《香港傭兵》: [Day 16－秘密情報] PART 08
日倫係話...ADAM...
日倫都知道...
『你都知道有關ADAM嘅事？』會唔會有更多嘅線索？
「嗯...」日倫一邊行，一邊點點頭，「我有查開原核嘅事...查到ADAM有扭曲空間嘅特性...應該有穿越時空嘅功能。」
真係...連日倫都話應該有穿越時空嘅功能...
「你呢？」日倫打量我一眼，「你都有有關ADAM嘅資料？」
『我？嗯...都唔可以話有嘅...只係曾經喺情報庫睇過...』都唔係睇得好多...
「你有喺情報庫睇過內文？」日倫繼續打量住我。
『嗯...』我點點頭，諗一諗，『唔知點解無啦啦俾我睇到...不過都係睇過一次...之後就入唔返喇...』
「係吖？」日倫又諗一諗，「咁你睇到啲乜？」
『我吖？其實真係唔多...都係話ADAM有穿越時空嘅功能...我就係想搵到佢返翻去過去！』講真佢仲有乜特別我都唔需要理！我淨係想返翻去過去！搵返阿月！
「係吖...」日倫又諗一諗，「咁你仲記唔記得係點樣穿越時空？」
『我記得係我放咗工，夜晚搭巴士返入屯門，喺駛到入...隔音隧道嘅時候，眼前突然出現黑點...粒黑點越嚟越大...變咗個黑球！吞噬所有嘢！到我睜開眼就嚟咗呢個年代喇...』仲要俾個小妹妹話咩SPIRIT做咩佢咩嘅隨行者咩...
「嗯...」日倫點一點頭，「咁就應該係...」
『吓？』應該係咩？
「以我所知...」日倫又諗一諗，「ADAM係一種黑色物質...好似深淵一樣黑...」
『係吖係吖！個黑球都好似深淵一樣黑㗎！』好似深淵一樣黑...吞噬眼前嘅一切...
「嗯...之但係...」日倫打量住我，「你係話返到嚟屯門...駛入隔音隧道？」
『係吖！』有問題咩？
「咁就奇怪...」日倫又諗一諗，「應該唔會喺呢邊...」
唔會喺呢邊？
『你知道ADAM喺邊？！』唔係真係咁開心吖化？！
「唔係～」日倫擰擰頭，「我又冇咁厲害，知道三原核之一嘅ADAM確實位置～只係以我所知...應該就唔係喺屯門。」
三...三原核？！
『你係話...原核唔止得ADAM...仲有兩個？！』我有冇理解錯？
「嗯...」日倫點點頭，「除咗ADAM之外，以我所知仲有一個名叫LILITH嘅原核。不過只係知道個名～有乜特性又有乜用途就真係完全唔知～仲有另一個就連名都唔知～」
『哦...』ADAM...LILITH...仲有一個連名都唔知嘅原核...
三原核...
「你對三原核都好似好有興趣咁喎～」日倫打量我一眼，「不過都啱嘅～三原核嘅情報...係SPIRIT之中最值錢...最多人想知。」
『又唔係真係對三原核好有興趣...係只係對ADAM有興趣！』講真理得佢其餘兩個原核有乜用吖～最重要都係ADAM姐～
「嗯？」日倫Keep住打量住我。
『我真係...好想返翻去過去...』我真係唔想再留喺呢度...
我真係好想...返去搵返阿月...
我真係...好掛住阿月...
「係吖...」日倫諗咗一諗，「我再有ADAM嘅線索嘅話...通知你。」
『吓？』有ADAM嘅線索...通知我？『之但係呢啲情報都好寶貴㗎喎！我冇咁多錢買㗎...』
「唔使啦～」日倫帶住微笑擰擰頭。
『吓？唔使？咁你咪好蝕？』情報都係用嚟賣！
我哋SPIRIT嘅行者，有邊個唔係唯利是圖？
「哈哈～」日倫笑咗兩聲，「反正再有多啲線索，都唔夠情報庫嘅多。」
『嗯？』唔夠情報庫嘅多？
又同多與少有乜關係？
「嗯～」日倫點一點頭，「再多啲線索都只係零碎～唔足夠放上情報庫賣～因為系統會認為唔夠而家最貴，有關三原核嘅資料多。相關嘅情報唔夠現有嘅多，係唔俾放上去。」
乜...原來係咁㗎？
原來要放情報上情報庫...係有啲咁嘅限制？
唔怪得啦...唔怪得我啲情報都被系統判定為一文不值啦！
「唔好話人哋有唔少關於三原核嘅資料...」日倫再諗一諗，「我自己只係知其中一個原核嘅皮毛...」
調查型嘅行者...都只係知其中一個原核嘅皮毛...
