《香港傭兵》: [Day 07－緊急委託] PART 01
同阿月推住手推車仔喺city’super裡面行吓行吓～
左望望～右望望～
阿月翹住我手臂，帶住我四周搜索材料...
『月月～妳...想買咩上去食㗎？』阿月呢個古怪嘅人...又唔知有乜古怪想法...
「一陣你咪知囉～」阿月對我莞爾一笑，繼續搜索材料...
吓...唔好咁驚喜得唔得吖...
每次見到阿月對住我咁樣笑...總係覺得充滿陰毛...
而結果出嚟唔係令我“唔撚係吖化？！”，就係“大佬呀！唔好咁痴線啦！”...
阿月望住一塊塊扒。
有雞扒、有羊扒、有豬扒、有牛扒...
阿月好細心咁左揀揀…右揀揀...
望住眼前嘅阿月就好似一個師奶仔咁～
都真係幾可愛～
「好啦～就呢兩塊啦～」阿月揀左兩塊...Chateaubriand steak？
『嘩...咁大塊...得唔得㗎？』我望住兩塊Chateaubriand steak...又厚又大塊...
「煎牛扒嘅嘢你識條鐵咩～」阿月就好似好滿意咁拎住兩塊Chateaubriand steak點點頭。
『聽聞平時都係我買餸煮飯㗎喎月月娘娘...』連碗都係我洗...
「你扮咩吖？」阿月冷眼打量住我，「你收工收咁夜，平日我哋都係出街食㗎啦...係放假你先會買餸煮飯㗎咋嘛...」
『咁都係我買餸煮飯啦...』家庭煮男...
「早餐係我煮㗎！」阿月谷起塊面豬登！
『係係係～早餐係你煮～但未煮過煎牛扒做早餐～』不過每朝都係煮我最鍾意食嘅煎蛋腸仔加火腿～
「都係煎咋嘛～」阿月好叻叻豬咁點點頭！
『呃...』又好似...係喎...
「啱㗎喇～啱㗎喇～識煎一定揀Chateaubriand steak嚟煎～」阿月再拎多兩塊Chateaubriand steak放落架手推車仔～然後又繼續揀～
望住阿月又揀吓雞翼...
『燒雞翼～我鍾意食～』我拎住包雞翼～
「係煎吖～」阿月又谷起塊面豬登～一手搶咗我手上包雞翼Dom落手推車～
『上山登膠又煎牛扒又煎雞翼？咁豐富吖？』我不禁要恥笑一下阿月～
有幾多人上山登膠，會食得咁豐富㗎？
初初我仲諗住求求其其公仔麵加條腸就算架啦～
「上山登膠識得食梗係食牛扒㗎啦～唔識嘢～」阿月得得戚戚咁望一望我。
得戚得你個樣...不過我鍾意～
『咁使唔使買埋紅酒添吖？』有牛扒又點少得紅酒吖？
「吖～你提醒咗我添～」阿月翹住我手臂推住架手推車仔彈吓跳吓咁衝～
『喂喂喂喂喂...慢慢...慢慢...』
「82年... 82年... 82年利賓納...」阿月右手翹實我手臂，左手食指掂吓掂吓自己個嘴仔，望住貨架上嘅飲品...
『82年...會唔會死人㗎～』我望住阿月喺貨架上拎起兩支利賓納...
「痴線嘅～人哋啲82年Lafite咪又係用提子釀成～一樣㗎姐～」阿月拎起兩支利賓納睇睇。
我偷偷望一望個日期...車～8咩2姐～咪又係寫住2015年先過期～
「做咩吖？你唔係真係信會俾我喺city’super搵到兩支82年利賓納吖化？」阿月對我莞爾一笑～
『係丫～妳講我就信㗎喇～』喺你身上～有乜事唔會發生～
就只有平常事唔會發生～
「花哈哈～你係唔係真係咁天真？咁易俾人呃吖？」阿月擰一擰頭～
『我？我呢啲唔係叫做天真...更唔係容易俾人呃...我只係容易俾你呃姐～』我將阿月手上兩支利賓納放入手推車仔。
「哦？係咩？」阿月翹住我手臂，古古惑惑咁打量住我。
『唔係咩？我都唔明點解，我對你好似總係言聽計從咁嘅樣～只要係出自你口，我就差唔多可以話信到十足十...就算明知有可能係講笑...講大話...隨口噏吓...我都會放喺心裡面...我...根本就係你手中嘅布娃娃～』我摸一摸阿月個鼻～
「係吖係吖～我鍾意點舞，你就跟住點跳～」阿月又對我莞爾一笑，「因為...我哋係命中注定～」
命中...注定...
