《香港傭兵》: [Day 20－遺址禁區] PART 01
望住阿月喺韆鞦上盪嚟盪去～盪去盪嚟～
阿月身上條黑色長裙就飄飄揚揚～揚揚飄飄～
一對雪白無暇嘅美腿就喺面前若隱...若現...若隱...若現...
阿月真係...好靚...好似仙女一樣咁靚...
突然！
阿月一跳！就跳到我面前！對我莞爾一笑：「喂！不如我哋去露營咯～」
『吓？露咩營吖？』阿月又有咩鬼主意吖？
「上山露營吖露咩營～」阿月Keep住對我莞爾一笑～
『吓？上山露營？大佬呀...你唔好咁痴線啦...』先唔好話無啦啦上咩山露咩營咩喇...
「有咩問題？」阿月仲係一面天真咁嘅樣～
『你睇你身衣著...』我打量住阿月身上條黑色長裙...
「有咩問題？」阿月仲要雙手拉一拉起條裙邊～
『長裙吖大佬...點上山吖？』邊有人著長裙上山㗎？！
「有咩問題？」阿月又雙手擺動條長裙～
『仲有你對鞋呢？布鞋仔嚟㗎...』我望住阿月對黑色布鞋仔...
「有咩問題？」阿月又踢踢對腳仔～
『邊有人著布鞋行山㗎？』跌到仆街㗎喎真係...
「有咩問題？我著布鞋都跑贏你啦～」阿月又對我莞爾一笑～
『呃...呃...』又有位俾阿月入...
「再加上有你喺我身邊吖嘛～有咩事你都會睇住我㗎嘛～」阿月翹實我隻手，對我莞爾一笑～
『呃...係...係...』見到阿月呢個樣...我都反抗唔到㗎啦...
「咁我哋行喇行喇～」阿月拉住我行兩步～
『真係就咁上山吖？』我就半推半就咁被阿月拉住嚟行...
「就咁點上山吖？要去買嘢先～要去買嘢先～」
『去邊度買吖？』
「過銅記～過銅記～」
『銅鑼灣？點解要去咁遠呢？』
「因為嗰邊啲嘢齊吖嘛～」
所以話阿月呢個女仔...你總係估唔到佢想做乜...
總係有好多驚人嘅主意...
仲好痴線添...
不過就係咁...我先會咁愛佢...
「行快啲啦行快啲啦～」望住阿月跑前幾步...
「有好多嘢要買㗎～」再跑遠幾步...
「再唔...快...啲...」望住阿月轉身...越轉越慢...
慢慢停落嚟...定格一樣...
整個空間都停頓落嚟…整個空間都變成灰色...分裂...
分裂到阿月回身...向住我...伸出手...粉碎...飄散...
當我再次有意識之時...再次睜開眼之時…
『阿...月...等...等...天...』天花板？
我...我又...又返咗嚟...
「醒喇？」呢把聲係...日倫？
我立即坐起身，就望到著住黑色大褸...挨喺梳妝檯邊嘅日倫打量住我！
『呃...醒...醒咗...』我皺一皺眉，『你...你又會喺度嘅？尋...尋晚你都喺度瞓？』
尋...尋晚...
「我點會俾佢喺度瞓。」呢把係綽姿把冷淡聲...
我望返上前...已經著好校服嘅綽姿就坐喺單人梳化上...
「呃...」日倫摸摸頭，「我尋晚送埋你上樓，之後就返咗自己屋企。」
『返咗自己屋企...』尋晚...我又好似...未返到嚟就進入深層睡眠...
「嗯...」日倫點點頭，打量住我，「我喺特殊區都有地方嘅...打算等今朝你醒咗先再嚟一齊傾傾...點知...我上到嚟，你都未醒...」
『哦...係吖係吖...』原來係咁...
咁睇嚟...我又瞓咗好耐...
瞓到綽姿都換好衫...
「佢係咁...」綽姿打量住我，「每次都瞓得好耐好耐...真係好弱...不過尋晚已經算好。起碼唔係突然進入深層睡眠。」
又話我弱...
