《香港傭兵》: [Day 08－破壞能源] PART 10
雖然入嚟嗰嘢，冇仁慈同綽姿咁型...但總算都入到嚟發電廠。
雪花由天上降下，我哋三個人都貼近牆邊。
最頭嘅係仁慈...第二係綽姿...最後係我。
仁慈探頭望出去...綽姿提高警覺...我就...八八卦卦咁望望...
呢個位置...貼住幅灰黑色大牆，冇乜嘢望到...
隱約望到條罅...好光！
應該係射燈！
仲要好似係...固定咗嘅射燈。
咁樣嘅話...點出去？
我都仲未構想到點出去，仁慈就一個箭步衝出去！
綽姿亦緊隨其後！
要...要行喇？喂喂...我仲未有心理準備喎！
我都唔理咁多，一個轉身就衝出去！
一出到去，仲係大大盞射燈射住！但已經唔見綽姿同仁慈嘅蹤影！
而而家身處喺一條打橫嘅通道！
面前距離十米左右有堆木箱同油桶！
左直路唔知通去邊！
右邊啱啱就有兩個著上防彈背心...手持長槍嘅守衛背住我巡緊！！！
要衝去邊？向邊邊衝？我完全唔知！
不過可以肯定唔會係右邊！左邊都唔多似...應該就係前面堆木箱同油桶！
應該係㗎喇！應該係㗎喇！
玩Metal Gear都係喱得就喱㗎啦！
我就以忍步鳩衝過去！跨過木箱，綽姿同仁慈已經踎低等緊我！
YES！估啱咗～都話我玩潛行有一手㗎啦！
當我差唔多落地之時，綽姿扶一扶我！仁慈又一手撳住我個嘴！
使唔使吓吓都撳住我個嘴吖？你估我係女咩？係唔係都嗌咗先？
然後仁慈繼續帶頭，我同綽姿又緊隨其後！
跨過一堆雜物...喺幾個木箱後面探頭望出去！
今次我都可以睇清楚出面嘅情況！
雪花紛飛之下，我見到出面有幾支定點大射燈由高處射住！又有幾支郁動嘅大射燈，設喺暸望台上，由高處掃嚟掃去！
隱約仲見到暸望台上有著上防彈背心...手持Barrett M82駐守！
嘩...使唔使吖？
你以為咁就大笨象？未算～
暸望台與暸望台之間都有鐵製天橋！
天橋上仲不時都有守衛巡邏！
淨係要避開佢哋嘅耳目都唔容易！
建築物嘅外牆仲要掛咗唔少黑色半圓球體！
係CCTV...
至於地面...有幾架吉普車...又有幾架運兵貨車...又有幾個大嘅軍用帳篷！
仲有唔少著上防彈背心...手持長槍嘅守衛巡緊！
一個發電廠姐...又使唔使咁多人守呀？
唔講仲以為係軍事基地！
出面守備森嚴，我哋又點出去吖？
只見仁慈望多兩眼，等到六個巡邏守衛行過咗，就跳出去！避住郁動緊嘅大射燈，一跳就跳上運兵貨車車頂！借勢再跳！就跳上啱啱有兩個守衛巡過嘅鐵製天橋！
兩個守衛完全察覺唔到仁慈跳咗上去！仲要繼續背住仁慈向前巡！
嘩我屌！我以為Metal Gear D NPC已經夠蠢，估唔到現實世界嘅守衛又盲又聾！
傷殘嘅都可以做到守衛，天門真係夠厚道～
當我仲喺度諗緊天門會有乜福利之時...
綽姿等到兩個巡邏守衛行過咗，就跳出去！避住郁動緊嘅大射燈，一跳就跳上運兵貨車車頂！借勢再跳！就跳上仁慈身邊！
佢哋兩個都跳晒上去，應該輪到我喇掛？
但我又應該幾時行動呢？
只見鐵橋上嘅仁慈向住我打晒手勢咁！
係等？定係行得？
喂我唔識手語呢樣嘢㗎喎！講返中文得唔得呀？
只見仁慈指手畫腳咁...
我再望望出面嘅環境...冇守衛巡...郁動嘅射燈就快射到去頭先仁慈同綽姿行動嘅位置...