我望住阿月，整個空間漸漸變成灰色...整個空間都變成灰色...分裂...
分裂到阿月嘅莞爾一笑之中...粉碎...飄散...
當我再次有意識之時...再次睜開眼之時…
『命中...』天...花板…
又係發夢...
「你醒咗喇？」係...綽姿嘅冷淡聲線！
『綽姿！你...』我一彈起身，就見到...淨係著住白色吊帶背心同白色底褲嘅綽姿背住我...喺衣櫃前揀緊衫！
「嗯？」綽姿用眼眉望一望我...
『你...你冇事嘛？』望到綽姿嘅內衣褲Look...我都仲係有啲怕怕地羞...
之但係綽姿話唔介意㗎嘛～話咩咩只係軀殼吖嘛～咁我就唔迴避㗎喇～
「我冇事。辛苦你...尋晚送咗我返嚟...」綽姿繼續喺衣櫃前揀衫...
『哦...唔...唔辛苦...』我望住綽姿隻左手...
完整無缺...冇花冇爛...靈活自如...
尋晚...尋晚仲睇住佢隻手生返出嚟...
一條條紅線...好似生返啲筋骨肌肉皮膚咁...生返成隻手出嚟！
究竟係...咩科技？
SPIRIT嘅科技...喺邊度嚟？
「但我唔係講過...叫你唔好再攬住我瞓？」綽姿拎起條黑色短裙喺手...
『我？我...唔係呀！唔係呀！我抱你落床之後，又...又進入咗深層睡眠！』係咯係咯！我冇心㗎！我唔係想佔綽姿便宜㗎！！！
「嗯...雖然你尋晚...送咗我返嚟，但...你應該聽我講，有機會就走。」綽姿望住條黑色短裙擰擰頭，放返入衣櫃。
『咁...咁我都係想幫...』我都未將個“你”字講埋出口...
「你只會拖累我。」綽姿好堅決咁打斷我。
『我...』都係嘅...
唔係綽姿為咗救我...都唔會俾逆行者斬斷左手...
逆行者...
『係呢...究竟...逆行者係咩人？』尋晚都冇機會問...
「逆行者...」綽姿再喺衣櫃拎咗件黑色Tee出嚟，諗一諗，「係背叛SPIRIT嘅行者。」
係背叛SPIRIT嘅...行者？！
綽姿將件黑色Tee放上身：「喺唔知幾耐之前，有班行者唔知咩原因之下，離開咗SPIRIT...」
Once upon a time...Unknown reason...
綽姿將件黑色Tee放喺床上，再喺衣櫃裡面搵衫：「佢哋建立咗一個組織...被我哋SPIRIT命名為“逆行者”。」
原來逆行者呢個名...係由我哋SPIRIT命名嘅...
綽姿再喺衣櫃裡面拎咗條紅色格仔短裙出嚟：「其後有唔少行者因為害怕接委託...冇辦法賺取更多Sil為生...渴望盡快獲得自由...種種原因之下背叛SPIRIT...投奔逆行者。」
渴望盡快獲得自由...渴望盡快獲得自由...
綽姿將條紅色格仔短裙放喺床上，同條黑色Tee拼埋一齊：「而眾多原因之中...最關鍵嘅係...強大嘅綠光能量。」
最關鍵嘅原因係...強大嘅綠光能量？！
「逆行者所使用嘅...」綽姿將件黑色Tee穿上身，「能量，同我哋本身所使用嘅精神液相似...但佢哋唔係發出紅光...係綠光。」
『係呀係呀！嗰兩個叫...偶然同必然身上總係有綠色粒子飄吓飄吓...手上嘅精神刀都係發出刺眼嘅綠光！』雖然同我哋好相似...但佢哋唔係紅色...係綠色！
綠色嘅粒子一閃一閃...好似螢火蟲咁！
「嗯...」綽姿穿對腳落條紅色格仔短裙，拉到上屁股仔，「我哋唔知佢哋喺邊度獲得呢種綠光能量...只知道好強大...極強大。」
『係呀係呀！我擋一刀都成個彈開！』我仲好記得嗰一刀...
「講真...嗰一刀砍你唔死算你好彩...以佢嘅能量...應該可以輕易切斷你把精神刀所釋出嘅精神能量...將你一分為二。」綽姿冷冷望咗我一眼，就繼續整理身上嘅衣物。
吓？原來係咁㗎？
原來我...差啲就收咗皮...
死亡...真係可以好近...
冇錯...你睇吓尋晚嗰十幾個執雞隊友...只係一刀...全部化成紅色粒子...
綽姿隻手臂...都係咁輕易斬斷...
長袍嘅防禦力完全抵擋唔到逆行者嘅綠光刀刃...
