《香港傭兵》: [Day 14－紅色警戒] PART 06
竟然...竟然一入到嚟工業大廈就俾我遇到...上次嗰個黃傘馬尾女...
究竟係我好彩...定係佢唔好彩？
我望多兩眼，馬尾女望咗過嚟！
我立即扮晒鹹濕佬咁，掃視馬尾女全身～然後又扮晒冇乜好望咁望部𨋢幾時落到嚟。
警覺性果然好高！
不過唔係問題...
至少佢一定認唔出我！
上次見佢，我係笠好帽，拉起衫領...佢根本就睇唔到我係咩樣。
就算認到我嘅身形...我呢啲香港男仔標準身形一街都係～認到都唔可以肯定係我～
所以...我而家可以好放心咁...企喺馬尾女身邊...一齊等𨋢。
其實...企喺度一齊等𨋢嘅，唔止我同馬尾女...
仲有兩男三女...
睇佢哋嘅裝扮...應該係上去Party Room嗰啲地方，或者係買嘢。
而馬尾女除咗對我有所戒心之外，對嗰兩男三女亦都一樣...
馬尾女不時都望住嗰兩男三女...
我都留意嗰兩男三女多一陣...發現兩個男嘅係相識...但就唔識得嗰三個女...
而三個女都係同行...有傾有講有笑...
傾談嘅內容都係講上面有乜嘢賣...想賣啲乜...都係啲無聊嘢...
好吖...普通人...用嚟掩護一下都好...
等𨋢都等咗一段時間，終於都等到其中一部客𨋢落到嚟。
嗰兩男三女好自然咁行入𨋢。
我就讓馬尾女行先，跟住佢身後入𨋢。
入到𨋢之後，我已經見到有兩個樓層撳著咗。
係嗰兩男三女要去嘅樓層。
一個比較高...另一個比較低...
至於馬尾女就喺控制板前，撳閂門...但就冇撳到樓層...
係因為佢要去嘅樓層，咁岩係嗰兩層嘅其中一層？
定係為咗...等我...
等我撳埋先...以防我跟蹤佢？
如果係咁嘅話...咁我撳...定唔撳？
唔撳嘅話...縱使佢估我咁啱就係嗰兩層其中一層，都一定會起疑心...
俾佢起疑心，就冇咁易跟到佢...
所以...
『唔好意思...』我都係撳比較中間嘅樓層。
然後就要睇睇...馬尾女肯唔肯撳...
佢肯撳就最好，我就可以跑樓梯趕去佢嘅樓層。
萬一佢唔肯撳，等我出咗𨋢先再撳，我都可以出咗𨋢再睇佢邊層停。
始終而家𨋢裡面嘅人數唔係多...
「唔該～唔該～」兩男仲要出𨋢先。
而家𨋢裡面淨係得返我...馬尾女同三個女仔...
就喺部𨋢繼續向上升...
仲未撳...仲未肯撳...唔係真係打算等我出埋𨋢先撳嘛？
定係...佢要去嘅樓層...咁啱就係嗰三個女仔嗰層？
再唔係...再巧合啲...俾我撳中咗？！
就喺我諗緊六合彩又唔見我中之時，馬尾女突然撳我撳嗰層嘅下一層！
部𨋢亦都慢慢停落嚟。
𨋢門都未完全打開，馬尾女就一個側身急住出𨋢！向右邊方向行！
我都立即撳閂門掣！
右邊方向...右邊方向...
估唔到...馬尾女真係咁小心...
等到最後一刻先嚟撳...
不過總算好彩...只係一層之隔...
部𨋢好快就上到上一層，打開𨋢門！
我都係未等到𨋢門完全打開就一個側身衝住出𨋢！
我左望望...右望望...後樓梯...後樓梯喺邊呢？
喺𨋢嘅左手邊，正正就有道防煙門！
係呢度喇！
我左手插住褸袋，右手就推開道防煙門！衝落樓梯！
下面嗰層！一出去轉右！！！
就喺我跑到落下層，一拉開防煙門，我就見到...有個身影...用槍指住我！
係馬尾女！馬尾女用支手槍指住我個頭！
「你...係...」我未等到馬尾女講晒出口...
左手用力捏...捏褸袋入面支精神液！
一道寒意由手背傳遍手掌…傳到手臂…全身！
當道寒意游到上頭之時…
「好凍...好攰...」我又聽到喇...
