(爆料、起底、偷窺)高登第二十七台: Chapter １

Chapter １
 
 
每一個故事都會有一個主角，而我就係依個故事嘅主角，我叫包學平，今年二十三歲，我老豆同老母係一對性關係好濫嘅ＭＫ，佢地扑嘢唔帶套生咗我出嚟，我由一個疏堂姑婆帶大，依對ＭＫ老豆老母從來未見過我，好似我只係佢地性高潮嘅副產品，不過最諷刺嘅係一對ＭＫ生個仔出嚟居然喺一個毒撚，而且係毒撚之中嘅毒撚，姑婆係我廿歲嘅時候過咗身，原本住緊間公屋畀政府收番，無人無物嘅我，除咗瞓街之外，只可以選擇劏房。
 
學歷唔高嘅我搵咗份Marketing公司嘅ＣＳ　Clerk做，毒撚始終係毒撚，份工做咗無幾耐，掃把話我唔適合做啲對人嘅工，於是調我做data entry，人工得八千唔夠洗，自己考咗個電單車牌，間中做吓part time麥麥送、必勝客。
 
今日連踩兩份工，番到深水埗屋企，開著燈，望住得嗰八十尺嘅地方，一張床、一個櫃、一張檯，已經無乜空間，但係唔知點解係一個咁擠迫嘅空間裡面，我都感到好空虛，每日生活如一，無親人、無女友，朋友都無乜，日日返工收工、放假上網，唔駛蘇民峰，我自己都可以算出二十年後自己會點？二十、三十年、四十年後，自己都會過住同依家相近嘅生活。
 
每日就算我好疲累，返到屋企好夜，我都會開著電腦，上陣網，上得最多嘅就係高登，上高登睇改圖、睇人派膠、追故依個就係我最大嘅娛樂。


 
有個零知名度嘅網絡寫手話電腦螢幕有幾大，毒撚嘅世界就有嘅大，就算毒撚將二十吋螢幕換咗做四十吋，仍然唔可以容納多一個人。
 
哈哈，我唔知其他毒撚點睇，但係睇嚟依句說話放係我身上好貼切。
 
我諗住上兩個鐘高登就瞓覺，但係好似連個天都唔鍾意我，當我剔入高登網頁嘅時候，螢幕只係出現一句句子：
 
網站維護中，請稍後再試．
HKGolden Forum is undergoing maintenance, please try again later.
 


我撳多次Ｆ５都係咁樣，上唔到高登，辛苦咗成日想娛樂吓都唔得，一日唔上高登都好似周身唔自在咁，於是不斷Ｆ５，但係唔單止無出現熟悉嘅高登網頁，反而仲出現一排熄燈公仔。
 
屌！依排高登唔知乜春，成日熄燈，之前仲足足一日上唔到高登，成班爸絲打要去香討吹水。
 
我頂！依排唔知咩事，上高登成日斷線，究竟係咪因為太多人瀏覽嘅關係，所以伺服器承受唔到？
 
都係沖個涼先，由於厠所浴室係公家嘅，我拎住啲乾淨衣物同毛巾，離開咗間房，再鎖上門。
 
依個時候，應該無人用厠所啩？
 


由我間房到浴室要經過一條難以令兩人並肩而行的走廊，走廊兩旁有其他劏房，依個時候有一個年約二十歲嘅女仔迎面走過，佢就係喺依間一開八，其中一間劏房嘅租客陳小姐。
 
陳小姐剛剛沖完涼，秀髮末端仍然凝住水珠，最重要嘅係擁有典型港女身型嘅佢，居然無戴胸圍飛釘。
 
但係身為毒撚嘅我，並唔敢用眼食依個冰淇淋，我垂低頭側身咁匆匆喺佢身邊經過，依個時候厠所門打門，一個好似吳孟達嘅男人擔住支煙仔走咗出嚟，佢手上拎住本龍虎豹，佢對眼嘅焦點一直放係陳小姐嘅屁股，嘴角掛住異常猥瑣嘅浮笑，同發情期嘅狗公差無幾。
 
到陳小姐入咗房，佢先望住我同我講：「啊！包生，通知你一聲，下個月開始加租二百啊！」
 
「吓！波叔，又加，好似三個月前先加咗無耐！」
 
「唏！無辦法啦！包生，地鐵又加價、牛肉又加價，連老麥嘅廿蚊餐都加價，百物騰貴啊！」
 
「哦！」我無可奈何應咗一聲，就走入厠所，我打開厠所門，一陣惡臭瀰漫係厠所，馬桶內一片狼藉，我捂住鼻幫波叔沖厠。
 
波叔條撚樣好無手尾屙屎唔沖厠不特止，而且仲…


 
當我發現地下滑溜溜嘅時候，我一睇鞋底，發現我踩到嘅係波叔嘅子孫，波叔條友頭先應該係厠所雙重享受，一路屙屎，一路打飛機，仲要射到通地下都係。
 
我沖咗個凍水涼，再洗埋對拖鞋，小心避開包租公遺留係地下嘅子孫，返番房鎖咗門。
 
今日出面差唔多三十度，身處天台嘅劏房裡面比出面仲要高兩至三度，我將風扇較到最大，仍然感受到房間嘅悶焗。
 
我飲咗杯水，眼角眉梢無意識咁望咗電腦屏幕一眼。
 
「咦？點解今日高登咁奇怪嘅。」
 
平時高登版面每一個台下面都有一段標籤字，好似娛樂台就有女神、水著女優；時事台就有港聞、強國，但係依家無曬依啲字，得番個ＬＯＧＯ，我撳入去娛樂台，ＬＯＡＤ咗一陣，又係一排熄燈公仔，撳入創意台、遊戲台同動漫台又係同一情況。
 