「想私下賣俾其他行者都唔得...」日倫擰擰頭，「太零碎，冇人有興趣～賣得太平又好似好唔抵～」
私下賣...冇人有興趣...賣得平又好似好唔抵...
「所以都係到我真係有更多更深入嘅情報先算啦～」日倫帶住微笑擰擰頭，「不過都唔知有冇命。」
唔知有冇命...
呢點我都有諗過...
「仲有一點...」日倫打量住我，「話唔定...會係關鍵...」
會係關鍵？
咩關鍵吖？
「吖係呢～」日倫摸住個肚，「呢頭有乜嘢食呢？」
『呃...呢頭吖...呢頭啲嘢真係唔係人食㗎喎...你肚餓吖？』呢頭仲要係工廠區...
「都真係餓喇～」日倫Keep住摸個肚，「呢兩日都冇用過精神液。」
『我知有間咖啡店唔錯嘅～有冇興趣去試試？』講到食真係別無他選～
「咖啡店吖？」日倫諗咗一諗，「好吖～我都幾鍾意咖啡店～」
『咁就啱喇～我諗呢間咖啡店都幾啱你口味～』
「係？咁就真係要試試～」
『不過...有啲遠㗎喎...』
「唔緊要～我平時行路多。」
帶住日倫行出工廠區，向住市中心方向行。
真係唔講得笑...調查型嘅行者果然唔簡單...
只係單單講幾句...就知多咁多自己唔知道嘅事...
對我嚟講...已經係好重要嘅情報...
最開心嘅係...唔使錢！
喺調查型嘅行者身上，原來可以得到咁多免費情報！
真係有種相逢恨晚嘅感覺～
認真講...話唔定...仲有更多有用嘅情報喺日倫手中！
帶住日倫向住市中心方向行，總算平安嚟到Today Coffee。
日倫望望Today Coffee嘅店名，再望住門口塊木牌...
『Bil Keane～係出自Bil Keane～』我記得吖～我記得上次帶羅羅過嚟，佢有咁講過㗎～
上次...仲以為羅羅真係只係一個天真無邪可愛得意嘅小妹妹...
我俾佢呃咗...
「嗯...」日倫眼定定咁望住塊木牌點點頭，「就係呢間？」
『係吖係吖～就係呢間咖啡店～』就喺呢間Today Coffee～
「睇起上嚟...」日倫再打量幾眼，「真係幾特別喎。」
『嗯嗯～都真係幾㗎～我哋入去咯～』特別吖...喺地獄之中有間正常嘅咖啡店的確係特別～
「嗯...好。」
我就帶日倫行入咖啡店。
“叮 叮”
「歡迎光...咦？係飛揚吖？」Owner就喺櫃檯望住我哋。
『Owner～好耐冇見喇～』今日終於唔偷懶喇咩？
「係飛...揚吖～」本來整緊蛋糕嘅雨姐都行咗過嚟～「仲帶咗個朋友仔嚟？」
就連喺舖面抹緊檯嘅輝哥都行咗過嚟：「係...朋友...吖？」
『係吖係吖～佢係...』正當我想介紹日倫俾Owner佢哋認識之時...
「大家好～我叫日倫～」日倫就自我介紹～
「你好吖～我係Owner～」
「我係雨姐～」
「我...叫我輝哥得喇...」
大家都自我介紹～
「係呢～」Owner帶住微笑打量住日倫，「唔似係呢區嘅人喎～喺出面嚟㗎？」
日倫都帶住微笑點點頭：「係吖～喺市區入嚟探探朋友嘛～」
「係吖...」雨姐都帶住微笑打量住日倫，「呢區好危險㗎喎～都專程入嚟探飛揚～你哋真係好老友喎～」
日倫都帶住微笑擰擰頭：「唔係唔係～我係識佢細妹嘅～知道佢阿哥由日本返嚟照顧佢，所以入嚟探探佢，同認識佢阿哥囉～」
咦喂...我有同日倫講過我嘅身份係綽姿阿哥咩？
我又有講過我嘅來歷係由日本返嚟咩？
冇吖...我淨係同日倫講我穿越時空咋喎...
「哦～原來係咁～」雨姐帶住微笑點點頭，「我仲以為你係同飛揚一樣，都係喺日本返嚟添～」
「唔係唔係～」日倫Keep住微笑擰擰頭，「我一直都喺香港生活～久唔久會入嚟特殊區咁囉～我似喺外地生活開咩？」
Owner帶住微笑擰擰頭：「我就覺得唔似喇～你睇起上嚟醒好多～你睇飛揚～喺日本返嚟烚吓烚吓咁～」
做咩無啦啦燒埋我嗰疊...
