《香港傭兵》: [Day 10－西貢獻命] PART 08
喺我仲未盤算到仲有啲咩突發事要有定心理準備之時...
「準備出發。」綽姿著埋對鞋。
『嗯。』我都著起件黑色毛毛大褸...
出發！
落到街，綽姿左望右望：「你帶路。」
『嗯。』我就帶住綽姿，向置樂方向行。
一路上，綽姿都跟喺我身後...
我都留意住街上嘅情況。
沿住馬路旁邊一路直行，一路上冇乜人，環境都比較暗...不過都已經習慣。
而我要留意嘅係...有冇西貢獻命嘅光頭佬...有冇奇怪嘅貨車經過。
始終...而家我同綽姿...係兩個妙齡少女...完全係西貢獻命嘅目標...
仲要大安旨意咁喺條陰暗嘅路邊行...
我唔想未去到目的地，就被佢哋捉上車...
所以我都係提高警覺...留意四周。
不過好彩著咗件大褸～遮遮下面冇咁凍～
我真係唔明啲女仔，點解可以著咁短嘅短裙...
真係好似冇著咁㗎喎！啲風真係入晒去㗎喎！唔怕冷親個窿㗎？
而家我有件大褸遮遮吖，都凍到鳩縮啦！
唉～真係唔明啲女仔諗乜～
繼續提高警覺行，總算安全嚟到置樂。
『差唔多到喇。』轉個彎，再行多兩步，差唔多就見到酒吧。
「嗯。放鬆啲。」綽姿行喺我身邊，翹住我手臂。
『嗯。』放鬆？乜我而家好緊張咩？
我就盡量放鬆，帶住綽姿行過馬路。
我哋已經見到，不遠處有兩個光頭佬企喺酒吧門前。
兩個光頭佬都食住煙吹水。
呢個時候...
“咯 咯”綽姿加重腳步！
兩個光頭佬就察覺到我哋正行近佢哋面前，擰咗過嚟！打量住我哋！
我同綽姿就繼續行...越行越近...
當我哋行到呢門口前...
「就係呢度喇？」綽姿帶住天真爛漫嘅笑容指指酒吧。
『嗯～』我唔敢講太多...只敢扮嬌嗲咁“嗯”咗一聲...
喂大佬...要扮女仔聲唔易㗎...你估真係升高兩度就變容祖兒咩？
兩個光頭佬就鹹鹹濕濕咁打量住我同綽姿。
其中一個仲摸住下巴：「妹妹仔～嚟飲嘢吖？」
嘩我屌...個樣衰撚到呢...真係妹妹仔嘅話，早就俾你嚇走咗啦...
「係吖係吖～」綽姿仲要一面天真咁，「係唔係女仔免費㗎？」
「係吖係吖～」另一個光頭佬就摸住綽姿背脊，「免費任飲添㗎～」
你條仆街！唔好抽綽姿水好喎！
話口未完，另一個光頭佬又摸住我背脊：「鍾意飲幾多都得～飲幾耐都得～」
仲要越摸越落...摸到落我個屁股...
仆你個街！我咁大個仔都係第一次俾男人摸屁股！
「咁好吖？咁我哋快啲入去咯～」綽姿就拉住我入酒吧！
臨入門口之時，仲要俾個光頭佬捏一捏屁股！
屌！好撚好捏咩？！
「走得咁快...」
「唔緊要～一陣慢慢玩都仲得～」
「過吓手癮好喇...唔搞得㗎...」
入到去酒吧，裡面同今朝好唔同！
音樂都幾大聲！
而且多咗好多人！
成個場都真係差唔多坐滿晒！
有男有女，不過都係女仔居多！
喺個場行唔夠兩步，綽姿就拉住我埋去吧檯坐！
一坐低，一個光頭Bartender就嚟問我哋：「兩位靚女想要啲咩？」
呢個光頭Bartender都係西貢獻命嘅人？
「我哋唔識㗎～你幫我哋揸主意吖～不過唔要咁易醉㗎喎～我哋唔係好飲得㗎咋～」綽姿仲係帶住天真嘅笑容。
「好吖好吖～等我幫你哋調杯冇咁重酒精嘅Cocktail～等等我～」個光頭Bartender一轉身...
我就見到佢左頸後方有個...西貢獻命嘅紋身！
果然...都係西貢獻命嘅人！
「係呢係呢～估唔到會有間咁正嘅酒吧吖呵～」綽姿邊問邊望望周圍。
『嗯嗯～』我都再橫視一下整間酒吧...坐咗唔少光頭佬...
