《香港傭兵》: [Day 20－遺址禁區] PART 06
“吱...”日倫手車真係好定，但就唔知點解總係唔多舒服...
好似...暈車浪咁...
雖然話係由屯門過到嚟西貢呢邊...一邊西...一邊東...但香港都唔算好大姐...夾夾埋埋都係一個鐘車程左右姐...咁都會暈車浪？
我唔係真係咁鬼弱吖化？！
要我穿州過省咪死得？
唉...真係唔好話要我做一個稱職嘅行者...就連做個人都唔多稱職...
“吱～飃！飃～”等一隊銀色巨型貨車車隊喺身邊飛過之後...望住佢哋越駛越遠...遠到連車尾都見唔到之後...
日倫就越揸越慢...慢慢咁將架車駛埋路邊...駛上一塊細小爛地上...停低。
嗯？到㗎喇？
我見日倫都解開安全帶，我都只好跟住佢解開安全帶落車。
企喺路邊，望望四周...都係得草吖...樹吖...有個大海吖...仲有個好似已經荒廢咗嘅...遊艇會？
呢度...好似同西貢...仲有一大段距離...
「你冇事吖嘛？」日倫拎住盒Drone行過嚟我身邊。
『我...我冇咩事...』唔係咁都俾日倫發現我暈車浪咁柒吖化？
「唔係喎...」日倫打量住我，「我睇你有啲面青青...口唇仲有啲白白地咁喎...」
『係咩？有咁嚴重咩？』我唔係真係咁廢吖化？！
「嗯嗯...」日倫打量住我咁點點頭，「係唔係我手車太拋？」
『唔係唔係～你手車好定吖～係...可能係我少去咁遠嘅地方...過一陣就冇嘢㗎喇...』真係講出嚟都面紅...
媽...好撚柒吖真係...
『呃...係呢...呢度好似距離西貢仲有啲遠喎...』我都係轉移個話題...
「係吖...已經係最近嘅位置...再前多少少就已經係禁區...有解放軍駐守...我哋就要行上去高少少嘅地方...你OK嘛？」日倫帶住微笑拍一拍我膊頭。
『我OK～我梗係OK啦～』唔好講到我真係咁廢好唔好姐...
「咁我哋行喇～免得俾佢哋發現...對我哋起疑心...」日倫就向住小路行過去。
『係...』我都跟住日倫行去小路。
一路跟住日倫身邊行...由小路一直向小路行上少少...
雖然話係上少少唔算太斜...之但係我都仲係唔多舒服咁...
總係有少少暈...又唔係好抖到氣咁...
屌行幾步路上斜少少都唔夠氣咁...點登膠吖？
我深呼吸咁跟住日倫身邊...一直向住荒山野嶺行入去...
真係唔係講笑...越行得入...就越荒山野嶺咁嘅樣...
樹高草密...就算有建築物都應該係荒廢咗...冇人用...
路面上又有啲樹枝...又有啲大樹幹打橫瞓喺路上...
我同日倫都要跨過去...
唔怪得日倫唔駛架車上嚟啦...駛到上嚟都行唔到...
咦喂...等等先...咁講法...
『你...嗄...你之前上過嚟㗎喇？嗄...』我抖住大氣咁問...
「有吖～」日倫Keep住平均步速，「就係之前查到解放軍喺邊度開始封...然後就行過呢頭...睇睇有冇一個好嘅位置，再向西貢作出調查～」
『哦～』咁...咁複雜咁嘅？
「調查係冇可能一步到位嘅～係要分開好幾次...每次都要好小心咁...唔可以俾人發現之餘...又要探索定下次調查嘅起點...總之就逐步逐步啦～」日倫點點頭，Keep住行。
『嗯嗯...明白...』我又...又學到嘢...
喺日倫身上...真係學到唔少...
一路跟住日倫身邊，越行越斜...
行咗好一大段路...又見到唔少荒廢以久嘅建築物...再行多一段路...
