《香港傭兵》: [Day 18－險中求液] PART 07
我真係睇得唔清楚...最清楚嘅都係...紅光刀刃同綠光刀刃高速揮動...碰撞格檔！
“嗡！嗡！吱！嗡！吱！”紅綠刀光閃過不停！
好快！太快喇！唔精神化嘅話，對眼根本就跟唔上佢哋嘅速度...
精神化...
唔可以...絕對唔可以精神化...
一精神化嘅話...就會被逆行者感應到！
之但係...而家我身處嘅位置...同佢哋戰鬥範圍嘅距離...又係唔係安全呢？
話口未完，兩個黑影飛嚟飛去...閃左閃右...一踩落七彩繽紛木屋嘅牆身後...
“砰！啪！嘭！”成間木屋就斬到飛開晒！木板散到一地都係！
你睇你睇！幾咁危險！
雖然話個距離都仲有啲遠...之但係...佢哋咁高速嘅對戰...冇精神化嘅我好易誤中副車㗎嘛！
再話口未完...
“嗡！嗡！吱！嗡！砰！啪！嘭！”帆布摺臂篷都冧晒落嚟！
唔得喇唔得喇...真係好危險呀！
我係唔係應該...走人？
係咯...唔應該咁八卦...更唔應該理人咁多...
唔好唔記得...而家精神液大缺貨...好撚寶貴...
冇必要捲入不必要嘅麻煩之中...浪費寶貴嘅精神液吖...
啱吖啱吖...都係趁仲未俾佢哋發現...未捲入佢哋兩個嘅戰鬥之前...閃人...閃人...
就喺我正想轉身偷偷逃離之時...
「你真係好大膽！」我聽到有把...變咗聲嘅...女仔聲？
我再鬼鬼祟祟咁貼近牆身...偷偷探頭望出去...
我望到...手持綠光刀刃嘅黑色長袍身影指住...坐咗喺地上...手持紅光刀刃嘅黑色長袍身影...
睇嚟...勝負已經分出...
「竟敢喺天門範圍擺檔？！」逆行者再用綠光刀刃指一指...
真係女仔聲...呢個逆行者...又係囡？！
等陣先...個逆行者係唔係囡都唔重要...更重要嘅係...擺檔？
坐喺地上嘅行者...係喺呢度...擺檔...咁會係賣乜吖？
唔會係賣...精神液掛？
唔會係...神秘商人掛？！
只見坐喺地上嘅行者向後爬兩爬...逆行者就行前多兩步...
唔係喇唔係喇...如果真係...真係神秘商人嘅話...我係唔係應該要救佢？
話唔定救到佢...就買到精神液...
都啱吖都啱吖...先唔好理佢係唔係神秘商人...有冇精神液賣...
二對一...我都應該要出手救佢...勝算都應該唔會太低...
啱吖啱吖...逆行者手持綠光刀刃...指住坐喺地上...向後爬緊嘅行者...步步進迫...
再唔出手救佢...佢一定會喺綠光刀刃之下...化為無數嘅紅色粒子...
唔得喇唔得喇...唔好再諗咁多喇...用咗精神液先啦！
我立即左手伸入褸袋，用力一捏支Level 2精神液！
寒意由手背傳遍手掌…傳到手臂…全身！
當道寒意游到上頭之時…
「Help...」女仔聲...
「Help Me！」仲要係...講英文？
「Where am...」點會係...講英文嘅...鬼妹？！
“鈴鈴”係...係風鈴聲？
“鈴鈴”有鈴鈴聲喺...出面...
唔好理喇！唔理得咁多喇！逆行者正舉起綠光刀刃...要處決坐喺地上嘅行者喇！
我立即將身上件大褸除落嚟，Dom埋一邊！
同時一邊拉高衫領！笠起頂帽！一邊以拔刀姿勢由窄巷飛出去！
逆行者好快就感應到我嘅存在...感應到我正高速接近...望咗過嚟...立即以綠光刀刃一擋！
“吱！”擋住我嘅橫刀一閃！
我再用刀一推！將逆行者推開！
逆行者退後幾步！企定咁望住我！
精神化之下...我而家可以望清楚...逆行者身上嘅綠色粒子...一閃...一閃...
