《香港傭兵》: [Day 14－紅色警戒] PART 14
我哋一行五人喺紅色嘅粒子包圍之下，戒備咗一段時間...
枯竭拎住部電話一睇：「雖然有啲干擾...之但係仲可以掃到...大約廿米範圍以內。」
掃到？
「嗯。」羅羅點點頭，「應該向邊個方向行比較安全？」
枯竭再望住部電話諗一諗：「行入前面條通道...精神能量比較弱。」
「好。」羅羅就提高警覺，向住通道方向行入去。
我哋一行四人都跟住羅羅身後...個個都揸實把精神刀...亮出紅光刀刃...行入通道...
喺通道入面，雖然話精神能量好似真係弱啲...但都仲係被雜亂嘅氣息包圍！
再加上牆身都有唔少彈窿同爪痕...地上亦有唔少著住重裝備嘅人體殘肢...好不安...
突然！
「呀呀呀！！！！！！」唔知喺邊度傳嚟嘅慘叫聲！
我哋五個都立即停落嚟！
『喺邊度傳嚟㗎？』好恐怖吖...呢種叫聲...
「唔知...」羅羅望實前方！「不過應該好遠...」
好遠...就咁聽都應該係幾遠嘅...
「係異常生命體？」綽姿都望實前方！
「應該係...究竟有幾多...」羅羅諗咗諗，「繼續行。」
繼續行？真係可以繼續行？
有幾多隻異常生命體都唔知...
但就頭先所見，一隻都好難對付喎！
『我哋好唔好同其他Team匯合咗先？』嗱！唔好話我淨係識諗問題又冇建議提供呀！
羅羅一路行，一路擰擰頭：「冇完整地圖，加上被雜亂嘅氣息干擾，想搵個地方集合都唔得。」
又...又好似係喎...
點解我又冇諗到呢點呢？
「繼續行。睇有乜發現。」綽姿都跟喺羅羅身邊。
『哦哦...』好啦好啦...跟大佬啦！
繼續沿住通道行...好快就嚟到一道被爪爛嘅金屬閘口！
羅羅同綽姿都行近閘口觀察...
羅羅摸住切口：「係精鋼鑄造嘅閘門...睇嚟係用嚟有緊急情況時封住通道。」
緊急情況？用嚟封住通道？
綽姿摸住爪痕：「嗯。不過封住都冇用...都係擋唔住...睇嚟前面應該仲有。」
擋唔住？擋唔住異常生命體？
異常生命體...係由呢度上到去地面？！
好明顯啦！
之但係...
『啲異常生命體係點嚟㗎？呢度又係咩地方呀？』點解越諗就越唔對路？！
「要再調查先知...」羅羅穿過破爛嘅閘口繼續向前行...
我哋一行五人繼續深入呢個不知明嘅神秘地方...
綽姿講得啱！真係仲有被爪爛嘅金屬閘門！
真係擋唔住...咁厚咁硬淨嘅閘門都擋唔住異常生命體...
「嗚呀呀呀！！！」行多幾步又聽到遠處傳嚟慘叫聲！
究竟仲有幾多...又會幾時再遇到...
再穿過幾道被爪爛嘅金屬閘門，地上除咗有著住重裝備嘅人體殘肢外，仲有啲係...著住...白色袍...
呢啲白色袍...又唔同異常生命體嗰啲...
異常生命體著住嗰啲，係有啲似精神病人著嗰啲病人袍...
而而家眼前所見，屍體著住嗰件白色袍...就好似...醫生袍...
究竟佢哋係咩人？又喺度做乜㗎呢？
綽姿踎喺屍體旁，檢查一下...
我哋其餘四人就喺一旁戒備！
我望住綽姿檢查屍體...屍體胸口都被爪到黑晒...燶晒！
頸同面都有被咬過嘅痕跡！血肉模糊！
嘩屌...真係好嘔心...
綽姿檢查完屍體企返起身：「身上乜都冇。」
乜都冇？連銀包電話都唔帶？！
羅羅望一眼屍體：「睇嚟呢度嘅保安都好嚴格。」
保安嚴格？
點解羅羅會咁認為呢？
就單憑屍體身上乜都冇？！
枯竭望住部電話：「前面大約三十米，有房間咁嘅間格。」
「房間...我哋行去睇睇。」羅羅就繼續向前行。
我哋一行五人繼續提高警覺行！
「嗚呀呀呀呀呀呀！！！」又聽到遠處傳嚟嘅慘叫聲！
再行多幾步，就行到嚟...以玻璃幕牆間開嘅房間！
一間間以玻璃幕牆間開嘅房間！一間間又一間間！有好多間！
可以好清楚...望到房間裡面...有唔少...電腦...同電子儀器！
當然唔少得...屍骸...
