《香港傭兵》: [Day 19－神秘工廠] PART 09
西貢獻命...係國安局嘅走狗...
而家嘅屯門...西貢獻命都唔知去晒邊...就只係喺小欖先會見到佢哋...
咁啱...而家就話深井會由解放軍接手...
唔通...解放軍同國安局...
似喇！大家都係為支共辦事...
唔止佢哋兩個...就連我哋SPIRIT...都係接佢哋嘅委託...
假如真係已經傾好晒...
解放軍接手深井後，下一步就係大軍進攻屯門...
西貢獻命係國安局嘅走狗，絕不反抗...解放軍就可以不費吹灰之力收回屯門...
然後...再加埋我哋SPIRIT...對付天門！
啱喇啱喇...縱使天門背後有逆行者撐住...都已經四面楚歌！
唔使幾耐...整個特殊區就可以完全收回！
最大嘅反抗勢力玩完...香港都玩完...
果然...堅硬嘅堡壘都係由內部破壞！
喺我推測緊局勢發展嘅同時，日倫都好努力咁撳撳撳撳部電話。
食完個麵，飲住杯嘢飲...等日倫計劃...
時間都過得好快...不知不覺原來已經三點幾...
「搞掂...」日倫飲多啖凍檸水，「你都開嚟睇睇。」
『哦哦...好...』咁快就搞掂？我仲以為要搞多兩三個鐘...
我都拎部電話出嚟，開返個SPIRIT App...
畫面所見...幅地圖多咗好多線！
實線虛線...唔同顏色嘅都有！
唔止....唔止線...沿住啲線睇到去神秘工廠...多咗好多唔同顏色嘅符號！
呢啲符號...又係代表啲咩㗎呢？
「嗯？睇唔明？」日倫打量住我。
『嗯嗯...真係睇唔明...』我都冇開到聲...日倫都察覺到我睇唔明幅地圖...
「唔明唔緊要～跟我行就得喇。」日倫飲埋最後一啖凍檸水就起身。
『哦...喂喂！行喇？等埋等埋！』我飲埋最後一啖凍檸茶都起身，跟住日倫行出餐廳。
跟住日倫身邊，喺天橋上行。
所行過嘅路，都係上次同羅羅去神秘工廠交收嘅路。
由身邊有唔少工人行過...企喺欄邊食煙...到越嚟越少人...一個人都冇...
橋下嘅馬路都係冇車經過...
「去到呢度，橋下面都已經唔安全...有好多地方都被監控...所以都係繼續行天橋過去。」日倫雙手插褸袋，繼續望住前方行。
『哦哦...』就咁睇都似喇...
我哋繼續喺天橋上向住神秘工廠方向行...直至到離遠見到秘神工廠嘅銀色圍牆...
日倫挨喺欄杆，望住神秘工廠。
『呃...而家我哋...』我都未問晒成句...
「等～」日倫眼定定咁望實遠處嘅神秘工廠。
『吓？等咩吖？』我都喺幾棟廢棄嘅工業大廈之間，望住遠處嘅神秘工廠。
「好快你就知～」日倫帶住微笑點點頭。
好快...就知？
當我正想挨近欄杆之時...
我感覺到電話震震...
我拎部電話出嚟睇一睇：『係...綽姿...喂？』
我一接聽後，聽筒就傳嚟綽姿把冷淡聲：「你喺邊？」
『我？我喺...荃灣...』我都未將想講嘅說話講完...
「我叫你接委託你就去咗荃灣？」就被綽姿打斷咗。
『咁冇委託符合你要求吖嘛...』又係你話要接啲有價值嘅...
「俾咗成日時間你都接唔到一個委託返嚟，去荃灣做乜鬼吖？」綽姿繼續責怪我。
『我...我今朝咁啱遇到日倫...』我又未將想講嘅說話講晒出口...
「立即同我返嚟！」又被綽姿打斷！
『吓？立即...』我又未講完...
