《香港傭兵》: [Day 13－愛港愛國] PART 03
望住個記錄一頭問號...
強迫委託...
我再碌上少少...
『唔係吖...上次去會展嗰次係有記錄㗎喎...』仲要同其他委託一樣清清楚楚咁記錄低...
大家都係強迫委託姐...點解上次有...尋晚嗰次就冇？
唔...或者性質唔同掛...
或者...尋晚嘅委託比較特殊...
不論係背後嘅原因...目的...
點都好啦～而家應該要睇咗今次個委託，我要做啲乜先。
我撳入“吞噬”，睇睇我要做嘅係...
『去荃灣準備一架車...』停泊喺指定嘅位置？
我仲見到...有地圖...地圖上有點紅點...
係喺...荃灣...近海邊...碼頭附近？
我要搵架車...泊去碼頭附近...
仲寫咗個時間...係要我喺...中午十二點前？！
又要我搵車？！大佬呀，點解總係要一個冇車牌嘅人去搵車㗎？
雖然話我曾經由青衣揸過架林寶返嚟姐！
咁係因為林寶易揸姐！
未來嘅車係唔係架架都好似打機咁咁易揸㗎先？
都算喇！問題係點搵吖？
上次就話好彩（定唔好彩？）遇到宋伯伯借架車俾我捉返佢自己姐！
今次呢？仲要喺市區！
點搵呀？！
市區...咪住先...上次同輝哥出去...好似係用...
輝哥係用App...搵...共享...共享車呀！
冇錯冇錯！呢個時空係有共享車呢種偉大服務！（講到尾咪又係搵錢...有幾偉大...）
咁我去到深井再裝返個App搵共享車咪得囉！
咁泊咗架車之後又要點做呢？
係咪都係到時先有下一步指示㗎喇～
咁而家要做嘅係...我最期待嘅環節...拎綽姿啲衫去洗...嘿嘿嘿...
又可以接觸到綽姿嘅內衣褲...嘿嘿嘿...
咪撚變態啦！！！
我都係拎埋自己啲衫，一次過洗埋！
我拎返呢個禮拜著過嘅污糟衫，拎埋緊身衫褲，拎埋長袍...
拎住緊身衫褲同長袍喺手，睇清楚啲...
好多好多窿...係刀痕...
尋晚...都真係中咗好多刀...
大大小小...有深有淺...
最大條亦係最深嘅就應該係...胸口...
嗰一刀...嗰一個行者...利用自己隊友條命...向我使出最致命嘅一擊...
隊友？隊咩友吖？喺佢哋之間，根本就冇“隊友”呢種關係...
我哋SPIRIT...
咁逆行者呢？
佢哋又會唔會好似SPIRIT咁？
話晒本來都係SPIRIT嘅行者...
之但係背叛SPIRIT之後，又會唔會有所改變？
諗咁多做乜吖？
反正有好多嘢都唔喺自己嘅控制範圍～
而家我可以控制到嘅...就係做好自己本份，唔要再成為綽姿嘅負累！
好！拎齊晒啲衫就過去洗衣舖洗衫！出發！（差啲唔記得拎鎖匙同銀包...）
拎埋鎖匙同銀包，著返件大褸...
『呢件大褸...咪係尋晚喺停車場除嗰件...』又係綽姿幫我拎返...
每次都係綽姿幫我執手尾...我自己就失去知覺...
唉～真係好鬼弱～
究竟點先可以好好控制精神能量㗎？！
我就一邊諗，一邊拎住籃衫出門口。
落到街，都仲係好凍...
“飃！飃！”啲風吹埋嚟仲係刺骨...
而街上都仲係有唔少露宿者瞓緊...又有唔少學生行緊返學。
今日好似...早咗啲...學生都係慢慢行，有傾有講咁。
唔知道...會唔會遇到西貢獻命捉學生妹呢？
一路沿住馬路向洗衣舖方向行，一路留意住路面...
留意住有冇白色輕型貨車...留意住街上有冇光頭佬...
但一路上，都唔係好覺有西貢獻命嘅蹤影...
唔通係太早？仲未起身做嘢？
不過咁都好～少啲麻煩嘛～
綽姿話㗎嘛～無謂惹麻煩上身～
行入井財街，望吓街上...再行入啲...