唔少著住白色...染晒血嘅醫生袍嘅屍骸...
有啲瞓咗喺地上...有啲瞓喺病床上...
仲有啲殘肢...
有幾塊玻璃幕仲碎晒...散到一地都係玻璃碎！
我哋就由其中一塊碎裂嘅玻璃幕牆行入房間。
望住一部部電腦...電子儀器...
『呢度究竟係咩地方...』我冇辦法控制自己唔再問...
呢個地方...呢個地方真係好似...
羅羅將瞓喺電腦前件死屍推落地，撳撳部電腦：「睇嚟呢度係...一個地下研究中心...」
地下研究中心？！
綽姿都調查身邊幾部電子儀器：「冇錯...睇嚟佢哋喺度研究緊...啲嘢...」
研究緊啲嘢？研究乜鬼嘢呀？T病毒定G病毒呀？！
冇錯呀！而家呢度十足十Umbrella嘅地下研究所咁啦！
嗰班著重裝備嘅部隊直頭係Umbrella Security Service嚟啦！
異常生命體明顯就係中咗T病毒嘅喪屍啦！
點呀？點解無啦啦走咗嚟玩Biohazard㗎？！
「上晒鎖...睇嚟係因為緊急情況之下，保安機制自動上鎖...」羅羅撳多兩撳部電腦，再拎部電話出嚟撳幾撳，「用程式解都要...成個鐘...」
「成個鐘...」綽姿望住部電子儀器，「我哋冇咁多時間...」
冇咁多時間？梗係冇咁多時間啦！
淨係留喺度多一分鐘，我都覺得隨時冇命！
突然！我感覺身後出現極強大氣息！
我回頭一望...望住企喺我身後...拎住部電話嘅枯竭...由右邊膊頭...到左邊腰間...劃出四條紅光爪痕！
「呃...」枯竭隨即化成無數紅色粒子！
正當紅色粒子要喺空氣中飄散之時...喺粒子之間...我望到...有兩點...紅光...盯實我？！
紅色粒子開始飄散...
可以好清楚咁...睇到...一個雙眼發出紅光...著住染滿血跡長袍...滿口鮮血嘅女仔...舉起紅光利爪...正要向我...
今次弊！
就喺紅光利爪正要爪向我身上之時，綽姿一手拉開我！
“吱！！！”同時，綽姿以紅光刀刃擋住紅光利爪！
又係...又係異常生命體！！！
“嗡！吱！”羅羅都一個轉身，拔刀橫斬落異常生命體腰間！
“吱！吱！！！”異常生命體同時俾綽姿同羅羅嘅攻擊打到彈後幾步...趴喺地上！！！
只見異常生命體趴喺地上震吓震吓...全身抽搐...睥住我...
又係異常生命體...又係好似喪屍咁嘅女仔...
異常生命體喺地上抽多兩抽...就好似初好機咁爬行過嚟！
“嗡嗡！”綽姿同羅羅一左一右咁砍向異常生命體！
“吱！吱！”異常生命體一左一右咁擋開綽姿同羅羅後，繼續向住我衝埋嚟！
我都唔敢再呆企喺度...
“嗡！”立即拔出精神刀...一擋！
“吱！！！”紅光利爪就壓落我身上！！！
大量紅色粒子由我把紅光刀刃飄出！！！
好大嘅精神能量...刀刃都快要被切斷！！！
「嗚呀！！！」異常生命體突然擘大個血盆大口！
做...做咩呀？想點呀？！
就喺異常生命體想一嘢咬落嚟...
“吱！”一把紅光刀刃就直插入異常生命體個口入面！
係...係盛況把精神刀！
紅光刀刃插喺異常生命體個口入面，但好快...
