《香港傭兵》: [Day 06－護送委託] PART 08
同綽姿保持一定距離咁一齊企喺海邊望住個海吹吹風...
偷偷望望綽姿...綽姿又用上鄙視嘅眼神眼眉望住我...
做咩姐...你話我真係有叫雞就話姐...
我都冇做到...
最多只可以話我望咗小妹妹對腳一眼...仲有俾佢攬住嚟喊囉...
咁就要俾綽姿誤會...
唉...真係蝕...早知真係搞咗先算！
我再偷偷望望身後，又多兩個著住黑色大褸，雙手插住褸袋嘅男人企喺牆邊。
呢兩個男人...同其他人一樣...總係偷偷望過嚟我哋呢邊...偷偷望住綽姿...
話我係變態戀童癖？呢班人比我更似喎...
綽姿就一於好少理，繼續雙手插褸袋，望住個海。
我就雙手攬住自己...震吓震吓咁...好撚凍吖...好鳩凍吖...究竟仲要等幾耐㗎？等緊啲乜吖？
等吓等吓...天色都開始暗...好快又天黑...
入黑嘅氣溫就更加凍...凍到我就快變雪條...
「開定掃描...」久久冇出過聲嘅綽姿終於開聲喇！
『哦哦...』我就跟住綽姿，拎部電話出嚟，開定個掃描，『我哋要護送啲乜？』
「唔知...」綽姿袋返好部電話...
『吓？』連你都唔知？咁邊個知吖？！
「我淨係知要入去解放軍基地。然後...再等指示。」綽姿雙手插褸袋，轉身行。
係要去...解放軍基地？！
原來又係要...幫解放軍做事...
之但係...再等指示？
係等解放軍指示？
我跟住綽姿身後行，發現原來已經有...十二個身影圍住嚟企！
十二個人...加埋我同綽姿就十四個人...
咁分錢方面...
當我同綽姿都行埋過去之時...
「差唔多係時候...大家用咗精神液先。」偷生叔叔發出指示！
用精神液...用精神液...
我左手插入褸袋...用力一捏支Level 2精神液！
當道寒意由手背傳遍手掌…傳到手臂…全身...
「做咩呀？呢度係邊度？」我又聽到喇！
「救命呀！有冇人呀？！」我又聽到女仔聲喇！
「我係唔係就快...就快...」點解一用精神液就...
當道寒意傳遍全身之後...我感覺到除咗綽姿之外...仲有身邊...其餘十二人...
十二人當中...就只有偷生叔叔好似比較強...
但都係強唔過綽姿...
「估唔到...瓦解真係咁勁～」矮毒對眼發晒紅光咁望實綽姿！
唔止...唔止矮毒一個...在場除咗偷生叔叔之外，其餘十個隊員都雙眼發晒紅光...注視住綽姿！
「話晒人哋都係西貢攻防戰嘅倖存者...」高毒又由頭到腳掃視綽姿全身！
喂你好喇喎！𥄫還𥄫，唔好䏜到咁猥瑣好喎！
「好喇！唔好再講無謂嘢！夠鐘出發㗎喇！」偷生叔叔一聲令下...
高矮雙毒都好冇癮咁收晒聲。
其他隊員都唔再將注意力放喺綽姿身上。
所以話，一隊人裡面真係要有個隊長～
而且資歷高嘅都比較穩重係真嘅～
偷生叔叔向住馬路方向行。
我哋一行人都跟住偷生叔叔身後行。
當我哋行到差唔多到馬路邊...
“吱！依！！！”一架黑色GMC Van就劈住彎咁衝過嚟我哋面前急煞！
我感覺到...車頭有兩道氣息...成架車都係得呢兩道氣息...
今次嘅委託...總人數係十六人？
十六人...分15,000 Sil...
唔係唔係！
應該我同綽姿加埋先為之一份...
即係分到...1,000 Sil...
咁計法...今次冇乜著數咋喎...
「上車。」偷生叔叔打開車門...
我哋一行人就跟住上車。
“啪！啪！”偷生叔叔上埋車，閂埋車門之後...
“吱！依！”GMC Van隨即起動！
呢種GMC Van係冇窗！閂埋車門就完全密封咁嘅樣！
我哋十四個人...就左右兩邊各七人...面對面咁坐...