「救命...有冇人可以...救我...出去...」我又聽到女仔嘅...求救聲...
「有冇人...呢度係邊度...咩液體...」唔好理...而家唔係理呢啲求救聲嘅時候！
「...咩...人？」就喺馬尾女問晒成句嘅同時...
我以迅雷不及掩耳嘅速度捉住馬尾女手上支槍再捉佢入後樓梯反佢隻手向背後壓佢埋牆！
一連串嘅動作我諗應該唔到0.3秒！
「嗚！」馬尾女慘叫一聲！成個人就俾我壓實埋牆！
『唔好亂郁亂叫。』我再用力扭一扭馬尾女隻手！
馬尾女隻手一軟，手上支槍就俾我搶走！
「你係...你係SPIRIT嘅人...」馬尾女明顯俾我壓到唔係好抖到氣。
『知你就唔好咁多嘢講。帶我去你哋嘅基地。』我都唔嘥時間！因為已經用咗精神液...時間緊迫！
「我係唔會帶你去㗎！」馬尾女仲要口硬！
『你唔帶我去唔緊要...我最多逐層搵...殺晒呢度所有人！』當然...我只係想嚇嚇佢...
「你！你係嚟剷除我哋？！」馬尾女雖然口硬，但無力掙扎！
『唔係...我嚟只係想搵一個女仔。只要我搵到佢...就唔會濫殺無辜。你知我指邊個㗎啦...帶我去搵佢！』我都唔怕老實咁同你講...
「我...我哋係唔會交實驗品俾你㗎！」
實...實驗品？
「殺咗我...殺晒我哋都唔會交實驗品俾你！」馬尾女仲要繼續口硬！
實驗品？咩實驗品呀？
我唔係話想搵一個女仔㗎咩？佢係唔係Get錯咗呀？
『搞清楚，殺唔殺晒你哋同你哋交唔交實驗品出嚟係冇關係...因為我都一定會搵得到！』我大一大馬尾女！
雖然我唔清楚咩實驗品...但而家跟佢講就冇錯㗎喇！
馬尾女唔出聲。
『只係我想俾條生路你哋，俾個機會你哋交實驗品出嚟。』嚇完就要氹。
馬尾女仲係唔出聲。
『條數好易計姐...唔係仲要諗呀化？！』我再用力壓馬尾女埋牆！
「嗚呀！」馬尾女慘叫一聲！
睇嚟我真係大力咗...鬼咩～精神化之下都唔知力度有幾大～
「好！嗄！我帶你去！嗄！」馬尾女抖晒大氣咁！
『早啲答應咪唔使受咁多苦囉！』我鬆返開馬尾女。
馬尾女轉一轉身，挨喺牆身，抖住氣咁怒視住我！
『望咩呀望？俾你認到我個樣又點吖？』你呢啲革命軍自己都唔見得光啦！
馬尾女無奈咁擰擰頭。
『點呀？抖夠未呀？抖夠就行啦！』我拉住馬尾女隻手臂，推一推佢去防煙門！
「唔係呢層吖...」馬尾女撳住自己隻手，向住樓梯方向行。
『早啲講吖！』我就跟住馬尾女身後，行上樓梯。
沿住後樓梯向上行...跟住喺馬尾女身後...
我都拉返起衫領，笠返頂帽。
不過就唔方便除件褸...（其實係我唔捨得除...話晒都係綽姿送...仲要情侶裝咁款...）
冇所謂啦～都唔影響行動嘅～
『喂！仲要行幾耐㗎？唔好整古做怪呀！』我推一推馬尾女背脊！
都行咗好幾層...都仲未到？
「喺上面㗎...定係你想搭𨋢吖？」馬尾女無奈咁行上樓梯。
『搭𨋢？想出古惑呀？！』你唔好當我真係大埔LuLu先得㗎！
「咁咪繼續行囉...」馬尾女一隻手扶住欄杆，另一隻手叉住條腰行。
不過呢個時候都係揸定把精神刀柄喺手穩陣！
就算馬尾女想出咩古惑，都可以第一時間用精神刀應對！
我右手揸槍，左手揸精神刀柄，跟住馬尾女身後喺後樓梯向上行...都已經行咗好幾層...
我一直都有提高警覺...
除咗話要提防唔知馬尾女會出咩古惑之外...仲有...逆行者...
始終...尋晚嘅委託證明咗黃傘同逆行者係有關係...
