是咁的，我嘅職業係幫人瞓覺: 一百九十九、miki

「恕我多口問，佢係咪⋯⋯」

嘉儀知我想問咩，率先點點頭。

「嗯，已經唔喺度喇。佢同你一樣，都係叫阿金。其實講真，我地兩個唔係真係好熟，只係互相委託嘅關係。」

「互相委託？」

「我委託佢幫我寫遺書；佢委託我幫佢記錄自己嘅故事。」





寫遺書個故事我好似睇過少少，但就無為意個作者名係乜，依家咁聽起上嚟，嘉儀應該就係嗰本書嘅作者。

「你等等。」我用手機上網搵返嘉儀個筆名，確定佢就係作者。

「原來幫人寫遺書嗰個故事係你寫嘅。」

嘉儀微微一笑：「都唔完全係，我只係將金仔同我講嘅經歷記錄低啫。依樣係佢走之前拜託我做嘅事。」

「但佢點解會⋯⋯走咗？」我盡量選擇啲客觀少少嘅用字，始終講死人話題係有啲尷尬嘅。





「因為佢想救自己嘅女朋友。」

一個叫miki嘅女仔。