乜我尋晚唔算係突然咩？
都係未上到樓就失去知覺...
「佢睇嚟唔係弱...」日倫打量住我，擰擰頭，「係抵抗...」
嗱！日倫就有見地得多喇！
果然係調查型行者吖～係識嘢啲嘅～
之但係...咩抵抗？
「唔知你哋知唔知...」日倫諗一諗，「其實唔係所有人都可以精神化...」
其實唔係所有人都...可以精神化？
所有人係指...
日倫望咗綽姿一眼...綽姿冇俾任何反應，日倫就繼續講：「唔係所有人都可以精神化，所以要經過挑選...又或者簡單咁試過先知可唔可以做到行者...」
經過挑選...試過先知...可唔可以做到行者？
綽姿點一點頭，日倫就繼續講：「一個非正式又冇得到證實嘅消息顯示，男性比較難精神化...而女性嘅行者能力都比較強...」
男性比較難精神化？而女性都比較強？
咁即係話...
綽姿擰擰頭：「唔使戴咁大個頭盔，就係睇佢咁唔穩定咁進入深層睡眠同瞓得咁耐就知。一直都唔明點解佢會成為到行者...」
做咩姐...又話我弱...
「唔係唔係...」日倫擰擰頭，「唔係咁簡單...有抵抗唔等於弱...」
嘩...咁高深嘅？
有抵抗唔等於弱？色即是空空即是色啲Friend吖？
日倫又諗一諗，打量住我：「單純精神化唔到就精神化唔到...但佢並唔係精神化唔到...係唔穩定...」
喂...講得明啲得唔得㗎？
綽姿都皺住眉咁打量住日倫：「係唔想同我哋透露你啲值錢情報就唔好講。唔好講啲唔講啲，拋磚引玉。」
嘩...乜係咁攻心計㗎咩？
講到日倫城府好深咁喎...
「唔係唔係～」日倫帶住傻笑摸摸頭，「我係想講好似片翼咁...你唔好諗到我咁衰啦～」
片...片翼？又同片翼有關？
綽姿仲係冷眼咁望實日倫...
「好喇好喇...唉～」日倫再傻笑住咁摸摸頭，「片翼夠強大喇嘛？先行者Number 2吖嘛～尋晚大家都留意到佢嘅氣息啦？」
「我唔係尋晚...」綽姿擰一擰頭，諗一諗，「早喺西貢攻防戰就已經留意到佢係咁...恭喜你...你引到肉。」
引...引到肉？
「但我唔係...」日倫諗一諗...一面無奈，「都話唔好咁諗我咯～」
『你哋唔好互相猜忌先啦...』猜忌係集思廣益嘅最大敵人！
綽姿乖乖地等日倫繼續講...
「嗯嗯...」日倫點一點頭，「我遇過片翼...都已經有六次...最近嗰次係上個禮拜...第一次遇到係差唔多一年前...即係西貢攻防戰之前...」
綽姿又冷眼望住日倫：「連片翼呢啲大人物都係你嘅客仔？果然厲害。」
客仔？
即係...片翼都要搵日倫幫手？
幫手做乜？
日倫係調查型行者...係要查嘢？
日倫只係執行者咋喎！
咁講法...先行者級數嘅調查型行者...咪仲更加多情報喺手？！
「唔好咁講～」日倫又一面無奈咁嘅樣，「咪又係冇份參與西貢攻防戰～」
綽姿又皺一皺眉：「你唔好再諗住探口風。快啲繼續講你想講嘅嘢。」
「你成日都咁睇我...」日倫擰一擰頭，「我想講上個禮拜又好，一年前都好，我遇到片翼嘅時候，佢係Keep住極強大氣息！」
『極強大嘅氣息...』我偷偷望一眼綽姿...見佢冇話唔俾我講落去，『我哋之前都有感受過片翼嘅極強大氣息...』
日倫諗一諗，又擰擰頭：「我諗以你哋嘅感受...應該係逐步...而唔係一開始就Keep住...」
『哦...嗯...係...係...』係掛...
