今日發生既事，改變左我一生。: 第零章．序

今日發生既事，改變左我一生。

七月十二日，星期四。

如無意外，今日就係開始放暑假既日子。先介紹一下自己，我叫陳家朗，今年十七歲，九月就中六，興趣係打棒球，基本上我既生活就只係返學等放學，放學等打波。大大話話都打左五年棒球。依家係港隊U18既一員，每個星期有五日都要行上藍田晒草灣球場練波。今日亦都唔例外，一放學就返屋企食個飯又準備上山練波。

「喂，阿朗，又咁早上到黎既？」U18裡面既王牌投手阿祺輕輕咁拍左我一下膊頭。

「冇阿，食完飯冇乜野做未早D上黎抖下先囉。」





阿朗同我一樣，都係五年前開始打棒球，佢同我好唔同，佢一入黎打既時候細細粒粒，邊有人會諗過佢今日會係我地既王牌投手喎，佢一入到黎就好努力好比心機，今日佢都依舊早成個鐘上黎跑步。而我同阿祺就係三年前成為左拍檔，佢係投手，而我就係捕手。即係係棒球場上踎低，著曬野上身個個阿。
「哦…. 唔講住啦，我仲有15分鐘先跑完，陣間練波再講啦! 」阿祺講完就即刻返返落緩跑徑度跑步。

反正仲有半個鐘先練波，我都係入更衣室嘆陣冷氣抖抖先。

「嘭嘭嘭嘭嘭…. 走阿，攞空投!!」一打開更衣室度門就聽到槍聲不斷，肯定又係Kevin佢地食緊雞。

「咦，係阿朗呀，咁遲架你，我地三個開左場啦，冇左你我地係咁比人射低，我都唔知救左佢地兩個幾多次啦! 」

Kevin係一個又高又大隻既毒L，除左打棒球，佢既活動就只有打機。唔洗練波既日子佢都會留係屋企開大冷氣打機，基本上咩槍Game佢都打過曬，Battlefield、Call Of Duty、Hitman…. 當然唔少得PUBG，當PUBG出埋手機版，佢又點會放過阿。雖然佢係一個毒L，但唔知點解佢打棒球都寕捨勁。





唉，個天就係咁唔公平。

佢可以好輕易就將個波打到好遠，基本上每場比賽佢都會有一支全壘打。而同Kevin一齊食緊雞個兩個，就係我地隊既孿生兄弟，志明同志強，不過我地個個都叫佢地阿哥同細佬就算。

「阿朗，你下場一定要入黎阿，佢兩個周圍亂咁跑，都唔知係想嬴定想死! 我就變左醫療兵!」Kevin個樣真係好似個D搶救完傷者既救護員個個樣。

「好啦好啦，你地死左就邀我入黎啦。」聽Kevin講緊野個陣我已經入左game。

「啪低，唔好郁!」我大嗌。





「嘭——」一下槍聲，就完左。係Kevin最後Head shot左最後一個人。

Kevin:「阿朗，好彩有你係度制住呢兩隻野咋，唔係我地一早就係咁比人發現死左十世啦!」

「講呢D，有你呢個神槍手，想輸都難啦!」我指住Kevin話。

「喂，出面都聽到你地把聲啦，夠鐘啦，仲唔出去練波!!」原來係阿祺跑完步入黎拎袋準備過球場。

「係係係，依家行啦。」我講完呢句，拎起個袋企起身準備行之際，眼前開始慢慢變黑，之前都試過呢D情況，都只係坐低起身D血未上到腦而搞成咁姐。點知，今次連腳仔都軟埋，我成個人坐左落地。

「阿朗，你無事阿嘛? 」阿祺即刻沖埋黎扶起我。

「無….. 踎低起身見頭暈姐..... 依家冇事啦。」





「仲練唔練到波架你? 洗唔洗返去抖下? 」

「冇事既，上到黎唔通唔練咩! 行啦!」

「辛辛苦苦行到上山唔係唔練呀。」我心諗。

就係咁，阿祺就扶住我一齊行入去球場。

諗都諗唔到，個下黑一黑係會搞成咁……