是咁的，我嘅職業係幫人瞓覺: 二百五十、只需要一日

「多啲上嚟坐呀女。」

「知道媽咪！」

阿媽同miki繼續上演美麗誤會，但佢兩個都好鬼開心，我決定真係咩都唔講。

「咁我送佢落去先喇。」

「好聲行呀，拜拜！」





miki向我家兩老道別之後，就同我一齊搭𨋢落樓下攞車。

去到miki架車旁邊，我忍唔住同佢講：「我未試過同一個第一次見面嘅人，一日之內經歷咁多事。」

「我都未試過架。仲有被人地當係一家人嘅感覺都係第一次感受到。以前金仔同我一樣都無屋企人，所以今日真係一個全新嘅體驗啊！我好開心呀，多謝你請我上嚟食飯呀！」

miki嘅笑容同今日晏奏啱啱識佢嘅笑容有啲唔同，依個更加似係由心而發，開心嘅笑。而唔係為咗掩飾某啲感情先扮出嚟嘅笑。

「多謝我阿媽啦，係佢主意嚟嘅。」我難為情咁擦一擦鼻，見到miki笑得咁開心，我嘴角都忍唔住上揚。





「啊，我都要多謝你，將超能力嘅事話我知，仲帶我去驗腦。」

如果唔係佢主動嚟搵我，就唔會有今日嘅經歷。

「咁我再多謝你聽我講咗咁多以前嘅事吖。」

「咁⋯⋯我就多謝你氹到我阿媽咁開心啦。」

miki明明已經企喺架車旁邊，但無急住上車，反而好似仲想對我耐啲咁。





我聽人講過，當緣份嚟嘅時候，要愛上一個人，只需要一日。

我都唔知點解會無啦啦諗起依句說話，可能我真係對miki有啲意思啩？

「我地⋯⋯仲有機會再見架可？」

miki諗一諗，就答：「你做手術嗰日，記得同我講，我會嚟睇你。」

「好呀，就咁話啦。」

就因為依句說話，我同miki真係去到做手術嗰日先至再見。