《香港傭兵》: [Day 08－破壞能源] PART 02
輕鐵到站後，我同綽姿都落車。
“飃！飃！”食晒西北風咁行，好快就行到嚟Double”S。
「拜拜東叔叔～好嘢～又有糖食～」咁啱又有幾個小朋友買完糖，行出大門。
「試吓我呢粒吖～好好味㗎～」
望住一班天真無邪嘅小朋友，帶住歡欣嘅笑容開心Share手中嘅糖果...真係窩心。
「嗯嗯～真係好好味吖～你都試吓我呢粒吖～」
等到一班小朋友都行出大門，我同綽姿都行入店裡。
「咦綽姿？嚟咗吖？你冇乜事吖嘛？」東叔一邊補返啲糖果入箱，一邊問候綽姿。
「我好好...有心。」綽姿冷眼睥住我。
我就梗係扮晒傻咁周圍望啦！
好明顯就係俾綽姿察覺到我尋日漏咗口風俾東叔聽！
「下次小心啲喇～唔係次次都咁好彩㗎～」東叔仲要偷笑。
「嗯...」綽姿揸實拳頭睥住我！
我就繼續扮傻，行去睇吓有乜糖果...
東叔...拜託你唔好再講啦...
「點吖？今次嚟有乜幫襯吖？」東叔補充完一箱，又補充另一箱。
「我哋想租車。」綽姿行到櫃檯前，望住東叔補充糖果。
「哦...好吖～想租咩車？」東叔漫不經心繼續補充。
『林寶林寶！』要租就梗係租返架林寶啦！
「唔林寶。林寶唔方便。」綽姿立即Reject！
『吓？有乜唔方便吖？林寶又快又好揸！』前晚你都領教過啦！
加速猛！轉彎定！煞車反應夠晒快！
真係馬中赤兔，車中林寶！
「係囉係囉...」東叔一頭問號咁打量住綽姿，「去邊咁唔方便吖？」
「總之就唔方便...」綽姿擰擰頭！
「哦哦～一定係去龍鼓灘嗰邊喇！」東叔帶住陰濕嘅微笑點點頭！
綽姿唔出聲，淨係冷眼睥住我...
做...做咩姐...咁係東叔佢自己估到咋嘛...又入我數呀？
東叔古古惑惑咁打量住綽姿：「入去龍鼓灘做咩吖？想打發電廠主意吖？」
喂我屌！東叔咁撚醒嘅？！
綽姿保持沉默，繼續冷眼睥實我...
「唔出聲即係係啦～」東叔放低手上包糖，一邊行入密室，「呢個委託終於出現...」
等到東叔行咗入密室，綽姿一手箍住我條頸：「唔出聲冇人話你啞㗎。」
『呃...呃...對唔住...對唔住...』唔好再咁箍住我...壓住...我隻手臂壓住綽姿個小饅頭喇...
仲要越壓越實...軟熟嘅小饅頭...軟熟嘅小饅頭俾我隻手臂...壓到扁晒...
等到東叔拎咗條車匙出嚟：「估唔到係你哋接...你哋有冇信心完成到？」
綽姿接過東叔條車匙：「冇信心就唔會接。」
「係咩係咩？」東叔拎部電話出嚟撳幾撳，「你帶住個隨行者㗎喎...唔好接啲咁高難度嘅委託比較好...」
嘩屌...又燒埋我嗰叠...
綽姿都拎出電話撳幾撳：「佢自己冇能力生存唔關我事。」
睇小我咁話？
話晒都過咗一個禮拜行者生活...仲要遇過逆行者都死唔去...
“叮”一聲響…
「多謝晒～小心啲喇。」東叔望住部電話同我哋揮揮手。
「嗯。」綽姿袋返好部電話同車匙後，就向住大門行。
『嗯嗯...拜拜東叔...』
“叮叮”同綽姿行出糖果店...
『乜今次嘅委託好危險咩？』我跟喺綽姿身邊行。
「唔知。」綽姿又雙手插褸袋咁行。
『咁點解東叔講到好似好危險咁呢？』叫我哋小心啲喎...
「唔知。可能係因為你唔知同佢講過啲乜...」綽姿又冷眼望住我。
『我！我...冇吖...冇講過啲乜吖...』扮傻扮傻...繼續扮傻...