我諗...係機會喇！
我一跨過木箱就避住郁動緊嘅大射燈，跑向運兵貨車！
掂吖掂吖！避得好靚吖！
只要我跑過去運兵貨車...跳上運兵貨車車頂...
就喺我差唔多跑到去運兵貨車...跳上車頂之時...
“吱！吱～”運兵貨車開走咗！
乜撚嘢呀？！
點解運兵貨車會開走㗎？
有呢一Part㗎咩？
咁而家點算呀？我應該點上去呀？
我立即左望望！右望望！
射燈就快射到過嚟！再唔快啲走...就俾人發現㗎喇！
正所謂禍不單行，就喺我仲諗緊點算之時，我聽到好似有人正要喺個大嘅軍用帳篷行出嚟！
仆街喇呢次！佢一行出嚟...就會見到我成條蕉咁棟喺度！
我眼尾望一望上綽姿...綽姿正想拔刀！而仁慈立即撳住佢！
非必要都唔好傷人...免打草驚蛇！
我都係立即跳入吉普車入面！避避先！
我一跳入吉普車...
「嗯？」我就聽到...出面有把男人聲！
係被人察覺到？頭上亮起問號？
仆街喇呢次...仆得街喇呢次...
“咯...咯...”我仲聽到腳步聲...“咯...咯...”越嚟越近...
點好呢？應該點做呢？
我心裡已經響起Metal Gear嘅配樂聲！！！
有冇紙皮箱俾我喱喱呀？！
吉普車裡面乜鳩都冇...行過嚟一望就望到我㗎喇喎！
我係唔係應該箍佢頸，再整暈佢？定係一刀插死佢算呢？
“咯...咯...”越行越近...
除咗腳步聲，我感覺到自己嘅...心跳！
“砰噗！砰噗！”仲要好急...好重...好大聲！
心跳聲...係喎！心跳聲？！
我一直都冇留意到...原來喺精神化期間...一樣會有心跳！
咁講法...心臟...會唔會都係要害之一？
“咯...咯...咯...咯...”好近...已經差唔多行到埋嚟...
撳住佢個嘴...一刀插死佢...
就喺我準備好拔刀之時...
“嘟 嘟”兩聲Call機聲！
「係？好...知道...而家過嚟。」
“咯 咯 咯 咯 咯”腳步聲越行越遠...
『呼...』嚇死我...
我以為真係要出手...好彩都俾我過到骨～
唔好咁開心住！而家係要上去同綽姿佢哋會合！
我再探頭出去睇睇...確保出面安全，爬上架吉普車頂！再大大力一跳！跳上鐵製天橋！
當我同綽姿佢哋會合之時，仁慈一手就捉實我件袍，拉我埋去細細聲講：「我咪打晒手勢同你講兩秒後架運兵貨車會駛開你就三秒內向三點鐘方向跑定過去架吉普車借個車頂跳上嚟囉！！！」
『我...我我我識鬼睇咩？』你當我聾啞人士吖？
「我都話咗你會低估佢嘅無能。」綽姿Face Palm。
咩姐...而家咪又係有驚無險到Check Point...
「貼緊啲！」仁慈繼續喺鐵橋上潛行。
『哦哦...』我都跟住仁慈身後，喺鐵橋上潛行。
綽姿就跟喺我後面...
而家被綽姿跟住...真係有啲唔慣...
我再望望下面...又有六個著上防彈背心...手持長槍嘅守衛巡邏...
究竟佢哋巡乜春㗎？我哋三個喺正佢哋頭頂行都留意唔到？！
抬頭望望都見到啦！
就喺我正要望返上前之時，我塊面撞咗埋仁慈個屁股！
喂！做乜無啦啦停低吖？！（不過仁慈個屁股又...幾軟熟...）
再望上前，原來仁慈等緊射燈掃過～
以前玩Metal Gear都已經有呢個疑問，你咁樣掃又點會掃到可疑人物？
你估我唔識避㗎咩？
應該定點射住！咪過唔到囉！
等到支射燈掃過，我哋又極速衝前幾步！轉個靚彎！再跳落下一層！
喺下一層等下面嗰兩個守衛行過，我哋又跳落去！再極速跑去牆身！貼住牆身咁行入窄巷！
穿過窄巷，再等架吉普車駛過，我哋又跳上通往暸望台頂嘅鐵製樓梯！再跳入對面建築物嘅氣窗！
一入到嚟...