“吱！”異常生命體一咬！紅光刀刃嘅精神能量就被切斷！
我見唔對路，立即向後一退！
「嗚呀！！！」但異常生命體又發晒癲咁向住我衝埋嚟！
點解又係我呀？！
「嗚呀呀呀！！！」異常生命體不停向我亂揮爪！
“嗡！嗡！嗡嗡嗡！！！”紅光爪影閃過不停！！！
“嗡！吱！嗡！吱！嗡嗡嗡！吱吱吱！！！”我邊後退邊亂擋！
嘩嘩嘩！唔擋得幾多！就快退無可退喇！！！
綽姿立即向異常生命體身上砍幾刀！
“吱吱吱！”但完全入唔到肉！異常生命體亦冇理會綽姿！繼續向我亂揮紅光利爪！
“吱！吱！！！”我一擋！再擋！一避！再避！
異常生命體嘅紅光利爪爪中電腦！爪中電子儀器！立即變成碎件！！！
盛況瞄住異常生命體條頸斬落去！
但呢刀都係唔入肉！紅光刀刃被異常生命體頸上嘅紅光擋住！擦出大量紅色粒子！
“嗡！”異常生命體向盛況一揮爪！
“吱！”盛況用紅光刀刃擋住咁彈後幾步！
異常生命體又雙眼發出紅光睥實我，向我雙爪一揮！
“吱！”我用紅光刀刃一擋！但力量太大！我成個人被震到彈開！
羅羅趁住一剎那空檔，睇準異常生命體對前臂，一刀橫斬埋去！
“吱！！！”呢刀橫斬有啲睇頭！斬到異常生命體退後幾步！
異常生命體站穩陣腳後口吐大量紅色粒子...怒睥住企喺我面前嘅羅羅！
「嗚...嗚呀呀呀！！！」突然！異常生命體又大嗌一聲！身上爆出大量紅色粒子！
又係強大且雜亂嘅氣息！
異常生命體身上不斷爆出大量紅色粒子...同時面上...面上出現裂紋？
一條條...幼細嘅...發出紅光嘅裂紋...
突然！迅雷不及掩耳！異常生命體衝到埋嚟我同羅羅面前！
就喺我乜反應都嚟唔切...異常生命體舉起紅光利爪...正要插向企正喺我面前嘅羅羅之時...
羅羅一手捉咗盛況埋去面前，擋住紅光利爪！！！
「啊！」成隻紅光利爪就插入盛況胸口！大量紅色粒子由盛況口中噴出！
竟然...羅羅竟然...
“嗡！”綽姿趁機一刀砍落異常生命體前臂！
「嗚呀！！！」異常生命體前臂同盛況同時化成無數紅色粒子！喺空間之中飄散！
而異常生命體前臂斷口亦噴出大量紅色粒子！
同時，異常生命體面上嘅裂紋越嚟越多...越嚟越光！
綽姿乘勝追擊！
羅羅看準時機！
“嗡！嗡！嗡嗡嗡嗡！”二人同時喺異常生命體身上亂斬多刀！
無數咁多條紅光刀影就喺異常生命體身上劃過不停！
「嗚嗚呀呀呀呀呀呀！！！」異常生命體大嗌之下...
“轟隆！”紅光一閃！異常生命體全身化成無數紅色粒子！向四周爆開！
雜亂嘅氣息散遍整個空間...飄散...飄散...
「終於解決咗...」綽姿仲係緊握發出刺眼紅光刀刃嘅精神刀！留意四周！
「不過唔知仲有幾多隻...」羅羅亦都一樣！緊握發出刺眼紅光刀刃嘅精神刀！提高警覺！
我就望住散滿喺空間之中...閃燦...閃燦...慢慢變淡嘅紅色粒子：「點解...」
羅羅同綽姿都望咗過嚟...
『點解你要搵盛況擋？』我望住羅羅。
「嗯？有乜咁出奇？」羅羅語氣之中帶住天真。
有乜咁出奇...
「唔搵佢擋嘅話，我同你有機會變串燒添～」羅羅繼續帶住天真嘅語氣。
我同羅羅有機會變...串燒？
「定係你想同我串埋一齊？咁浪漫㗎咩～」羅羅嘅語氣仲要夾雜一點點甜絲絲。
點解可以...講笑咁講...
人命嚟㗎...
羅羅真係...好殘忍...
話晒都係自己隊員...話拎嚟擋就拎嚟擋...
死咗都仲要唔覺得係乜嘢一回事...
今次就話係拎盛況嚟擋刀姐...下次會唔會輪到我？！
唔係喇唔係喇...羅羅呢個人極危險！
仲話跟佢喎...真係死咗都唔知咩事！
都係綽姿好...
「我就話佢天真。」綽姿冷冷放下一句。
唔係喇唔係喇...綽姿都唔係好得幾多㗎咋...佢冷血㗎嘛！