「哈哈～」日倫尷尬咁笑一聲，「邊係呢邊係呢～我都成人俾人搵笨㗎～」
「係呢～」雨姐又帶住微笑打量住日倫，「你同飛揚個細妹係...情侶？」
吓？係情侶？！
雨姐個腦真係...
一有男男女女，雨姐就聯想到情侶關係...
「唔係唔係～」日倫揮晒手～擰晒頭～「只係都算幾熟嘅朋友姐～」
「哦～～～」雨姐又古古惑惑咁打量住日倫，「幾熟嘅朋友～～～」
又係咁喇～又係咁喇～雨姐又諗衰嘢喇～
「我哋真係八卦喇～」Owner唔好意思咁嘅樣，「問咗咁多嘢...坐喇坐喇～隨便坐～」
『哦～好好～』你都知你八卦呢...
「係咯係咯～隨便坐隨便坐～」雨姐帶住微笑望住我同日倫之後，又凶神惡煞咁對住輝哥，「成碌木咁企喺度做咩姐？！唔使做吖？！抹檯啦！」
「係係係...」輝哥又死晒狗咁，「咁你哋...隨便坐喇...」
『嗯嗯～』我就帶住日倫坐喺較中間嘅四人圓檯。
一坐低嘅一刻...我望到...坐喺窗邊位嘅子茵望咗過嚟...
陽光由窗外照射入嚟，照射落子茵身上...好似天使一樣嘅子茵...眼尾望住...日倫...
竟...竟然...
不問世事嘅仙女...竟然會望住...日倫？
「呢度真係好特別。」日倫望一望四周。
『吓？嗯～係吖係吖～呢度真係好特別～我久唔久都會嚟呢度返Part Time。』呢度...唔好話喺特殊區...直頭係整個香港最安全...最溫暖嘅地方。
「嗯？返Part Time？」日倫疑惑咁打量住我。
『係吖～嗱～』我細細聲講，『嗰個Owner吖～成日偷懶唔返工㗎～仲有嗰個輝哥吖～成日話自己隻手舊患復發偷懶唔做嘢～得返雨姐一個，我得閒咪嚟幫幫手囉～』
「係吖...」日倫打量住抹緊Bar檯嘅Owner幾眼...又打量住抹緊圓檯嘅輝哥幾眼...然後又打量住整緊蛋糕嘅雨姐幾眼...
『吖～係呢～你想食啲咩吖？』都唔記得日倫話呢兩日冇用過精神液，應該都好肚餓。
「我冇所謂～你話事。」日倫帶住微笑。
『哦...我話事...叫啲鹹點食吓好唔好吖？』我都好似未試過呢度嘅鹹點...
「OK吖～」日倫又帶住微笑點點頭。
『咁想飲咩？』
「Espresso～」
『你真識飲～』
「哈哈～OK咁啦。」
『咁你等等我～』
「嗯。」
當我行到埋櫃檯之時，雨姐又古古惑惑咁打量住我：「點吖？想同妹夫食啲乜吖？」
『咩妹夫吖？佢都話係同...我細妹係朋友咯...』呢個雨姐真係吖...
「係吖係吖？」雨姐又古古惑惑咁嘅樣，「做阿哥嘅都唔敏感嘅～」
『嘩...又要有幾敏感吖？』會唔會係你過敏咋？
「唉～做人阿哥喎～點吖？想要咩姐？」雨姐冇我咁好氣～
『呃...一份香酥肉卷...一份火腿芝士脆多...要多份雞肉凱撒沙律卷...一杯Espresso同一杯凍拿鐵...吖～仲要一件黑森林同Blueberry Cheesecake添吖唔該～』我諗應該夠食嘅～
「員工價二百啦～」雨姐向我打咗個眼色～
『哦好好～』我喺銀包拎咗二百蚊交到雨姐手～
「坐低等等啦～」雨姐就怒視住Owner，「Owner吖！過嚟幫手整嘢食啦！想抹張Bar檯抹到幾時吖？！」
「係係係...」Owner無奈咁行近廚櫃，「唉...員工惡過Owner...」
我唔理Owner咁多～行返埋位坐～
我望到子茵...又專注喺佢本筆記之中...
唔...
『係呢...』突然我想問問日倫，『你係唔係鍾意綽姿？』
頭先聽完雨姐咁講...腦海就閃出呢條問題...
「唔係～梗係唔係啦～」日倫帶住微笑擰擰頭，「只係...只係喺綽姿身上...有種親切感。」
『吓？』親切感？
「或者...」日倫諗一諗，「大家都係姓梁掛～」
大家都係...姓梁...
就喺呢個時候...
“叮 叮”
「係飛揚吖？」門口傳嚟熟識嘅男仔聲。
我望去門口...望到企咗一個著住黑色大褸...白髮男子...係...
『梓翹？』