「逆行者擁有我哋唔了解嘅極強大綠光能量...加上佢哋本來就係SPIRIT嘅行者...而且總會針對我哋嘅委託作出行動...係我哋SPIRIT最大嘅敵人。」綽姿再對住塊全身鏡拉拉條紅色格仔短裙。
逆行者有我哋嘅技術...又有勁過我哋好多嘅綠光能量...仲要針住我哋嘅委託行動...係我哋SPIRIT嘅最大敵人...
『唔怪得...唔怪得你尋日叫我出去小心啲啦！』真係好危險呀！
萬一...萬一我自己一個喺出面遇到逆行者...我收硬皮！！！
「並唔係咁...」綽姿喺櫃桶拎咗對...黑絲出嚟！！！仲要係有少少Lace花邊嘅絕對領域黑絲！
並...並唔係咁？
係咩意思呢？
只見綽姿坐喺床邊...遞起隻腳...將隻腳仔穿入對黑絲裡...一直伸...一直伸...
幼嫩嘅肌膚極度順滑...好容易就穿好一隻...再穿好另一隻...
綽姿企返起身...拉一拉條Lace邊...將對絕對領域黑絲拉到上大髀...拉到左右對稱...
望住綽姿著上對透透地嘅絕對領域黑絲...成對腳就更加幼...
真係好幼...又好修長咁...好好J...
「你望乜嘢？」綽姿冷眼望住我...
『好好...J...好好...』我由綽姿對絕對領域黑絲美腿...望上佢條紅色格仔短裙...望上佢條纖腰...望上佢對小饅頭...望到上佢對想殺人嘅眼神...『冇冇冇！逆行者咁勁，我哋都應該加入啦！』
望到著晒迷...差啲走火...入魔...
講返轉頭...如果走去做逆行者...能量強大得多...又唔使賺成億Sil就可以立即獲得自由...真係百利而無一害！
綽姿好認真咁望實我：「諗都唔好再諗。唔係嘅話你唔係死喺綠刃之下...一定係死喺紅刃之下。」
唔係死喺綠刃之下...一定係死喺紅刃之下？
點解綽姿會咁講呢？
只見綽姿行去梳妝檯，對住把鏡仔梳頭。
『你...你...你咁早換衫出街吖？』望住綽姿嘅背影...望住佢對透透地嘅絕對領域黑絲...
啱啱仲熟緊嘅少女腳，被一對絕對領域黑絲包住...
綽姿對腳仲要俾對黑絲修得好幼...
薄薄地嘅黑絲仲要透出綽姿雪白嘅美腿...
好想...摸...摸...
「嗯...約咗茵婷行街...你又望乜？」綽姿梳一梳兩邊鬢髮，再冷眼望住我。
『你...你對腳...呀呀呀！冇冇冇！我見到你著得咁少女，覺得你好似小櫻咋嘛！』仆街...又𥄫到著晒迷添！
「小櫻？邊個小櫻？」綽姿疑惑咁望住我。
『百變小櫻...』
我哋互相對望...對望咗好一陣子...
『百變小櫻魔法神奇誰可阻擋～看我Sakura～揮揮魔棒解開咀咒...』
我哋再互相對望...又對望咗好一陣子...
『算啦冇嘢喇...你都係快啲出門口唔好要知世等啦...』
「都唔知你喺度唱乜...」綽姿擰擰頭，再行去衣櫃拎件有帽嘅黑色短褸，「你今日自己搵啲嘢做吓...我唔會接委託。」
『哦...』又自由活動吖？都好吖～
「仲有...」綽姿著件有帽嘅黑色短褸上身，對住塊全身鏡照照，「幫我去東叔度買返件長袍同精神刀柄。」
『哦...』又要做跑腿...
「仲有...」綽姿再拎埋個黑色手袋仔，執執啲嘢入去，「我同東叔講咗有架車賣俾佢。你幫我揸埋過去。」
『車？』乜我哋有...等等先！『你指尋晚揸返嚟嗰架？！』
「嗯...」綽姿一邊執，一邊點點頭。
『喂唔係呀化？！林寶嚟㗎喎！』林寶呀！係我最愛嘅林寶呀！仲要係我搶返嚟㗎！你而家話賣就賣呀？！
「唔係點？你有位泊咩？你有電充咩？」綽姿孭好個黑色斜孭手袋仔。
『呃...』又真係冇...
「賣俾東叔係最好選擇。話唔定第時有機會租返嚟用。」綽姿再著埋對黑色皮鞋仔。
租...真係租得返咩...
「記得喇。得閒就留意吓SPIRIT App...自己小心。拜。」綽姿就出門口。
『哦...拜...』
自己...小心...