《香港傭兵》: [Day 13－愛港愛國] PART 11
夜幕之下，大飛劃破倒照在大海之中的明月。
泛起陣陣漣漪之時，大飛依舊拋到仆街...
我個屎忽根本就坐唔穩...拋到啪啪聲...開晒花...
至於目標人物？我睇佢應該都好辛苦...
又反鎖對手又蒙頭入閘又瞓住嚟拋又唔知會俾人捉去邊...
係咯...我都唔知㗎...我亦都唔知要捉你做乜㗎...
我係佢嘅話...仲要咁年輕貌美...唔驚就有鬼啦...
唉...都真係戥佢可憐...（我不嬲都係一個憐香惜玉嘅君子～）
不過可憐又點？我又可以點？
你睇綽姿佢都係無動於衷咁望住個大海吹吹風...
海賊都係依舊望住前方死衝爛衝...
連女仔都唔幫女仔，我呢啲男人就無謂多事啦...
喺茫茫大海上拋到甩肺...
都唔知拋咗幾耐...
只係覺得好空虛...好無助...
或者迷失喺宇宙...喺宇宙中飄浮會比較有趣...
然後...我開始見到光...
唔係星光...唔係月光光...
而係...燈光！
開始見到...開始見到水平線上...一點點...一點點燈光！
越嚟越多...越嚟越光！
係岸...嗰邊應該就係荃灣！
唔止...唔止見到岸上嘅燈光...
仲見到...見到海面上...有大貨船嘅身影！
正正有一隻...好大隻...超大隻...直頭係巨型貨船就喺正我哋前面！
海賊巧妙咁兜一兜！我哋隻大飛就喺正隻巨型貨船身邊擦過！
嘩...真係大到...見唔到個頂...
點解仲有咁多貨運入嚟香港？
香港真係咁發達㗎咩？
打仗㗎喇喎...啲商家佬真係唔驚㗎咩？
局勢不穩...股市會跌...樓市會跌...乜春都跌...商家佬都應該會撤資啦...
點解唔安定都可以保持到繁榮？
真係越嚟越唔明啲人諗乜...
所以話我真係唔係一個做生意嘅材料...
唔止一隻...面前仲有一大隻！
海賊又好巧妙咁兜一兜！片一片！
嘩屌！呢一片差啲就飛落海！
揸大飛又唔使下下都最後一刻先嚟片嘅...
我都係揸穩啲船邊...
唔係一陣真係拋咗落海，睇佢哋都唔會停低等我上返船...一定係要我自己游上岸㗎啦...
我就揸住船邊實一實！（差啲俾我揸到爛...）
越嚟越近...雖然唔算話真係燈火通明...但明顯真係越嚟越多燈光...越嚟越近！
近到大飛都開始減速...
近到打橫隻大飛...片住埋岸！
當隻大飛一貼埋碼頭邊...綽姿就一手捉起目標人物！
「呀！做咩吖？」目標人物驚到掙扎！
「唔好亂郁！」綽姿大聲喝！「再亂郁就Dom你落海！」
目標人物立即驚驚收晒聲！
然後綽姿就捉實目標人物一跳！就跳上碼頭！
我都跟住綽姿一跳！跳到目標人物身邊！捉一捉實佢！
你唔好話...我都真係幾驚佢會跌落海...
唔使講啦...萬一目標人物跌落海...一定係我落去執返佢上嚟㗎啦...
“吱！吱～”海賊立即將隻大飛駛走！
嗯？走㗎喇？真係淨係負責揸船㗎咋？
「車呢？」綽姿捉實目標人物問一問。
『呃...係...係喺...』我左望望...右望望...指一指馬路嗰邊...『嗰邊嗰邊...』
其實我有夜盲症...夜晚唔係好認得方向...
「行！」綽姿就捉實目標人物，行向我指嘅方向。
我哋三個就行到嚟馬路旁邊...終於見返我今日晏晝揸過嚟嗰㗎白色共享私家車！（我幾驚唔知咩原因唔見咗...我對共享呢個概念都唔係咁放心...）
行到埋車旁，綽姿就一手拉開車門！（輕手啲啦...唔知會唔會爛...）再一手Dom目標人物上車！
「呀！」目標人物慘叫一聲！瞓喺凳上！
唔好對佢咁粗魯啦...好慘㗎真係...
