是咁的，我嘅職業係幫人瞓覺: 二百三十、驗腦結果
其實我本身無諗住同阿媽講，無論份報告係咩結果，我都諗住瞞住佢先。
不過我又真係忍唔住心入面要向佢報告嘅衝動，正如我之前所講，我同阿媽之間嘅感情實在太平淡，平淡到好多時我感覺唔到我地之間係有無愛存在。
依家難得有件事可以掉入平靜嘅湖入面，我好想睇下可以泛起幾多漣漪。
雖然毒舌賤嘴就改唔甩架喇，但講真佢一收到消息即刻打畀我依個行為，至少令我感受到佢著緊我。
無幾耐，一個姑娘喺通向檢查室嘅走廊行出嚟叫我個名，我就跟佢入去診症室。
行之前miki仲向我做咗個「加油」手勢。
講真，估唔到行嗰條走廊，直到開門入房坐喺醫生對面嘅路程係咁漫長。明明條路本身好短，我就好似行咗半個世紀先到咁。
心跳隨住我嘅腳步漸漸加速，我驚入到去醫生同我講我真係有腫瘤。
我知道驚係無用，但就係控制唔到自己標冷汗。呼吸急促，好似有人壓住個肺唔畀我抖氣咁。
「魏先生，你腦入面有個陰影。」