“轟隆！轟隆！轟隆！”好鬼嘈！
而且仲要好暗！
喺暗淡嘅光線之間，只係隱約見到有好多條...粗幼不一嘅管道...
又有唔少閘掣...
呢度係...
“轟隆！轟隆！轟隆！”繼續跟住仁慈行，行落鐵製吊橋...
呢度嘅溫度都比外面高...
呢度係...
行多幾步再轉個彎，身後嘅綽姿突然拉停我！
做...做咩？
“吱！”突然！左邊其中一支管道噴出白色蒸氣！
『嘩嘩嘩！差啲就顏射！』好彩有綽姿拉住姐！
「A廠已經好殘舊...」綽姿推一推我，「最好小心啲。」
『哦哦...』A廠？呢度就係...原來我哋已經入到嚟A廠？！
仁慈繼續行，跳過斷開嘅橋面...
我同綽姿都跟住仁慈，跳過斷開嘅橋面，轉落下一層...又跳過水氹...
“轟隆！轟隆！轟隆！”
話說...咁大個A廠...我哋要喺邊度放炸彈？
只係一直跟住仁慈行，一直都唔見有人。
冇守衛...亦冇工作人員...
乜發電廠唔使人喺裡面做嘢㗎咩？
只見面前嘅仁慈一直提高警覺...向前行...
就喺我哋再轉多兩個彎，落多一層，跳過兩條斷橋，再轉一個彎，仁慈停咗落嚟...
嗯？到喇？
我行前多一步，望望前面有啲乜～
我就望到...距離我哋大約五米嘅前面...有個...著住黑色長袍...笠起頂帽嘅...身影？！
係...行...者？
呢個身影...右手手中仲要拎...
突然！呢個身影背後閃出一對散發住綠色粒子嘅...天使翼！
同時！身影嘅全身...長袍上嘅暗花...都發出綠色光芒！“嗡！”手中嘅精神刀柄亦亮出刺眼嘅綠光刀刃！
然後！天使翼就好似曇花一現...瞬間消失...
『係...係逆行...』逆行者！！！
“嗡！嗡！嗡！”仁慈雙手同時喺左右腰間拔出精神刀柄，亮出刺眼嘅紅光刀刃！
係...係雙刀流？！
綽姿喺我背後細細聲講：「拔刀。」
拔...拔刀？
我回頭一望綽姿，先發現原來佢手中把精神刀已經亮出刺眼嘅紅光刀刃！
係...係...要拔刀！
但喺我仲伸緊手去腰間之時...
逆行者踏前一步，就以橫斬姿態向我哋展開攻擊！
仁慈立即一個後空翻...
冇錯！我望住仁慈係一個後空翻，翻到我同綽姿身後！
而逆行者就已經跑到嚟我面前...使出天翔龍閃！
仆街喇呢次！我連刀都未拔到！
就喺千鈞一髮之際，綽姿用精神刀幫我一擋！
逆行者立即彈後兩步！
「果然...」綽姿企正喺我身邊，「一有事就第一個走。」
『你係指...仁慈？』我都拔出精神刀，亮出紅光刀刃！
我感覺到...仁慈嘅氣息已經遠到...遠到感覺唔到...
「仲有邊個？」綽姿擺出備戰姿態，「佢話過一遇到逆行者就立即逃走...我就諗佢會唔會賣甩我哋，自己走先。」
原來...綽姿一直都盤算住呢點...
等我仲以為...以為仁慈會...
睇嚟我真係太天真！
『咁我哋聯手對付面前呢個逆行者！感覺上...呢個逆行者冇上次遇到嗰兩個咁勁...』我的確可以分辨出...
由剛才逆行者背後閃出一對散發住綠色粒子嘅天使翼嘅一剎那，我就感覺到佢嘅氣息...比嗰兩個叫必然同偶然嘅逆行者弱！
「我哋聯手...或者真係可以從佢一個手中走得甩。但...你真係認為得佢一個？」綽姿側一側身...
真係認為...得佢一個？