《香港傭兵》: [Day 08－破壞能源] PART 04
我同綽姿都繼續留心...聽聽有乜情報收集...
「唔好話你！我都想快啲走！」一把粗魯嘅男人聲接住講。
快啲走？走去邊？
然後又有一把女仔聲：「咪就係囉...呢邊乜都冇...仲要鬼咁凍...好想快啲返入元朗吖...」
原來係想返入元朗...
原來...真係天門嘅人...
然後又有另一把男仔聲：「呢個係我哋嘅任務。」
任務？守喺呢度係佢哋嘅任務？
然後又到第一把男聲：「咁即係仲要守到幾時呀？成個月喇...已經喺呢個鬼地方食咗成個月西北風喇...」
「我守咗半個月都就快變雪條喇...」
「未收到指示。不過我諗應該好快有人嚟接我哋手。」
佢哋四個就繼續討論。
有人嚟接手？又會係咩人？
會唔會係...西貢獻命？
「喂！你哋守咗一頭半月都好啦！我係本來守喺度嗰批喇㗎！我仲要係差唔多換更㗎！當初淨係叫我哋唔好撤住，話等進一步指示！好啦！諗住可能未安排好姐！而家幾時會派人嚟接我哋手又唔知！上面搞緊乜㗎？！」
就咁聽佢哋講...點解好似咁混亂？
「我都係一樣。咁都係因為我哋夠資深，上面先要我哋一直留喺度姐。」
佢哋所指嘅上面...係唔係指天門嘅高層？
究竟呢啲反抗軍嘅架構又會係點？
「而家上面係唔係有啲亂？」
睇嚟唔止我...就連佢哋自己都察覺到...
「唔可以話係亂。只係...近期發生咗啲事。」
近期發生咗啲事？
「發生咗咩事呀？」
「唔清楚。不過...好似話總算處理好。」
就咁聽...係真係唔清楚？定係唔想講？
「放心啦。應該唔會好耐，元朗嗰邊就會排人過嚟換更。」
照咁睇...就唔係西貢獻命要嚟接手...
應該都係天門嘅人繼續守...仲應該要守...一段時間...
「其實上面係唔係想放棄我哋㗎...」
講到放棄咁嚴重？！
「唔會。上面一直都有派物資過嚟。而且...」
就喺呢個時候...
「兩碗餐蛋麵～兩杯熱檸茶～係唔係好快呢～」老闆娘就放低兩個麵餐喺我哋面前！
「嘩～真係好快～」綽姿又一面天真，「唔該晒～」
「唔使客氣啦～同哥哥慢慢歎喇～」老闆娘笑淫淫咁行返入舖頭。
俾老闆娘嚇咗嚇添...
不過唔緊要啦！而家邊食邊聽！
「嗯嗯～好味～」綽姿都食得津津樂道。
『嗯...好味...好味...』我都邊食邊豎起耳仔繼續偷聽...
「有佢哋都放心啲嘅...」
有佢哋？邊個佢哋吖？
頭先俾老闆娘突入，Miss咗啲嘢添！
「你有見過佢哋咩？」
「我見過。」
「吓？你真係有見過佢哋呀？」
「我都見過！你哋兩個新仔未見過唔出奇！之前喺呢邊守嘅，總有機會見到！」
見到邊個吖？
講咗咁耐，都仲係唔講見到邊個佢哋！
「咁佢哋係...」
「殊...」
突然...嗰邊四個人靜晒...
當我想擰個頭過去睇睇咩事之時...
「哥哥～試吓我呢塊餐肉吖～」綽姿餵塊餐肉到我嘴邊！
『哦...哦...好...』我望住塊餐肉...有綽姿咬過嘅痕跡...
有綽姿嘅口水...食綽姿嘅口水尾...
我細細啖咁咬一口...
唔...點解好似...甜甜地咁嘅...
「我又要試你嗰塊～吖～吖～」綽姿擘大個嘴仔，成隻雛鳥咁～
『哦...好好...』我就夾塊餐肉，餵到綽姿嘴邊....
「唔！唔～」綽姿一大啖咬落去！「嘿嘿～好味～」
望住綽姿呢個天真樣，真係冧死人...
不過而家唔係冧嘅時候！
我繼續偷聽...
「總之大家就唔使咁擔心。所有嘢都會安排得妥妥當當。」
「望就咁望啦...」
「唔係可以點？」
「好喇。食飽都差唔多要當值喇。」
「係係係！又要冒住觸電危險！」
「真係有人觸電㗎？」
「冇喎！從來都冇人觸過電喎！」
「咁你又講...」
然後我就聽到有腳步聲...行緊過嚟我哋呢邊...
