是咁的，我嘅職業係幫人瞓覺: 二百五十八、迷宮入口

我喺地上轉身，見到miki想追入嚟，但就好似被透明嘅牆阻住去路咁。

被隔咗喺外面嘅miki，極力衝擊大門，但反作用力將佢彈開。

即使唔閂門，佢都被拒於門外。

miki嘅另一個人格好似喪屍咁拍打透明防護罩，我亦一腳踢埋道門。

我發現另一個人格無辦法踏足依間房。





我摸一摸背上嘅傷口，有兩刀，但感覺唔到痛，應該無大礙，好彩唔係致命傷。

依我估計，外面嘅大屋係儲存miki慘痛回憶嘅地方，亦係孕育另一個人格嘅溫室。

大屋係另一個miki嘅地盤，源源不絕咁為佢提供傷痛嘅能量，但佢嘅活動範圍只限於大屋。

我觀察自己走咗入咩地方。

依度只係一間好普通嘅住宅，唯一嘅特點，係廚房個抽油煙機燒燶咗。





我喺書度睇過，係miki第一次幫金仔煎午餐肉嘅時候搞成咁。

即係話，依度係金仔屋企。

正常人應該唔會有兩個心房⋯⋯啊，miki曾經有人格分裂症，亦即係話外面嗰個係另一個人格嘅心房。

如果大屋係象徵痛苦同悲傷嘅「悲痛心房」，咁金仔屋企就係代表幸福同快樂嘅「幸福心房」。

依兩個心房由完全唔同嘅情緒組成，而miki好清楚唯獨同金仔曾經有過嘅快樂回憶，絕對唔可以被傷痛沾污，所以潛意識自動拒絕另一個miki入嚟依個範圍。





執返一身彩。

我企起身，視背上嘅刀傷如無物，反正只係夢，唔會痛。依間屋細好多，我行咗一陣，就見到一道黑色嘅門上，掛住「心之迷宮」嘅門牌。

「搵到你喇。」

我即刻打開門，一陣閃光令我頭暈眼花，被逼要合埋眼。

身體喺強光中行前一步，踏入心之迷宮。

當我重新有返意識嘅時候，我發現自己喺一間屋入面。