我仲感應到佢嘅...氣息...
親切...又陌生嘅氣息...係之前未遇過...第一次遇上...
“鈴鈴”身後有鈴鈴聲！
我回頭一望！身後嘅行者一個轉身！趁機逃跑！
睇住身上散發住紅色粒子嘅行者跳上七彩繽紛嘅木屋頂！再一跳就已經唔知去咗邊！
仆街喇...連氣息都消失埋...走到無雷公咁遠！
屌等我仲諗住...同佢一齊對付逆行者㗎嘛！
「你都幾多事㗎喎...」面前嘅逆行者用綠光刀刃指住我，「好威吖？英雄主義吖？」
我雙手緊握精神刀...向逆行者擺出防禦姿勢！
「你嘅力量都唔係好大姐...」逆行者暗黑嘅面容之中...兩點綠光盯住我，「咁夠膽衝出嚟做炸兩？！」
我而家點止係衝出嚟做炸兩？直頭係衝出嚟柒添啦！
「神秘商人逃走咗...衝個傻仔出嚟...」逆行者揮一揮綠光刀刃...
神秘商人...果然真係！
不過真係又點吖...而家個神秘商人都閃咗去九丈遠啦！
我而家仲要...面對住逆行者...
都唔知...脫唔脫到身...
話口未完...
「受死啦！」逆行者一個忍步衝埋嚟！
仆街喇！
“嗡！吱！”我以紅光刀刃擋住逆行者嘅橫刀一閃！
好彩...力量唔算好大...
“吱！嗡！”我用力一推！逆行者再回身一斬！一砍！
我再一擋一避！再向逆行者連揮兩刀！
“嗡！嗡！吱！”逆行者用綠光刀刃反手一擋！好輕鬆咁...用力一震！將我震開！
我站唔穩陣腳！向後退兩步...
逆行見我有空檔，立即踏前一步！向我施以橫一文字斬！
我立即用紅光刀刃反手一擋！
“吱！”我成個人彈咗去九尺遠！
退後多幾步！勉強站穩陣腳...
點解...點解佢嘅力量...好似又大咗咁多咁嘅？
包圍住逆行者身上嘅綠色粒子閃著...閃著...
就連手上把綠光刀刃都閃著...閃著...
同必然...偶然...甚至片翼都係一樣...
身上嘅氣息總係好似...時強...時弱...
點解會...
當我仲困惑緊之時...逆行者雙手舉刀向我衝埋嚟！
我立即反手舉起精神刀！
“嗡！吱！”就喺紅光刀刃與綠光刀刃相格之時，我雙手舉起刀柄！刀背緊貼手臂...以刃引之形化解咗逆行者嘅直砍！
好輕鬆...逆行者呢一下嘅攻擊...又係好似力度不大...好輕鬆咁接住咗...
當逆行者嘅綠光刀刃沿住我手上嘅紅光刀刃向斜下滑落...我順勢抽刀一砍！
就喺紅光刀刃正要砍落逆行者個頭頂之時...
“嗡！吱！”逆行者急速雙手舉起精神刀！舉起刀柄！刀背緊貼手臂...以刃引之形化解咗我嘅反擊！
雖然話被逆行者格擋咗...之但係唔覺得好大反彈力...力量真係唔算得話好大...
“嗡！吱！嗡！吱！嗡！吱！”我同逆行者互相以刃引之形化解對方嘅反擊！
刀接刀...刀接刀...好快...好快！
不停有紅綠粒子由紅光刀刃與綠光刀刃之間擦出！
速度好快！但係力量唔算好強...仲可以擋得住！
“嗡！吱！嗡！吱！嗡！吱！”一進一退...一退一進咁來來回回幾十個回合！
突然！
“嗡！吱！！！”逆行者一刀橫斬斬落我把紅光刀刃！
『嗚呀！』我成個人被震飛幾米！撞埋落木屋牆身！
成塊木牆身就俾我撞到凹晒！
好重...啱啱頭先嗰一刀...好大力量嘅一刀！
點會...點會咁？
係專登控制住自己嘅能量...呃我習慣佢嘅力度...然後出其不意使出全力！等我攻其不備？！
真係咁咩？
我都唔知...