呢個情報仲係新鮮滾熱辣...仲要係親身體驗嘅第一手資料...
以防萬一...我一直都提高警覺...感應四周...感應有冇逆行者嘅氣息...
講開又講...逆行者...同我哋SPIRIT嘅氣息...總有少少分別...
個分別就係...多一點點親切感...
綠色嘅粒子...好似螢火蟲咁...一閃...一閃嘅綠色粒子...總係帶住點點親切感...
唔知呢一點點親切感...喺佢哋仲係SPIRIT嘅人...仲未用綠光能量之前，又係唔係都係帶住呢點點親切感㗎呢？
咁喺佢哋成為逆行者之後，氣息係唔係又會有所變化呢？
又有好多問題閃出...
唔止搵唔到答案...搵到嘅係...越嚟越多問題...仲好似...越嚟越複雜...
不過而家唔係研究問題多定答案多...
而家係要...繼續提高警覺！感應四周有冇奇怪嘅氣息！跟住馬尾女去搵目標人物！
『行快啲得唔得呀？』我推一推馬尾女背脊！
「你整傷咗我係行得慢啲㗎啦！」
『壓你埋牆又整傷到你呀？』
「人哋女仔嚟㗎！」
『你係揸槍㗎喎！革命軍喎！』
「揸槍唔係女仔呀？革命軍唔係女仔呀？」
『好好好...係女仔～係女仔～咁使唔使抖抖先吖？』
「最好啦！」
喺後樓梯邊抖邊行...（啲女仔真係好麻煩！）
然後就上咗十幾廿層樓！嚟到廿幾樓！
好彩一路上都感應唔到有奇怪嘅氣息...
係！係咩氣息都感應唔到！
咁即係話喺附近唔單止冇逆行者...就連我哋SPIRIT嘅行者都冇？
估唔到...真係俾我冷手打個熱飛機！
跟住馬尾女拉開防煙門，行出後樓梯。
喺走廊之中左望右望...見到有唔少公司名...
我都收返埋支槍喺大褸入面遮一遮...一路跟住馬尾女背後行，再望清楚啲...都係啲Party Room...Playroom...密室逃脫...
呢個年代真係興呢啲㗎咩？
乜真係玩到冇嘢好玩喇咩？
繼續跟住馬尾女身後行，期間仲有唔少顧客由乜Room嘜Room出出入入...
我就行近馬尾女身邊，搭住佢膊頭：『仲要行幾耐？』
馬尾女盡量配合：「好快就到...」
『唔好出古惑呀...』我箍一箍馬尾女條頸！
「點敢呀...」馬尾女推一推開我隻手！
最好就真係唔敢啦...
我真係唔想殺人...
但如果真係冇辦法...迫於無奈...我都只好大開殺戒！
跟住馬尾女身後行多幾步...
轉多幾個彎...
再與幾個由Party Room行出嚟嘅顧客擦身而過...
我就跟住馬尾女身後行到嚟...Umbrella...War Game場？
係室內...War Game場？！
竟然係...以War Game場作掩飾...
好吖～好吖～都幾貼切吖～
只見馬尾女左望望...右望望...鬼鬼祟祟咁...
屌使乜咁鬼祟姐～我都喺正你背後啦！仲怕俾邊個知呀？！
馬尾女放隻手喺掌紋識別器上...
“咔！”一聲，鐵門就打開！
我就跟住馬尾女身後，行入室內War Game場。
一行到入去...面前係一塊黑牆！
跟住馬尾女靠近黑牆向左行...穿過一塊黑布...裡面漆黑一片...
真係黑到伸手不見五指...
War Game場姐...唔使黑成咁呀化？似秘室逃脫多啲喎...
我盲摸摸咁伸手向前亂摸：『喂...喂！我睇唔到路呀！開燈得唔得呀？』
「跟住我啦...向呢邊行啱㗎喇...」我聽到馬尾女把聲...喺我右邊...
係右邊吖...好啦...
我又盲摸摸咁向右邊行...行...行多幾步...
真係唔對路...睇唔到嘢真係好難行...
『喂...開燈啦不如...』開燈...不如自己提升視力啦！
係喎～點解我而家先諗到㗎呢？
就係我提升視力...提升到...就嚟睇到...已經睇到...
突然！眼前一亮！
『嘩！！！』好光！好亮！白茫茫一片！！！
點解呀？咩事呀？話想開燈姐...使唔使成個空間都...係射燈？！