又有幾個光頭侍應執緊嘢...抹緊檯...
仲有幾個企埋一二邊...睇緊個場...
咁即係話...真係成間酒吧都係西貢獻命嘅人工作...
咁呢間酒吧...究竟係用嚟做乜㗎呢？
望住右邊遠處嗰張檯，幾個攬住幾條十六七歲妹妹仔嘅西裝友...
又望望左邊不遠處張檯，兩個西裝友被兩個十四五歲妹妹仔坐大髀...
原來呢區都有西裝友㗎？！
定係喺出面入嚟㗎？！
而在場嘅女仔...十五六歲嘅又有...就連十一二歲嘅妹妹仔都有...
睇起上嚟...全部都係廿歲以下...
咁呢間酒吧...唔係真係純粹想劏班搵食嘅鹹濕西裝友吖化？！
「嚟～兩杯Westlife～」個光頭Bartender就放咗兩杯Cocktail喺我哋面前。
Where the skies are blue to see you once again～My love？！
嘩而家啲人改名真係唔使用腦㗎喎～
「唔該晒～」綽姿仲要一面天真咁望住光頭Bartender笑～
「兩位慢用喇～」光頭Bartender轉身離開後...
我正想拎起杯酒飲之時...
綽姿撳一撳住我隻手！擰擰頭！
做咩吖？怕我易醉吖？
放心喎～個光頭Bartender話調杯冇咁重酒精㗎嘛～
綽姿向我打咗個眼色，望望後面...
我偷偷望望綽姿身後，正正就見到有個西裝友抱住個十四五歲嘅妹妹仔...入房！
唔係咁狼死吖化？！醉咗立即入房砌？！
唔單止嗰個十四五歲嘅妹妹仔...隔離張檯又有兩個醉死咗嘅十六七歲妹妹仔，被兩個西裝友同兩個光頭佬抬緊入房！
仲要係入同一間房！唔係一齊搞咁淫亂吖化？！
唔單止！唔單止！仲有四個十一二歲嘅妹妹仔瞓咗喺張梳化上！
之但係...點解班西裝友會同西貢獻命班光頭佬夾手夾腳抬班妹妹仔入房㗎呢？
我唔係好諗得通...
點解班西裝友會...同西貢獻命班光頭佬一齊抬班妹妹仔入房...
唔通...Share真係開心啲？
「杯酒有藥。」綽姿細細聲講。
『吓？！』周圍嘅環境有啲嘈吵，唔係好聽得清楚...
「留意班女仔...」綽姿再向我打個眼色。
我再留意班女仔...佢哋唔似係醉...似係昏迷！
冇錯！就好似尋晚...西貢獻命抬茵婷上貨車...好似貨車裡面班昏迷咗嘅女仔...
話口未完，我又見到有個十二三歲嘅妹妹仔拎住杯酒突然失去知覺！
係迷藥！
「我估...呢度係一個陷阱...」綽姿留意住四周，「迷暈女仔嘅陷阱。」
『係迷暈女仔嘅...』我都仲未講完...
“砰啪！”門口方向傳嚟巨響！
被巨響吸引，我望咗過去門口方向...我望到...有個...身影...
有個手持...綠光刀刃嘅身影！
『係...係逆行者...』
著上黑色長袍...笠起頂帽...塊面漆黑一片嘅逆行者手持綠光刀刃...一步一步行入嚟！
「係逆行者...係逆行者呀！」在場嘅光頭佬一邊大嗌！一邊走去拎...自動步槍！
「踎低！」綽姿一手拉低我！
我就同綽姿踎喺凳旁！
緊接落嚟嘅就係...
“啪啪啪啪啪！”槍聲！
好多好多槍聲，由四方八面傳出！
咩事吖？咩情況吖？點解會有逆行者出現㗎？！
綽姿攬實我！偷偷觀察...
我又偷偷由凳與凳之間望望...
望到逆行者揮動手上把精神刀！
“啪啪啪啪啪！”擋住正射向佢身上嘅子彈！
我睇唔到有幾多粒子彈飛埋去！亦都睇唔到佢擋到幾多粒！我淨係睇到綠光刀刃不停揮動揮舞！！！
好快...快到只係見到綠光殘影！好似有一層綠光盾擋喺逆行者面前！
說時遲，那是快，逆行者突然消失！
「嗚呀！」又幾下慘叫聲！
幾個光頭佬就分屍！！！
係分屍！的確係分屍！仲要散到一地都係！
然後我又捕捉到逆行者嘅位置...佢再揮動手中嘅精神刀幾下...