嘩～呢種感覺真係好特種部隊囉～
大家都將身上件黑色大褸除出嚟。
當然我都跟住大家...
大家做乜我跟住做就冇錯㗎喇～
「袋好佢...」綽姿偷偷隊咗支...Level 1精神液俾我！
『哦...哦...』以備不時之需？
係呢...唔知呢次護送...要搞幾耐呢？精神液又...夠唔夠用呢？
我好似一直都冇計算過...
一直都好似係...綽姿幫我計算...
大家都除咗件大褸，拉高衣領笠返頂帽。
我就發現有幾個件袍都穿晒窿咁...爛身爛世咁...
係得高矮雙毒同偷生叔叔件袍比較完整啲。
淨睇花紋...我估大家都係執行者...
係喎...除咗偷生叔叔...頭先都冇IM過！
唔...我諗公開委託係唔駛IM掛...又或者人太多廢事嘥時間掛...
唔知啦～反正唔使就唔理啦～
“吱！吱～依！吱！依！！！”坐咗唔係好耐，架GMC Van就停定咗。
偷生叔叔打開車門，我哋就跟住落車。
當我一落到車...喺夜幕之下...望一望外面...
呢度就係...解放軍基地？！
我望到...我哋喺圍牆之內...行車路上...有幾個Full Gear，手持長槍嘅解放軍士兵企喺我哋身邊！
呢種算係解放軍嘅歡迎儀式嘛？
偷生叔叔行去一個著住軍服嘅軍官面前...
呢個睇起上嚟好似高級啲嘅軍官向偷生叔叔伸出手，用上唔鹹唔淡嘅廣東話：「有勞。」
偷生叔叔同個軍官握握手...點點頭...
握手？唔係應該俾禮先啱㗎咩？
或者...因為我哋唔係解放軍...
或者...因為我哋係...傭兵...
Whatever啦～
偷生叔叔同個軍官握完手之後...
「瓦解同吞噬跟住我。其他人留喺度。」偷生叔叔背住我哋發出指令！
吓？點解係我同綽姿吖？
其他人都唔覺有乜問題咁...
就連綽姿都唔覺有問題咁...
唔通淨係得我一個覺得有問題？
大家都確定指令後，一隊解放軍士兵就帶住我哋三個行。
我一路行，一路留意四周...望望解放軍基地...
室外都停泊咗唔少大大細細嘅裝甲車...
就係唔見有坦克車...
唔通仲未有坦克運到落嚟香港？！
唔會吖化...咁大個基地...
除咗裝甲車之外，仲有唔少著晒Full Gear，手持長槍嘅解放軍士兵喺度巡。
天上仲有好幾部細細架...三角形...銀光閃閃嘅Drone飛嚟飛去。
戒備森嚴嘅解放軍基地...
繼續跟住解放軍士兵行到入室內...都係以銀灰色為主。
有唔少LED指示牌，有圖有字，但全部都係殘體字。
好似話乜乜東翼西翼南翼北翼乜乜重型乜乜庫乜乜裝甲乜乜庫...
好對唔住，我對眼天生就有殘體字Filter，所以唔係好睇得明佢寫乜春～
知唔知應該都唔係好重要嘅～而家只要好似鴨仔團咁跟住人行就得啦～
繼續跟住解放軍士兵行...
上上落落...又轉咗幾個圈...
經過唔少部門...唔少倉庫...
然後再搭𨋢...一直落...一直落...
望住個LED顯示牌一直由G落到B3...U6...U10...U15...U18...
然後一出𨋢...就嚟到一個比較暗嘅通道...
牆身都用上深灰色...整個環境都用上冷色燈光作照明...
地下樓層就係要用上呢種設計？
繼續跟住解放軍行得入啲...行得深啲...穿過幾道大鐵閘...又再行得入啲...深啲...
行到嚟一道黑色鐵門前...兩個守住喺門口，著上Full Gear，手持長槍嘅解放軍士兵向帶住我哋行嘅軍官敬禮之後，軍官就用...掌紋同面部識別打開鐵門！
軍官帶我哋行過鐵門...其餘嘅解放軍士兵喺門外守住。
入到黑色為主嘅房間...裡面又有四個著上Full Gear手持長槍嘅解放軍士兵守住！
嘩...呢度收埋咗啲乜嘢咁重要？核彈呀？生化武器呀？要搞到咁大笨象咁呀？
四個著上Full Gear手持長槍嘅解放軍士兵向軍官敬禮後，軍官又用掌紋同面部識別打開入面道鐵門！
冇喇嘛？應該到喇嘛？
當我哋都入到去一間房...房裡面又有四個著上Full Gear手持長槍嘅解放軍士兵守住...面前仲有一大塊...玻璃...