『嗄...嗄...』行到我上氣唔接下氣咁...
然後就開始見到...有村屋...
啲村屋都係已經荒廢...玻璃窗都爛晒...冇人住...
馬路上都遺留咗幾架生晒銹嘅爛車...廢鐵一樣...
我同日倫喺啲爛車廢鐵之中右穿右插...再行上多幾步...再行上大斜路...
然後就同日倫行到盡頭...一棟白色...兩層高嘅別墅...
別墅嘅外牆其實都甩咗唔少油...玻璃窗都爛晒...應該都係荒廢咗一段日子...
“依...”日倫拉開黑色鐵閘，行入去...
我都跟住日倫身邊，行入別墅...
入到去室內，差唔多可以話係空空如也...
就只有爛地板...玻璃碎...仲有少量爛家具...
我就一路好小心咁跟住日倫身後...行上樓梯...
沿住樓梯行上去...室內都比較暗...真係要好小心...
“依...依...”仲要驚條樓梯會冧...
總算有驚無險咁上到嚟...天台！
天台嘅地磚都係爛晒...裂晒...爆開晒...
日倫就行出啲...行去天台邊邊嘅位置，放低黑色盒，拎咗兩副眼鏡出嚟。
我都行到去日倫身邊，望一望四周...
呢個位置高又唔算太高...四周都係見到綠綠黃黃嘅樹頂...
「戴住佢先～」日倫隊咗副眼鏡俾我～
『哦...』做咩要我戴眼鏡？我冇近視㗎喎...
之不過日倫叫得我戴，我就只好乖乖聽話戴起佢啦～
當我一戴起副眼鏡...好清楚喎！
係好清楚！勁高清！
四周嘅景物都好鮮明！
真係唔戴過眼鏡都唔知原來自己有近視！
唔止...唔止咁...
仲要...仲要有得Zoom？！
當我想望遠啲...就真係望得遠啲！
好遠吖！超遠吖！仲可以追住遠處嘅雀仔...飛緊嘅雀仔！
仲要有埋...“麻雀”嘅字眼指住隻雀仔！跟住佢飛！
好鬼勁吖！唔止咁呀！仲顯示埋佢嘅距離！仲有顯示埋佢嘅飛行速度！！！
咩料吖？呢副就係傳說中嘅智能眼鏡？！
真係唔係講笑！未來嘅科技呀！
勁就係勁喇...之但係呢...喺呢個位置...呢個高度...角度...好似都仲望唔到...西貢嗰邊...
係就係有顯示住“西貢”嘅位置...之但係就睇唔到...都仲係有好多樹遮住...
「眼鏡除咗有望遠鏡功能，仲有好多功能～不過咁係唔夠...都仲係睇得唔夠多...」日倫拎起隻Drone...
“吱！”隻Drone立即好似Transformer咁變形！伸咗四支螺旋槳出嚟！
日倫拎部電話喺手，撳兩撳...
四支螺旋槳同時轉動！隻Drone隨即喺日倫手上升起！慢慢消失...漸漸消失！
然後...我眼前嘅影像...轉咗！仲向前移動！飛緊！
「眼鏡係可以同隻Drone連接～可以實時睇到Drone所拍到嘅影像～」日倫一邊講，我眼前嘅影像就一直向住前方...喺樹頂飛緊！
好似打機咁...好似戴住VR揸直升機咁！
「Drone嘅視網膜系統係可以分別控制視點...即係你望去邊，睇啲乜，就隨你自由望～唔會影響到我～」日倫一邊講，我眼前嘅影像係飛緊向...馬路嗰邊！
視網膜系統？咩嚟？聽都未聽過...
不過日倫講得話係可以分別控制...
我嘗試將對眼碌向左邊...可以望到左邊嘅樹林...
