「哦～啱吖啱吖～你對啲𡃁妹仔不嬲都係零抵抗㗎啦～」阿月又對我莞爾一笑～
『唔係吖唔係吖...』
「仲話唔係？快啲去溝人啦～吖唔係～快啲去俾人溝啦～」
『都話唔係咯...我同佢冇嘢㗎...我嘅身份係佢哥哥...』
「哦～仲要係哥哥添吖？啱晒你啦～你呢個妹控～唔係一直都好想有個妹妹俾你搞㗎咩？」
『搞乜吖？係愛錫吖！你個腦真係...』
「愛～～～錫～～～吖嘛～」
好彩冇講到羅羅出嚟姐...如果俾阿月知道我同過羅羅瞓喺床...同羅羅玩過換衫...同羅羅行過街...拍過拖...實死得比做行者仲快！
沿住馬路旁邊行咗一大段路...再橫過馬路...行到過嚟M記...都仲係有咁多MK仔女企喺門口煲緊煙...
總算喺屯門見返啲正常人...見返一班不知天高地厚嘅死𡃁仔...死𡃁妹...
萬一俾西貢獻命見到好似佢哋而家咁...扯住飛煙眼超超...一定打到佢哋仆晒街！
我再望望對面馬路...銀行裡面嘅自動櫃員機...
「嗯？做咩？」阿月又一頭問號咁打量住我...
『冇...冇...諗返起...第一次撳機...就喺對面...然後第一次遇到西貢獻命班人...搶錢打人...』真係打到仆晒街...
「真係咁冇皇法㗎嘛？」阿月又跟住我，望住對面銀行。
『冇...特殊區裡面就只有西貢獻命同天門...西貢獻命管屯門...天門就管元朗同天水圍...』
「吓？咁點解屯門係由西貢獻命管...西貢獻命同西貢又有冇關係？」阿月一頭問號咁...
『嘩...講起上嚟就真係水蛇春咁長...』
「我要聽～我要聽～」阿月捉實我隻手，Fing吓Fing吓～
『呃...咁好啦...』就等我慢慢講故事你聽啦...
我一五一十...
『廿年後嘅香港已經有革命軍...』
十五二十...
『我哋SPIRIT精神化要靠精神液...』
廿五三十...
『逆行者係用綠色嘅能量...』
盡我所理解了解知道嘅一切一切，有關廿年後嘅香港，我所經歷過嘅種種都講俾阿月聽...
我真係只可以盡力...因為我都仲係有好多嘢唔明...唔知...唔清楚...
「唔...點可能有革命軍吖？槍都冇支～」阿月拖住我，行落陰暗嘅樓梯。
『有外國勢力㗎嘛！有唔少軍火都由外面運入！佢哋唔止有槍...連RPG都有㗎喇！』我又繼續講解！
「就算有槍有RPG都搞唔掂啲警察㗎～人哋警察受過專業訓練～」阿月又咬住唇～
『你話警總嗰啲就唔敢講...但屯門啲警察廢㗎！仲有我哋呢啲大西北，要調派入嚟都要時間啦！』成間警署要被攻陷有幾難？！
「咁都仲有解放軍㗎～」阿月又眼仔碌碌～
『班革命軍有逆行者撐腰！』我再繼續講解！
「咁講法逆行者打晒啦～推翻政府啦～」阿月又點點頭～
『咁政府會僱用我哋去對付逆行者㗎嘛！唔係嘅話都唔會搞到西貢咁大鑊啦！』滅城呀！
「咁僱用你哋消滅逆行者就平定革命啦～」阿月再點點頭～
『唔得唔得！逆行者所用嘅綠色能量勁過我哋好多！而且我哋精神化有時限！過咗會進入深層睡眠！而喺精神化期間受到致命傷害，都會死亡！所以好多制肘！』唔係咁易㗎羅師父...
「咁逆行者咁勁...點解唔消滅晒你哋呢？」阿月又眼仔碌碌～
『我點知吖...我又唔係逆行者...』問問問...你估我乜都知咩...
不過都係嘅...阿月就係一個舉一反三嘅人...
同佢講乜都係反咗先...