頂！ＡＤＭＩＮ點攪架，林早泄點攪架，又上唔到。
 


當我撳番上一頁出去嘅時候，我發現咗高登首頁另一個同平時好唔同嘅地方，就係喺娛樂台上面多咗一個黑色方框，平時娛樂台上面嘅地方係一啲廣告，但係依家畀嗰個黑色方格取代咗。
 
我操控滑鼠移到那地方上，心想：「咩嚟架？等陣，唔通依個就係ＡＤＭＩＮ講嘅新台，依個就係傳說中嘅高登第二十七台（＊註：依家高登已經有三十一個台）？究竟依個台係關於啲咩？親子？寵物？ＪＴＶ？定係ＡＶ？」
 
答案即刻揭曉。
 
當我撳咗一下黑色方格一下，畫面彈出咗另一個方格，方格顯示出：
 
此台只限核心會員登入，請輸入會員帳號及密碼
 
會員帳號：
密碼：
 
確定　　　取消　　　　申請核心會員
 


我嘗試輸入原本嘅電郵地址同密碼，版面彈出咗一行字──帳號或名稱輸入錯誤，請重新輸入。
 
點解唔得嘅？
 
此時，我才發現核心會員這四個字。
 
核心會員？高登幾時多咗個核心會員架？
 
高登唔係得版主、台主、高級會員同埋普通會員嘅咩？以我所知高登以前的確有好多唔同級別嘅會員，唔通林早泄又再一次推行依一個政策？依個台唔畀ＣＤ－ＲＯＭ同普通嘅高登會員入，咁佢為乜要開依個台？要知道高登嘅收入主要係廣告，廣告商視乎瀏覽量而決定落唔落廣告，個台要嗰個乜春核心會員先入到，人流多極有限，以方丈無寶不落嘅性格，唔會做啲賺唔到錢嘅嘢，唔靠廣告收入，就只有靠嗰個核心會員所收嘅會費，我相信會費應該唔平，但係我又有一個疑問，點解佢覺得要錢嘅嘢，會有好多人去畀錢申請，依一個台有啲咩咁吸引？
 
我撳咗一下申請會員個掣，彈出咗一個方格，方格內顯示：正在評估申請者所需會費，請稍候。
 
咩事啊？申請會費唔係固定咩？要評估？用咩準則去評估啊？
 
此時，版面彈出了另一個方格，評估完成，申請者成為會員需要邀付費用為五千元美金。


 
我瞠目結舌，破口大罵道：「五千蚊？仲要美金？都戅撚鳩鳩？」
 
我馬上撳取消，倏地彈出了另一個方格──溫馨提示：閣下可以免費三天試用核心會員的功能。
 
這一刻，我決定試用一下價值高達五千蚊美金嘅核心會員，解開依個核心會員嘅Account點解咁值錢嘅疑問。
 
我撳咗確定，版面彈出咗另一個視窗，這個視窗係一張表格，與當時申請高登Account一樣都是填寫一些個人資料，但與申請普通嘅高登會員唔同，唔駛附上身分證明檔案，我匆匆打上有關自己嘅個人資料，然後撳遞交。
 
畫面突然彈出申請未被接納嘅提示，身份證編號及聯絡電話錯誤，我睇返張表格，真係好似打錯字，但係我又覺得有啲奇怪，點解個系統會知道我打錯咗？
 
我修正了身份證編號及聯絡電話，再次撳遞交，螢幕彈出了另一個長方格，長方格內容顯示了一連串注意事項及條款，由於字數實在太多，我只係留意到第一項以紅字顯示的第一項條款：

• 不准向任何人透露核心會員的任何事情，否則後果自負。

 
我心諗，咩嘢咁巴之閉，如果我偷偷地同人講，你又點知呢？
 
正當我打算撳下同意嘅按鍵，突然之間，我諗起，之前睇過一套叫做無限恐怖嘅網絡小說，小說入面講某日主角電腦螢幕突然彈出一個信息，主角撳咗Yes，跟住主角就進入咗電影嘅輪迴世界，進行咗一場又一場嘅戰鬥。
 
我會唔會好似嗰套小說咁，進入咗電影嘅輪迴世界？
 
又或者會唔會當我撳咗同意，會有啲咩嘢由虛擬世界走出嚟？
 
我搖頭自嘲：「包學平，依個世界邊有可能出現依啲超自然現象嘅嘢！」
 
終於，我撳咗同意掣。

=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝

https://www.facebook.com/vc907907/