我再將個頭擰向左邊...個影像就真係向住左邊方向移過去！
嘩！好撚堅喎！！！
我真係好似坐撚咗喺架直升機裡面！我鍾意擰去邊望去邊，都唔會影響到直升機嘅飛行路線！
好好玩呀真係！
我仲可以好似頭先咁...望實隻雀仔...又係有“麻雀”嘅字眼指住隻雀仔！跟住佢飛！
又係顯示埋佢嘅距離！又係有顯示埋佢嘅飛行速度！
真係好鬼正呀屌你～
話咁快，隻Drone就飛到去馬路上...仲見到我哋頭先泊喺路邊塊爛地上架黑色私家車！
咁快就飛到落去...
隻Drone就開始沿住條馬路...喺馬路之上...高空之中...以均速向前飛...
好定...飛行速度同高度都好穩定...
我就望住條馬路...又望望左邊樹林...叢林...又望望右邊塊爛地...
然後...
“吱！飃～”有一隊銀色巨型貨車車隊喺下面駛過！
又係...解放軍嘅貨車車隊...
等等先...乜原來係...收到音㗎？
收到音唔係問題...我冇戴耳機㗎喎！點解我都可以聽到由Drone收過嚟嘅聲音嘅？
唔通係...
『骨傳導技術？！』我曾經聽過...呢種科技...
我冇記錯嘅話...骨傳導係一種聲音傳導方式...通過將聲音轉化為不同頻率嘅機械振動，通過人嘅顱骨、骨迷路、內耳淋巴液傳遞、螺旋器、聽神經、聽覺中樞來傳遞聲波！
我記得...冇幾耐之前聽返嚟...都係啱啱著手研究...
估唔到...
「嗯...做咩？好似咁好奇咁嘅？」日倫一邊問，隻Drone Keep住以均速喺馬路上空向前飛。
『冇！冇～唔係好奇吖～』係估唔到...廿年後呢種技術咁成熟...
係咯...廿年後...仲要係SPIRIT嘅偵測工具...成熟又有乜咁出奇...
隻Drone Keep住以均速喺馬路上空向前飛...轉咗一兩個大彎...然後再向前飛多一段距離...就見到...見到路障？見到閘口！
啱啱頭先嗰隊銀色巨型貨車車隊駛入閘口！
然後個閘口閂返埋！有兩個...解放軍士兵行近閘口後面...守住！
冇錯！係解放軍士兵！嗰兩個解放軍士兵頭上有“解放軍士兵”字樣指住！
再細心咁望住嗰兩個解放軍士兵身上嘅裝備...手上支長槍...立即又有啲字指住！
我諗係裝備嘅名同型號掛...軍械嘅嘢我唔識吖...
之但係呢個位置...應該係...
『白沙灣？！』的確！眼前顯示住呢度一帶係白沙灣！
「係吖...上次揸車過到去就見到解放軍設置嘅閘口...」日倫一邊講，隻Drone就停喺兩個解放軍士兵頭上。
『白沙灣離西貢...仲有一大段距離㗎喎！』我就真係冇乜嚟過西貢幾多次...
之但係由白沙灣去到西貢...差唔多都仲有十五分鐘車程？
「係吖...就係仲有咁大段距離先到西貢，我嗰次先咁唔小心揸到去佢哋面前...仲要俾佢哋用槍隊住嚟問做乜揸車入嚟！入嚟做乜！呢區早就封咗！點會揸車過到嚟呢邊！」日倫一邊大大聲講，隻Drone仲係停留喺嗰兩個解放軍士兵頭上！
『咁...咁你點答吖？』講到好似審犯咁喎...
「冇吖...我淨係話知道西貢封咗...但就唔知喺咁前嘅位置就已經係禁區...啲路牌爛晒咁...車上嘅導航又壞嘅...都唔知自己揸咗去邊...想揸前啲搵路調頭，就揸咗嚟禁區前喇...總之就係扮晒傻咁囉...」日倫一邊大大聲講，隻Drone就開始向前飛。
『哦...』扮傻都過到骨吖？咁啲解放軍都...幾蠢㗎喎...