日倫就向我伸出手：「俾我聽～」
『哦哦...』我就交部電話俾日倫。
日倫接過我手上部電話後：「喂～係吖...邊係呢...咁啱姐...又唔好咁講...哈～你咁睇我㗎...又唔好講到我咁衰...真係咁啱...冇...邊有目的姐...」
日倫同綽姿傾到好似...打情罵俏？
「諗住調查荃灣嗰間神秘工廠咋嘛...你知邊間嘅...有冇興趣一齊？哈～反正而家全個香港區域都冇高價嘅委託接，俾你喺秘神商人買到精神液返嚟都唔擺得耐。反而查到有用嘅情報嘅話，就可以拎去賣...條數你識計嘅...咁好啦～我Send埋啲資料俾你睇住先，你過嚟搵我哋啦...等你吖～」日倫遞返部電話俾我。
我望住部電話...收咗線：『綽姿而家過嚟吖？』
「嗯...」日倫都拎自己部電話出嚟撳一撳，「佢啱啱放學...而家返去換衫拎埋裝備過嚟。」
『哦...』好彩日倫講得掂綽姿～
老老柒柒唔好話要我說服綽姿過嚟同我哋一齊調查神秘工廠...就係要我自己跟住日倫去調查，綽姿都唔會俾啦～
「而家我哋就...慢慢等。」日倫袋返好部電話，繼續挨住喺欄杆，望住遠處嘅神秘工廠。
『嗯...』我都企喺日倫身邊，同佢一齊挨喺欄杆望住神秘工廠。
時間一分一秒咁過...好快就到咗黃昏...
“吱～”天橋下面不時都會有一隊隊銀色巨型貨車車隊駛向神秘工廠...
“吱～”又不時有一隊隊銀色巨型貨車車隊由神秘工廠駛出...
假如貨車裡面全部都係載住SPIRIT嘅原材料...咁都真係幾多...
會唔會真係...咁多？
就喺我心中盤算緊之時...我感覺到...有人行緊過嚟...
我望一望天橋之中...正正就有個嬌小嘅...黑色身影行緊過嚟...
越行越近...越近越清楚...清楚見到呢個著住黑色毛毛大褸嘅嬌小身影係...綽姿！
綽姿怒氣沖沖咁向住我哋身處嘅方向衝過嚟！
『綽...』當我正想行近綽姿面前，迎接佢之時...
綽姿一手就推開我！
『哎吖...』我被綽姿推開兩步！
綽姿一手就捉住日倫褸領：「唔使講張地圖一定係你呃返嚟㗎啦！」
地圖？呃返嚟？
「唔好咁講～唔好咁講～」日倫雙手舉起，投晒降咁，「係交換情報姐。」
嗯？交換情報？地圖？係指...
「交換情報？」綽姿再用力一捉日倫褸領，「你啲情報好價錢呀？！」
『呃...其實係唔係講緊...』我都未將想講嘅說話講完...
綽姿一手推開日倫！再行到我面前！指住我個鼻：「你個死蠢知唔知入面嘅地圖幾咁寶貴吖？你交俾佢？！」
『呃...交換姐...』係囉...咁日倫都有付出㗎嘛...
「哎吖...」綽姿冇眼睇我咁擰晒頭，「點解我嘅隨行者咁蠢㗎...」
呃...乜真係好蠢咩...
「你又唔好咁話佢啦～」日倫行到綽姿身邊，拍拍佢膊頭，「都係為咗得到更多情報姐～」
綽姿怒視住日倫：「你仲好講？！」
「唔好咁啦～」日倫仲係帶住微笑，「得到更多情報，賣到更多錢，大家都有著數～」
「唉...」綽姿抖咗啖大氣，再怒視住我，「唔使問喺神秘商人買精神液返嚟又係你講俾佢聽㗎啦？」
『呃...』好似...好似係有提過...
「唉吖...點解吖...」綽姿皺晒眉，「點解我嘅隨行者可以蠢成咁㗎？！」
呃...好大問題咩？
日倫帶住微笑摸摸頭：「唔好咁啦～又唔係啲咩大不了嘅情報～」
「你唔好扮嘢吖！」綽姿又怒視住日倫，「唔係你知道啲精神液係喺神秘商人買返嚟唔係咁新鮮唔擺得耐，邊有藉口叫我出嚟同你一齊去查嗰間工廠吖？！」
呃...點解講到好似咁有機心咁嘅...
日倫又一面無辜：「咁唔使佢講，我見到啲精神液都估到啦～」
綽姿又一手捉住日倫褸領：「你仲上埋我屋企添？！」
日倫又舉晒手：「又唔係第一次～」
綽姿再用力捉實日倫褸領：「問題係你今次冇問過我...我亦冇話俾你嚟吖！」
日倫又死晒狗咁：「係係係...下次唔敢～」
『係咯係咯...都唔...』我都仲未將要講嘅嘢講完...