我只係知道...面前呢個逆行者...莫講話必然同偶然...就連遇過嘅逆行者都比佢強...係我遇過氣息最弱嘅逆行者...
之但係...要大力起上嚟...都可以震飛我...擋到我手都震埋...
我手震震咁...手震震咁離遠向住被閃著閃著嘅綠色粒子包圍住嘅逆行者擺出防禦姿勢！
逆行者望一望手上把閃著綠光嘅精神刀刃：「點會...你究竟...係咩人？」
我...我係咩人？
咩...咩咩人吖大姐？
逆行者見我唔答佢...好似好嬲嬲豬咁...
喂喂...唔關我事㗎喎...你問到唔清唔楚咁...叫我點答你吖？
話口未完...逆行者著晒綠光咁衝埋嚟！
“嗡！嗡！”逆行者高速揮兩刀！我及時避開！
“砰！啪！嘭！”而身邊間木屋就斬到散晒！啲木板散到一地都係！
我屌好彩避得切！
但逆行者完全冇打算俾我有喘息嘅機會！
“嗡！嗡！嗡嗡嗡！！！”逆行者一個轉身，就貼住我瘋狂揮刀！
我左閃右避！再閃又避！邊閃避邊後退！
“嗡！嗡！嗡嗡嗡！！！”綠光刀刃就喺我身邊閃過不停！
唔講得笑...而家佢嘅氣息...好似好強...比起頭先...強得多！
之不過...速度唔算快...仲可以避...迴避...唔好嘗試用精神刀刃去擋...更唔好諗住硬食一刀！
“嗡！嗡！嗡嗡！砰！啪！嘭！”我好努力咁迴避逆行者對我施展亂刀斬砍！身邊嘅七彩繽紛木屋同頭頂上嘅帆布摺臂篷都被逆行者亂刀斬開！砍冧！
唔單止木板帆布...就連攤檔裡面啲貨物都被逆行者斬到爛晒碎晒！散到一地都係！
綠光刀刃閃過不停！仲有唔少刀氣飛出！
被綠光刀氣砍中嘅木屋就算唔冧...木板牆身都留有唔少刀痕！
痴線！好撚大仇口咩而家？可唔可以唔好咁亂嚟吖？
唔得...再咁搞法呢度會受我哋嘅打鬥所波及...（唔係已經波及咗喇咩？！）要諗辦法先得！
我後退多幾步...就一跳跳上木屋頂！
要離開呢度...唔可以再喺呢...
我呢頭都未諗完，嗰頭逆行者就追咗上嚟！仲要向我橫刀一斬！
“嗡！吱！”我立即以精神刀刃擋住！
明顯...逆行者嘅力量...又明顯減弱咗...仲要好多...好多...
「可惡！」之但係逆行者並冇退縮，繼續貼住我！向我施展狂刀亂舞！
好快！快到我又避唔開！只能勉強用精神刀邊擋邊退！
“嗡！嗡！吱！嗡！嗡！吱！嗡！吱！！！”喺七彩繽紛嘅木屋之間，用精神刀邊擋邊退...留意住四周...
應該要退去邊呢？向住邊個方向退好呢？
唔可以波及到呢度嘅平民...要遠離平民...
屌你呢個逆行者有冇諗過平民嘅安全㗎？！淨係識得向住我瘋狂咁又斬又砍！
真係咁撚大仇口咩？！
之但係我咁樣退法都唔係辦法...
木屋頂都站唔穩陣腳...
話口未完...
“嗡嗡！砰！啪！嘭！”逆行者向我企緊嘅位置揮兩刀！木屋頂立即碎開！
『嗚呀！』我就由木屋頂跌返落地面！
「喝呀！」逆行者由上以下直砍落嚟！
“嗡！吱！”我用精神刀刃一擋！再順勢彈後幾步！
拉返開個距離...拉返幾個身位嘅距離先！！！
唔得...唔得...逆行者嘅力量又好似大咗...擋到我手都震埋...
“嗡...嗡...”我手震震咁...紅光刀刃震震咁...向住逆行者擺出防禦姿勢...
話就話係防禦...但明顯就唔穩陣啦...
唔得喇...再咁擋落去都唔係辦法...
逃...睇怕就逃不了...應該要...攻...進攻！