是咁的，我嘅職業係幫人瞓覺: 二百四十八、食飯喇

到底miki嘅生命當中有邊個範疇無被悲劇色彩污染？

「我屋企人死哂架喇，所以之前先話唔上嚟的話都係自己食。」

每當聽到miki嘅自白，我都會震撼到講唔出任何野。

幸福同痛苦都係比較出嚟，恆仔所講嘅說話，我今日先有實感。

平凡有平凡嘅好。





簡單到只係返到屋企嘅時候見到阿媽同老豆喺廚房煮飯，已經係一種幸福。

我知道miki就算返到屋企，都係家徒四壁，空無一人。

因為平凡，所以幸福同愛就蘊藏喺日常生活嘅每件小事當中。

聽到我要驗腦嘅時候馬上打電話畀我、通話時間超過三分鐘、比我更早返到屋企準備晚飯，即使伋依啲咁唔起眼嘅小事，都足以令我感覺到愛。

只係以前嘅我無察覺到，其實所謂幸福嘅人生就係靠依啲好似細沙咁嘅小事堆砌而成嘅城堡。





愛喺日常只會有限度，好少好少咁表現出嚟。

愛要遇到特定嘅事件，先會爆炸性咁展現。而通常依啲事件，往往都同生離死別扯上關係。

所以即使感覺到愛，隨之而嚟嘅都會係傷心，而唔係純粹嘅幸福。

當我地學識去欣賞每一件日常小事，就會自然感受到愛。

「食飯喇。」





今日依句「食飯喇」，聽喺我耳中，已經有所不同。

我知道miki平時唔會聽得到依三個字，所以先驚覺原來我一直以係理所當然會聽到嘅「食飯喇」，已經係幸福嘅一種。