日倫繼續講：「我係感覺到佢控制自己嘅氣息...喺相隔半個身位以內...極強大且霸道...令人窒息嘅氣息！一感覺到就已經係！Keep住係！從來冇減弱過！好穩定！嚇死人！」
雖然日倫講得有啲誇張...之但係又真係感覺得到喎...
片翼...應該係咁...咁先係先行者Number 2嘅片翼！
「呼...」日倫抖一啖大氣，「之但係尋日遇到嘅片翼...好奇怪...就好似飛揚咁...」
好...好似我咁？
綽姿皺一皺眉...望一望我...
日倫都打量住我：「身上嘅紅色粒子一閃...一閃...氣息跟住時強...時弱...」
呃...乜我真係可以同片翼呢啲大人物相提並論咩？
「我會認為...」日倫諗一諗，「片翼呢種情況，同飛揚好相似...對精神液有抵抗...」
「邊有可能...」綽姿立即擰擰頭，「唔好話片翼呢種級數...普通一個隨行者都唔會...」
綽姿咁講又好有道理咁喎...
綽姿冷眼望住我：「邊似得佢咁，根本就連隨行者都冇資格做。」
嗱...呢句又變返冇道理喇...
唔好一有機會就話我弱好唔好？
「唔...」日倫望住我，好用力咁諗，「我冇實質證據同情報去支持我嘅講法...所有都係以我眼見同感覺而推測...係有啲嘢令片翼同精神液產生抵抗...」
有啲嘢...令片翼同精神液產生抵抗？
『咁...咁我又係唔係有啲嘢令到我同精神液產生抵抗？』我同片翼嘅情況相似吖嘛...
日倫同綽姿都冇出聲...淨係打量住我...
咁...咁即係點吖？
日倫繼續打量住我：「咁你有冇...好勁嘅時候？」
『我...』你咁問我...叫我點答吖？
好難為情㗎喎...
「都有...」綽姿望實我，點一點頭，「的確係試過...另眼相看...」
吓吓吓？真係㗎咩？
原來綽姿都有覺得我勁嘅時候㗎？
聽到綽姿咁講，總係有飄飄然嘅感覺呢～
「嗯...」日倫點點頭...但就冇繼續講落去...
點吖？想講咩姐？係唔係想講“咁就似喇...似會好似片翼咁勁...甚至勁過片翼...”吖？
係嘅話唔怕講㗎喎～我OK接受到㗎喎～
「點講都好...」綽姿擰擰頭，「都係一個唔稱職嘅隨行者。」
嘩...乜咁講嘢㗎...又趁機話我弱...
「或者啦...」日倫諗一諗，點點頭，「持續唔穩定嘅情況之下...好易死咗都唔知咩事...」
『我而家咪又係生勾勾！』咁即係冇問題啦！
綽姿又擰擰頭：「真係奇蹟。」
屌...講到尾都係唔肯承認我係有能力嘅！
『咁...咁講返神秘工廠吖...即係點呢？』我都係轉個話題...無謂自討沒趣啦...
日倫諗一諗：「雖然話已經落咗禁查令...成為禁查區...之但係我哋有查過，係可以將手上所得嘅現有資料，互相討論嘅。」
係喎...差啲都唔記得禁查令呢回事...
「嗯。」綽姿都點點頭。
日倫得到綽姿嘅認同之後，就繼續講：「尋晚嗰間神秘工廠...應該就係解放軍嘅兵工廠...」
係解放軍嘅...兵工廠？！
綽姿冇出到聲，只係等日倫繼續。
日倫望咗綽姿一眼之後，繼續講：「大家都見到，喺工廠裡面有唔少解放軍士兵駐守...巡邏...而佢哋嘅裝備...好先進...應該話係...用上我哋嘅科技嚟整。」
用上我哋嘅科技...
「記住！」日倫強調！「我所指嘅係，除咗用上我哋嘅物質，仲有科技！」
除咗用上我哋嘅物質...仲有科技？！