「仲話冇...」綽姿冇我咁好氣咁擰擰頭，「聽佢嘅口吻就知佢應該知道前晚我哋遇上逆行者嘅事。」
『嘩！咁都俾你估到？！』真心堅喎！
「果然真係...你知唔知呢啲情報係好珍貴？知道都唔會隨便放上情報庫賣？」綽姿冷眼望住我。
『呃...唔小心姐...下次小心啲囉...』仲未習慣嘛...
「下次？下次我應該毒啞你。」綽姿又冇我咁好氣咁擰擰頭。
『對唔住...對唔住...』我知㗎喇...我知自己衰多口㗎喇...
繼續跟住綽姿身邊，好快又行到嚟屋苑停車場。
喺日久失修，凹凸不平嘅行車路上行，有日光照射入嚟，可以睇得清楚啲，泊喺度嘅車都好鬼污糟！
原來有幾架都爆晒胎...有幾架仲要連車轆都冇埋！
沿住條斜路上多層，綽姿拎住條車匙喺手撳吓撳吓…
一邊行又一邊撳...再撳多兩撳…
我就見到架碳纖色車身...極貼地...勁扁身...超誇張流線擾流設計...型到核爆嘅林寶泊咗喺兩架爛車中間！
我立即跑上前，跪喺車頭，攬住架車錫錫個狂牛Logo：『林寶呀林寶！要你屈就喺呢啲鬼地方同堆爛車一齊真係委屈咗你喇！！！』
唉哎哎...見到深愛嘅林寶咁樣，就好似賣個囡囡俾隻禽獸任意凌辱，蹂躪強姦！
慘過九七回歸呀仆街！！！
「點吖？重逢完未吖？」綽姿翹住對手，不耐煩咁。
『未吖！未吖！唔會完㗎！！！』最衰都係你！賣乜俾東叔姐！自己搵個地方收起佢唔得嘅？！
「冇你咁好氣。」綽姿繼續行，繼續撳撳條車匙。
撳多兩撳...行多兩步...
“咇！咇！”兩下響亮嘅咇咇聲由不遠處傳出！
我起返身，八八卦卦咁望望...望望綽姿向住架...白色嘅...
我再八八卦卦咁行前幾步...行近綽姿...
綽姿就行咗去一架...白色嘅...大大架嘅...車頭有幾隻銀色嘅英文字寫咗...
『Range...Rover...』Land Rover？！
望住眼前大大架白色Land Rover：『今次部車好似唔錯咁喎～』
之但係又使唔使用Land Rover咁誇張吖？
「上車睇過先再講。」綽姿Dom咗條車匙俾我，自己行去客座嗰邊上車。
我接實綽姿條車匙，打開車門，坐上司機位：『嗯？我揸吖？』
Land Rover嘅車廂都幾闊，幾好坐。
「嗯。日光日白我揸嘅話都唔係咁方便。俾西貢獻命班人見到都係麻煩。開車睇吓先。」綽姿扣好安全帶。
『哦哦...』開車...開車...
“吱！”都係電動㗎喎！
『試試車頭燈...著到...試試水撥...郁到...仲有水出添！』真係唔錯喎！
「總算似樣啲...開車。」
『呃...我...唔係好識路...』咁多年嚟，我都未去過嗰邊...
「有地圖㗎嘛。」綽姿篤篤中間塊LED顯示屏。
篤咗幾篤，就出現咗條路線。
『點解唔係顯示喺擋風玻璃㗎...』都冇林寶咁型嘅...
「呢架始終都係舊款啲...你唔好咁多要求好唔好？開車。」綽姿冷眼望住我。
『係係...』你係大佬嘛～全宇宙都知啦～
我都扣好安全帶開車。
“吱...”好小心咁揸...
咁大架車喺個咁窄嘅停車場行...轉個彎都要睇清睇楚...
「你可唔可以開快啲？」綽姿翹住對手。
『喂！好易High嘢㗎！又冇用精神液！』你話用咗精神液就話姐...