“嗡！嗡！嗡！”幾道綠光飛出！斬開咗幾張木檯！幾個光頭佬同西裝友都中刀！分屍！
嘩！連西裝友都唔放過？
咁我又會唔會俾佢斬死？！
「嘩！救命吖！救命吖！」幾把女仔慘叫聲！
“啪啪啪啪啪啪啪！”再有幾下槍聲！
“嗡！嗡！嗡！”逆行者再揮多幾刀！忍步移到持槍嘅光頭佬面前！分屍！！！
好快手！手起刀落！斬到一件件...身首異處！
全間酒吧嘅光頭佬同西裝友都無一倖免...
然後...逆行者就行近“VIP房”...
“嗡！”逆行者一刀斬開VIP房門！
“啪！”房內傳來一下槍聲後...
「唔好殺我...唔好殺我！」
呢個角度...我唔係好睇到房裡面嘅情況...只係聽到...大哥B嘅求饒！
「大家都係自己人...冇必要趕盡殺絕姐...」冇錯！的確係大佬B把聲！
之但係...點解大佬B會話...大家都係自己人？
然後...
「邊個同你係自己人？」係一把...變咗聲嘅...「你哋班國安局嘅走狗！」
女仔聲？！
“嗡！”
「呀...」大佬B慘叫一聲後...
逆行者都由VIP行返出嚟！
逆行者手持綠光刀刃，一步步行，喺我哋面前行過...出門口...
綽姿攬實我...再探頭偷偷望一望門口，確保逆行者嘅身影離去之後...
「走咗。」綽姿望住門口方向，扶返我起身。
『嗯...頭先嗰個女嘅逆行者...』雖然變咗聲，但我都可以好肯定...個逆行者係女仔嚟...
「係男係女都唔重要...」綽姿望望在場仲生還嘅女仔...
「救命吖！嗚嗚！」
望住班女仔一個又一個咁跑出門口，離開酒吧...
再望望四周...屍橫遍野...
『點解...點解佢哋會話係...自己人？』我一邊跟住綽姿行，一邊再望望...
原來就連喺吧檯裡面嘅光頭Bartender都身首異處...
「因為...」綽姿一邊向住VIP房行，一邊諗，「本來西貢獻命背後係有逆行者支持...就喺西貢攻防戰嘅時候，同佢哋交過手。係唔知點解嚟到呢度，好似反咗目...個局面好似敵對咁。」
『唔怪之得...佢哋噏得出...逆行者...』唔單止知道有我哋SPIRIT嘅存在...仲同逆行者有關係...
而原來...西貢攻防戰係有同逆行者交戰...
唔怪之得...綽姿會咁出名...
「我就覺得奇怪...點解會有西貢獻命嘅委託...照咁睇...西貢獻命同逆行者反目...仲投靠咗國安局。」綽姿行到嚟VIP房門前，望住被一刀兩斷，瞓喺地上嘅大哥B屍骸。
『因為我哋會接國安局嘅委託...順理成章都會接西貢獻命嘅委託。』因為西貢獻命已經係國安局嘅走狗。
「嗯...應該係咁...而且...呢排逆行者比較活躍，所以西貢獻命就委託我哋，防範逆行者。」綽姿離開VIP房，向住另一間房行過去。
委託返我哋，去防範返逆行者...
你話呢個世界幾咁奇怪。
之前嘅夥伴，而家嘅敵人。
之前嘅敵人，而家嘅夥伴。
「記住，頭先所講同喺呢度所見嘅唔可以話俾人知，要絕對保密。」綽姿打開另一道房門。
『嗯。了解。』我知道...情報係好寶貴。
而呢啲咁寶貴嘅情報，唔知又值幾多錢呢？
『係呢...咁班女仔點吖？』我望住喺房裡面，昏迷晒...瞓晒喺梳化同地上嘅女仔...
個個都十幾歲...好多都唔夠秤...有啲仲衣衫不整...
「可以點？唔理得咁多。話唔埋好快就有西貢獻命嘅人嚟車走佢哋都唔定。」綽姿望住班昏迷晒嘅女仔擰擰頭。
『喂你都識講話唔埋好快就有西貢獻命嘅人嚟車走佢哋都唔定啦！又想見死不救吖？』茵婷你就救，其他你就見死不救！
「唔係你又想點吖？」綽姿打量住我。
『我又想點吖？救晒佢哋走囉！』仲要問吖？
「你...你真係我遇過之中，最多事嘅行者。」綽姿冷眼望住我，擰擰頭。
我呢啲唔係叫多事...
我呢啲係叫路見不平，拔刀相助！
TO BE CONTINUED