是咁的，我嘅職業係幫人瞓覺: 二百五十二、最後一個客人

miki依個時候走入嚟，阿媽同老豆向佢點頭，之後就走出病房畀啲私人空間我地兩個。

「光頭幾襯你吖。」做頭部手術要剃光頭，miki一嚟到做嘅第一件事，竟然係陰陰嘴笑我。

即使成兩個月無見，我地都完全無尷尬，直接變返朋友咁對話，輕鬆自然。

「你唔係病人都蝦下話？」

miki坐喺病床旁邊：「唔係咯，真係覺得襯你吖嘛。你面色睇落都仲好好喎。」





我摸下自己個光滑嘅頭頂。

「其實都無乜自己有腫瘤嘅實感。又無嘔又無暈，係近排開始有啲頭痛，但整體上嚟講我真係無乜唔舒服。」

「所以你真係好好彩咯。」

「多得你啫。係你⋯⋯救咗我架。」

miki好似聽到笑話咁大笑起嚟：「傻啦，我又唔係醫生，幫你做手術嗰個先係你救命恩人呀。」





「其實講真，如果當日唔係你夾硬帶我去驗腦，我之後一定會嫌麻煩唔去驗。反正我又無咩唔舒服，最後實會吽到真係有症狀先去睇醫生，但到時已經太遲架喇。」

我向miki微笑：「所以點計，你都係救咗我。多謝你。」

miki有啲難為情：「唔好客氣啦。」

「係喇，不如⋯⋯我幫你瞓覺吖？」

miki聽到，即刻嘟起嘴，正想一拳敲我頭頂，又記起我個腦有事，於是打咗落我個肚度。





「我咪話咗唔準用超能力咯！」

佢嬲個樣好似雞泡魚。

「做完手術之後我仲用唔用到超能力都係未知之數，所以我想做手術之前用最後一次。」

miki繼續靜靜聽我講野。

「我想最後一個客人係你。」