我本身都已經唔係咁清楚個情況㗎啦...阿月仲要不停咁反...叫我點講得清楚明白呢？
「花哈哈～你睇得太多動漫喇～」阿月又忍唔住恥笑我～
『唔係吖！係真㗎！廿年後嘅香港真係好恐怖！好痴線㗎！』你去過就知㗎喇！
「你話係廿年後嘅香港...」阿月諗一諗，「咁而家呢？你所講嘅SPIRIT呢？逆行者呢？」
『呃...SPIRIT就應該潛伏喺唔同嘅機構...公司...逆行者就...唔知...』我邊知咁多姐...
「但係就從來都冇聽過有你所講嗰啲黑衣人出現過～更冇死喺咩精神刀之下咁嘅狀況嘅新聞喎～好似激光劍咁...分屍唔流血...斷口焦燶晒喎...咁匪夷所思嘅狀況你估蘋果唔衝住報出嚟？動新聞又嚟喇～分屍唔流血～斷口焦燶晒～Jedi救香港～」阿月繼續講笑～
『真㗎！我講真㗎！我真係去咗廿年後嘅香港！生存咗兩個幾禮拜㗎！』好實在！好真實！完完全全體驗到咩叫生存遊戲！
「第二個講我都信～你喎～喺一個咁恐怖嘅地獄生存到兩個幾禮拜？唔到一日就收皮啦～」阿月又恥笑我～
『嘩你咩意思？話我廢吖？你試吓吖！你就真係唔到一日收皮喇！』你同我一樣，都係普通嘅香港人嚟咋！
做冷氣軍師你就叻！
「俾著係我？我拎住把精神刀就由呢度打到上北京吖～嗡！嗡！嗡嗡嗡！」阿月又手舞足蹈咁扮晒雙手持刀揮動～
嗱！你睇！仲唔係冷氣軍師？
由呢度打到上北京？
SPIRIT係傭兵嚟㗎！收錢做嘢㗎咋！
而家最大嘅客仔係支共吖！反你腦細吖？
就算真係俾你作反...精神液呢？邊有咁多精神液俾你打到上北京？
仲有深層睡眠呢？期間係完全冇意識㗎喎！俾人揭穿身份就死得㗎喇喎！
「不過又真係幾有故事性嘅～啲設定都唔錯吖～真係可以用嚟寫返個故喎～」阿月又眼仔碌碌～
頂...仲係覺得我吹水...仲話要用嚟寫故...
係吖...真人真事改編吖...賺到錢唔該分返啲俾我吖...
「係呢係呢？咁廿年後嘅我係點㗎？」阿月睜大對大眼仔望實我～
『廿年後嘅你吖？唔知喎...』
「吓？點會唔知㗎？廿年後嘅我未死㗎嘛？」阿月皺住眉咁諗...
『真係唔知你死咗未喎...』
「吓？你冇搵我咩？」阿月仲係皺住眉咁望實我...
『我唔記得咗你電話吖...』
「有冇搞錯呀你！咁都唔記得？！又話點愛我點著緊我！電話都唔記得仲愛乜鬼著緊乜鬼呀？！」阿月谷起塊面豬登！
『邊...邊關事吖...』死...阿月嬲嬲豬添...
「我唔理你呀！同我返去罰抄十萬次呀！」阿月雙手叉住條小蠻腰！谷到塊面豬登勁紅！
『嘩...十萬次吖？抄到手都斷啦...』你話我精神化之下就應該輕輕鬆鬆姐...問題係而家都冇精神液喺手...
「唔得呀！要罰抄十萬次！好好咁記住我個電話！唔係嘅話，等陣你又穿越時空去咗未來咁點算？」
『嘩...你詛咒我吖？』
「咁都叫詛咒你吖？俾你又返去搵你嗰個綽姿𡃁妹仔咪益咗你囉～哦！唔怪得唔想記我電話唔搵返我啦！原來係想同個𡃁妹仔開心心～」
『梗係唔係啦！你又諗咗去邊吖？我同佢冇嘢㗎！我心只有你囉！』
「仲話個心只有我？電話都唔記喺心裡面吖！」
『因為成個心都係你～連電話都載唔落～』
「收...皮...啦...陳...飛...揚...」
『唉...難為我為咗你...一直都好好控制自己...守身如玉...冇受誘惑...真係成個唐僧咁㗎...』
「哦～原來咁樣好難為你嘅～咁你快啲返去未來搞個𡃁妹仔啦～唔阻你喇～」
『唔係吖唔係吖...係我專一又長情姐～』
「收...皮...啦...陳...飛...揚...」