路旁除咗有幾架單車...仲瞓咗唔少...道友喺度...
唔係一般嘅露宿者...睇佢哋嘅身形...骨瘦如柴...面色蒼白...體弱無力...明顯就係道友...
比上個拜禮過嚟...多咗...多咗唔少...
我一邊行...喺兩旁店舖之中嘅行人路上邊行邊偷偷留意...
有幾個手中拎住...細細粒...紅色嘅...
係...係聖水？
我記得綽姿撻我喺旺角拎返嚟嗰粒紅色毒品嘅時候講過，嗰粒毒品叫聖水...
原來真係...呢頭嘅道友都係啪聖水...
咁貨源又喺邊度嚟？
西貢獻命？
呢啲都唔係重點...重點係...綽姿好似對呢粒聖水好有興趣...
如果唔係做乜要撻咗我㗎呢？！
不過算啦～反正喺我手上都冇乜大作為～
我又唔吸毒嘅～
咁綽姿拎嚟做乜呢？
唔通佢吸？！
望住幾個道友手震震咁...拎住粒紅色聖水...吉落手指罅...
然後幾個道友全身震一震...好似射咗咁...然後又好似有返精神咁！起身執雜物！！！
嘩！呢啲係唔係就係叫做上電？！
上完電真係會精神啲？！
毒品呢樣嘢真係好神奇...
唔怪得引到咁多人走去試...
搞到我都心思思...
許！唔好諗唔好諗！好人好姐掂咩毒品？！
我可以肯定綽姿都唔會！
只係...綽姿想喺紅色嘅聖水裡面...查啲嘢...
嗯...我有好強嘅直覺...一定唔會有錯！
好啦～講咗等於冇講～都係廢話～
拎衫入洗衣舖先～
攬住籃衫行入洗衣舖，一推門入去，我又見到有個肥婆坐喺櫃檯入面瞓緊。
「哞...呼...哞...呼...」仲要瞓到牛叫咁...
唉～都係唔好理人咁多，快啲洗衫先～
我攬住籃衫，行去洗衣機前...睇一睇...
『仆...街喇...』我立即拎個銀包出嚟睇睇！『真係！』
真係咩？
真係得兩張一百蚊紙同一張廿蚊紙囉！
咁即係點呀？即係我又冇散紙囉！
『四十蚊... 十五分鐘…』屌...
我放晒啲衫入洗衣機後，死死地氣拎張一百蚊紙出嚟...隊埋去...
“吱！叮 叮 叮 叮 叮”
點解...
“叮 叮 叮 叮 叮”
點解人類總要重複同樣的錯誤...
“叮 叮 叮 叮 叮”
唉...
“叮 叮 叮 叮 叮”
我坐喺張爛凳上等...
“叮 叮 叮 叮 叮”
等到啲一蚊銀跌晒落嚟，又望住部洗衣機裡面啲衫轉吖轉...
唔知今日...會唔會有道友嚟打劫呢？
望望個肥婆，仲要好似瞓得好冧咁...
我係班道友就唔打劫～偷偷地入嚟偷好過啦～
反正個肥婆瞓得咁冧，偷晒啲錢走都唔知啦～
個肥婆嘅睡相就真係冇乜好望，都係望返部洗衣機裡面啲衫轉吖轉...轉咗好多個圈...
不知不覺就過咗十五分鐘...
『唉...洗完又到乾衣...』我就由下面部洗衣機拎啲衫放入上面部乾衣機...
又戇鳩鳩咁一蚊一蚊...逐蚊放入收銀機...
放咗六十個一蚊銀入部機度之後...
『屌...入到手都震...』我就坐返落張爛凳，又要等...
坐喺度再虛度光陰...
「哞...呼...哞...呼...哞...呼...」聽住肥婆嘅鼻鼾等...
然後又過咗廿分鐘...
『好喇...搞掂...』我就行去拎啲衫出嚟睇睇係唔係真係乾淨晒。
雖然係嘥時間，但點都要檢查嘅～
我隨手拎綽姿啲白色底褲睇睇...
白白淨～冇黃漬～
再拎返我同綽姿嘅緊身衫褲同長袍睇睇...
穿窿嘅地方仍然穿窿～冇爛得更嚴重就OK喇～
『好！拎返啲衫返屋企～』我就攬住籃衫...