「快啲上車。」綽姿邊打開前客座車門邊講。
『哦哦...』又我揸吖？
我都坐返上駕駛座...
“吱！吱～”撻返著架車...
『我哋要去邊？』係咯...其實我都仲未知要去邊...
綽姿一邊留意住倒後鏡...鏡中仲瞓喺凳上嘅目標人物...一邊開著車上嘅導航系統...
綽姿全神貫注咁留意住目標人物...喺塊LCD顯示板上撳撳撳撳撳...
我一直都留意住...留意住綽姿輸入嘅地方...係...
「跟住導航行。」綽姿輸入好地方之後，都仲係留意住倒後鏡中仲瞓喺凳上嘅目標人物。
而導引線亦都喺地圖之中出現！
咦喂...唔係投射喺擋風玻璃嗰隻嘅？
唔係真係得啲超級跑車同豪華房車先有呢種技術呀化？！
真係一分錢...一分貨...
「快啲開車...時間無多。」綽姿仲係一邊留意倒後鏡中仲瞓喺凳上嘅目標人物，一邊向我發出命令。
『了解。』開車囉...
“吱...吱～”
喺精神化期間，揸車並唔算太難。
難就難在...要睇住幅地圖上嘅導引線嚟揸...
「開快啲。」綽姿仲係一邊留意倒後鏡中仲瞓喺凳上嘅目標人物，一邊催促我。
『係。』你真係講就易...
大姐吖...我無牌駕駛㗎...
一陣開得太快，超咗速俾警察截停，我點解釋吖？
定係你想我拒捕，踩盡油逃走吖？
GTA吖？咁易逃到吖？
“吱！吱～”一邊望住地圖，一邊揸車。
駛過荃灣區之後，路面上越嚟越多車。
我仲見到對面線有一隊銀色巨型貨車駛過。
又係印有紅色解放軍軍徽嘅巨型貨車...
今朝嘅車禍...仲見到喺巨型貨車車尾...漏出黑色嘅物質...
係咩嚟㗎呢？又係駛緊去荃灣嗰間神秘工廠？
好想知嗰間工廠係搞啲乜...之但係而家嘅我真係冇閒情逸致理佢咁多...
都係快啲駛過去目的地！
“吱！吱～”喺高速公路上，留意住路面有冇警車...又有冇貌似隱形戰車嘅車輛跟喺後面。
提高警覺...提高視力...總算平平安安駛到過嚟九龍區...
一嚟到九龍區...又係特別繁華...
一棟棟豪宅插晒喺度...
又高又密...
豪宅之下又係一個個大型商場...
落地大玻璃鬼死咁大...
唔係睇到裡面名店林立，就係一個個五光十色嘅LCD顯示器賣緊廣告...
路面上都多咗唔少靚車...
“吱！”仲有唔少超級跑車擦身而過...衝去港島嗰邊！
啲超級跑車真係快到識飛（我都揸過林寶啦～）...我踩盡油都跟唔上...
之但係我就唔係跟住啲超級跑車衝去港島...
我係要轉過去...
“依！吱～”我轉過去油麻地...身邊都仲係有好多車...
架架車都開到百幾...私家車又係...搵食車又係...
咁我都大膽啲...再踩得盡啲！
“吱！吱～”穿過何文田...冇穿冇爛咁嚟到...土瓜灣...
冇錯...今次嘅目的地係土瓜灣...而且仲要係喺...
喺一個個燈位前停車...再轉入橫街窄巷...又喺一個個燈位前停車...
左右兩邊嘅商舖都落晒閘...街燈都仲係咁暗...有唔少唐樓都空置...等重建...
“吱...”轉多一個彎，喺左右兩邊都泊滿晒舊車嘅馬路上行駛多一段路...
“依...”我就將架車...停定喺...牛棚入口前...
冇錯...目的地就係牛棚！之不過...