「你仲好意思出聲？！」綽姿又走嚟我面前，指住我個鼻，「我真係冇見過咁蠢嘅隨行者！佢係調查型行者嚟㗎！對佢嚟講所有資訊都係有用情報！」
『呃...』呃...我都唔知講咩好...
「唉...」綽姿冇晒氣咁行去欄杆...挨一挨，「好心你就提防佢啦...」
日倫行到去綽姿身邊：「你又唔好講到我咁衰...」
綽姿冇出聲，但就怒睥住日倫！
日倫又舉晒手投降咁：「係係...唔講唔講～」
「唉...」綽姿又好無奈咁，「點吖？而家要點做吖？」
日倫疑惑咁打量住綽姿：「你冇睇到個計劃㗎咩？」
綽姿又怒視住日倫：「睇到你呃咗幅圖返嚟都眼火爆啦！仲點睇落去呀？！」
日倫又扮晒無辜咁揮晒手：「係係係...我哋而家呢...等...等再夜啲先。」
綽姿冇出聲，淨係挨喺欄杆，望向遠處嘅神秘工廠。
既然綽姿都冇舉動，我都只好學佢咁挨喺欄杆，望向遠處嘅神秘工廠。
“吱～”天橋下面仲係久唔久都會有一隊隊銀色巨型貨車車隊駛向神秘工廠...
“吱～”又久唔久有一隊隊銀色巨型貨車車隊由神秘工廠駛出...
我哋三個都靜靜咁等...
然後...天橋嘅燈都開始亮起...
然後...天色都開始深...
然後...街上嘅街燈亦都亮起...
然後...然後都到咗夜晚...
街道上就只有暗黃色嘅街燈照明...
而最光最亮嘅...就只有...遠處嘅神秘工廠...
「差唔多...」日倫對眼突然一紅！
「嗯...」綽姿對眼都紅咗一紅！
用...要用精神液喇？
我都伸隻左手入褸袋，用力一捏支Level 2精神液！
寒意由手背傳遍手掌…傳到手臂…全身！
當道寒意游到上頭之時…
「Help Me...」女仔聲...
「Please...」又要係...講英文？
「Please...Help！」點會又係...講英文嘅...鬼妹仔？！
「喂...飛揚？」係日倫把聲，「做乜呆晒咁？」
「佢係咁...」綽姿擰擰頭，「次次都係...」
『呃...係係...冇嘢...』點解...呢兩次都係...聽到講英文嘅鬼妹？
「哦...咁我哋行咗過去先。」日倫就開始行落樓梯。
『吓？就咁行過去？』咁張揚？
「跟住佢做就得㗎喇。」綽姿都冇異議咁跟住日倫身後行。
『哦...』連綽姿都冇異議...我都只好照做啦。
我同綽姿就跟喺日倫身後行...行落天橋...
喺馬路旁邊嘅行人路上行...喺暗黃色嘅街燈照射之下行...
行咗只有幾步...只係過咗一個街口...突然！
日倫一跳！就跳咗上一棟危樓！
說時遲...那時快...綽姿都跟住日倫身後一跳！都跳咗上危樓之中！
跟住...跟住！
我都立即一跳！跳上危樓！
喺危樓之間行...呢度裡面都係黑漆漆咁...
冇牆...就只有爛柱...仲有一地都係碎石...
而喺裡面望返出去...都唔覺得好光...
陰暗嘅環境...最適合我哋行動...
繼續跟住日倫身後慢慢行...行到嚟危樓嘅盡頭...日倫又望住對面棟危樓一跳！
綽姿又緊隨其後跳入對面棟危樓！
再跟...再跟！
我都立即跳入對面棟危樓！而喺落地嗰一步...面前正正有個大窿！
『嘩嘩呀！！！』我立即再向前一跳！跳過大窿！
綽姿回頭冷眼望一望我...擰擰頭後繼續跟住日倫向前行。
做...做咩姐...有窿吖嘛...
而家置身喺呢棟危樓...抬頭一望...個頂都穿晒一個個大窿...
再行出少少...行多幾步...直頭成個頂都冇咗！
可以見到...見到頭上被一片夜幕所包圍...
我真係開始感覺到...黑夜先係屬於我哋SPIRIT...