「哞...呼...哞...呼...」望住個肥婆仲係呼呼大睡...
好彩你有鼻鼾聲...唔係我真係以為你死咗...
攬住籃衫行出洗衣舖，沿路行返屋企。
呢區真係...變咗道友嘅集中地...
不論係瞓喺街邊唔知死咗未，定抑或喺街上算係精神咁行嚟行去...都係骨瘦如柴...面色蒼白...
個個望住我嘅眼神...都係不懷好意咁...
真係估唔到...以前久唔久都會走過嚟食糖水嘅地方...而家變成咁...
我都係盡快離開...因為我仲有嘢要做。
攬住籃衫返到嚟屋企，都差唔多九點。
『要快手啲喇...要快手啲喇...要喺一點前搵到架車泊喺指定地點...』我就快快手手摺自己啲衫！
摺好晒自己啲衫之後，又快快手手咁幫綽姿褶好埋啲內衣褲放喺床上！
仲有摺好啲Tee...短褲...掛返好條校裙...短裙...
『好喇好喇搞掂搞掂...』我就快快手手換返套穿晒窿嘅緊身衫褲！綁埋把匕首喺大髀！著埋穿晒窿嘅行者長袍！插返把精神刀柄喺腰間！再拎埋精神液...
精神液...應該拎Level幾呢？
『唔...』我又有選擇困難症...
其實都唔係有好多俾我揀姐！都係得兩三支咋嘛！
是旦啦！拎支Level 2先啦！
真係好趕呀真係好趕呀差唔多九點三喇！要快啲趕過去...唔撚係喎...我仲要撳機喎...
身上得返百二...
『屌！真係好撚煩呀！！！』
我拎齊晒嘢著埋件大褸就九秒九鳩衝落樓！
『屌你老味...撳機又要過去新墟嗰邊...撳完又要走返過嚟搭紅Van...』屌真係好撚柒煩！
我又九秒九咁鳩衝過到去新墟！鳩衝到櫃員機前！
『好彩冇人...好彩冇人...』我就快快手手撳...
呃...我嘅銀行戶口剩返...六百五？！
仆街吖！撳晒六百蚊出嚟加埋身上有嘅都係得七百二...夠錢出去都唔夠錢返！
做乜一大清早就諸事不利咁㗎？！
係唔係應該轉咗Sil先...唔好搞咁多喇！冇時間喇！撳晒六百蚊出咗去搵咗架車先算啦！話唔定今日搭紅Van又有折頭呢！
我就快快手手撳晒六百蚊出嚟袋好！再九秒九秒跑返去屋企嗰邊！
『嗄...嗄...嗄！』跑到返嚟屋企對面馬路...我已經上氣唔接下氣...
屌...啲體能都仲係咁差...
真係唔掂...真係唔掂...如果你話精神液可以長期使用幾咁好...
我企喺路邊，扯晒大氣咁等...等紅Van...
今次又要等幾耐㗎？我冇乜時間㗎咋...
我好心急咁望得遠啲...再遠啲...
我望到...望到有...紅色嘅頂...
“吼！”嚟緊喇！嚟緊喇！
“吼！吼～”好彩今次唔算等得太耐！
“吼～吼！”真係估唔到...今日第一件好彩嘅事...係咁快有紅Van搭！
我向住紅Van揮揮手！
“依！！！”紅Van就急煞喺我身邊！打開車門！
『幾錢呀幾錢呀？』我一上車就拎個銀包出嚟摷定錢！
「五百囉我屌你個柒頭問咁多自己唔鳩識睇牌㗎咩？盲閪...」林雪又屌晒鬼咁拎起放喺車頭塊紅牌俾我睇睇再放返上車頭...
『哦...哦...』屌...你手車飛得咁快...我睇鬼得清你車頭塊牌咩...
我由銀包拎張五百蚊出嚟，交到林雪手...
銀包裡面得返二百二...一陣搵完架車真係要轉返啲錢...
「屌你老味真係...」林雪由倒後鏡中望住我擰擰頭...「坐撚穩啦...」
『係係...』我都係快啲坐落張凳...
“依！吼！”林雪就一俾油！紅Van就衝住去！
做乜姐...講到我好似好失禮咁...