架車一停定，綽姿就立即落車打開後客座車門，拉目標人物落車！
「呀！你哋...你哋想點呀？」目標人物就腳仔軟軟咁。
「行！」綽姿就一手秤住目標人物行！
我都立即跟住落車！跟住綽姿身邊！行入眼前呢間...愛港愛國辦事處！
冇錯...門牌上的確係寫住“愛港愛國辦事處”！
其實當綽姿喺導航系統上輸入“愛港愛國辦事處”，地圖顯示出位置嘅時候，我就覺得奇怪...
明明係牛棚...點解會變咗...愛港愛國辦事處？
一路跟住綽姿身邊行，行唔夠兩步...
「你哋係...請跟我嚟！」就有兩個職員為我哋帶路！
原來今次嘅委託人...係愛港愛國？！
咁點解佢哋要捉呢個靚女返嚟？
我同綽姿就押住目標人物，跟住面前兩個職員身後行！
行到一間紅磚屋...門外都有兩個職員把守...
點解總係好似...怪怪地咁...
行入紅磚屋裡...然後屋裡又有四個職員...幫我哋打開...地窖？！
地窖鐵門一打開，兩個帶路嘅就沿住通往地下室嘅樓梯行落去！
我同綽姿都繼續押住目標人物，跟住兩個帶路嘅職員行落去...
地下通道嘅燈光唔算光猛...而且個格局好似...囚室？！
冇錯！再行入啲...就已經見到左右兩邊...一個個鐵欄式囚室！
估唔到...呢度會有...地下囚室...
再行入啲...裡面仲囚禁咗...犯人？！
佢哋該犯何事？點解會被囚禁喺呢度？！
再行入啲...跟住面前兩個職員再行入啲...
「講呀！收埋咗喺邊？」
一間...刑房裡面...有個犯人被綁起！
「仲咁口硬呀嘛？！」
兩邊都有人用皮鞭鞭打個犯人！
個犯人成套白色衫褲都染滿紅色嘅血跡...都已經冇晒知覺咁...呆望住我哋行過...
嘩咩事呀？使唔使咁殘忍呀？！
一陣間...佢哋又會唔會咁對...對目標人物...
再行入啲...有幾個囚室裡面嘅犯人都瞓咗喺度...唔知係生定係死...
搞咩？呢度搞咩呀？呢間究竟係乜嘢辦事處呀？！
而喺通道之中，仲企咗唔少腰間插住把槍嘅...守衛...
啲守衛望住我哋經過...個個都仲要賊尾賊眼咁...成班賊嚟㗎？！
然後...我哋就行到嚟一間...房仔...
房仔裡面有...五個人...
有四個大大隻隻...腰間仲要插住支槍...
而企喺中間嗰個...係一個四眼老女人...仲要係成個賣國賊咁嘅四眼老女人...
四眼老女人點起支煙：「呵～好準時喎～」
綽姿就押住目標人物，拎部電話出嚟：「確認交收。」
「等等先...」四眼老女人扯一扯飛煙，「除頭套睇睇係唔係先啦。」
「好。」綽姿一揭開目標人物頭套...
我見到目標人物勁驚咁...望住個四眼老女人...
唔係真係要交俾佢哋嘛？
「呵呵～」四眼老女人摸一摸目標人物塊面，再一手捏住佢面狹，「黃傘力量吖嘛？成日同我哋作對吖嘛？諗住匿喺特殊區就捉唔到你呀？」
黃傘力量？目標人物係...黃傘力量嘅人？
「好～一陣慢慢同你玩～」四眼老女人就拎出電話，同綽姿部電話“對望”。
「多謝惠顧。」綽姿袋返好部電話之後...
真係咁就將個靚女交俾班仆街？（點睇班仆街都唔係好人！）
「唔使客氣～帶佢去四號刑房。」正當四眼老女人轉身...
正當兩個大大隻隻嘅大隻佬行近目標人物身邊...
突然！我感覺到...氣息！
與此同時，面前嘅目標人物背後閃出一對...天使翼！
係散發住...綠色粒子嘅天使翼！！！