我偷偷一望...有個著住灰色大褸...淺灰短髮...帶眼鏡嘅男子...眼尾望住我...喺我哋身邊行過...
然後呢個眼鏡男就拎出銀包，行到老闆娘面前：「老闆娘收錢。」
「多謝晒喎～食飽喇？」
「嗯。要當值喇。」
「哦～慢行喇～」
眼鏡男俾完錢之後，就望住我哋身後行過去。
「好彩今日唔使當夜班！」
「係吖係吖...女仔當夜班...皮膚好易差...」
「呢邊又凍又乾，唔會爆咩？」
「何止爆...仲甩皮添吖...快啲俾我返入元朗啦...」
「耐心等多一排。應該唔使幾耐。」
眼尾望住三男一女嘅背影...離開露天茶記...
天門嘅人...
雖然都聽咗唔少關於天門喺呢度嘅事...
之但係...都仲係唔知點解呢邊要天門守...而唔係西貢獻命...
而事實上，喺呢頭行咗咁耐又坐咗喺度食咗咁耐，都唔見有西貢獻命班人嘅蹤影...
呢邊就好似...完全唔關西貢獻命事...
唔通...
同綽姿繼續坐定定邊食邊觀察...
除咗有著灰或白色大褸嘅人行過，坐低食嘢嘅人都唔似係西貢獻命嘅人...
「嗯～食飽飽喇～哥哥飽未呢？」綽姿雙手拎住杯熱檸茶，甜絲絲咁望住我。
『嗯...飽飽...』我都拎起杯熱檸茶...飲一啖...
其實都唔熱...變咗暖...
天氣都真係太凍...
「咁好啦～我哋飲埋杯嘢就行咯～」綽姿捉住我隻手Fing吓Fing吓～
『哦...好好...』行...行去邊呢？
我諗...應該係繼續調查！
難得入到嚟，仲有好多嘢都唔清楚，一定要調查得再深入啲！
話唔定...會俾我哋查到一啲...珍貴嘅情報！
「等我請哥哥食啦～」綽姿就彈吓跳吓咁行去俾錢。
咁就多謝晒喇～
「走喇妹妹？」老闆娘接過綽姿手上嘅錢。
「嗯～」綽姿背住我，向老闆娘點點頭。
「慢行喇～唔好行得太入喎～入面有狗㗎～」
「哦～好吖～拜拜喇～」
「拜～」
同老闆娘揮過手後，綽姿又翹實我嚟行。
行到去冇人嘅地方，我就細細聲問：『我哋係唔係要繼續調查？』
「嗯。」雖然綽姿仲係翹實我，但語氣又變回冷淡。
『老闆娘話再行入啲會有狗㗎喎。』雖然話變回冷淡嘅綽姿比較順眼（可能係睇慣咗嘅關係），但俾佢翹住就周身唔自在...
「你怕狗㗎咩？」綽姿冷眼望望我。
『唔係話怕...之但係有狗就...比較麻煩囉...』啲衰狗好鍾意對住人吠！
「就係麻煩先越要走去調查。」綽姿留意住四周...突然帶住甜絲絲嘅微笑挨近我！
做咩？做咩又咁突然？！
“咯 咯”突然有人喺轉角行出！
係一個著住白色大褸嘅黑髮少女！
少女望咗我哋一眼，然後偷偷笑咁喺我哋身邊行過。
好彩...好彩察覺唔到我哋有異樣...
我聽住背後...確保少女越行越遠...轉咗彎...
『你覺得...嗰邊會有古怪？』我再追問綽姿。
「唔使問喇吓話？」綽姿又變回冷淡，冷眼望望我。
『交流吓姐...』一齊行動㗎嘛...可唔可以多啲互動？增加氣氛...
「頭先間露天茶記算係一個哨站。老闆娘叫得我哋唔好過去，一定有啲嘢。」綽姿又左望兩眼，右望兩眼。
『吓？哨站？頭先間露天茶記喎！個老闆娘好友善，似係做普通生意咋喎！』點會係哨站吖？！
係唔係綽姿過分敏感咋？
「喺一個邊境地區，你認為真係仲會有咁友善嘅人存在咩？」綽姿提高警覺。
又好似...係喎...
俾綽姿講一講...喺一個邊境地區...邊個仲會有心情友善？
「老闆娘呢種角色，係為咗防止一啲真係無無聊聊走過嚟嘅平民，等佢哋唔好太緊張，遠嚟一啲敏感嘅地帶。另外就係...試探...」綽姿行慢兩步...