我望住玻璃...裡面間用白光燈作照明嘅密室...中間坐咗一個人...
呢個著住白色衫褲...長有白色頭髮...外表慈祥...和藹可親...帶住親切笑容嘅伯伯...係...
宋本木？！
原來...宋伯伯被解放軍...禁固喺呢度...
喺白光燈作照明嘅密室入面，除咗坐喺中間嘅宋伯伯外，仲有四個著上Full Gear手持長槍嘅解放軍士兵守喺四個角落！
塊玻璃亦都唔係普通嘅玻璃...
玻璃之中仲有唔少數字...一條條棒形圖...唔少資料！
究竟宋伯伯係咩人？點解解放軍會...
軍官再用掌紋同面部識別打開入面道鐵門後...
只見偷生叔叔跟住軍官行...綽姿又跟住偷生叔叔...
點解綽姿好似...喺度見到宋伯伯唔覺得有乜咁驚訝？
唔通綽姿一早就預咗？
我就跟住綽姿身後行...行入去囚禁住宋伯伯嘅密室！
企喺四個角落嘅解放軍士兵向軍官敬禮，我哋就分開四邊...企喺宋伯伯身邊...
被我哋四個圍住嘅宋伯伯氣定神閒，仲要帶住慈祥嘅微笑望住我：「我哋又見面喇...少年。」
宋伯伯佢...認得我？！
冇理由㗎...點會...點會認到我呢？
平凡像我路過十個似我...Dry論身高同身材一定認唔出...
唔通係因為...綽姿？！
綽姿就有可能喇！佢咁細粒！
我同綽姿一齊...要認到就唔出奇～
睇真啲...宋伯伯啲手手腳腳都鎖喺張金屬凳度...
其實又使唔使對個老人家咁高設防呀？
你哋啲解放軍神高神大又Full Gear又揸晒槍咁...使怕個赤手空拳嘅老人家？！
「帶佢走。」軍官一聲令下，企喺四個角落嘅四名解放軍士兵就行過嚟，各自幫宋伯伯解開手腳上嘅鎖！
帶宋伯伯走？
今次個委託...就係要護送宋伯伯？！
當解放軍士兵幫宋伯伯解開晒鎖之後...
「唉～」宋伯伯鬆鬆對手，「俾支鹽水同風筒我整整個頭先啦～」
呢啲時候仲整頭？！
宋伯伯真係唔驚㗎咩？！
話晒連我都唔知要帶你去邊喎！
軍官拉住宋伯伯衫領：「你唔好整古做怪！」
「放鬆～放鬆～」宋伯伯雍容不迫咁，「個頭唔靚，打死我都唔會行出呢個門口～」
軍官唔服氣但都冇辦法咁：「同我拎鹽水同風筒過嚟！」
嘩...真係聽宋伯伯點㗎喎！
究竟宋伯伯係何許人也？！
「喂喂～記得要Parlux 2800吖唔該～」宋伯伯仲要好有要求喎！
等到個解放軍士兵真係拎咗支鹽水同專業風筒過嚟...
宋伯伯就對住塊...鏡？！
喺呢邊睇...本來有好多數據同資料嘅玻璃變咗一大塊鏡！
我諗...同單面反光鏡一樣原理掛...
宋伯伯就拎住支鹽水對住塊鏡噴吓噴吓個頭...又用對手按吓按吓個頭！
搞咗幾分鐘...
“颼！”就用風筒吹頭！
我而家睇清楚...先知個風筒唔使插電！
未來嘅風筒！淨用叉電啲風都吹得咁猛！真心堅！
「啦啦啦啦～啦啦啦～啦啦啦啦～啦啦啦啦～」宋伯伯一邊用心吹造型，又一邊哼住歌...
等到宋伯伯又吹頭吹咗差唔多十分鐘...
「喂！髮蠟呢？Spray呢？冇髮蠟同Spray點Set頭呀？！」宋伯伯仲繼續有要求！
嘩...係唔係真係咁把炮呀？