[劇毒]自從裝左小熊來電之後……我部電話就無響過……: 46
[3/3/2015 20:04]
唔知喊到幾時,啊樺已經欲哭無淚,佢企左起身,走埋去一二角,雙手掩面,低聲飲泣。
啊樺細細聲咁安慰自己:「唔會既……嘻嗝……唔會既……嘻嗝……無事既啊樺……嘻嗝……你會無事既……嘻嗝……」
我一直低頭,我真係唔忍心見住啊樺咁樣。
因為雙手被綁既關係,我只可以掩住一邊耳仔,而啊樺就不斷咁喃喃自語。
忽然之間,佢無再出聲,我抬頭一望,正好同佢既對喊到紅通透既眼睛對上。
佢向我衝過嚟,捉住我衣袖問:「……嘻嗝……我唔會死嫁可……嘻嗝……啊麟……嘻嗝……你答我啊……嘻嗝……」
我嘗試迴避佢既眼神,但係佢成個人就更加貼得實我問:「……嘻嗝……我唔會死嫁可……嘻嗝……」
我無言而對:「ER……」
啊樺就再貼得實啲問:「……嘻嗝……答我……嘻嗝……我唔會死嫁可……嘻嗝……」
我對佢講左個大話:「……係……無事既……」
啊樺:「……係囉……嘻嗝……無事既……嘻嗝……」
港女OL細細聲咁:「摺,好心你咪呃佢啦。」
啊樺企起身指住港女OL:「咩呃我……嘻嗝……啊麟唔會呃我架……嘻嗝……係咪啊,啊麟?」
當我正想答係既時侯,港女OL一巴車埋去啊樺到:「你唔好再咁啦,好難睇啊!你比Major Tom打左啲藥去你到,你點會唔死啊。」
啊樺:「……嘻嗝……唔係既!我會番現實世界既!」
港女OL:「我唔知你會唔會番現實世界,但係搞到我地今日咁既,全因為你喳!本來好地地走佬咪算,仲番嚟做咩?我地鬥唔過Major Tom。」
啊樺:「唔係……嘻嗝……唔係咁……嘻嗝……Major Tom幫我地嫁嘛?」
聽到啊樺講依句,我都唔知點答,Major Tom如果講真既話,就真係會幫我地。
但係事實係點無人知,小熊來電又好,Major Tom都好。
我都唔知邊個講既野係真,究竟三日之後係點?
信Major Tom?定係小熊來電?
但係對啊樺嚟講,佢無得唔信Major Tom,因為佢無得揀,但係我地呢?
啊樺捉住左負傷既大隻佬問:「Major Tom有解藥既,係咪啊?係咪啊?」
大隻佬望望我再望望啊樺,答左句係就算。
啊樺見到大隻佬既反應,佢放棄了。
佢去番自己既角落坐番低,去接受自己既生命仲有兩個鐘既時間,又或者佢仲有兩個鐘就會去番現實世界,唔知道佢選擇左信邊樣,而你又信邊樣?
但係我決定唔會好似啊樺咁,我要有得揀,而唔係坐喺到等。
我走埋去大隻佬到,細細聲咁同佢講:「我決定走,我唔想再比Major Tom困住喺到,我要出去。」
大隻佬:「但係我地就算真係走都唔夠佢鬥,出面有咁多個西裝佬。」
我:「咁我地就要博一鋪。」
幫大隻佬包紮緊既運動姐姐問:「博?」
我點點頭:「嗯,博!」
運動姐姐望一望出面再諗一諗:「哦,我明啦!但係點肯定?」
我:「所以咪要博囉!」
我同大隻佬仲有運動姐姐如是者傾點樣走,至於港女OL同啊樺就各佔一角咩都唔理。
而兩個鐘後,十點三十四分,啊樺死左,無人體爆炸,都無咩自焚,好安詳咁死左……