『試...探？！』
綽姿又突然帶住甜絲絲嘅微笑挨近我：「哥哥～好凍～」
“咯 咯 咯 咯”然後又有兩個人喺轉角行出！
兩個白色大褸嘅男人望住我哋行！與我哋擦身而過！
我聽住背後...兩個男人嘅腳步都行得好慢，但總算Keep住越行越遠。
確保身後兩個男人轉咗彎之後，綽姿又變回冷淡：「你頭先察覺唔到㗎咩？」
『頭先？』我可以察覺到啲乜吖？察覺到你個小饅頭有幾咁軟熟吖？
「老闆娘試探咗我哋三次。」綽姿點點頭。
『三...』三次？有咁多咩？邊三次吖？
「我都估到你察覺唔到㗎喇。」綽姿冷眼望望我。
『我...我以為淨係得出前一丁嗰次咋...』乜原來唔止...
「出前一丁？」綽姿疑惑咁望望我。
『嗯...出前一丁...我之前去過七仔睇過...冇出前一丁賣...我諗呢區都唔會有得買，所話我先話出去一次過買多啲。再加上...頭先食落都知唔係出前一丁。』明明就係公仔麵。
「嗯...原來係咁...」綽姿諗咗諗，「話唔定...我哋已經打草驚蛇。」
『吓？打草驚蛇？！咁咪好危險囉？咁我哋係唔係要走喇？！』再行入去好似唔係一個好選擇！
「咁又唔使...」綽姿再諗諗，「又話唔定你咁答，已經化解咗佢哋嘅戒心。」
吓？真係咁易？
咁我又算唔算做得好吖？
「另外，我認為...」綽姿再諗諗，「呢度已經係全民皆兵。」
全民皆兵？！
『你意思係...住喺度嘅天門嘅人...都係守衛？』
「可以咁講。」綽姿點點頭，「就算唔係守衛，都唔會係平民。」
呢點我真係冇諗過喎！
『咁即係話...呢度可以話係一個...軍營？！』我有冇推測錯？
「唔...應該話係...軍事佔點。所以如果佢哋真係對我哋起升咗戒心...呢度所有嘅人都應該已經監視緊我哋。」綽姿謹慎咁細細聲講。
吓？！原來已經...咁危險？！
『咁我哋應該點...應該點...』
「我哋要繼續扮晒無無聊聊嘅訪客，誤打誤撞咁繼續行。」
真係Work咩？！
「仲有...仲有啲嘢需要確定...」綽姿欲言又止...盤算盤算...
喂！你有咩就講啦！唔好再賣關子好唔好呀？！
被綽姿翹實繼續行...
行多幾步...
“汪！汪！”就聽到狗吠聲！
沿住狗吠聲嘅方向繼續行，就見到對面馬路有幾座獨立屋...
“汪！汪汪！”而喺圍欄入面，就有幾隻唐狗又跳又爬欄咁對住我哋吠！
有狗嘅地方...
綽姿翹住我手臂，行過馬路望清楚啲...
望望啲勁嘈嘅唐狗，又望望裡面...
獨立屋裡面...乜都睇唔到...
淨係見塊落地玻璃好黑...黑都乜都睇唔到...
綽姿冇理咁多，再沿住小路行入去睇睇。
左右兩邊有起滿兩三層高嘅獨立屋。
啲獨立屋睇起上嚟唔算新，仲有啲殘，不過全部都圍晒欄，又鎖晒閘。
有人住？我諗一定有。
住喺度嘅，都係天門嘅人？
我又唔肯定...
我哋繼續行，轉咗幾個彎又再行得入啲。
有狗嘅屋其實唔多，就只有喺入口嗰兩三間。
而當我哋行到嚟一間鐵閘虛掩嘅三層式獨立屋，綽姿推一推開鐵閘...
我哋行入去，綽姿嘗試打開木門：「鎖咗。」
再靠近落地玻璃窗行...睇睇裡面嘅情況...
我望到裡面都...幾黑...陽光都好似照射唔到入去...（加上今日都係天陰，冇陽光。）
究竟裡面有啲乜呢？
就喺我滿心好奇之時...
「你哋係咩人？」突然背後傳嚟一把女仔聲！
我立即回頭一望！就望到有個白色頭髮，髮長到肩，中分髮型嘅少女企正喺我哋背後！
係幾時...點解會...察覺唔到？！