我而家係一個冇車牌嘅普通人咋！
「揸車都要用精神液？你可唔可以爭氣啲？」綽姿又要極度嫌棄。
『嘩...你真係講得輕鬆...未學過車都揸得郁架車算係咁啦吓話？』嘩屌！分一分心差啲直隊埋牆！
「點解你總係有咁多藉口為自己嘅弱辯護？」綽姿擰擰頭。
『我弱？唉係喇係喇係喇～我最弱～得未？』屌...講多都嘥氣。
「你真係好有呢度啲人嘅特質。」綽姿望住個車身貼住牆邊咁過。
『咩特質呢又？』差啲啲...差啲啲...轉埋呢個彎就出到去㗎喇！
「死剩把口。」
『哈哈哈～香港人吖嘛～香港人係咁㗎啦～事實我真係一個香港人...仲要係由廿年前穿越時空，嚟到未來～我都有講過俾你聽㗎啦～係你唔信咋嘛～』
綽姿唔出聲，冇我咁好氣。
而我都終於將架Land Rover駛出停車場。
“吱...”喺公路上望住個地圖行。
「你真係可唔可以開快啲？呢條路已經又直又闊。」綽姿明顯不耐煩。
『咁都要睇清楚先得㗎嘛...咁樣睇住張地圖揸好唔方便囉...都話租林寶㗎啦！林寶嘅話到咗啦！』講你又唔聽。
綽姿又冇我咁好氣咁擰擰頭。
『做咩吖？咁心煩咁嘅？嚟M吖？』我打量一眼綽姿，又慢慢揸。
「見到你，我就嚟M啦。」綽姿冷眼望望我。
『哈～原來你識講笑㗎？』
「好笑咩？唔覺喎。」
『唔係吖～幾好笑吖～』
「唔好再望我。專心揸車。」
『哦哦...好啦好啦...』
“吱...”繼續跟住地圖嘅導引揸...
揸咗一段時間，駛過咗已經荒廢嘅蝴蝶灣公園...開始離開“城鎮”，駛到去更加郊外嘅地區。
而且開始...難行...路上除咗多裂紋...仲要有唔少雜物。
有唔少雜物喺路上，阻礙行駛！
「衝過去。」綽姿望住路上嘅雜物。
『吓？就咁衝？』雖然啲雜物都唔算好大件...又唔係好硬...都係啲樹枝同廢木...仲有沙沙石石咁囉...
「呢架車絕對衝得過。衝！」
『哦哦哦...衝！』
“吱！砰砰啪啪！啪啪砰砰！”
我而家終於明白點解綽姿話林寶唔啱用...
一路上避得就避...避唔到就硬衝！
越行越郊區...越行越難行！
幾經辛苦經過一堆荒廢咗...長滿野草嘅貨倉...工廠...爛地...
再震到甩肺咁揸多一段路...（架Land Rover個避震咁好都咁震...林寶嘅話真係散晒啦！）
我就見到...不遠處有...兩碌大煙囪！
『係發電廠...嗰度就係...發電廠？！』終於都...
綽姿都望住兩碌大煙囪，留意住嗰邊嘅方向。
沿住條鋪滿沙石嘅馬路繼續行駛...
唔使幾耐就已經見到發電廠嘅...入口！
而且...入口仲有...兩個人把守！
“吱...”我慢慢駛近...再睇清楚啲...
我見到有兩個...著上防彈背心...手持長槍嘅守衛把守！
呢種外型...呢種裝束...呢種裝備...
兩個守衛望咗過嚟...望住我哋...
「繼續行。」綽姿望住前路。
『哦哦...』我就繼續俾油。
“吱...”駛離發電廠。
「奇怪...點解會係...天門嘅人...」綽姿一面困惑。
『係吖？真係吖？嗰班真係天門嘅人？』果然真係...
頭先一睇到佢哋嘅裝束，腦裡就閃出“係天門嘅人”！
「嗯...」綽姿盤算住，「我仲以為...屯門交咗俾西貢獻命之後，發電廠會由西貢獻命接手...」
『係咯...天門唔係應該撒離咗屯門區...去咗元朗嗰邊㗎咩？』我繼續好專心咁揸車，又好唔專心咁同綽姿分析。
「唔知...我冇喺呢邊調查過。」綽姿繼續盤算，又擰擰頭。
『吓？你冇調查過？』綽姿唔係乜都知㗎咩？
「我只係以為西貢獻命接收屯門後，會負起埋守護發電廠嘅責任...」
『即係話...你接呢個委託之時...認為對手會係西貢獻命？』
「嗯...」
『咁就算而家嘅對手係天門都唔係啲咩問題㗎。』
「唔同...」
『吓？』有乜唔同？咪又係反抗軍...
「總之...而家搵個地方泊低架車先。」綽姿一直Keep住個盤算樣。
『哦...』點解我總係覺得...綽姿隱瞞咗啲乜咁？